ಯೋಹಾನ 20:19 - ಕೊಡವ ಬೈಬಲ್

¹⁹ ಆ ದಿವಸ ವಾರತ್‍ರ ಆದ್ಯ ನಾಳಾನ ನಾರಾಚೆ ಆಯಿತ್ಂಜತ್. ಅಂದ್ ಬೈಟಾಪಕ, ಯೇಸುರ ಶಿಷ್ಯಂಗ ಒಟ್ಟ್ ಕೂಡಿತ್ ಇಂಜ ಜಾಗತ್‍ಲ್, ಯೆಹೂದ್ಯಂಗಕ್ ಬೊತ್ತಿಯಂಡಿಂಜಗುಂಡ್, ಪಡಿ ಇಟ್ಟಿತ್ ಒಳ್‍ಲ್ ಇಂಜತ್. ಅಕ್ಕ ಯೇಸು ಅಲ್ಲಿಕ್ ಬಪ್ಪಂಜಿ ಅಯಿಂಗಡ ಮದ್ಯತ್‍ಲ್ ನಿಂದಂಡ್: ನಿಂಗಕ್ ಸಮಾದಾನಾಂದ್ ಎಣ್ಣ್‌ಚಿ.

ಯೋಹಾನ 20:19 ပူးပေါင်းရင်းမြစ်များ

ಮತ್ತಾಯ 10:13

ಆ ಸಮಾದಾನಕ್ ಅಯಿಂಗ ಯೋಗ್ಯವಾಯಿತುಂಡೇಂಗಿ ಆ ಸಮಾದಾನ ಅಲ್ಲಿ ಇರಡ್ ಇಲ್ಲತೆಪೋಚೇಂಗಿ, ಆ ಸಮಾದಾನ ನಿಂಗಡ ಪಕ್ಕ ಪುನಃ ಬರಡ್.

ಮತ್ತಾಯ 18:20

ಎನ್ನಂಗೆಣ್ಣ್‌ಚೇಂಗಿ, ಎಲ್ಲಿ ದಂಡ್‍ಮೂಂದಾಳ್ ನಾಡ ಪೆದತ್‍ಲ್ ಕೂಡಿ ಬಪ್ಪ, ಅಲ್ಲಿ ಅಯಿಂಗಡ ಮದ್ಯತ್‍ಲ್ ನಾನ್ ಇಪ್ಪೀಂದ್ ಎಣ್ಣ್‌ಚಿ.

ಮಾರ್ಕ 16:14

ಕಡೇಕ್ ಅಂವೊಂಡ ಪನ್ನಂದ್ ಶಿಷ್ಯಂಗ ಉಂಬಕ್ ಅಳ್‌ತಂಡಿಪ್ಪಕ ಯೇಸು ಪ್ರತ್ಯಕ್ಷವಾಚಿ. ಚಾವ್‍ಯಿಂಜ ಜೀವವಾಯಿತ್ ಎದ್ದ ನನ್ನ ಕಂಡಯಿಂಗ ನಿಂಗಕ್ ಬಂದಿತ್ ಎಣ್ಣುವಕಾಪಕ ನಿಂಗ ಅದ್‍ನ ನಂಬುವಕಿಂಜಿಲೆ. ಅಯಿಂಗಕ್ ನಂಬಿಕೆ ಬರತೆಗುಂಡ್ ಪಿಂಞ ಅಯಿಂಗಡ ಹೃದಯ ಅಚ್ಚಕ್ ಕಠಿಣ ಆಯಿತ್ಂಜಗುಂಡ್ ಯೇಸು ಅಯಿಂಗಳ ಜೋರ್ ಮಾಡ್‍ಚಿ.

ಯೋಹಾನ 14:27

ಸಮಾದಾನತ್‍ನ ನಿಂಗಕ್ ಬುಟ್ಟಿತ್ ಪೋಪಿ, ನಾಡ ಸಮಾದಾನತ್‍ನೇ ನಿಂಗಕ್ ತಪ್ಪಿ; ಈ ಲೋಕ ತಪ್ಪ ಪ್ರಕಾರ ನಾನ್ ನಿಂಗಕ್ ತಪ್ಪುಲೆ. ನಿಂಗಡ ಹೃದಯ ಬೇಜಾರ್ ಪಡತೆ, ಗಾಬರಿ ಆಕತೆ ಇರಡ್.

ಯೋಹಾನ 16:22

ಅನ್ನನೆ, ನಿಂಗ ಇಕ್ಕ ಬೇಜಾರತ್‍ಲ್ ಉಳ್ಳಿರ, ಚೆನ್ನ ಕಾಲ ಆನ ಪಿಂಞ ನಾನ್ ಪುನಃ ನಿಂಗಳ ಕಾಂಬಿ. ಅಕ್ಕ ನಿಂಗಡ ಹೃದಯ ಸಂತೋಷತ್‌ಲ್ ದುಂಬುವ, ಆ ಸಂತೋಷತ್‌ನ ನಿಂಗಡಯಿಂಜ ದಾರ್‌ಕು ಎಡ್‍ಪಕ್ ಕಯ್ಯುಲೆ.

ಯೋಹಾನ 16:33

ನಿಂಗಕ್ ನಾಡಲ್ಲಿ ಸಮಾದಾನ ಇಕ್ಕಂಡೂಂದ್ ನಾನ್ ನಿಂಗಕ್ ಇದ್‍ನೆಲ್ಲಾ ಎಣ್ಣಿಯೆ. ಲೋಕತ್‍ಲ್ ನಿಂಗಕ್ ಕಷ್ಟ ಉಂಡ್ ಆಚೇಂಗಿಯು ದೈರ್ಯತ್‍ಲ್ ಇರಿ; ನಾನ್ ಲೋಕತ್‍ನ ಗೆದ್ದಿಯೇಂದ್ ಎಣ್ಣ್‌ಚಿ.

ಯೋಹಾನ 20:21

ಯೇಸು ಇಂಞೊರ್ ಕುರಿ ನಿಂಗಕ್ ಸಮಾದಾನ ಆಡ್; ನಾಡ ಅಪ್ಪ ನನ್ನ ಅಯಿಚನೆಕೆ ನಿಂಗಳ ನಾನು ಅಯಿಚಂಡುಳ್ಳ್‌ಂದ್ ಎಣ್ಣಿತ್,

ಯೋಹಾನ 20:26

ಪುನಃ ಎಟ್ಟ್ ದಿವಸ ಆನ ಪಿಂಞ, ಯೇಸುರ ಶಿಷ್ಯಂಗ ಪಡಿ ಇಟ್ಟಂಡ್ ಒಳ್‍ಲ್ ಇಂಜತ್. ಅಯಿಂಗಡ ಕೂಡೆ ಇಕ್ಕ ತೋಮ ಸಹ ಇಂಜತ್. ಎಲ್ಲಾ ಪಡಿಕ್ ಬೀಗ ಇಟ್ಟಿತ್ಂಜತ್. ಅಕ್ಕ ಯೇಸು ಅಯಿಂಗಡ ಮದ್ಯತ್‍ಲ್ ಬಪ್ಪಂಜಿ, ನಿಂಗಕ್ ಸಮಾದಾನ ಇಕ್ಕಡ್‍ೕಂದ್ ಎಣ್ಣ್‌ಚಿ.

ಯೋಹಾನ 21:1

ಇಂಞು ಚೆನ್ನ ದಿವಸ ಆನ ಪಿಂಞ, ಯೇಸು ತಿಬೇರಿಯ ಕೆರೆರ ಪಕ್ಕ ಅಯಿಂಗಕ್ ಪುನಃ ಅಂವೊನ ಕಾಂಬ್‌ಚಿಟ್ಟಂಡತ್.

ಯೋಹಾನ 21:14

ಯೇಸು ಚತ್ತಿತ್ ಎದ್ದ ಪಿಂಞ ಶಿಷ್ಯಂಗಕ್ ಅಂವೊನ ಕಾಂಬ್‍ಚಿಡುವದ್ ಇದ್ ಮೂಂದನೆ ಕುರಿ.

ಯೋಹಾನ 7:13

ಆಚೇಂಗಿಯು, ಅಯಿಂಗಕ್ ಯೆಹೂದ್ಯಂಗಡ ಅದಿಕಾರಿಯಂಗಡ ಮೇಲೆ ಪೋಡಿ ಇಂಜಗುಂಡ್, ದಾರೂ ಅಂವೊಂಡ ವಿಷಯತ್‍ನ ದೈರ್ಯವಾಯಿತ್ ಎಣ್ಣ್‌ವಕಿಂಜಿಲೆ.

ಅಪೊಸ್ತಲ 1:3

ಅಂವೊ ಶಿಲುಬೇಲ್ ಕಷ್ಟಪಟ್ಟಿತ್ ಚತ್ತ್‌ಪೋನ ಪಿಂಞ, ಅಂವೊ ಜೀವವಾಯಿತ್ ಉಂಡ್‍ೕಂದ್ ನಾಪದ್ ದಿವಸ, ಅಪೊಸ್ತಲಂಗಕ್ ದುಂಬ ಕುರಿ ದೃಡ ಸಾಕ್ಷಿಯಾಯಿತ್ ಅಂವೊನ ಕಾಂಬ್‌ಚಿಟ್ಟಂಡತ್. ಅನ್ನನೆ ದೇವಡ ರಾಜ್ಯತ್‍ರ ವಿಷಯತ್‍ನ ಪರ್ಂದಂಡ್, ಜೀವ ಉಳ್ಳಂವೊನಾಯಿತ್, ಕಾಂಬ್‌ಚಿಟ್ಟಂಡ್ ಇಂಜತ್.

ರೋಮ್ 15:33

ಸಮಾದಾನತ್‍ರ ದೇವ ನಿಂಗ ಎಲ್ಲಾಡ ಕೂಡೆ ಇರಡ್. ಆಮೆನ್.

1 ಕೊರಿಂಥ 15:5

ಅಂವೊ ಕೇಫಂಗ್ ಪಿಂಞ ಪನ್ನೆರಂಡ್ ಅಪೊಸ್ತಲಂಗಕ್ ಅಂವೊನ ಕಾಂಬ್‍ಚಿಟ್ಟತ್.

ಎಫೆಸ 2:14

ಎನ್ನನೆ ಎಣ್ಣ್‌ಚೇಂಗಿ, ಅಂವೊನೇ ನಂಗಕ್ ಸಮಾದಾನ ತಪ್ಪಂವೊನಾಯಿತು, ಯೆಹೂದ್ಯಂಗ ಪಿಂಞ ಯೆಹೂದ್ಯಂಗಲ್ಲತಯಿಂಗಾಂದ್ ಇಂಜ ದಂಡ್ ಜನತ್‍ನ ಒಂದ್ ಮಾಡಿತ್, ಬೋರೆ ಬೋರೇಂದ್ ಮಾಡಿಯಂಡ್ ವಿರೋದವಾಯಿತ್ ಮದ್ಯತ್‍ಲ್ ನಿಂದಂಡಿಂಜ ಗೋಡೆನ ಪೊಳಿಚತ್.

ಎಫೆಸ 6:23

ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ಅಣ್ಣತಮ್ಮಣಂಗಕ್ ಸಮಾದಾನ ಪಿಂಞ ನಂಬಿಕೇರ ಕೂಡೆ ಪ್ರೀತಿಯು ಕ್‍ಟ್ಟಡ್.

ಫಿಲಿಪ್ಪಿ 1:2

ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು ಸಮಾದಾನವು ನಿಂಗಕ್ ಕ್‍ಟ್ಟಡ್.

2 ಥೆಸಲೊನೀಕ 3:16

ಸಮಾದಾನತ್‍ರ ಒಡೆಯನೇ ಎಲ್ಲಾ ಸಮಯತ್‍ಲು ಎಲ್ಲಾ ವಿದತ್‌ಲು ನಿಂಗಕ್ ಸಮಾದಾನ ತರಡ್. ಒಡೆಯ ಎಕ್ಕಾಲು ನಿಂಗಡ ಕೂಡೆ ಇಕ್ಕಡ್.

ಇಬ್ರಿಯ 7:2

ಮೆಲ್ಕಿಜೆದೇಕಂಗ್ ಅಬ್ರಹಾಮ ಅಂವೊಂಡ ಎಲ್ಲಾ ವಸ್ತುಯಿಂಜ ಪತ್ತ್‌ಲ್ ಒರ್ ಬಾಗತ್‍ನ ಕೊಡ್‍ತತ್. ಮೆಲ್ಕಿಜೆದೇಕ ಎಣ್ಣುವ ಅಂವೊಂಡ ಆದ್ಯ ಪೆದಕ್ ನೀತಿರ ರಾಜಾಂದು, ಪಿಂಞ ಸಾಲೇಮ್‍ರ ರಾಜ ಎಣ್ಣುವ ಪೆದಕ್ ಸಮಾದಾನತ್‍ರ ರಾಜಾಂದು ಅರ್ಥ ಆಪ.

3 ಯೋಹಾನ 1:14

ನಾನ್ ನಿನ್ನ ಬೆರಿಯ ನೋಟ್‌ವೀಂದ್ ನಂಬಿಕೇಲ್ ಉಳ್ಳ. ಅಕ್ಕ ನಂಗ ಮೂಡ್ ನೋಟಿತ್ ತಕ್ಕ್ ಪರಿಯುಲು.

ಪ್ರಕಟನೆ 1:4

ಆಸ್ಯ ಪ್ರಾಂತ್ಯತ್‍ಲ್ ಉಳ್ಳ ಏಳ್ ಸಬೇಕ್ ಯೋಹಾನ ಒಳ್‍ದ್‍ವದ್ ಎಂತ ಎಣ್ಣ್‌ಚೇಂಗಿ: ಇಕ್ಕ ಇಪ್ಪಂವೊನು, ಮಿಂಞ ಇಂಜಂವೊನು, ಮಿಂಞಕ್ ಬಪ್ಪಕುಳ್ಳಂವೊನು ಆಯಿತುಳ್ಳ ಯೇಸು ಕ್ರಿಸ್ತಂಡ ಕೃಪೆ ಪಿಂಞ ಸಮಾದಾನ ನಿಂಗಕ್ ಕ್‍ಟ್ಟಡ್. ಯೇಸು ತಾಂಡ ಸಿಂಹಾಸನತ್‍ರ ಮಿಂಞತ್‌ ವಾಸ ಮಾಡಿಯಂಡುಳ್ಳ ಏಳ್ ಆತ್ಮತ್‍ರಗುಂಡ್,