ಯೋಹಾನ 8:29 - ಕೊಡವ ಬೈಬಲ್

²⁹ ನನ್ನ ಅಯಿಚಂವೊ ನಾಡ ಕೂಡೆ ಉಂಡ್, ಅಂವೊಂಗ್ ಕುಶಿ ಆಪದ್‍ನ ನಾನ್ ಎಕ್ಕಾಲು ಮಾಡ್‌ವಗುಂಡ್ ಅಂವೊ ನನ್ನ ಎಕ್ಕಾಲು ಒಂಟಿಯಾಯಿತ್ ಬುಟ್ಟಿತ್‌ಲ್ಲೇಂದ್ ಎಣ್ಣ್‌ಚಿ.

ಯೋಹಾನ 8:29 ပူးပေါင်းရင်းမြစ်များ

ಮತ್ತಾಯ 17:5

ಪೇತ್ರ ಅನ್ನನೆ ತಕ್ಕ್ ಪರ್ಂದಂಡ್ ಇಪ್ಪಕಲೆ, ಒರ್ ಮಿನ್ನುವ ಮೋಡ ಅಯಿಂಗಳ ಆವರಿಚಿಟ್ಟತ್. ಇಂವೊ ನಾಡ ಕೊದಿರ ಮೋಂವೊ, ಇಂವೊಂಡ ಮೇಲೆ ನಾಕ್ ದುಂಬ ಕುಶಿ ಉಂಡ್, ಇಂವೊ ಎಣ್ಣುವಾನ ನಿಂಗ ಕ್‍ೕಳೀಂದ್, ಆ ಮೋಡತ್ಂಜ ಒರ್ ವಾಣಿ ಬಾತ್.

ಮತ್ತಾಯ 3:15

ಅದ್ಂಗ್ ಯೇಸು: ಇಕ್ಕ ಇದ್‍ನ ಇನ್ನನೆ ಮಾಡ್‌ವಕ್ ಬುಡ್. ಇನ್ನನೆ ಮಾಡ್‌ವಕ ನಂಗ ದೇವಡ ಎಲ್ಲಾ ನೀತಿ ಕಾರ್ಯತ್‍ನ ಪೂರ್ತಿ ಮಾಡ್‌ವಾಂದ್ ಎಣ್ಣ್‌ನಾಂಗ್ ಯೋಹಾನ ಒತ್ತಂಡತ್.

ಮತ್ತಾಯ 3:17

ಅಕ್ಕ, ಪರಲೋಕತ್ಂಜ ಒರ್ ವಾಣಿ: ಇಂವೊ ನಾಡ ಕೊದಿರ ಮೋಂವೊ, ಇಂವೊಂಡ ಮೇಲೆ ನಾಕ್ ದುಂಬ ಕುಶಿ ಉಂಡ್‍ೕಂದ್ ಎಣ್ಣ್‌ಚಿ.

ಯೋಹಾನ 14:31

ನಾನ್ ನಾಡ ಅಪ್ಪನ ಪ್ರೀತಿ ಮಾಡಿಯಂಡುಂಡ್‍ೕಂದು, ಅಪ್ಪ ನಾಕ್ ಆಜ್ಞೆ ಕೊಡ್‍ತನೆಕೆ ನಾನ್ ಮಾಡಿಯಂಡುಂಡ್‍ೕಂದು ಈ ಲೋಕತ್‍ರ ಜನಕ್ ಗೊತ್ತಾಪಕಾಯಿತ್ ಇದೆಲ್ಲಾ ಆಪ. ಬಾರಿ, ಈ ಜಾಗತ್‍ನ ಬುಟ್ಟಿತ್ ನಂಗ ಪೋಕಾಂದ್ ಎಣ್ಣ್‌ಚಿ.

ಯೋಹಾನ 15:10

ನಾನ್ ನಾಡ ಅಪ್ಪಂಡ ಆಜ್ಞೆರ ಪ್ರಕಾರ ನಡ್ಂದಂಡ್ ಅಂವೊಂಡ ಪ್ರೀತಿಲ್ ಸ್ತಿರವಾಯಿತ್ ಇಪ್ಪನೆಕೆ ನಿಂಗಳು ನಾಡ ಆಜ್ಞೆರ ಪ್ರಕಾರ ನಡ್‌ದಂಡ್ ಇಂಜತೇಂಗಿ ನಾಡ ಪ್ರೀತಿಲ್ ನಿಂಗ ಸ್ತಿರವಾಯಿತ್ ಇಪ್ಪಿರ.

ಯೋಹಾನ 16:32

ಒರ್ ಸಮಯ ಬಪ್ಪ, ಅದ್ ಇಕ್ಕಲೆ ಬಂದ್‌ರ್‌ತ್. ನಿಂಗ ಎಲ್ಲಾರು ನನ್ನ ಬುಟ್ಟಿತ್ ಚದ್‌ರಿ ಪೋಯಿತ್ ಬೋರೆ ಬೋರೆ ಆಯಿತ್ ನಿಂಗ ನಿಂಗಡ ಮನೆಕ್ ಪೋಪಿರ, ನಾನ್ ಒಬ್ಬನೇ ಆಯಿಪೋಪಿ. ಆಚೇಂಗಿಯು ನಾನ್ ಒಂಟಿಯಾಯಿತ್ ಇಪ್ಪುಲೆ, ನಾಡ ಅಪ್ಪ ನಾಡ ಕೂಡೆ ಉಂಡ್.

ಯೋಹಾನ 17:4

ನೀನ್ ನಾಕ್ ಕೊಡ್‍ತ ಕ್ರಿಯೇನ ಪೂರ್ತಿಮಾಡಿಯೆ, ನಾನ್ ಈ ಲೋಕತ್‍ಲ್ ನೀಕ್ ಮಹಿಮೆ ಕ್‍ಟ್ಟುವನೆಕೆ ಮಾಡಿಯೆ.

ಯೋಹಾನ 4:34

ಅಯಿಂಗಕ್ ಯೇಸು: ನನ್ನ ಅಯಿಚಂವೊಂಡ ಚಿತ್ತತ್‍ರನೆಕೆ ಮಾಡಿತ್, ಅಂವೊಂಡ ಕ್ರಿಯೇನ ನೆರೆವೇರಿಚಿಡುವದೇ ನಾಡ ಆಹಾರಾಂದ್ ಎಣ್ಣ್‌ಚಿ.

ಯೋಹಾನ 5:30

ನಾನ್ ನಾನಾಯಿತೇ ಒಂದು ಮಾಡುಲೆ. ದೇವ ಎಣ್ಣುವನೆಕೆ ನಾನ್ ತೀರ್ಪ್ ಮಾಡ್‌ವಿ. ನಾನ್ ನಾಡ ಇಷ್ಟತ್‍ರ ಪ್ರಕಾರ ಮಾಡ್‌ವಕ್ ಕುಶಿ ಪಡತೆ, ನನ್ನ ಅಯಿಚಂವೊಂಡ ಚಿತ್ತತ್‍ರನೆಕೆ ಮಾಡ್‌ವಕ್ ಕುಶಿಪಟ್ಟಿತ್ ಮಾಡ್‌ವಗುಂಡ್ ನಾಡ ತೀರ್ಪ್ ನೀತಿವಂತದಾಯಿತುಂಡ್.

ಯೋಹಾನ 6:38

ಎನ್ನಂಗೆಣ್ಣ್‌ಚೇಂಗಿ, ನಾನ್ ಪರಲೋಕತ್ಂಜ ಬಂದದ್ ನಾಡ ಇಷ್ಟ ಪ್ರಕಾರ ಕ್ರಿಯೆ ಮಾಡ್‌ವಕ್ ಅಲ್ಲ, ದಾರ್ ನನ್ನ ಅಯಿಚತೋ ಅಂವೊಂಡ ಚಿತ್ತತ್‍ರ ಪ್ರಕಾರ ಕ್ರಿಯೆ ಮಾಡ್‌ವಕ್ ಬಂದಿಯೆ.

ಯೋಹಾನ 8:16

ಅನ್ನನೆ ನಾನ್ ತೀರ್ಪ್ ಮಾಡ್‍ಚೇಂಗಿ, ನಾಡ ತೀರ್ಪ್ ನೇರಾಯಿತ್‌ಪ್ಪ. ಎನ್ನಂಗೆಣ್ಣ್‌ಚೇಂಗಿ, ನಾನ್ ಒಬ್ಬನಾಯಿತ್ ಇಲ್ಲೆ, ನನ್ನ ಅಯಿಚ ಅಪ್ಪನಾನ ದೇವ ನಾಡ ಕೂಡೆ ಉಂಡ್.

2 ತಿಮೊಥೆಯ 4:17

ಆಚೇಂಗಿ ಒಡೆಯ ನಾಡ ಕೂಡೆ ನಿಂದಿತ್ ನನ್ನ ಬಲಪಡ್‍ತಿತ್, ನಾಡ ಮೂಲಕ ನಲ್ಲ ಸುದ್ದಿನ ಪೂರ್ತಿಯಾಯಿತ್ ಪ್ರಚಾರ ಮಾಡ್‌ವಕ್, ಯೆಹೂದ್ಯಂಗಲ್ಲತ ಜನ ಅದ್‍ನ ಕ್‍ೕಪನೆಕೆ ಮಾಡ್‍ಚಿ. ಇದ್ ಅಲ್ಲತೆ ಸಿಂಹತ್‍ರ ಬಾಯಿಯಿಂಜ ನನ್ನ ಬುಡ್‍ಗಡೆ ಮಾಡ್‍ಚಿ.

2 ತಿಮೊಥೆಯ 4:22

ಒಡೆಯನಾನ ಯೇಸು ಕ್ರಿಸ್ತ ನೀಡ ಆತ್ಮತ್‍ರ ಕೂಡೆ ಇರಡ್. ದೇವಡ ಕೃಪೆ ನೀಡ ಕೂಡೆ ಇರಡ್.

ಇಬ್ರಿಯ 4:15

ನಂಗಡ ಬಲಹೀನತ್‍ರ ವಿಷಯತ್ ನಂಗಕಾಯಿತ್ ಬೇಜಾರ್ ಪಡುವಕ್ ಕಯ್ಯತ ಯಾಜಕ ನಂಗಕ್ ಇಲ್ಲತೆ, ಎಲ್ಲಾ ರೀತಿಲ್ ನಂಗಡನೆಕೆ ಸೋದನೆ ಪಟ್ಟಿತು, ಪಾಪ ಇಲ್ಲತಂವೊನಾಯಿತುಳ್ಳ ಮಹಾ ಯಾಜಕನೇ ನಂಗಕ್ ಉಂಡ್.

ಇಬ್ರಿಯ 7:26

ಇನ್ನನೆ ಉಳ್ಳ ಮಹಾ ಯಾಜಕನೇ ನಂಗಕ್ ಬೋಂಡಿಯತ್. ಇಂವೊ, ಪವಿತ್ರವಾನಂವೊನು, ಕುತ್ತ ಇಲ್ಲತಂವೊನು, ಒರ್ ತಪ್ಪ್ ಇಲ್ಲತಂವೊನಾಯಿತು ಉಂಡ್. ಅಂವೊ ಪಾಪಿಯಂಗಡ ಕೂಡೆ ಕೂಡತೆ, ಪರಲೋಕತ್‍ಲ್ ಎಲ್ಲಾಕಿಂಜ ಬಲ್ಯ ಸ್ತಾನತ್‍ನ ಪಡ್ಂದಂವೊನಾಯಿತುಂಡ್.

1 ಯೋಹಾನ 2:1

ನಾಡ ಪ್ರೀತಿರ ಮಕ್ಕಳೇ, ನಿಂಗ ಪಾಪ ಮಾಡತೆ ಇಪ್ಪಕಾಯಿತ್ ನಾನ್ ನಿಂಗಕ್ ಇದ್‍ನ ಒಳ್‍ದ್‍ವಿ. ಅನ್ನನೆ ದಾರೇಂಗಿ ಪಾಪ ಮಾಡ್‍ಚೇಂಗಿ, ನಂಗಕಾಯಿತ್ ಅಪ್ಪನಾನ ದೇವಡ ಪಕ್ಕ ಬೋಡ್‍ವಕ್ ಮದ್ಯಸ್ತ ಒಬ್ಬ ಉಂಡ್. ಆ ಮದ್ಯಸ್ತ, ನೀತಿವಂತಂವೊನಾನ ಯೇಸು ಕ್ರಿಸ್ತ.

1 ಯೋಹಾನ 3:22

ನಂಗ ದೇವಡ ಆಜ್ಞೆರ ಪ್ರಕಾರ ನಡ್‌ಂದಿತ್, ದೇವಕ್ ಕುಶಿಯಾನ ಕೆಲಸತ್‍ನ ಮಾಡ್‌ವಗುಂಡ್ ದೇವಡ ಪಕ್ಕ ಎಂತ ಬೋಡ್‍ಚೇಂಗಿಯು, ದೇವ ಅದ್‍ನ ನಂಗಕ್ ತಪ್ಪ.