ಮಲಾಕಿ 3:3 - ಕೊಡವ ಬೈಬಲ್

³ ಅಂವೊ ಶುದ್ದಮಾಡುಬವನೆಕೆ ಅಳತ್ತಿತ್‌ ಬೊಳ್ಳಿನ ಚಾಯಿ ಮಾಡುವ; ಅಂವೊ ಲೇವಿಯಡ ಸಂತಾನತ್‌ನ ಬೊಳ್ಳಿ ಪಿಂಞ ಪೊನ್ನ್‌ರನೆಕೆ ಸುದ್ದಮಾಡುವ. ಪಿಂಞ ಒಡಯನಾನ ಯೆಹೋವಂಗ್‌ ನೀತಿರ ಕಾಣಿಕೆ ಅರ್ಪ್ಪಿಚ್ಚಿಡುವ ಜನ ಇಪ್ಪ.

ಮಲಾಕಿ 3:3 ပူးပေါင်းရင်းမြစ်များ

ಜ್ಞಾನತ್‌ರ ಪಡಿಮ 17:3

ಜನ ಬೊಳ್ಳಿನ ತಿತ್‌ ಬೂಕ್ಕು ಪಾತ್‌ರತ್‌ಲು ಪೊನ್ನ್‌ನ ತಿತ್ತ್‌ ತೊಳೆಯಿಲು ಇಟ್ಟಿತ್‌ ಪರೀಕ್ಷೆ ಮಾಡುವ, ಆಚೇಂಗಿ ಜನಡ ಹೃದಯತ್‌ನ ಪರೀಕ್ಷೆ ಮಾಡ್‌ವಂವೊ ಯೆಹೋವನೇ.

ಜ್ಞಾನತ್‌ರ ಪಡಿಮ 25:4

ಬೊಳ್ಳಿಯಿಂಜ ಕಚ್ಚಡತ್‌ನ ನೀಕಿರ್, ಅದ್‌ಲ್ಲಿಂಜ ತಟ್ಟ ಒರ್‌ ಪಾತ್‌ರತ್‌ನ ಮಾಡುವಕಯ್ಯು.

ಮಲಾಕಿ 4:1

ಇದಾ, ಕಡಾಯ ತೊಲೆ ತಿತ್ತ್‌ಲ್‌ ಕತ್ತ್‌ವನೆಕೆ ಒರ್‌ ದಿವಸ ಬಪ್ಪ. ಅಕ್ಕ ಆಂಗಾರಿಯ ಎಲ್ಲಾರು, ವಂಚನೆ ಮಾಡುವಯಿಂಗ ಎಲ್ಲಾರು ಒಣಂಗ್‌ನ ಎಲ್ಕಂಡರನೆಕೆ ಇಪ್ಪ. ಬಪ್ಪ ಆ ದಿವಸ ಅಯಿಂಗಳ ಚುಟ್ಟ್‌ರ್‌ವ. ಅದ್‌ ಬೇರ್‌ ಪಿಂಞ ಕೊಂಬ್‌ನ ಸತ ಅಯಿಂಗಕ್‌ ಉಳಿಕೆ ಮಾಡುಲೆ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 3:16

ಅಕ್ಕ ಯೋಹಾನ: ನಾನ್ ನಿಂಗಕ್ ನೀರ್‌ಲ್ ದೀಕ್ಷಾಸ್ನಾನ ಕೊಡ್‍ತಂಡುಂಡ್. ಆಚೇಂಗಿ ನಾಕಿಂಜ ಬಲ್ಯಂವೊ ಒಬ್ಬ ಬಪ್ಪ. ನಾನ್ ಅಂವೊಂಡ ಕಾಲ್‍ರ ಎಕ್ಕಡತ್‌ನ ಉತ್ತ್‌ವಕ್ ಸಹ ನಾಕ್ ಯೋಗ್ಯತೆ ಇಲ್ಲೆ. ಅಂವೊ ನಿಂಗಳ ಪವಿತ್ರಾತ್ಮತ್‍ಲ್ ಪಿಂಞ ತಿತ್ತ್‌ಲ್ ದೀಕ್ಷಾಸ್ನಾನ ಮಾಡ್‌ವ.

ರೋಮ್ 12:1

ಆನಗುಂಡ್, ನಾಡ ಅಣ್ಣತಮ್ಮಣಂಗಳೇ, ನಿಂಗಡ ತಡೀನ ಪವಿತ್ರವಾಯಿತ್, ದೇವ ಕುಶಿಪಡ್‌ವನೆಕೆ ಜೀವ ಬಲಿಯಾಯಿತ್ ಅರ್ಪಿಚಿಡಂಡೂಂದ್ ದೇವಡ ಕನಿಕಾರತ್‌ಂಜ ನಾನ್ ನಿಂಗಳ ಬೋಡುವಿ. ಇನ್ನನೆ ನಿಂಗ ಮಾಡ್‌ವ ಆರಾದನೆ, ಆತ್ಮೀಯ ಆರಾದನೆಯಾಯಿತುಂಡ್.

ರೋಮ್ 15:16

ಅದ್ ಎಂತ ಎಣ್ಣ್‌ಚೇಂಗಿ, ಯೆಹೂದ್ಯಲ್ಲತಯಿಂಗ ಒರ್ ಬಲಿರನೆಕೆ ಪವಿತ್ರಾತ್ಮತ್‍ರಗುಂಡ್ ಶುದ್ದ ಆಯಿತ್, ದೇವಕ್ ಒರ್ ಕುಶೀರ ಬಲಿಯಾಪನೆಕೆ, ನಲ್ಲ ಸುದ್ದಿರ ದೇವಡ ಯಾಜಕನಾಯಿತ್, ಯೇಸು ಕ್ರಿಸ್ತಂಡ ಸೇವಕನಾಯಿತ್ ಯೆಹೂದ್ಯಲ್ಲತಯಿಂಗಕ್ ನಾನ್ ಆನ.

ಫಿಲಿಪ್ಪಿ 2:17

ಎನ್ನಂಗೆಣ್ಣ್‌ಚೇಂಗಿ, ನಿಂಗಡ ನಂಬಿಕೇರ ಆರಾದನೆನ ನಿಂಗ ದೇವಕ್ ಅರ್ಪಿಚಿಡುವಕಾಯಿತ್, ನಾಡ ಜೀವತ್‍ನ ನೀರ್‌ರನೆಕೆ ದೇವಕ್ ಬೂಕಿತ್ ಕಳಂದತೇಂಗಿಯು ಅದ್‍ಲ್ ನಾನ್ ಕುಶಿ ಪಡುವಿ. ಅನ್ನನೆ ನಡ್ಂದತೇಂಗಿ ಆ ಕುಶೀನ ನಿಂಗೆಲ್ಲಾರು ಪಾಲ್ ಮಾಡಂಡೂಂದ್ ನಾನ್ ಎಣ್ಣ್‌ವಿ.

ಫಿಲಿಪ್ಪಿ 4:18

ನಾಕ್ ಬೋಂಡಿಯಚ್ಚಕು ಅದ್ಂಗಿಂಜ ಜಾಸ್ತಿಯಾಯಿತು ಕ್‍ಟ್ಟ್‌ಚೀಂದ್ ಎಣ್ಣ್‌ವಿ. ನಿಂಗ ಅಯಿಚ ಇನಾಮ್‍ನ ಎಪಫ್ರೋದೀತನಿಂಜ ಎಡ್‍ತಂಡಿಯೆ. ಅದ್ ದೇವಡ ಮಿಂಞತ್ ದೇವಕ್ ಕೊಡ್‌ಪ ಸುಗಂದ ವಾಸನೆಯಾಯಿತು ಅಂವೊಂಡ ಪ್ರೀತಿರ ಅರ್ಪಣೆಯಾಯಿತು ಉಳ್ಳಾಂಗ್ ನಾಕ್ ತೃಪ್ತಿಯಾಚಿ.

2 ತಿಮೊಥೆಯ 4:6

ಎನ್ನಂಗೆಣ್ಣ್‌ಚೇಂಗಿ, ನಾಡ ಬದ್‍ಕ್‍ನ ದೇವಕ್ ಬಲಿ ಕೊಡ್‍ಪಕ್ ನಾನ್ ತಯಾರಾಯಿತುಳ್ಳ. ನಾನ್ ಈ ಲೋಕತ್‍ನ ಬುಟ್ಟಿತ್ ಪೋಪಕುಳ್ಳ ಸಮಯ ಪಕ್ಕ ಬಾತ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2:14

ಅಂವೊ, ನಂಗಳ, ನಂಗಡ ಎಲ್ಲಾ ಪಾಪತ್ಂಜ ಬುಡ್‍ಗಡೆ ಮಾಡಿತ್, ಅಂವೊಂಡ ಸ್ವಂತ ಜನವಾಯಿತ್ ಮಾಡ್‌ವಕಾಯಿತ್, ಎಲ್ಲಾ ನಲ್ಲ ಕೆಲಸತ್‍ನ ಕುಶೀಲ್ ಮಾಡ್‌ವಕ್ ಅರ್ಪಿಚಿಟ್ಟಯಂಗಳಾಯಿತ್ ಪಿಂಞ ನಂಗಳ ಶುದ್ದ ಮಾಡ್‌ವಕಾಯಿತ್ ಅಂವೊನ ಅಂವೊನೇ ನಂಗಕಾಯಿತ್ ಒಪ್ಪ್‌ಚಿಟ್ಟತ್.

ಇಬ್ರಿಯ 12:10

ಅಯಿಂಗ, ಅಯಿಂಗಕ್ ಏದ್ ನಲ್ಲದ್‍ೕಂದ್ ಗೊತ್ತಾಚೋ, ಅದ್ಂಡ ಪ್ರಕಾರ ಚೆನ್ನ ಕಾಲ ಶಿಕ್ಷೆ ಕೊಡ್‍ತ್‍ಚಿ; ಆಚೇಂಗಿ ದೇವ, ತಾಂಡ ಪವಿತ್ರವಾನ ಗುಣಕ್ ನಂಗ ಬಾದ್ಯತೆ ಆಂಡೂಂದ್, ನಂಗಡ ಪ್ರಯೋಜನಕಾಯಿತೇ ನಂಗಕ್ ಶಿಕ್ಷೆ ಕೊಡ್‍ತಂಡುಂಡ್.

1 ಪೇತ್ರ 1:7

ಪಾಳಾಯಿ ಪೋಪ ಪೊನ್ನ್‌ನ ತಿತ್ತ್‌ರಗುಂಡ್ ಸೋದನೆ ಮಾಡ್‌ವ; ಆಚೇಂಗಿ, ಅದ್ಂಗಿಂಜ ಬಲ್ಯ ಬೆಲೆಯುಳ್ಳ ನಿಂಗಡ ನಂಬಿಕೆ ಈ ಕಷ್ಟತ್‍ರಗುಂಡ್ ಸೋದನೆಕ್ ಒಳಪಟ್ಟಿತ್, ನೇರಾನದ್‍ೕಂದ್‌ ಗೊತ್ತಾಪಗುಂಡ್, ಯೇಸು ಕ್ರಿಸ್ತ ಬಪ್ಪಕ, ಅದ್ ನಿಂಗಕ್ ಕೀರ್ತಿಯಾಯಿತ್, ಗನವಾಯಿತ್ ಪಿಂಞ ಮಹಿಮೆಯಾಯಿತ್ ಕ್‍ಟ್ಟುವನೆಕೆ ಆಪ.

1 ಪೇತ್ರ 2:5

ಆನಗುಂಡ್, ನಿಂಗಳು, ಜೀವವಾಯಿತುಳ್ಳ ಕಲ್ಲ್‌ರನೆಕೆ ಉಳ್ಳಾಂಗ್, ನಿಂಗಡಗುಂಡ್, ಆತ್ಮೀಯ ಮನೆಯಾಯಿತ್ ಕೆಟ್ಟಿಯಂಡುಂಡ್. ಅಲ್ಲಿ, ನಿಂಗ ಯೇಸು ಕ್ರಿಸ್ತಂಡ ಮೂಲಕ, ದೇವಕ್ ಪ್ರೀತಿಯಾಯಿತುಳ್ಳ, ಆತ್ಮೀಯ ಬಲಿನ ಕೊಡ್‍ಪಕ್ ಪವಿತ್ರವಾನ ಯಾಜಕ ಮಕ್ಕಡ ಕೂಟವಾಯಿತು ಉಳ್ಳಿರ.

1 ಪೇತ್ರ 2:9

ಆಚೇಂಗಿ ನಿಂಗ, ನಿಂಗಳ ಇರ್‌ಟ್‌ಂಜ ತಾಂಡ ಅದ್ಬುತವಾನ ಬೊಳಿಕ್ ಕಾಕ್‌ನಂವೊಂಡ ತುದಿನ ಅರಿಚಿಡ್‌ವಕ್, ದೇವ ಗೊತ್ತ್ ಮಾಡ್‍ನಯಿಂಗಳಾಯಿತ್, ರಾಜಕೀಯ ಯಾಜಕಂಗಳಾಯಿತ್, ಪವಿತ್ರವಾನ ರಾಜ್ಯತ್‍ರ ಮಕ್ಕಳಾಯಿತ್ ಪಿಂಞ ದೇವಡ ಸ್ವಂತ ಜನವಾಯಿತ್ ಉಳ್ಳಿರ.

ಪ್ರಕಟನೆ 1:6

ಅಂವೊಂಡ ದೇವನಾಯಿತುಳ್ಳ ಅಪ್ಪಂಡ ಸನ್ನಿದಾನತ್‍ಲ್ ನಂಗಳ ರಾಜಂಗಳಾಯಿತು, ಯಾಜಕಂಗಳಾಯಿತು ಮಾಡ್‍ಚಿ. ಅಂವೊಂಗ್ ಕಾಲಕಾಲಕು ಮಹಿಮೆಯು, ಶಕ್ತಿಯು ಇರಡ್. ಆಮೆನ್.

ಪ್ರಕಟನೆ 3:18

ನೀನ್ ಐಶ್ವರ್ಯವಂತನಾಪಕ್, ತಿತ್ತ್‌ಲ್ ಇಟ್ಟಿತ್ ಎಡ್‌ತ ಪೊನ್ನ್‌ನ ಪಿಂಞ ನೀಡ ಅವಮಾನವಾಯಿತುಳ್ಳ ಬೆತ್ತಲೇನ ಮುಚ್ಚ್‌ವಕ್ ಬೊಳ್‍ತ ಬಟ್ಟೇನ ನಾಡ ಕೈಯಿಂಜ ಕ್ರಯಕ್ ಎಡ್‌ತ ಪಿಂಞ ನೀಡ ಕಣ್ಣ್ ಕಾಂಬನೆಕೆ, ಕಣ್ಣ್‌ಕ್ ಮದ್ದ್ ಇಡ್‍ೕಂದ್ ನಾನ್ ನೀಕ್ ಬುದ್ದಿ ಎಣ್ಣ್‌ವಿ.

ಪ್ರಕಟನೆ 5:10

ನಂಗಡ ದೇವಡ ಮಿಂಞತ್, ಅಯಿಂಗಳ ರಾಜಂಗಳಾಯಿತು, ಯಾಜಕಂಗಳಾಯಿತು ಮಾಡಿತ್: ಅಯಿಂಗ ಬೂಮಿಲ್ ರಾಜ್ಯಬಾರ ಮಾಡ್‌ವಾಂದ್, ಒರ್ ಪುದಿಯ ಪಾಟ್ ಪಾಡ್‌ಚಿ.