ಯೋಹಾನ 16:28 - ಕೊಡವ ಬೈಬಲ್

²⁸ ನಾನ್ ಈ ಲೋಕಕ್ ಅಪ್ಪಂಡಯಿಂಜ ಬಂದಿಯೆ, ಇಕ್ಕ ನಾನ್ ಈ ಲೋಕತ್‍ನ ಬುಟ್ಟಿತ್ ಅಪ್ಪಂಡ ಪಕ್ಕ ಪೋಯಂಡುಂಡ್‍ೕಂದ್ ಎಣ್ಣ್‌ಚಿ.

ಯೋಹಾನ 16:28 ပူးပေါင်းရင်းမြစ်များ

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 24:51

ಅನ್ನನೆ ಆಶೀರ್ವಾದ ಮಾಡಿಯಂಡ್ ಇಪ್ಪಕ, ಅಂವೊ ಅಯಿಂಗಳ ಬುಟ್ಟಿತ್ ಪೋಚಿ, ಅಂವೊನ ಪರಲೋಕಕ್ ಎಡ್‍ತಂಡ್ ಪೋಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 9:51

ಪರಲೋಕಕ್ ಅಂವೊನ ಎಡ್‌ತ ಪೋಪಕ್ ಸಮಯ ಪಕ್ಕ ಬಂದಂಡಿಪ್ಪಕ, ಯೇಸು ಯೆರೂಸಲೇಮ್‌ಕ್ ಪೋಪಕ್ ಗೇನ ಮಾಡ್‍ಚಿ.

ಯೋಹಾನ 13:1

ಇಕ್ಕ, ಪಸ್ಕ ನಮ್ಮೆ ಪಕ್ಕಪಕ್ಕ ಬಾತ್. ಯೇಸುಕ್: ನಾನ್ ಈ ಲೋಕತ್‍ನ ಬುಟ್ಟಿತ್ ನಾಡ ಅಪ್ಪಂಡ ಪಕ್ಕ ಪೋಪೀಂದ್ ಗೊತ್ತಾಚಿ. ಆನಗುಂಡ್, ಅಂವೊ ಈ ಲೋಕತ್‍ಲ್ ಇಂಜ ಅಂವೊಂಡಯಿಂಗಳ ಎಚ್ಚಕ್ ಪ್ರೀತಿ ಮಾಡಿತ್ಂಜತೋ ಅನ್ನನೆ ಆಕೀರ್‍ಕತ್ತನೆ ಪ್ರೀತಿ ಮಾಡ್‍ಚಿ.

ಯೋಹಾನ 13:3

ಯೇಸುಕ್: ತಾಂಡ ಅಪ್ಪನಾನ ದೇವ ಎಲ್ಲಾನ ಮಾಡ್‌ವಕುಳ್ಳ ಶಕ್ತಿನ ಕೊಡ್‌ತಿತ್ ಉಂಡ್‍ೕಂದು, ತಾನ್ ದೇವಡಯಿಂಜ ಬಾತ್‍ೕಂದು, ದೇವಡ ಪಕ್ಕ ಪೋಯಂಡುಂಡ್‍ೕಂದು ಗೊತ್ತಾನಗುಂಡ್:

ಯೋಹಾನ 14:28

ನಾನ್ ನಿಂಗಳ ಬುಟ್ಟಿತ್ ಪೋಪಿ ಆಚೇಂಗಿ ನಾನ್ ನಿಂಗಡ ಪಕ್ಕ ಪುನಃ ಬಪ್ಪೀಂದ್ ನಾನ್ ಎಣ್ಣ್‌ನದ್‍ನ ಕ್‍ೕಟಿರಲ್ಲ. ನಿಂಗ ನನ್ನ ಪ್ರೀತಿಚಿಟ್ಟತೇಂಗಿ, ನಾನ್ ಅಪ್ಪಂಡ ಪಕ್ಕ ಪೋಪೀಂದ್ ಎಣ್ಣ್‌ನ ವಿಷಯಕ್ ಕುಶಿ ಪಡುವಿರ, ಎನ್ನಂಗೆಣ್ಣ್‌ಚೇಂಗಿ ಅಪ್ಪ ನಾಕಿಂಜ ಬಲ್ಯಂವೊನಾಯಿತುಂಡ್.

ಯೋಹಾನ 16:10

ನಾನ್ ಅಪ್ಪಂಡ ಪಕ್ಕ ಪೋಪಗುಂಡ್ ನನ್ನ ಇಂಞು ಮಿಂಞಕ್ ನಿಂಗ ಕಾಂಬುಲೆ. ಆನಗುಂಡ್ ನೀತಿರ ವಿಷಯತ್ ಅಂವೊ ಎಣ್ಣಿ ತಪ್ಪ.

ಯೋಹಾನ 16:16

ನಾನ್ ನಾಡ ಅಪ್ಪಂಡ ಪಕ್ಕ ಪೋಪಗುಂಡ್, ಚೆನ್ನ ಕಾಲ ನಿಂಗ ನನ್ನ ಕಾಂಬುಲೆ. ಚೆನ್ನ ಸಮಯ ಆನ ಪಿಂಞ ನನ್ನ ನಿಂಗ ಕಾಂಬಿರಾಂದ್ ಎಣ್ಣ್‌ಚಿ.

ಯೋಹಾನ 16:30

ನೀಕ್ ಎಲ್ಲಾ ವಿಷಯವು ಗೊತ್ತುಂಡ್. ನೀಡ ಪಕ್ಕ ದಾರೂ ಪ್ರಶ್ನೆ ಕ್‍ೕಕಂಡೂಂದ್ ಇಲ್ಲೆ. ಆನಗುಂಡ್ ನೀನ್ ದೇವಡಯಿಂಜ ಬಾತ್‍ೕಂದ್ ನಂಗ ನಂಬುವಾಂದ್ ಎಣ್ಣ್‌ಚಿ.

ಯೋಹಾನ 16:5

ಆಚೇಂಗಿ ಇಕ್ಕ, ನಾನ್ ನನ್ನ ದಾರ್ ಅಯಿಚತೋ ಅಂವೊಂಡ ಪಕ್ಕ ಪೋಯಂಡುಂಡ್; ನೀನ್ ಎಲ್ಲಿಕ್ ಪೋಪಿಯಾಂದ್ ಒಬ್ಬನಾಚೇಂಗಿಯು ನನ್ನ ಕ್‍ೕಟಂಡಿಲ್ಲೆ.

ಯೋಹಾನ 17:11

ಇಂಞು ನಾನ್ ಈ ಲೋಕತ್‍ಲ್ ಇಪ್ಪುಲೆ, ಆಚೇಂಗಿ, ಈಂಗ ಲೋಕತ್‍ಲ್ ಇಪ್ಪ; ನಾನ್ ನೀಡ ಪಕ್ಕ ಬಂದಂಡುಂಡ್, ಪವಿತ್ರವಾಯಿತುಳ್ಳ ಅಪ್ಪನೇ, ನಾನು ನೀನು ಬೋರೆ ಬೋರೆಯಾಯಿತ್ ಅಲ್ಲತೆ, ಒಂದಾಯಿತ್ ಉಳ್ಳನೆಕೆ ಈಂಗಳು ಒಂದಾಯಿತ್ ಇಪ್ಪನೆಕೆ, ನೀನ್ ನಾಕ್ ತಂದಿತುಳ್ಳ ನೀಡ ಪೆದತ್‍ಲ್ ಅಯಿಂಗಳ ಕಾಪಾಡಂಡು.

ಯೋಹಾನ 17:13

ಆಚೇಂಗಿ ಇಕ್ಕ ನಾನ್ ನೀಡ ಪಕ್ಕ ಬಂದಂಡುಂಡ್; ನಾಡ ಕುಶಿ ಪೂರ್ತಿಯಾಯಿತ್ ಅಯಿಂಗಡಲ್ಲಿ ಇಪ್ಪಕಾಯಿತ್ ನಾನ್ ಅಯಿಂಗಡ ಕೂಡೆ ಇಪ್ಪಕಲೆ ಇನ್ನನೆ ನಾನ್ ಎಣ್ಣಿಯಂಡುಳ್ಳ.

ಯೋಹಾನ 17:5

ಇಕ್ಕ, ಅಪ್ಪಾ! ಈ ಲೋಕ ಸೃಷ್ಟಿ ಆಪಕ್ ಮಿಂಞಲೇ ನಾಕ್ ನೀಡ ಪಕ್ಕ ಇಂಜ ಮಹಿಮೇರಗುಂಡ್ ಇಕ್ಕ ನೀನ್ ನೀಡಲ್ಲಿ ನಾಕ್ ಮಹಿಮೆ ಕ್‍ಟ್ಟುವನೆಕೆ ಮಾಡ್.

ಯೋಹಾನ 8:14

ಅಯಿಂಗಕ್ ಯೇಸು ಇನ್ನನೆ ಉತ್ತರ ಕೊಡ್‍ತತ್: ನಾಡ ವಿಷಯತ್ ನಾನೇ ಸಾಕ್ಷಿ ಕೊಡ್‍ತ್‍ಚೇಂಗಿಯು, ನಾಡ ಸಾಕ್ಷಿ ನೇರಾನದಾಯಿತುಂಡ್. ಎನ್ನಂಗೆಣ್ಣ್‌ಚೇಂಗಿ, ನಾನ್ ಎಲ್ಲಿಂಜ ಬಾತ್‍ೕಂದು, ನಾನ್ ಎಲ್ಲಿಕ್ ಪೋಪೀಂದು ನಾಕ್ ಗೊತ್ತುಂಡ್, ಆಚೇಂಗಿ ನಾನ್ ಎಲ್ಲಿಂಜ ಬಾತ್‍ೕಂದು ಎಲ್ಲಿಕ್ ಪೋಪೀಂದು ನಿಂಗಕ್ ಗೊತ್ತ್‌ಲ್ಲೆ.

ಯೋಹಾನ 8:42

ದೇವ ನಿಂಗಡ ನೇರಾನ ಅಪ್ಪನಾಯಿತುಂಡೇಂಗಿ, ನಿಂಗ ನಾಡ ಮೇಲೆ ಪ್ರೀತಿಲ್ ಇಪ್ಪಿರ. ಎನ್ನಂಗೆಣ್ಣ್‌ಚೇಂಗಿ ನಾನ್ ದೇವಡಯಿಂಜ ಬಂದಿತುಳ್ಳ. ನಾನ್ ನಾಡ ಇಷ್ಟ ಪ್ರಕಾರ ಬಂದಿತ್‌ಲ್ಲೆ, ಅಂವೊನೇ ನನ್ನ ಅಯಿಚತ್.