ಮಲಾಕಿ 4:2 - ಕೊಡವ ಬೈಬಲ್

² ಆಚೇಂಗಿ, ನಾಡ ಪೆದಕ್‌ ಬೊತ್ತುವ ನಿಂಗಡ ಮೇಲೆ ನೀತಿರ ಸೂರ್ಯ ಉದಿಪ. ಅದ್‌ಂಡ ರೆಕ್ಕೆರ ಅಡಿಲ್‌ ಆರೋಗ್ಯ ಇಪ್ಪ. ನಿಂಗ ಕೊಟ್ಟ್‌ಯಿಂಜ ಪೊರ್ಮೆ ಪೋನ ಕಡಚಿಯರನೆಕೆ ಕುಶೀಲ್‌ ತುಳ್ಳಿಯಂಡಿಪ್ಪಿರ

ಮಲಾಕಿ 4:2 ပူးပေါင်းရင်းမြစ်များ

ಜ್ಞಾನತ್‌ರ ಪಡಿಮ 4:18

ನೀತಿವಂತಂಯಿಂಗಡ ಬಟ್ಟೆ ಪೊಲಾಕತ್‌ರ ಬೊಳೀರನೆಕೆ ಇಪ್ಪ, ಅದ್‌ ಎನ್ನನೆ ಎಣ್ಣ್‌ಚೇಂಗಿ ಮಜ್ಜಣತ್‌ರ ಬೊಳಿ ಪ್ರಕಾಶ ಆಯಂಡೇ ಇಪ್ಪನೆಕೆ ಜಾಸ್ತಿ ಆಯಿತ್‌ ಇಪ್ಪ.

ಮಲಾಕಿ 3:16

ಅಕ್ಕ ಯೆಹೋವಂಗ್‌ ಬತ್ತ್‌ತವಯಿಂಗ ಅಯಿಂಗಯಿಂಗಳೇ ತಕ್ಕ್‌ ಪರಿಯುವ. ಒಡಯನಾನ ಯೆಹೊವ ಎಚ್ಚರತ್‌ಲ್‌ ಕ್‍ೕಪ; ಯೆಹೋವಂಗ್‌ ಬೊತ್ತ್‌ವಯಿಂಗಕಾಯಿತು, ಒಡಯನಾನ ಯೆಹೋವಡ ಪೆದತ್‌ನ ಗನಪಡ್‌ತ್‌ವಯಿಂಗಕಾಯಿತು ಅಂವೊಂಡ ಮಿಂಞತ್‌ ಒರ್‌ ಞಾಪಕ ಪುಸ್ತಕ ಒಳದಿ ಬೆಚ್ಚಿತುಂಡ್.

ಮತ್ತಾಯ 11:5

ಕುರ್‌ಡಂಗ ಕಂಡಂಡುಂಡ್, ಕುಂಟಂಗ ನಡ್ಂದಂಡುಂಡ್, ಕುಷ್ಟರೋಗಿಯಂಗ ವಾಸಿ ಆಯಂಡುಂಡ್, ಕಿವ್‍ಡಂಗ್ ಕ್‍ೕಟಂಡು, ಚತ್ತಯಿಂಗ ಎದ್ದಡುಂಡ್, ಗರೀಬಂಗಕ್ ನಲ್ಲ ಸುದ್ದಿ ಪ್ರಚಾರ ಆಯಂಡುಂಡ್.

ಮತ್ತಾಯ 23:37

ಓ ಯೆರೂಸಲೇಮೇ, ಯೆರೂಸಲೇಮೇ, ಪ್ರವಾದಿಯಂಗಳ ಕೊಂದಿತ್ ದೇವ ಅಯಿಚ ಜನಳ ಕಲ್ಲ್ ಕನ್‍ಚಿತ್ ಕೊಲ್ಲುವ ಜನಳೇ, ಕೋಳಿ ತಾಂಡ ಕುಂಞಿಯಳ ರೆಕ್ಕೆರ ಒಳ್‍ಕ್ ಕೂಟಿಯಂಡ್ ಇಪ್ಪನೆಕೆ, ನೀಡ ಮಕ್ಕಳ ನಾನ್ ಸಹ ಕೂಟಿತ್ ರಕ್ಷಣೆ ಮಾಡ್‌ವಕ್ ಎಚ್ಚಕೋ ಕುರಿ ನಾಕ್ ಮನಸ್ಸ್ ಇಂಜತ್, ಆಚೇಂಗಿ ನಿಂಗಕ್ ನಾನ್ ಅನ್ನನೆ ಮಾಡ್‍ವದ್ ಕುಶಿಯಿಲ್ಲೆ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 1:50

ಅಂವೊಂಗ್ ಬೊತ್ತಿಯಂಡ್ ನಡ್‍ಪಯಿಂಗಕ್ ಒರ್ ಸಂತಾನತ್ಂಜ ಇಂಞೊರ್ ಸಂತಾನಕ್ ಕನಿಕರ ಕಾಟುವ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 1:78

ನಂಗಡ ದೇವಡ ಹೃದಯ ಕರುಣೇಲ್ ದುಂಬಿತುಳ್ಳಗುಂಡ್, ಪೊಲಾಕತ್‍ರ ಸೂರ್ಯನ ಪರಲೋಕತ್ಂಜ ನಂಗಡ ಮೇಲೆ ಇಳಿಂಜಿತ್ ಬಪ್ಪನೆಕೆ ಅಂವೊ ಮಾಡ್‌ವ.

ಯೋಹಾನ 1:14

ಈ ತಕ್ಕಾಯಿತ್‌ಂಜಂವೊ ಮನುಷ್ಯಂಡ ರೂಪತ್‌ಲ್ ಬಂದಿತ್, ಕೃಪೆಯಿಂಜಲು, ಸತ್ಯತ್ಂಜಲು ದುಂಬ್‍ನಂವೊನಾಯಿತ್ ನಂಗಡ ಮದ್ಯತ್‍ಲ್ ವಾಸ ಮಾಡಿಯಂಡ್ ಇಂಜತ್. ಅಪ್ಪನಾನ ದೇವಡ ಒರೇ ಮೋಂವೊಂಡ ಮಹಿಮೇಕ್ ತಕ್ಕಂತ ಮಹಿಮೇರೆನೆಕೆ ನಂಗ ಅಂವೊಂಡ ಮಹಿಮೆನ ಕಂಡತ್.

ಯೋಹಾನ 1:4

ಅಂವೊಂಡಲ್ಲಿ ಜೀವ ಇಂಜತ್. ಆ ಜೀವ ಮನುಷ್ಯಂಗಕ್ ಬೊಳಿಯಾಯಿತ್ಂಜತ್.

ಯೋಹಾನ 1:8

ಯೋಹಾನ ಆ ಬೊಳಿ ಅಲ್ಲ, ಆಚೇಂಗಿ ಅಂವೊ ಆ ಬೊಳಿರ ವಿಷಯತ್ ಸಾಕ್ಷಿ ಕೊಡ್‍ಪಕ್ ಬಂದಂವೊನಾಯಿತ್ಂಜತ್.

ಯೋಹಾನ 12:40

ದೇವ, ಅಯಿಂಗಡ ಕಣ್ಣ್ ಕಾಂಗತನೆಕೆ ಮಾಡ್‍ನಗುಂಡ್ ಅಯಿಂಗ ಕಾಂಬುಲೆ, ದೇವ ಅಯಿಂಗಡ ಹೃದಯತ್‍ನ ಕಲ್ಲ್‌ರನೆಕೆ ಮಾಡ್‍ನಗುಂಡ್ ಅಯಿಂಗಕ್ ಅರ್ಥ ಆಪುಲೆ. ಅಯಿಂಗಡ ಮನಸ್ಸ್‌ನ ತಿರಿಗಿತ್ ದೇವಡ ಪಕ್ಕ ಬರತನೆಕೆ, ದೇವ ಅಯಿಂಗಳ ವಾಸಿ ಮಾಡತನೆಕೆ ಮಾಡಿರ್‌ತ್. ಅದ್ಂಗಾಯಿತೇ ಅಯಿಂಗ ನಂಬುಲೇಂದ್ ಎಣ್ಣ್‌ಚಿ.

ಯೋಹಾನ 8:12

ಯೇಸು ಜನಳ ನೋಟಿತ್: ನಾನ್ ಲೋಕಕ್ ಬೊಳಿಯಾಯಿತ್ ಉಂಡ್, ದಾರ್ ನಾಡ ಬಯ್ಯಕ್ ಬಪ್ಪ, ಅಯಿಂಗ ಇರ್‌ಟ್‌ಲ್ ನಡ್‍ಪ್‍ಲೆ, ಆಚೇಂಗಿ ಜೀವ ತಪ್ಪ ಬೊಳಿಲ್ ನಡ್‌ಪಾಂದ್ ಎಣ್ಣ್‌ಚಿ.

ಯೋಹಾನ 9:4

ಸಮಯ ಇಪ್ಪಕತ್ತನೆ, ನನ್ನ ಅಯಿಚಂವೊ ನಾನ್ ಮಾಡಂಡೂಂದ್ ಬೆಚ್ಚಿತುಳ್ಳ ಕ್ರಿಯೇನ ಮಾಡಂಡು; ಬಯಿಟ್ ಬಂದಂಡುಂಡ್, ಅಕ್ಕ ಒಬ್ಬಂಗು ಕ್ರಿಯೆ ಮಾಡ್‌ವಕ್ ಕಯ್ಯುಲೆ.

ಅಪೊಸ್ತಲ 13:26

ಅಣ್ಣತಮ್ಮಣಂಗಳೇ, ಅಬ್ರಹಾಮಂಡ ಸಂತಾನಕಾರಳೇ, ದೇವನ ಆರಾದನೆ ಮಾಡ್‌ವ ಯೆಹೂದ್ಯ ಅಲ್ಲತ ಜನಳೇ, ಈ ರಕ್ಷಣೆರ ಬೋದನೆನ ನಂಗಕಾಯಿತೇ ಅಯಿಚತ್.

ಅಪೊಸ್ತಲ 13:47

ನೀನ್ ಲೋಕತ್‍ರ ಕಡೇಕತ್ತನೆ ರಕ್ಷಕನಾಯಿತ್ ಇಪ್ಪಕ್ ನಿನ್ನ ನಾನ್ ಯೆಹೂದ್ಯ ಅಲ್ಲತಯಿಂಗಕ್ ಬೊಳಿಯಾಯಿತ್ ನೇಮಿಚಿಟ್ಟಿಯೇಂದ್ ಒಡೆಯ ನಂಗಕ್ ಅಪ್ಪಣೆ ಕೊಡ್‍ತಿತುಳ್ಳಗುಂಡ್ ನಂಗ ಇನ್ನನೆ ಮಾಡ್‌ವಾಂದ್ ಎಣ್ಣ್‌ಚಿ.

ಅಪೊಸ್ತಲ 26:18

ಅಯಿಂಗ ನಾಡ ಮೇಲೆ ಇಡ್‌ವ ನಂಬಿಕೇರಗುಂಡ್, ಅಯಿಂಗಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟಿತ್, ಅಂವೊಂಗಾಯಿತ್ ಬೋರೆ ಮಾಡಿತ್ ಪವಿತ್ರ ಮಾಡ್‍ನ ಜನಕ್ ಕ್‍ಟ್ಟುವ ಬಾದ್ಯತೆನ ಪಡೆಯುವನೆಕೆ, ಅಯಿಂಗ ಇರ್‍ಟಿಂಜ ಬೊಳಿಕು, ಸೈತಾನಂಡ ಅದಿಕಾರತ್ಂಜ ದೇವಡ ಕಡೇಕು ತಿರಿತ್ ಅಯಿಂಗಡ ಕಣ್ಣ್ ತೊರಕಂಡೂಂದ್ ನಿನ್ನ ನಾನ್ ಅಯಿಂಗಡ ಪಕ್ಕ ಅಯಿಪೀಂದ್ ಎಣ್ಣ್‌ಚಿ.

2 ಥೆಸಲೊನೀಕ 1:3

ನಂಗಡ ಅಣ್ಣತಮ್ಮಣಂಗಳೇ, ನಿಂಗಕಾಯಿತ್ ನಂಗ ಎಕ್ಕಾಲು ದೇವಕ್ ವಂದನೆ ಎಣ್ಣುವಕ್ ಜವಾಬ್ದಾರಂಗಳಾಯಿತ್ ಉಂಡ್; ನಿಂಗ ದೇವಡ ಮೇಲೆ ಬೆಚ್ಚಿತುಳ್ಳ ನಂಬಿಕೆ ಚಾಯಿತೆ ಬೊಳ್ಂದಂಡ್, ನಿಂಗ ಒಬ್ಬೊಬ್ಬಂಡ ಮೇಲೆ ಬೆಚ್ಚಿತುಳ್ಳ ಪ್ರೀತಿ ದುಂಬ ಜಾಸ್ತಿ ಆಯಂಡ್ ಉಳ್ಳಾಂಗ್, ನಂಗ ಅನ್ನನೆ ಎಣ್ಣ್‌ವದ್ ಸರಿಯಾಯಿತ್ ಉಂಡ್.

2 ಪೇತ್ರ 1:19

ಈ ಅನುಬವ ನಂಗಕ್ ಕ್‍ಟ್ಟ್‌ನಗುಂಡ್, ಪ್ರವಾದಿಯಂಗ ಪ್ರವಾದನೆ ಮಾಡ್‍ನ ವಿಷಯತ್‍ಲ್ ನಂಗಕ್ ದುಂಬ ನಂಬಿಕೆ ಉಂಡ್. ಅಯಿಂಗ ಒಳ್‍ದಿ ಬೆಚ್ಚಿತುಳ್ಳದ್‍ನ ನಿಂಗ ಚಾಯಿ ನೋಟಂಡು. ಅಯಿಂಗಡ ವಾಕ್ಯವೆಲ್ಲ, ಇರ್‌ಟ್‌ಲ್ ಬೊಳಿ ತಪ್ಪ ಬೊಳ್‌ಚತ್‍ರನೆಕೆ ಉಂಡ್. ಪೊಲಾಕ ಆಪಕ ಬೊಳ್ಳಿ ಮೀನ್ ಬಪ್ಪನೆಕೆ, ಅಯಿಂಗಡ ವಾಕ್ಯ ನಿಂಗಡ ಹೃದಯತ್‍ಲ್ ಬೊಳಿಯುವಕತ್ತನೆ ಅದ್‍ನ ನೋಟಿಯಂಡ್ ಇಪ್ಪದ್ ನಲ್ಲದಾಯಿತಿಪ್ಪ.

2 ಪೇತ್ರ 3:18

ನಂಗಡ ರಕ್ಷಕನು, ಒಡೆಯನು ಆನ ಯೇಸು ಕ್ರಿಸ್ತಂಡ ಕೃಪೇಲ್, ಅಂವೊನ ಗೊತ್ತ್ ಮಾಡ್‌ವ ವಿಷಯತ್‍ಲ್ ಬೊಳಿವಿರ. ಅಂವೊಂಗ್ ಇಕ್ಕಲು ಎಕ್ಕಲು ಮಹಿಮೆ ಬರಡ್. ಆಮೆನ್.

1 ಯೋಹಾನ 2:8

ಆಚೇಂಗಿ, ನಾನ್ ನಿಂಗಕ್ ಒಳ್‍ದ್‍ವ ಪುದಿಯ ಆಜ್ಞೆ ಎನ್ನಂಗೆಣ್ಣ್‌ಚೇಂಗಿ, ಇದ್ ಯೇಸುರಲ್ಲಿ ಪಿಂಞ ನಿಂಗಡಲ್ಲಿ ಸತ್ಯವಾಯಿತುಂಡ್. ಎನ್ನನೆ ಎಣ್ಣ್‌ಚೇಂಗಿ ಇರ್‌ಟ್ ಪೋಯಂಡುಂಡ್, ನೇರಾನ ಬೊಳಿ ಇಕ್ಕಲೆ ಮಿನ್ನಿಯಂಡಂಡು.

ಪ್ರಕಟನೆ 11:18

ನೀಡ ಜನ ಅಲ್ಲತಯಿಂಗಕ್ ಚೆಡಿ ಬಾತ್, ಅಕ್ಕ ನೀಕ್ ಬಲ್ಯ ಚೆಡಿ ಉಂಟಾಚಿ; ಚತ್ತಯಿಂಗಕ್ ನ್ಯಾಯತೀರ್ಪ್ ಕ್‍ಟ್ಟ್‌ವಕು, ಪ್ರವಾದಿಯಳಾನ ನೀಡ ಸೇವಕಂಗಕು, ದೇವಡ ಮಕ್ಕಕು, ನೀಡ ಪೆದತ್‍ರ ಮೇಲೆ ಬಕ್ತಿಯಾಯಿತ್ ಇಂಜ ಬಲ್ಯಯಿಂಗಕು ಚೆರಿಯಯಿಂಗಕು ಫಲ ತಪ್ಪಕು, ಬೂಮಿಕ್ ಕ್‍ೕಡ್ ಮಾಡ್‍ನಯಿಂಗಳ ಪಾಳ್ ಮಾಡ್‌ವಕು, ಸಮಯ ಬಾತ್‍ೕಂದ್ ಎಣ್ಣಿತ್ ದೇವನ ತುದಿಚತ್.

ಪ್ರಕಟನೆ 2:28

ನಾನ್ ನಾಡ ಅಪ್ಪನಾನ ದೇವಡ ಕಡೇಯಿಂಜ ಅದಿಕಾರ ಪಡ್ಂದನೆಕೆ, ಅಂವೊಂಗ್ ಅದಿಕಾರ ಕೊಡ್‌ತಿತ್, ಪೊಲಾಕತ್‍ರ ನಕ್ಷತ್ರತ್‍ನ ಸಹ ತಪ್ಪಿ.

ಪ್ರಕಟನೆ 22:16

ಯೇಸುವಾನ ನಾನ್, ಸಬೇಕಾಯಿತ್, ನಿಂಗಡ ಕೂಡೆ ಇದ್‍ನೆಲ್ಲಾ ಸಾಕ್ಷಿಯಾಯಿತ್ ಎಣ್ಣುವಕ್, ನಾಡ ದೂತನ ಅಯಿಚಿಯೆ. ನಾನ್ ದಾವೀದಂಡ ಬೇರಾಯಿತು, ಅಂವೊಂಡ ಸಂತಾಕಾರನಾಯಿತು, ಪೊಲಾಕ ಕಾಂಬ ಪ್ರಕಾಶವಾನ ಬಾನತ್‍ರ ಮೀನಾಯಿ‍ತು ಉಳ್ಳ್‌ಂದ್ ಎಣ್ಣ್‌ಚಿ.

ಪ್ರಕಟನೆ 22:2

ಅದ್ ಆ ಪಟ್ಟಣತ್‍ರ ಬೀದಿರ ಮದ್ಯತ್‍ಲ್ ಪೋಯಂಡಿಂಜತ್, ಆ ಪೊಳೆರ ದಂಡ್ ಬರೀಲು ಜೀವ ತಪ್ಪ ಮರ ಇಂಜತ್. ಆ ಮರತ್ಂಜ ಪನ್ನೆರಂಡ್ ತರತ್‍ರ ಪಣ್ಣ್ ಕ್‍ಟ್ಟ್‌ವ. ತಿಂಗ ತಿಂಗಕ್ ಅದ್ ಪಣ್ಣ್ ತಪ್ಪಕಿಂಜತ್; ಆ ಮರತ್‍ರ ಎಲ್‌ಕಂಡ ಜನ ವಾಸಿ ಆಪಕ್ ಪ್ರಯೋಜನವಾಯಿತ್ಂಜತ್.