ಮತ್ತಾಯ 12:32 - ಕೊಡವ ಬೈಬಲ್

³² ಆನಗುಂಡ್, ಮನುಷ್ಯಕುಮಾರಂಗ್ ವಿರೋದವಾಯಿತ್ ತಕ್ಕ್ ಪರಿಯುವಂಗಕ್ ಮನ್ನಿಪ್ ಕ್‍ಟ್ಟ್‌ವ, ಆಚೇಂಗಿ ಪವಿತ್ರಾತ್ಮಂಗ್ ವಿರೋದವಾಯಿತ್ ತಕ್ಕ್ ಪರಿಯುವಂಗಕ್, ಈ ಲೋಕತ್‌ಲು ಪರಲೋಕತ್‌ಲು ಮನ್ನಿಪ್ ಕ್‍ಟ್ಟ್‌ಲೆ.

ಮತ್ತಾಯ 12:32 ပူးပေါင်းရင်းမြစ်များ

ಮತ್ತಾಯ 11:19

ಮನುಷ್ಯಕುಮಾರ ತಿಂದಂಡ್ ಕುಡಿಚಂಡಿಂಜತ್, ಅದ್ಂಗ್ ಅಯಿಂಗ: ಅಂವೊ ತೀನಿಮಾರಿಯು, ಕುಡ್‌ಕನು, ಕಂದಾಯ ಎಡ್‌ಪಯಿಂಗಡ ಪಿಂಞ ಸಮಾಜ ಪಾಪಿಯಂಗಾಂದ್ ಎಣ್ಣುವ ಜನಡ ಸ್ನೇಹಿತಾಂದ್ ಎಣ್ಣ್‌ಚಿ. ಆಚೇಂಗಿ, ದೇವಡ ಜ್ಞಾನ, ಅಂವೊನ ನಂಬುವಯಿಂಗ ಮಾಡ್‌ವ ಕ್ರಿಯೆರ ಮೂಲಕ ಸತ್ಯವಾಪಾಂದ್ ಯೇಸು ಎಣ್ಣ್‌ಚಿ.

ಮತ್ತಾಯ 12:31

ಆನಗುಂಡ್, ನಾನ್ ನಿಂಗಕ್ ಎಣ್ಣ್‌ವಿ: ಮನುಷ್ಯ ಮಾಡ್‌ವ ಎಲ್ಲಾ ಪಾಪಕು, ದೂಷಣೆಕು ಮನ್ನಿಪ್ಪ್ ಉಂಡ್, ಆಚೇಂಗಿ ಪವಿತ್ರಾತ್ಮಕ್ ವಿರೋದವಾಯಿತ್ ಮಾಡ್‌ವ ದೂಷಣೆಕ್ ಮನ್ನಿಪ್ ಕ್‍ಟ್ಟುಲೆ.

ಮತ್ತಾಯ 12:8

ಮನುಷ್ಯಕುಮಾರ ಸಬ್ಬತ್ ದಿವಸಕೂ ಒಡೆಯನಾಯಿತುಂಡ್‍ೕಂದ್ ಎಣ್ಣ್‌ಚಿ.

ಮತ್ತಾಯ 13:22

ಮುಳ್ಳ್‌ರ ಪೊದೆಲ್ ಬುದ್ದ ಕುರು ಎನ್ನನೇಂದ್ ಎಣ್ಣ್‌ಚೇಂಗಿ, ಅಯಿಂಗ ದೇವಡ ವಾಕ್ಯತ್‍ನ ಕ್‍ೕಪ. ಆಚೇಂಗಿ ಈ ಬದ್‍ಕ್‍ರ ವಿಷಯತ್ ಬೇಜಾರ್ ಮಾಡಿಯಂಡ್, ಪಣತ್‍ರ ಮೇಲೆ ಉಳ್ಳ ಆಸೆರಗುಂಡ್, ಇದೆಲ್ಲ, ಅಯಿಂಗ ಕ್‍ೕಟ ದೇವಡ ವಾಕ್ಯತ್‍ನ ನೆರ್‌ಕಿತ್, ಅಯಿಂಗ ಫಲ ಕೊಡ್‍ಕತೆ ಪೋಪ.

ಮತ್ತಾಯ 13:39

ಅದ್‍ನ ಬಿತ್ತುವ ವಿರೋದಿ ಸೈತಾನ. ಕೊಯ್ಯುವ ಕಾಲ ಎಣ್ಣ್‌ವದ್ ಈ ಲೋಕತ್‍ರ ಕಡೆ ಕಾಲ. ಕೊಯಿಪಣಿ ಮಾಡ್‌ವಯಿಂಗ ದೇವದೂತಂಗ.

ಮತ್ತಾಯ 13:40

ಕಚಡತ್‍ನ ಕೂಟಿತ್ ಚುಡ್‍ವನೆಕೆ, ಈ ಲೋಕತ್‍ರ ಅಂತ್ಯ ಇಪ್ಪ.

ಮತ್ತಾಯ 13:55

ಇಂವೊ ಒರ್ ಆಚಾರಿರ ಮೋಂವೊನಲ್ಲ? ಇಂವೊಂಡ ಅವ್ವ ಮರಿಯ ಅಲ್ಲ? ಯಾಕೋಬ, ಯೋಸೇಫ, ಸೀಮೋನ, ಯೂದ ಈಂಗ ಇಂವೊಂಡ ತಮ್ಮಣಂಗಲ್ಲ?

ಮತ್ತಾಯ 8:20

ಅದ್ಂಗ್ ಯೇಸು: ಕುರ್‌ಕಂಗ ವಾಸ ಮಾಡ್‌ವಕ್ ತೂತ ಉಂಡ್, ಬಾನತ್‍ರ ಪಕ್ಷಿಯಕ್ ಗೂಡ್ ಉಂಡ್, ಆಚೇಂಗಿ ಮನುಷ್ಯಕುಮಾರಂಗ್ ಮಂಡೆ ಬೆಪ್ಪಕ್ ಜಾಗ ಇಲ್ಲೇಂದ್ ಎಣ್ಣ್‌ಚಿ.

ಮಾರ್ಕ 10:30

ಈ ಬದ್‌ಕ್‌ಲೇ, ದೇವಡ ವಿಷಯಕಾಯಿತ್ ಕಷ್ಟತ್‍ರ ಕೂಡೆ ಅಂವೊಂಗ್ ನೂರ್‌ರಚ್ಚಕ್ ಜಾಸ್ತಿ ಮನೆಮಠ, ಅಣ್ಣತಮ್ಮಣಂಗ, ಅಕ್ಕತಂಗೆಯ, ಅಪ್ಪವ್ವ, ಮಕ್ಕ, ತೋಟ ಬೇಲ್ ಎಲ್ಲಾ ಕ್‍ಟ್ಟುವ ಪಿಂಞ ಮಿಂಞತ್‍ರ ಲೋಕತ್‍ಲ್ ನಿತ್ಯ ಜೀವವು ಕ್‍ಟ್ಟ್‌ವಾಂದ್ ಎಣ್ಣ್‌ಚಿ.

ಮಾರ್ಕ 3:28

ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ: ಮನುಷ್ಯಂಗ ಮಾಡ್‌ವ ಏದ್ ಪಾಪಕು ಪಿಂಞ ಅಯಿಂಗ ಪರಿಯುವ ದೇವದೂಷಣೆಕು ಮನ್ನಿಪ್ ಕ್‍ಟ್ಟ್‌ವ.

ಮಾರ್ಕ 3:29

ಆಚೇಂಗಿ ದಾರ್ ಪವಿತ್ರಾತ್ಮಂಡ ಮೇಲೆ ದೂಷಣೆ ಪರಿಯುವ ಅಯಿಂಗಕ್ ಮನ್ನಿಪ್ ಕ್‍ಟ್ಟ್‌ಲೆ. ಎನ್ನಂಗೆಣ್ಣ್‌ಚೇಂಗಿ ಇದ್ ನಿತ್ಯ ಪಾಪ, ಆನಗುಂಡ್ ನಿತ್ಯ ಕಂಡನೆಕ್ ಒಳಪಡ್‌ವ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 12:10

ದಾರಾಚೇಂಗಿಯು ಮನುಷ್ಯಕುಮಾರಂಗ್ ವಿರೋದವಾಯಿತ್ ದೂಷಣೆ ಪರ್ಂದತೇಂಗಿ ಅಯಿಂಗಕ್ ಮನ್ನಿಪ್ಪ್ ಕ್‍ಟ್ಟ್‌ವಕ್ ಸಾದ್ಯತೆ ಉಂಡ್, ಆಚೇಂಗಿ ಪವಿತ್ರಾತ್ಮಂಗ್ ವಿರೋದವಾಯಿತ್ ಕೆಟ್ಟ ತಕ್ಕ್ ಪರಿಯುವಂಗಕ್ ಮನ್ನಿಪ್ಪ್ ಕ್‍ಟ್ಟುಲೆ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 16:8

ಅನ್ಯಾಯ ಮಾಡ್‌ವ ಈ ಅದಿಕಾರಿರ ಎಜಮಾನ ಇದ್‍ನೆಲ್ಲಾ ಕ್‍ೕಪಂಜಿ, ಅಂವೊಂಡ ಬುದ್ದಿನ ಕಂಡಿತ್, ಬೋರೆ ಬಟ್ಟೆಯಿಲ್ಲತೆ ಅಂವೊನ ಹೊಗಳ್‍ಚಿ. ಮಿಂಞತ್‍ರ ಬದ್‍ಕ್‍ಕ್ ಬೋಂಡಿಯಾನದ್‍ನ ಉಳಿಕೆ ಮಾಡಿತ್ ಬೆಪ್ಪಕ್, ಬೊಳ್‍ಚತ್‍ರ ಮಕ್ಕಕಿಂಜ, ಈ ಲೋಕತ್‍ನ ಮಾತ್ರ ಗೇನಮಡಿಯಂಡುಳ್ಳ ಮಕ್ಕ ಬಾರಿ ಬುದ್ದಿವಂತಯಿಂಗಳಾಯಿತುಂಡ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 23:34

ಅಕ್ಕ ಯೇಸು: ಅಪ್ಪ, ಈಂಗಳ ಮನ್ನಿಚಿಡ್, ಈಂಗ ಎಂತ ಮಾಡಿಯಂಡುಂಡ್‍ೕಂದ್ ಅಯಿಂಗಕ್ ಗೊತ್ತ್‌ಲ್ಲೇಂದ್ ಎಣ್ಣ್‌ಚಿ. ಸಿಪಾಯಿಯಂಗ ಯೇಸುರ ಬಟ್ಟೇನ ಬಾಗ ಮಾಡಿತ್, ಚೀಟಿ ಇಟ್ಟಿತ್, ಬಟ್ಟೇನ ಎಡ್‍ತಂಡತ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 7:34

ಮನುಷ್ಯಕುಮಾರ ತಿಂದಂಡ್ ಕುಡಿಚಂಡಿಂಜತ್, ಅದ್ಂಗ್ ನಿಂಗ: ಅಂವೊ ತೀನಿಮಾರಿಯು, ಕುಡುಕನು, ಕಂದಾಯ ಎಡ್‌ಪಯಿಂಗಡ ಪಿಂಞ ಸಮಾಜ ಪಾಪಿಯಂಗಾಂದ್ ಎಣ್ಣುವ ಜನಡ ಸ್ನೇಹಿತಾಂದ್ ಎಣ್ಣಿರ.

ಯೋಹಾನ 7:12

ಯೇಸುರ ವಿಷಯತ್‍ಲ್ ಜನಾಂಗ ಗೊಣಗಿಯಂಡ್ ಇಂಜತ್. ಚೆನ್ನ ಜನ: ಅಂವೊ ನಲ್ಲಂವೋಂದ್ ಎಣ್ಣ್‌ಚಿ; ಚೆನ್ನ ಜನ: ಅನ್ನನೆ ಅಲ್ಲ, ಅಂವೊ ಜನಳ ಮೋಸಮಾಡಿಯಂಡುಂಡ್‍ೕಂದ್ ಎಣ್ಣಿಯಂಡಿಂಜತ್.

ಯೋಹಾನ 7:39

ಅಂವೊಂಡ ಮೇಲೆ ನಂಬಿಕೆ ಇಡ್‌ವ ಜನಕ್ ಕ್‍ಟ್ಟುವ ಪವಿತ್ರಾತ್ಮಂಡ ವಿಷಯತ್ ಯೇಸು ಇನ್ನನೆ ಎಣ್ಣ್‌ಚಿ. ಯೇಸು ಇಂಞು ಕೊಡಿಕ್ ಪೋಯಿತ್ ಮಹಿಮೆ ಪಡತೆ ಇಂಜಗುಂಡ್, ಪವಿತ್ರಾತ್ಮನ ಇಲ್ಲಿಕತ್ತನೆ ಕೊಡ್‍ತಿತ್‌ಲ್ಲೆ.

ಯೋಹಾನ 7:52

ಅಕ್ಕ ಅಯಿಂಗ: ನೀನ್ ಸಹ ಗಲಿಲಾಯತ್ಂಜ ಬಂದಂವೊನಾ? ಗಲಿಲಾಯತ್ಂಜ ಒರ್ ಪ್ರವಾದಿಯು ಬಪ್ಪ್‌ಲೇಂದ್ ದೇವಡ ಪುಸ್ತಕತ್‍ಲ್ ಚಾಯಿ ನೋಟ್‍ೕಂದ್ ಎಣ್ಣ್‌ಚಿ.

ಅಪೊಸ್ತಲ 3:19

ಆನಗುಂಡ್, ನಿಂಗಡ ಪಾಪವೆಲ್ಲ ಅಳಸಿ ಪೋಪಕಾಯಿತ್ ಪಶ್ಚಾತಾಪ ಪಟ್ಟಿತ್, ನಿಂಗ ದೇವಡ ಪಕ್ಕ ತಿರಿಗಿ. ಪಿಂಞ ಒಡೆಯಂಡಿಂಜ, ನಿಂಗಕ್ ಆರಾಮ್‍ರ ಕಾಲ ಕ್‍ಟ್ಟ್‌ವನೆಕೆ ಮಾಡ್‌ವ.

ಎಫೆಸ 1:21

ಅಂವೊನ ಪರಲೋಕತ್‍ಲ್ ತಾಂಡ ಬಲ್‌ತೆ ಬರಿಲ್ ಅಳ್‌ಪಕ್ ಮಾಡ್‍ಚಿ.

1 ತಿಮೊಥೆಯ 1:13

ಮಿಂಞ, ನಾನ್ ಅಂವೊನ ಎಚ್ಚಕೋ ದೇವ ದೂಷಣೆ ಮಾಡಿತ್, ಅಂವೊಂಡ ಜನಳ ಹಿಂಸೆ ಮಾಡಿತ್, ಕ್ರೂರವಾಯಿತ್ ಇಂಜ. ಆಚೇಂಗಿಯು, ನಾಕ್ ಅಂವೊಂಡ ಮೇಲೆ ನಂಬಿಕೆ ಇಲ್ಲತೆ, ಗೊತ್ತಿಲ್ಲತೆ ಇನ್ನನೆ ಮಾಡ್‌ನಾಂಗ್ ಯೇಸು ಕ್ರಿಸ್ತ ನಾಡ ಮೇಲೆ ಕನಿಕರ ಕಾಟ್‍ಚಿ.

1 ತಿಮೊಥೆಯ 1:15

ಪಾಪಿಯಳ ರಕ್ಷಣೆ ಮಾಡ್‌ವಕ್ ಯೇಸು ಬೂಲೋಕಕ್ ಬಾತ್. ಇದ್ ನೇರಾನ ತಕ್ಕ್ ಪಿಂಞ ಎಲ್ಲಾ ಅಂಗಿಕಾರಕೂ ಯೋಗ್ಯವುಳ್ಳದ್; ಎಲ್ಲಾ ಪಾಪಿಯಂಗಕಿಂಜ ಮುಕ್ಯಪಟ್ಟ ಪಾಪಿ ನಾನೇ.

1 ತಿಮೊಥೆಯ 4:8

ತಡೀರ ವ್ಯಯಾಮ ಮಾಡ್‍ವದ್ ನಲ್ಲದ್, ಆಚೇಂಗಿ ಆತ್ಮೀಯ ವ್ಯಯಾಮ ಎಲ್ಲಾಕಿಂಜ ಮೇಲಾನದ್, ಇಕ್ಕತ್‍ರ ಬದ್‍ಕ್‍ಕ್ ಪಿಂಞ ಬಪ್ಪಕುಳ್ಳ ಬದ್‍ಕ್‍ಕ್ ಅದ್ ಪ್ರಯೋಜನ ಆಪ.

1 ತಿಮೊಥೆಯ 6:17

ಈ ಲೋಕತ್‍ಲ್ ಐಶ್ವರ್ಯತ್‍ಲ್ ಉಳ್ಳಯಿಂಗ ಗರ್ವತ್‍ಲ್ ಇಕ್ಕತನೆಕೆ ಪಿಂಞ ಸ್ತಿರಯಿಲ್ಲತ ಅಯಿಂಗಡ ಐಶ್ವರ್ಯತ್‍ರ ಮೇಲೆ ನಂಬಿಕೆ ಬೆಕ್ಕತನೆಕೆ ಅಯಿಂಗಕ್ ಆಜ್ಞೆ ಮಾಡ್. ಅದ್ಂಡ ಬದ್‍ಲ್, ನಂಗ ಅನುಬವಿಚಿಡ್‍ವಕ್, ಎಲ್ಲಾ ನಲ್ಲದ್‍ನ ನಂಗಕ್ ಪೂರ್ತಿಲ್ ಕೊಡ್‍ಪ ಜೀವವುಳ್ಳ ದೇವಡ ಮೇಲೆ ನಂಬಿಕೆ ಬೆಪ್ಪಕ್ ಎಚ್ಚರ ಮಾಡ್.

2 ತಿಮೊಥೆಯ 4:10

ಎನ್ನಂಗೆಣ್ಣ್‌ಚೇಂಗಿ ಈ ಲೋಕತ್‍ರ ಮೇಲೆ ಉಳ್ಳ ಆಸೆರಗುಂಡ್ ದೇಮ ನನ್ನ ಬುಟ್ಟಿತ್ ಥೆಸಲೊನೀಕ ಪಟ್ಟಣಕ್ ಪೋಯಿರ್‌ತ್. ಕ್ರೆಸ್ಕ, ಗಲಾತ್ಯಕ್ ಪಿಂಞ ತೀತ, ದಲ್ಮಾತ್ಯಕ್ ಪೋಯಿರ್‌ತ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2:12

ಆನಗುಂಡ್ ಈ ಕೃಪೆ ದೇವಡ ಮೇಲೆ ಬಕ್ತಿಲ್ ಬದ್‍ಕ್‍ವಕ್ ಪಿಂಞ ಈ ಲೋಕತ್‍ರ ಮೇಲೆ ಉಳ್ಳ ಆಸೇನ ಬುಟ್ಟಿತ್ ಬದ್‍ಕ್‍ವಕ್ ನಂಗಕ್ ಎಣ್ಣಿ ಕೊಡ್‍ಪ. ಪಾಪ ದುಂಬ್‍ನ ಈ ಲೋಕತ್‍ಲ್, ನಂಗ ಜ್ಞಾನ ಉಳ್ಳಯಿಂಗಳಾಯಿತ್, ನೀತಿ ಉಳ್ಳಯಿಂಗಳಾಯಿತ್ ದೇವಡ ಮೇಲೆ ಬಕ್ತಿ ಉಳ್ಳಯಿಂಗಳಾಯಿತ್ ಬದ್‍ಕ್‍ವಕ್ ಸಹಾಯ ಮಾಡ್‌ವ.

ಯಾಕೋಬ 1:27

ತಬ್ಬಲಿ ಮಕ್ಕ ಪಿಂಞ ವಿದವೆಯಿಂಗಡ ಕಷ್ಟತ್‍ಲ್ ಸಹಾಯ ಮಾಡ್‍ವದ್ ಪಿಂಞ ಈ ಲೋಕತ್‍ರ ಪಾಪ ಅಂವೊನ ದೋಷ ಮಾಡತನೆಕೆ ಕಾಪಾಡಿಯಂಡ್ ಬದ್‍ಕ್‍ವದ್ ಇನ್ನತಾನ ವಿಷಯವೇ, ಅಪ್ಪನಾನ ದೇವಡ ಮಿಂಞತ್ ಶುದ್ದವಾನ ಕಳಂಗ ಇಲ್ಲತ ಬಕ್ತಿಯಾಯಿತ್‌ಪ್ಪ.