ಮತ್ತಾಯ 26:29 - ಕೊಡವ ಬೈಬಲ್

²⁹ ನಾನ್ ಪರಲೋಕ ರಾಜ್ಯತ್‍ಲ್ ನಿಂಗಡ ಕೂಡೆ ಪುದಿಯ ದ್ರಾಕ್ಷಿರಸತ್‍ನ ಕುಡಿಪಕತ್ತನೆ ಇಂಞು ಮಿಂಞಕ್ ಈ ದ್ರಾಕ್ಷಿರಸತ್‍ನ ಕುಡಿಪ್‌ಲೇಂದ್ ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

ಮತ್ತಾಯ 26:29 ပူးပေါင်းရင်းမြစ်များ

ಮತ್ತಾಯ 13:43

ನೀತಿವಂತಯಿಂಗ ಅಯಿಂಗಡ ಅಪ್ಪಂಡ ರಾಜ್ಯತ್‍ಲ್ ಸೂರ್ಯಂಡನೆಕೆ ಮಿನ್ನುವ. ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳಿ.

ಮತ್ತಾಯ 16:28

ಇಲ್ಲಿ ಉಳ್ಳ ಚೆನ್ನ ಜನ ಮನುಷ್ಯಕುಮಾರ ತಾಂಡ ರಾಜ್ಯತ್‍ಲ್ ಆಳುವಕಾಯಿತ್ ಬಪ್ಪದ್‍ನ ಕಾಂಬಕತ್ತನೆ ಚಾವ್‍ಲೇಂದ್ ನೇರಾಯಿತು ನಿಂಗಕ್ ಎಣ್ಣ್‌ವಿ.

ಮತ್ತಾಯ 18:20

ಎನ್ನಂಗೆಣ್ಣ್‌ಚೇಂಗಿ, ಎಲ್ಲಿ ದಂಡ್‍ಮೂಂದಾಳ್ ನಾಡ ಪೆದತ್‍ಲ್ ಕೂಡಿ ಬಪ್ಪ, ಅಲ್ಲಿ ಅಯಿಂಗಡ ಮದ್ಯತ್‍ಲ್ ನಾನ್ ಇಪ್ಪೀಂದ್ ಎಣ್ಣ್‌ಚಿ.

ಮತ್ತಾಯ 25:34

ಅಕ್ಕ ರಾಜ ತಾಂಡ ಬಲ್‌ತೆ ಬರಿಲ್ ಉಳ್ಳ ಜನಳ ನೋಟಿತ್: ನಾಡ ಅಪ್ಪಂಡ ಆಶೀರ್ವಾದ ಪಡ್ಂದಯಿಂಗಳೇ ಬಾರಿ, ಈ ಲೋಕ ಸೃಷ್ಟಿ ಆಪಕ್ ಮಿಂಞ ತಯಾರ್ ಮಾಡ್‍ನ ನಿಂಗಡ ರಾಜ್ಯತ್‍ನ ಎಡ್‌ತೊಳಿ.

ಮತ್ತಾಯ 26:28

ಇದ್, ಪಾಪಕ್ ಮನ್ನಿಪ್ ಕ್‍ಟ್ಟ್‌ವಕ್, ದುಂಬ ಜನಕಾಯಿತ್ ಬೂಕ್‌ವ ಪುದಿಯ ಒಪ್ಪಂದತ್‍ರ ನಾಡ ಚೋರೆಯಾಯಿತುಂಡ್.

ಮತ್ತಾಯ 26:30

ಪಿಂಞ ಅಯಿಂಗ ದೇವಡ ಪಾಟ್ ಪಾಡಿಯಂಡೇ ಆಲಿವ್ ಎಣ್ಣುವ ಕುಂದ್‌ಕ್ ಪೋಚಿ.

ಮತ್ತಾಯ 28:20

ನಾನ್ ನಿಂಗಕ್ ಎಂತೆಲ್ಲಾ ಆಜ್ಞೆ ಮಾಡಿತುಂಡೋ ಅದ್‍ಂಗೆಲ್ಲಾ ಬಗ್ಗಿತ್ ನಡ್‍ಪಕ್ ಈ ಪುದಿಯ ಶಿಷ್ಯಂಗಕ್ ಎಣ್ಣಿ ಕೊಡಿ. ಇದಾ, ಈ ಲೋಕತ್‍ರ ಕಡೇಕತ್ತನೆ ನಾನ್ ನಿಂಗಡ ಕೂಡೆ ಎಕ್ಕಾಲು ಇಪ್ಪೀಂದ್ ಯೇಸು ಶಿಷ್ಯಂಗಕ್ ಎಣ್ಣ್‌ಚಿ.

ಮಾರ್ಕ 14:25

ನಾನ್ ದೇವಡ ರಾಜ್ಯತ್‍ಲ್ ಪುದಿಯ ರಸತ್‌ನ ಕುಡಿಪಕತ್ತನೆ ಈ ದ್ರಾಕ್ಷಿರಸತ್‍ನ ಕುಡಿಪ್‌ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವೀಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 12:32

ನಾಡ ಶಿಷ್ಯಂಗಳೇ, ನಿಂಗ ಒಂದು ಇಲ್ಲತ ನಾಡ ಒರ್ ಚೆರಿಯ ಗುಂಪಾಯಿತ್ ಉಂಡೇಂಗಿಯು, ಬೊತ್ತತಿ, ಎನ್ನಂಗೆಣ್ಣ್‌ಚೇಂಗಿ ಅಪ್ಪನಾನ ದೇವ ಅಂವೊ ಆಳುವ ರಾಜ್ಯತ್‍ಲ್ ನಿಂಗ ಬದ್‍ಕ್‍ವಕಾಯಿತ್ ನಿಂಗಳ ಕುಶೀಲ್ ಗೊತ್ತ್ ಮಾಡಿತುಂಡ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 15:32

ಆಚೇಂಗಿ ಇಕ್ಕ ಕುಶಿಪಡ್‍ವದ್ ನ್ಯಾಯ, ಎನ್ನಂಗೆಣ್ಣ್‌ಚೇಂಗಿ ನೀಡ ತಮ್ಮಣ ಚತ್ತ್ ಪೋಯಿತ್ಂಜತ್, ಪುನಃ ಎದ್ದಿತ್ ಬಾತ್, ಅಂವೊ ಕಾಂಗತೆ ಪೋಯಿತ್ಂಜತ್, ಆಚೇಂಗಿ ಇಕ್ಕ ಕ್‍ಟ್ಟ್‌ಚೀಂದ್ ಅಂವೊಂಡ ಅಪ್ಪ ಎಣ್ಣ್‌ಚಿ.

ಯೋಹಾನ 15:11

ನಾಡ ಕುಶಿ ನಿಂಗಡಲ್ಲಿ ಎಕ್ಕಾಲು ಇರಂಡೂಂದು, ನಿಂಗಡ ಕುಶಿ ಪೂರ್ತಿಯಾಯಿತ್ ಇರಂಡೂಂದ್ ಇದ್‍ನೆಲ್ಲಾ ನಾನ್ ನಿಂಗಕ್ ಎಣ್ಣಿಯೆ.

ಯೋಹಾನ 16:22

ಅನ್ನನೆ, ನಿಂಗ ಇಕ್ಕ ಬೇಜಾರತ್‍ಲ್ ಉಳ್ಳಿರ, ಚೆನ್ನ ಕಾಲ ಆನ ಪಿಂಞ ನಾನ್ ಪುನಃ ನಿಂಗಳ ಕಾಂಬಿ. ಅಕ್ಕ ನಿಂಗಡ ಹೃದಯ ಸಂತೋಷತ್‌ಲ್ ದುಂಬುವ, ಆ ಸಂತೋಷತ್‌ನ ನಿಂಗಡಯಿಂಜ ದಾರ್‌ಕು ಎಡ್‍ಪಕ್ ಕಯ್ಯುಲೆ.

ಯೋಹಾನ 17:13

ಆಚೇಂಗಿ ಇಕ್ಕ ನಾನ್ ನೀಡ ಪಕ್ಕ ಬಂದಂಡುಂಡ್; ನಾಡ ಕುಶಿ ಪೂರ್ತಿಯಾಯಿತ್ ಅಯಿಂಗಡಲ್ಲಿ ಇಪ್ಪಕಾಯಿತ್ ನಾನ್ ಅಯಿಂಗಡ ಕೂಡೆ ಇಪ್ಪಕಲೆ ಇನ್ನನೆ ನಾನ್ ಎಣ್ಣಿಯಂಡುಳ್ಳ.

ಅಪೊಸ್ತಲ 10:41

ಆಚೇಂಗಿ, ಎಲ್ಲಾರು ಅಂವೊನ ಕಾಂಬನೆಕೆ ಮಾಡತೆ, ಯೇಸು ಚತ್ತಯಿಂಗ ಮದ್ಯತ್ಂಜ ಜೀವವಾಯಿತ್ ಬಂದ ಪಿಂಞ, ಅಂವೊಂಡ ಕೂಡೆ ಉಂಡಯಿಂಗಳು, ಕುಡಿಚಯಿಂಗಳು ಪಿಂಞ ಮಿಂಞಲೇ ಆಯ್ಕೆ ಮಾಡಿತ್ಂಜ ಸಾಕ್ಷಿಯಂಗಳಾನ ನಂಗಕ್ ಪ್ರತ್ಯಕ್ಷ ಆಯಿತ್ ನಂಗ ಕಾಂಬನೆಕೆ ಮಾಡ್‍ಚಿ.

ಇಬ್ರಿಯ 12:2

ನಂಬಿಕೇನ ಸುರು ಮಾಡ್‌ವ ನಾಯಕನು ಅದ್‍ನ ಪೂರ್ತಿಮಾಡ್‍ವಂವೊನು ಆಯಿತುಳ್ಳ ಯೇಸುರ ಮೇಲೆ ಕಣ್ಣ್‌ಟ್ಟಿತ್, ನಂಗಕಾಯಿತ್ ಬೆಚ್ಚಿತುಳ್ಳ ಓಟತ್‍ನ ಪೊರುಮೇಲ್ ಓಡೋಣ. ಎನ್ನಂಗೆಣ್ಣ್‌ಚೇಂಗಿ ಯೇಸು, ತಾಂಡ ಮಿಂಞ ಬೆಚ್ಚಿತ್ಂಜ ಕುಶಿಕಾಯಿತ್, ಅವಮಾನತ್‍ನ ಗೇನ ಮಾಡತೆ, ಶಿಲುಬೇನ ಸಹಿಸಿಯಂಡ್ ದೇವಡ ಸಿಂಹಾಸನತ್‍ರ ಬಲ್‌ತೆ ಬರಿಲ್ ಅಳ್‌ತತ್.

ಪ್ರಕಟನೆ 14:3

ಅಯಿಂಗ, ಸಿಂಹಾಸನತ್‍ರ ಮಿಂಞತ್‍ಲ್, ನಾಲ್ ಜೀವಿಯಡ ಮಿಂಞತ್‍ಲ್, ಪೆರಿಯಯಿಂಗಡ ಮಿಂಞತ್‍ಲ್ ಪುದಿಯ ಪಾಟ್‍ನ ಪಾಡ್‌ಚಿ. ಬೂಲೋಕತ್ಂಜ ವಿಮೋಚನ ಕ್‍ಟ್ಟಿತ್ ಬಂದ 1,44,000 ಜನಳ ಬುಟ್ಟಿತ್ ಆ ಪಾಟ್‍ನ ಬೋರೆ ದಾರೂ ಪಡಿಪಕ್ ಕಯ್ಯುವಕಿಂಜಿಲೆ.

ಪ್ರಕಟನೆ 7:17

ಸಿಂಹಾಸನತ್‍ರ ಮದ್ಯತ್‍ಲ್ ಉಳ್ಳ ಕೊರಿಕುಟ್ಟಯಾನಂವೊನೇ ಈಂಗಳ ಚಾಕಿತ್, ಅಯಿಂಗಳ ಜೀವತ್‍ರ ಜಲ ಉಕ್ಕಿ ಬಪ್ಪ ಜಾಗಕ್ ಕಾಕಿಯಂಡ್ ಪೋಪ; ದೇವ ತಾನೆ ಅಯಿಂಗಡ ಕಣ್ಣ್‌ಂಜ ಕಣ್ಣೀರ್‌ನೆಲ್ಲಾ ತ್‍ೕಟ್‍ವಾಂದ್ ಎಣ್ಣ್‌ಚಿ.