ಯೋಹಾನ 3:2 - ಕೊಡವ ಬೈಬಲ್

² ಅಂವೊ, ಒರ್ ಬಯಿಟ್ ಯೇಸುರ ಪಕ್ಕ ಪೋಯಿತ್: ಉಪಾದ್ಯನೇ, ನೀನ್ ದೇವ ಅಯಿಚಿತುಳ್ಳ ಉಪಾದ್ಯಾಂದ್ ನಂಗಕ್ ಗೊತ್ತುಂಡ್. ಎನ್ನಂಗೆಣ್ಣ್‌ಚೇಂಗಿ, ದಾರ್ ಒಬ್ಬಂಡ ಕೂಡೆ ದೇವ ಉಂಡೋ ಅಂವೊಂಗ್ ಮಾತ್ರ ನೀನ್ ಮಾಡ್‌ವನೆಕೆ ಇನ್ನತಾನ ಅದ್ಬುತ ಕಾರ್ಯತ್‍ನ ಮಾಡ್‌ವಕ್ ಕಯ್ಯೂಂದ್ ಎಣ್ಣ್‌ಚಿ.

ಯೋಹಾನ 3:2 ပူးပေါင်းရင်းမြစ်များ

ಮತ್ತಾಯ 22:16

ಅಯಿಂಗ ಹೆರೋದ ರಾಜಂಡ ಜನಡ ಕೂಡೆ ಅಯಿಂಗಡ ಶಿಷ್ಯಂಗಳ ಅಯಿಚತ್. ಅಯಿಂಗ ಬಂತ್, ಉಪಾದ್ಯನೇ, ನೀನ್ ಸತ್ಯ ಉಳ್ಳಂವೊನು, ದೇವಡ ಚಿತ್ತತ್‍ರ ವಿಷಯತ್ ಜನಕ್ ಸತ್ಯವಾಯಿತ್ ಬೋದನೆ ಮಾಡ್‍ವಿಯಾಂದೂ, ದಾರ್‌ಕು ಬೊತ್ತ್‌ವಂವೊ ಅಲ್ಲಾಂದು, ಪಕ್ಷಪಾತ ಇಲ್ಲತಂವೋಂದು ನಂಗಕ್ ಗೊತ್ತುಂಡ್.

ಮತ್ತಾಯ 23:7

ಚತ್ತೆಲ್ ಎಲ್ಲಾರು ಮರ್ಯಾದೆ ಕೊಡ್‌ಕಡ್ ಎಣ್ಣಿಯಂಡ್, ಎಲ್ಲಾರು ಅಯಿಂಗಳ ಉಪಾದ್ಯನೇಂದ್ ಕಾಕಂಡೂಂದ್ ಅಯಿಂಗ ಆಸೆ ಪಡುವ.

ಮತ್ತಾಯ 23:8

ನಿಂಗಳ ದಾರೂ ಉಪಾದ್ಯನೇಂದ್ ಕಾಕ್‍ವಕ್ ಬುಡತಿ. ಕ್ರಿಸ್ತ ಒಬ್ಬನೇ ನಿಂಗಕ್ ಉಪಾದ್ಯನಾಯಿತುಂಡ್. ನಿಂಗ ಎಲ್ಲಾರು ಅಣ್ಣತಮ್ಮಣಂಗಳಾಯಿತುಳ್ಳಿರ.

ಮಾರ್ಕ 12:14

ಅಯಿಂಗ ಯೇಸುರ ಪಕ್ಕ ಬಂದಿತ್: ಉಪಾದ್ಯನೇ, ನೀನ್ ಸತ್ಯ ಉಳ್ಳಂವೊನು, ದೇವಡ ಚಿತ್ತತ್‍ರ ವಿಷಯತ್ ಜನಕ್ ಸತ್ಯವಾಯಿತ್ ಬೋದನೆ ಮಾಡ್‍ವಿಯಾಂದು, ದಾರ್‌ಕು ಬೊತ್ತ್‌ವಂವೊ ಅಲ್ಲಾಂದು, ಪಕ್ಷಪಾತ ಇಲ್ಲತಂವೋಂದು ನಂಗಕ್ ಗೊತ್ತುಂಡ್. ಕೈಸರಂಗ್ ಕಂದಾಯ ಕೊಡ್‍ಪದ್ ಸರಿಯಾ? ನಂಗ ಕೊಡ್‌ಕಂಡುವ ಅಲ್ಲತೆ ಕೊಡ್‍ಕತೆ ಬುಡಂಡುವಾಂದ್ ಕ್‍ೕಟತ್.

ಯೋಹಾನ 1:38

ಯೇಸು ಬಯ್ಯಕ್ ತಿರಿತ್ ನೋಟುವಕ ಅಯಿಂಗ ತಾಂಡ ಬಯ್ಯಕ್ ಬಪ್ಪದ್‍ನ ಕಂಡಿತ್, ನಿಂಗಕ್ ಎಂತ ಬೋಂಡೂಂದ್ ಕ್‍ೕಟತ್. ಅದ್ಂಗ್ ಅಯಿಂಗ: ಉಪಾದ್ಯನೇ, ನೀನ್ ಎಲ್ಲಿ ವಾಸ ಮಾಡಿಯಂಡ್ ಉಳ್ಳಿಯಾಂದ್ ಕ್‍ೕಟತ್.

ಯೋಹಾನ 10:38

ನಾನ್ ನಾಡ ಅಪ್ಪಂಡ ಕ್ರಿಯೇನ ಮಾಡ್‍ಚೇಂಗಿ, ನಿಂಗ ನನ್ನ ನಂಬತ ಇಂಜತೇಂಗಿಯು, ನಾನ್ ಅದ್‍ನ ಮಾಡ್‌ವಿ. ನಾನ್ ನಾಡ ಅಪ್ಪಂಡ ಕೂಡೆ, ನಾಡ ಅಪ್ಪ ನಾಡ ಕೂಡೆ ಉಂಡ್‍ೕಂದ್ ಸಾಕ್ಷಿಯಾಯಿತ್ ನಾನ್ ಮಾಡ್‌ವ ಅದ್ಬುತ ಕಾರ್ಯತ್‍ನ ನೋಟಿತ್ ಅದ್‍ನ ನಂಬುವಿರಾಂದ್ ಎಣ್ಣ್‌ಚಿ.

ಯೋಹಾನ 12:37

ಯೇಸು ಇಚ್ಚಕೆಲ್ಲಾ ಅದ್ಬುತ ಕಾರ್ಯ ಈಂಗಡ ಮಿಂಞತ್‍ಲ್ ಮಾಡಿತಿಂಜತೇಂಗಿಯು, ಜನ ಅಂವೊನ ನಂಬುವಕಿಂಜಿಲೆ.

ಯೋಹಾನ 14:10

ನಾನ್ ಅಪ್ಪಂಡಲ್ಲಿ, ಅಪ್ಪ ನಾಡಲ್ಲಿ ಇಪ್ಪದ್‍ನ ನೀನ್ ನಂಬ್‍ಲೆಯಾ? ನಾನ್ ನಿಂಗಡ ಕೂಡೆ ಎಣ್ಣ್‌ನದೆಲ್ಲ, ನಾಡ ಇಷ್ಟ ಪ್ರಕಾರ ಎಣ್ಣಿಯಂಡಿಲ್ಲೆ. ನಾಡಲ್ಲಿ ವಾಸ ಮಾಡಿಯಂಡುಳ್ಳ ಅಪ್ಪನೇ ಈ ಕ್ರಿಯೇನೆಲ್ಲಾ ಮಾಡಿಯಂಡುಂಡ್.

ಯೋಹಾನ 15:24

ದಾರೂ ಮಾಡತ ಕ್ರಿಯೇನ ನಾನ್ ಅಯಿಂಗಡ ಮದ್ಯತ್‍ಲ್ ಮಾಡತೆ ಪೋಯಿತ್ಂಜತೇಂಗಿ, ಅಯಿಂಗಕ್ ಪಾಪ ಇಪ್ಪಕಿಂಜಿಲೆ; ಇಕ್ಕ ಅಯಿಂಗ ನಾಡ ಕ್ರಿಯೇನ ನೋಟಿತ್‌ಂಜತೇಂಗಿಯು ಸಹ, ನನ್ನ ಪಿಂಞ ನಾಡ ಅಪ್ಪನ ವಿರೋದಿಚಿಟ್ಟಂಡುಂಡ್.

ಯೋಹಾನ 2:11

ಇನ್ನನೆ, ಯೇಸು ತಾಂಡ ಆದ್ಯ ಅದ್ಬುತ ಕಾರ್ಯತ್‍ನ ಗಲಿಲಾಯ ಪ್ರಾಂತ್ಯತ್‍ರ ಕಾನಾ ಎಣ್ಣುವ ಊರ್‌ಲ್ ಮಾಡಿತ್, ತಾಂಡ ಮಹಿಮೆನ ಕಾಂಬ್‍ಚಿಟ್ಟತ್. ಅಂವೊಂಡ ಶಿಷ್ಯಂಗ ಯೇಸುನ ನಂಬ್‍ಚಿ.

ಯೋಹಾನ 20:16

ಯೇಸು ಅವಳ ನೋಟಿತ್: ಮರಿಯಾಂದ್ ಕಾಕ್‍ಚಿ. ಅವ ಅಂವೊನ ತಿರಿತ್ ನೋಟುವಂಜಿ: ರಬ್ಬೂನೀಂದ್ ಎಣ್ಣ್‌ಚಿ. ಅದ್ಂಡ ಅರ್ಥ ಅರಾಮಿಯ ತಕ್ಕ್‌ಲ್ ಉಪಾದ್ಯನೇಂದ್ ಆಪ.

ಯೋಹಾನ 3:26

ಅಯಿಂಗ ಯೋಹಾನಂಡ ಪಕ್ಕ ಪೋಪಂಜಿ: ಉಪಾದ್ಯನೇ, ಯೊರ್ದನ್ ಕೆರೆರ ಆಬರಿಲ್ ನೀಡ ಕೂಡೆ ಒಬ್ಬ ಇಂಜತಲ್ಲ, ನೀನ್ ಸಹ ಅಂವೊಂಡ ವಿಷಯತ್ ಸಾಕ್ಷಿ ಕೊಡ್‍ತಿಯಲ್ಲ? ಇಕ್ಕ ನೋಟಿ, ಅಂವೊ ದೀಕ್ಷಾಸ್ನಾನ ಕೊಡ್‍ತಂಡುಂಡ್, ಜನ ಎಲ್ಲಾರು ಅಂವೊಂಡ ಪಕ್ಕ ಪೋಯಂಡುಂಡ್‍ೕಂದ್ ಎಣ್ಣ್‌ಚಿ.

ಯೋಹಾನ 4:31

ಇದ್ಂಡ ಮದ್ಯತ್‍ಲ್, ಅಂವೊಂಡ ಶಿಷ್ಯಂಗ: ಉಪಾದ್ಯನೇ, ನೀನ್ ಉಣ್ಣ್‌ಂದ್ ಅಂವೊನ ಬೋಡಿಯಂಡತ್.

ಯೋಹಾನ 5:36

ಆಚೇಂಗಿ, ಅಂವೊಂಡ ಸಾಕ್ಷಿಕಿಂಜ ನಾಡ ಸಾಕ್ಷಿ ಬಲ್ಯದಾಯಿತುಂಡ್. ಅದ್ ಎಂತ ಎಣ್ಣ್‌ಚೇಂಗಿ, ನಾನ್ ನೆರೆವೇರಿಚಿಡಂಡೂಂದ್ ಅಪ್ಪನಾನ ದೇವ ನಾಕ್ ಎಣ್ಣಿ ಕೊಡ್‍ತ ವಿಷಯ ಪಿಂಞ ನಾನ್ ಮಾಡಿಯಂಡುಳ್ಳ ಕ್ರಿಯೆವೇ ಅಪ್ಪನಾನ ದೇವ ನನ್ನ ಅಯಿಚತ್‍ೕಂದ್ ನಾಡ ವಿಷಯತ್ ಸಾಕ್ಷಿ ಕೊಡ್‍ತಂಡುಂಡ್.

ಯೋಹಾನ 6:2

ಅಂವೊ ಕಾಯಿಲೆಸ್ತಂಗಡ ಮದ್ಯತ್‍ಲ್ ಮಾಡ್‍ನ ಅದ್ಬುತ ಕಾರ್ಯತ್‍ನ ದುಂಬ ಜನ ನೋಟ್‍ನಗುಂಡ್, ಅಂವೊಂಡ ಬಯ್ಯಕ್ ಅಯಿಂಗ ಎಲ್ಲಾರು ಪೋಚಿ.

ಯೋಹಾನ 7:31

ಅಲ್ಲಿ ಇಂಜ ದುಂಬ ಜನ ಅಂವೊನ ನಂಬಿತ್: ಕ್ರಿಸ್ತ ಬಪ್ಪಕ ಇಂವೊ ಮಾಡ್‌ವ ಅದ್ಬುತ ಕಾರ್ಯಕಿಂಜ ಜಾಸ್ತಿ ಮಾಡ್‌ವೋ ಎಂತೋಂದ್ ಎಣ್ಣಿಯಂಡ್ ಇಂಜತ್.

ಯೋಹಾನ 9:16

ಅಕ್ಕ ಚೆನ್ನ ಫರಿಸಾಯಂಗ: ಆ ಮನುಷ್ಯ ಸಬ್ಬತ್ ದಿವಸತ್‍ರ ಆಜ್ಞೆನ ಪಾ‌ಲನೆ ಮಾಡತೆಗುಂಡ್ ಅಂವೊ ದೇವಡಯಿಂಜ ಬಂದಂವೊನಲ್ಲಾಂದ್ ಎಣ್ಣ್‌ಚಿ. ಇಂಞು ಚೆನ್ನ ಜನ: ಪಾಪಿಯಾಯಿತುಳ್ಳ ಒಬ್ಬ ಈ ತರ ಅದ್ಬುತ ಕಾರ್ಯತ್‍ನ ಎನ್ನನೆ ಮಾಡ್‌ವಾಂದ್ ಕ್‍ೕಟತ್. ಇನ್ನನೆ ಅಯಿಂಗ ದಂಡ್ ಗುಂಪಾಯಿತ್ ಆಚಿ.

ಅಪೊಸ್ತಲ 10:38

ದೇವ ನಜರೇತ್‍ರ ಯೇಸುನ ಪವಿತ್ರತ್ಮಾತ್ಂಜಲು ಶಕ್ತಿಯಿಂಜಲು ಅಬಿಷೇಕ ಮಾಡ್‍ಚಿ. ದೇವ ಅಂವೊಂಡ ಕೂಡೆ ಇಂಜಗುಂಡ್ ಅಂವೊ ನಲ್ಲದ್ ಮಾಡಿಯಂಡ್ ಸೈತಾನಂಡ ಶಕ್ತಿಲ್ ಚಿಕ್ಕಿತ್ ಪೋಯಿತ್ಂಜ ಎಲ್ಲಾರ್‍ನೂ ವಾಸಿಮಾಡಿಯಂಡ್ ಎಲ್ಲಾ ಜಾಗಕು ಪೋಯಂಡಿಂಜತ್.

ಅಪೊಸ್ತಲ 2:22

ಇಸ್ರಾಯೇಲ್‍ರ ಜನಳೇ, ನಾಡ ತಕ್ಕ್‌ನ ಕ್‍ೕಳಿ; ನಿಂಗಕೆಲ್ಲ ಚಾಯಿತೆ ಗೊತ್ತುಳ್ಳನೆಕೆ ನಜರೇತ್‍ರ ಯೇಸುರ ಮೂಲಕ ದೇವ ನಿಂಗಡ ಮದ್ಯತ್‍ಲ್ ಬಲ್ಯ ಅದ್ಬುತ, ಆಶ್ಚರ್ಯ ಪಿಂಞ ಗುರ್‌ತ್ ಕಾರ್ಯತ್‍ನ ಮಾಡಿತ್ ಅದ್‍ಯಿಂಜ ಅಂವೊನ ದೇವ ನೇಮಿಚಿಟ್ಟತ್‍ೕಂದ್ ನಿಂಗಕ್ ಕಾಂಬ್‍ಚಿಟ್ಟತ್.

ಫಿಲಿಪ್ಪಿ 1:14

ನಾನ್ ಇನ್ನನೆ ಕೈದಿಯಾಯಿತ್ ಉಳ್ಳಗುಂಡ್, ಯೇಸುನ ನಂಬ್‍ನ ಸುಮಾರ್ ಅಣ್ಣತಮ್ಮಣಂಗ ದೇವಡ ವಿಷಯತ್‍ನ ಒರ್ ಪೋಡಿಯು ಇಲ್ಲತೆ ದುಂಬ ನಂಬಿಕೇಲ್ ದೈರ್ಯವಾಯಿತ್ ಎಣ್ಣಿಯಂಡುಂಡ್.