ಯೋಹಾನ 15:16 - ಕೊಡವ ಬೈಬಲ್

¹⁶ ನಿಂಗ ನನ್ನ ಗೊತ್ತ್ ಮಾಡಿತ್‌ಲ್ಲೆ. ನಾನ್ ನಿಂಗಳ ಗೊತ್ತ್ ಮಾಡಿಯೆ; ನಿಂಗ ಪೋಯಿತ್ ಫಲ ತಪ್ಪನೆಕೆಯು, ನಿಂಗಡ ಫಲ ಸದಾ ನಿಕ್ಕಂಡೂಂದು ನಿಂಗಳ ನೇಮಿಚಿಟ್ಟಿಯೆ. ಆನಗುಂಡ್, ನಾಡ ಪೆದತ್‍ಲ್ ಅಪ್ಪನ ನಿಂಗ ಎಂತ ಕ್‍ೕಪಿರೋ, ಅದ್‍ನ ಅಂವೊ ನಿಂಗಕ್ ತಪ್ಪ.

ಯೋಹಾನ 15:16 ပူးပေါင်းရင်းမြစ်များ

ಜ್ಞಾನತ್‌ರ ಪಡಿಮ 11:30

ನೀತಿವಂತಂವೊಂಡ ಫಲ ಜೀವ ತಪ್ಪ ಮರ. ಜನಳ ಗೆಲ್ಲುವಂಚೊ ಜ್ಞಾನ ಉಲ್ಳಂವೊ.

ಮತ್ತಾಯ 21:22

ನಿಂಗಕ್ ನಂಬಿಕೆ ಉಂಡೇಂಗಿ, ನಿಂಗ ಎಂತ ಕ್‍ೕಪಿರ ಅದ್ ನಿಂಗಕ್ ಕ್‌ಟ್ಟುವಾಂದ್ ಯೇಸು ಎಣ್ಣ್‌ಚಿ.

ಮತ್ತಾಯ 7:7

ಕ್‍ೕಳಿ, ಅಕ್ಕ ನಿಂಗಕ್ ತಪ್ಪ. ತ್‍ೕಡಿ ನಿಂಗಕ್ ಕ್‍ಟ್ಟುವ. ಪಡಿನ ತಟ್ಟಿ, ಅಕ್ಕ ನಿಂಗಕ್ ಪಡಿ ತೊರ್‌ಪ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 6:13

ಪೊಲಾಕ ಆಪಕ ಅಂವೊಂಡ ಎಲ್ಲಾ ಶಿಷ್ಯಂಗಳ ಕಾಕಿತ್ ಅಯಿಂಗಡಲ್ಲಿ ಪನ್ನೆರಂಡ್ ಶಿಷ್ಯಂಗಳ ಗೊತ್ತ್ ಮಾಡಿತ್, ಅಯಿಂಗಕ್ ಅಪೊಸ್ತಲಂಗಾಂದ್ ಪೆದ ಕೊಡ್‍ತತ್.

ಯೋಹಾನ 13:18

ನಿಂಗೆಲ್ಲಾಡ ವಿಷಯತ್‍ನ ನಾನ್ ಎಣ್ಣಿತ್‌ಲ್ಲೆ, ನಾನ್ ಗೊತ್ತ್ ಮಾಡ್‍ನಯಿಂಗಳ ನಾಕ್ ಗೊತ್ತುಂಡ್; ಆಚೇಂಗಿಯು, ನಾಡ ಕೂಡೆ ಕೂಳ್ ತಿಂದಂವೊನೇ, ನಾಡ ಮೇಲೆ ಅಂವೊಂಡ ಕಾಲ್‍ರ ಮುಡಿನ ನೇತ್‍ಚೀಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳನೆಕೆ ಇದ್ ಆಚಿ.

ಯೋಹಾನ 15:19

ನಿಂಗ ಈ ಲೋಕತ್‍ರ ಜನತ್‍ರನೆಕೆ ಇಂಜತೇಂಗಿ, ಈ ಲೋಕ ನಿಂಗಳ ಅಯಿಂಗಡ ಜನಾಂದ್ ಪ್ರೀತಿ ಮಾಡ್‌ವಕಿಂಜತ್; ಆಚೇಂಗಿ ನಿಂಗ ಈ ಲೋಕತ್‍ರ ಜನತ್‍ರನೆಕೆ ಇಲ್ಲತಗುಂಡ್ ಪಿಂಞ ನಾನ್ ನಿಂಗಳ ಈ ಲೋಕತ್ಂಜ ಗೊತ್ತ್ ಮಾಡಿತುಳ್ಳಗುಂಡ್ ಈ ಲೋಕ ನಿಂಗಳ ವಿರೋದಿಚಿಡುವ.

ಯೋಹಾನ 15:5

ನಾನೇ ದ್ರಾಕ್ಷಿ ಬಳ್ಳಿ, ನಿಂಗ ಕೊಂಬ್. ಒಬ್ಬ ನಾಡಲ್ಲಿ, ನಾನ್ ಅಂವೊಂಡಲ್ಲಿ ಸ್ತಿರವಾಯಿತ್ ಇಂಜತೇಂಗಿ ದುಂಬ ಫಲ ತಪ್ಪ; ನಿಂಗಕ್ ನನ್ನ ಬುಟ್ಟಿತ್ ಒಂದು ಮಾಡ್‌ವಕ್ ಕಯ್ಯುಲೆ.

ಯೋಹಾನ 6:70

ಅಯಿಂಗಕ್ ಯೇಸು: ಪನ್ನೆರಂಡ್ ಶಿಷ್ಯಂಗಳಾನ ನಿಂಗಳ ನಾನ್ ಗೊತ್ತ್ ಮಾಡ್‍ನ, ಆಚೇಂಗಿ ನಿಂಗಡಲ್ಲಿ ಒಬ್ಬ, ಸೈತಾನಾಯಿತುಂಡ್‍ೕಂದ್ ಎಣ್ಣ್‌ಚಿ.

ಅಪೊಸ್ತಲ 1:24

ಅಯಿಂಗ ಇನ್ನನೆ ಪ್ರಾರ್ಥನೆ ಮಾಡ್‍ಚಿ. ದೇವ, ನೀಕ್ ಎಲ್ಲಾಡ ಹೃದಯ ಪಿಂಞ ಗೇನ ಗೊತ್ತುಂಡ್,

ಅಪೊಸ್ತಲ 1:8

ಆಚೇಂಗಿ ಪವಿತ್ರಾತ್ಮ ನಿಂಗಡ ಮೇಲೆ ಬಪ್ಪಕ, ನಿಂಗ ಶಕ್ತಿವಂತಯಂಗಳಾಯಿತ್ ಯೆರೂಸಲೇಮ್ ಪಟ್ಟಣತ್‍ಲ್, ಯೂದಾಯ ಪ್ರಾಂತ್ಯತ್‍ಲ್, ಸಮಾರ್ಯ ಜಾಗತ್‍ಲ್ ಪಿಂಞ ಬೂಮಿರ ಕಡೇಕತ್ತನೆ ನಾಕ್ ಸಾಕ್ಷಿಯಳಾಯಿತ್‌ಪ್ಪಿರ.

ಅಪೊಸ್ತಲ 10:41

ಆಚೇಂಗಿ, ಎಲ್ಲಾರು ಅಂವೊನ ಕಾಂಬನೆಕೆ ಮಾಡತೆ, ಯೇಸು ಚತ್ತಯಿಂಗ ಮದ್ಯತ್ಂಜ ಜೀವವಾಯಿತ್ ಬಂದ ಪಿಂಞ, ಅಂವೊಂಡ ಕೂಡೆ ಉಂಡಯಿಂಗಳು, ಕುಡಿಚಯಿಂಗಳು ಪಿಂಞ ಮಿಂಞಲೇ ಆಯ್ಕೆ ಮಾಡಿತ್ಂಜ ಸಾಕ್ಷಿಯಂಗಳಾನ ನಂಗಕ್ ಪ್ರತ್ಯಕ್ಷ ಆಯಿತ್ ನಂಗ ಕಾಂಬನೆಕೆ ಮಾಡ್‍ಚಿ.

ಅಪೊಸ್ತಲ 22:14

ಅಕ್ಕ ಅಂವೊ: ನಂಗಡ ಅಜ್ಜಂಗಡ ದೇವ, ನೀನ್ ಅಂವೊಂಡ ಚಿತ್ತತ್‍ನ ಅರಿವಕು, ಆ ನೀತಿವಂತಂವೊನ ಕಾಂಬಕು, ಅಂವೊಂಡ ತಕ್ಕ್‌ನ ಅಂವೊಂಡ ಬಾಯಿಂಜ ಕ್‍ೕಪಕು ನಿನ್ನ ನೇಮಿಚಿಟ್ಟಿತುಂಡ್.

ಅಪೊಸ್ತಲ 9:15

ಆಚೇಂಗಿ ಒಡೆಯ ಅಂವೊಂಗ್: ನೀನ್ ಪೋ; ಎನ್ನಂಗೆಣ್ಣ್‌ಚೇಂಗಿ ಆ ಮನುಷ್ಯನ ಯೆಹೂದ್ಯರಲ್ಲತ ಜನಕು ರಾಜಂಗಕೂ ಪಿಂಞ ಇಸ್ರಾಯೇಲ್ ಜನಾಂಗಕು ನಾಡ ಪೆದತ್‍ನ ಅರಿಚಿಡ್‍ವಕಾಯಿತ್ ನಾನ್ ಆಯ್ಕೆ ಮಾಡ್‍ನ ಪಾತ್ರವಾಯಿತುಂಡ್.

ರೋಮ್ 1:13

ನಾಡ ಅಣ್ಣತಮ್ಮಣಂಗಳೇ, ಬೋರೆ ಜಾಗತ್‍ಲ್ ಉಳ್ಳ ಯೆಹೂದ್ಯ ಅಲ್ಲತಯಿಂಗಡ ಪಕ್ಕ ನಾಕ್ ಫಲ ಕ್‍ಟ್ಟ್‌ನನೆಕೆ, ನಿಂಗಡಲ್ಲಿಯು ನಾಕ್ ಫಲ ಕ್‍ಟ್ಟಂಡೂಂದ್ ನಿಂಗಡ ಪಕ್ಕ ಬಪ್ಪಕ್ ದುಂಬ ಕುರಿ ಗೇನ ಮಾಡ್‍ನ, ಆಚೇಂಗಿ ಇಲ್ಲಿಕತ್ತನೆ ಅದ್ಂಗ್ ತಡೆ ಆಯಂಡಿಂಜತ್‍ೕಂದ್ ನಿಂಗಕ್ ಗೊತ್ತಿಲ್ಲತೆ ಇಪ್ಪದ್ ನಾಕ್ ಕುಶಿಯಿಲ್ಲೆ.

ರೋಮ್ 1:5

ಅಂವೊಂಡ ಮೂಲಕ ಅಂವೊಂಡ ಪೆದಕಾಯಿತ್, ನಂಗ ಯೆಹೂದ್ಯಂಗ ಅಲ್ಲತ ಎಲ್ಲಾ ಜನಡ ಮದ್ಯತ್‍ಲ್ ಪೋಯಿತ್ ದೇವಡ ವಿಷಯತ್‍ನ ಪ್ರಚಾರ ಮಾಡ್‌ವಕ್ ಅಪೊಸ್ತಲಂಗಕಾನ ಅದಿಕಾರವು, ಬಾಗ್ಯವು ದೇವ ನಂಗಕ್ ತಂದಿತುಂಡ್. ಅದ್‍ನಗುಂಡ್ ಅಂವೊನ ನಂಬಿತ್, ಅಂವೊಂಗ್ ಬಗ್ಗಿತ್ ದೇವಕ್ ಮಹಿಮೆ ಕೊಂಡ್ ಬಪ್ಪ.

ರೋಮ್ 15:4

ದೇವಡ ವಾಕ್ಯತ್‍ರಗುಂಡ್ ಕ್‍ಟ್ಟುವ ಪೊರುಮೆ ಪಿಂಞ ಸಮಾದಾನತ್‍ರ ಮೂಲಕ ನಂಗ ನಿರಿಕ್ಷೇಲ್ ಇಪ್ಪಕಾಯಿತ್, ಮಿಂಞಲೇ ದೇವಡ ವಾಕ್ಯತ್‍ಲ್ ಒಳ್‍ದಿ ಬೆಚ್ಚದೆಲ್ಲ ನಂಗಕ್ ಒರ್ ಬೋದನೆಯಾಯಿತ್ ಬೆಚ್ಚಿತುಂಡ್.

ರೋಮ್ 9:21

ಒರ್ ಕುಂಬಾರಂಗ್, ಒರೇ ಕೊಜೆ ಮಣ್ಣ್‌ಲ್, ಒರ್ ಪಾತ್ರತ್‍ನ ಗನಪಟ್ಟ ಉಪಯೋಗಕಾಯಿತು, ಇಂಞೊರ್ ಪಾತ್ರತ್‍ನ ಸಾದಾರಣ ಉಪಯೋಗಕಾಯಿತು ಮಾಡ್‌ವಕ್, ಆ ಕುಂಬಾರಂಗ್ ಮಣ್ಣ್‌ರ ಮೇಲೆ ಅದಿಕಾರ ಇಲ್ಲೆಯಾ?

1 ಕೊರಿಂಥ 10:11

ನಂಗಡ ಯೆಹೂದ್ಯ ಮುತ್ತಜ್ಜಂಗಕ್ ಆನದ್ ನಂಗಕ್ ಒರ್ ಉದಾರಣೆಯಾಯಿತ್ ಉಂಡ್; ಲೋಕತ್‍ರ ಆಕೀರ್ ಕಾಲತ್‍ಲ್ ಬದ್‍ಕ್‍ವ ನಂಗಕ್ ಇದ್ ಎಚ್ಚರವಾಯಿತ್ ಇಪ್ಪಕ್ ಇದ್‍ನೆಲ್ಲಾ ಒಳ್‍ದಿ ಬೆಚ್ಚಿತುಂಡ್.

ಗಲಾತ್ಯ 1:15

ಅನ್ನನೆ ಇಂಜತೇಂಗಿಯು, ನಾನ್ ಪುಟ್ಟ್‌ವಕಿಂಜ ಮಿಂಞಲೇ ನನ್ನ ಬೋರೆ ಮಾಡಿತ್ ಅಂವೊಂಡ ಕೃಪೇರಗುಂಡ್ ನನ್ನ ದೇವ ಕಾಕ್‍ಚಿ.

ಎಫೆಸ 2:10

ಎನ್ನನೆ ಎಣ್ಣ್‌ಚೇಂಗಿ, ನಲ್ಲ ಕೆಲಸ ಮಾಡ್‌ವಕಾಯಿತ್ ನಂಗಳ ಪುದಿಯದಾಯಿತ್ ಕ್ರಿಸ್ತ ಯೇಸುರಲ್ಲಿ ಸೃಷ್ಟಿ ಮಾಡ್‍ನ ದೇವಡ ಕ್ರಿಯೇಯಾಯಿತುಂಡ್; ಅದ್‍ಲ್ ನಂಗ ನಡ್‍ಕಂಡೂಂದ್ ದೇವ ಮಿಂಞಲೇ ತಯಾರ್ ಮಾಡಿತುಂಡ್.

ಕೊಲೊಸ್ಸೆ 1:23

ನಿಂಗಕ್ ಕ್‍ಟ್ಟ್‌ನ ಈ ನಲ್ಲ ಸುದ್ದಿರ ನಂಬಿಕೇನ ಗಟ್ಟಿಯಾಯಿತ್ ಪುಡ್‍ಚಂಡ್, ಸ್ತಿರವಾಯಿತ್, ದೃಡವಾಯಿತ್ ನಿಂದಂಡಿಂಜತೇಂಗಿ ನಿಂಗಕ್ ಅನ್ನನೆ ಕ್‍ಟ್ಟುವ. ಈ ನಲ್ಲ ಸುದ್ದಿ, ಈ ಲೋಕತ್‍ರ ಎಲ್ಲಾ ಸೃಷ್ಟಿಕ್ ಅರಿಚಿಟ್ಟಂಡುಂಡ್, ಅದ್ಂಗಾಯಿತ್, ಪೌಲನಾನ ನಾನ್ ದೇವಡ ಸೇವಕನಾಯಿತ್ ಉಳ್ಳ.

ಕೊಲೊಸ್ಸೆ 1:6

ನಿಂಗಡ ಪಕ್ಕ ಬಂದ ಆ ದೇವಡ ನಲ್ಲ ಸುದ್ದಿ, ಇಡೀ ಲೋಕಕ್ ಪೋಯಂಡುಂಡ್. ಅದ್ ನಿಂಗಡ ಪಕ್ಕ ಬಂದಿತ್, ನಿಂಗ ಅದ್‍ನ ಕ್‍ೕಟಿತ್ ದೇವಡ ಕೃಪೇನ ನೇರಾಯಿತ್ ಅರ್ಥಮಾಡ್‍ನ ದಿವಸತ್ಂಜ ನಿಂಗಡ ಬದ್‍ಕ್‍ಲ್ ಎನ್ನನೆ ಫಲ ತಂದ್‍ೕಂಡುಂಡೊ, ಅನ್ನನೆ ಅದ್ ಪೋಪ ಜಾಗತ್‍ಲೆಲ್ಲಾ ಸಹ, ಜನಡ ಬದ್‍ಕ್‍ಲ್ ಮಾಡಿಯಂಡುಂಡ್.

1 ತಿಮೊಥೆಯ 2:7

ಈ ನಲ್ಲ ಸುದ್ದಿಕಾಯಿತೇ ದೇವ ನನ್ನ ಒರ್ ಬೋದಕನಾಯಿತ್ ಪಿಂಞ ಒರ್ ಅಪೊಸ್ತಲನಾಯಿತ್ ನೇಮಿಚಿಟ್ಟತ್. ನಂಬಿಕೇರ ವಿಷಯತ್‍ನ, ಸತ್ಯತ್‍ರ ವಿಷಯತ್‍ನ ಅನ್ಯ ಜನಕ್ ಬೋದನೆ ಮಾಡ್‌ವಕಾಯಿತ್ ನನ್ನ ಅಯಿಚತ್. ನಾನ್ ಪೊಟ್ಟ್ ಪರಿಯತೆ ಯೇಸು ಕ್ರಿಸ್ತಂಡ ಪೆದತ್‍ಲ್ ಸತ್ಯತ್‍ನ ಎಣ್ಣಿಯಂಡುಂಡ್.

2 ತಿಮೊಥೆಯ 1:11

ಈ ನಲ್ಲ ಸುದ್ದಿಕಾಯಿತ್ ದೇವ ನನ್ನ ಒರ್ ಪ್ರಸಂಗಿಯಾಯಿತ್, ಒರ್ ಅಪೊಸ್ತಲನಾಯಿತ್ ಪಿಂಞ ಬೋದಕನಾಯಿತ್ ನೇಮಿಚಿಟ್ಟಿತುಂಡ್.

2 ತಿಮೊಥೆಯ 2:2

ಎಚ್ಚಕೋ ಸಾಕ್ಷಿರ ಮಿಂಞತ್, ನಾನ್ ಮಾಡ್‍ನ ಬೋದನೇನೆಲ್ಲ ಕ್‍ೕಟ ನೀನ್, ಅದ್‍ನ, ಬೋರೆಯಿಂಗಕ್ ಪಡಿಪ್‍ಚಿಡ್‍ವಕ್ ಯೋಗ್ಯವಾನ ನಂಬಿಕಸ್ತಂಡ ಪಕ್ಕ ಒಪ್ಪ್‌ಚಿಡ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 1:5

ನಂಗ ಕ್ರೇತ ದ್ವೀಪತ್‍ಲ್ ಮಾಡಿಯಂಡಿಂಜ ದೇವಡ ಸೇವೇನ ಪೂರ್ತಿಮಾಡ್‌ವಕಾಯಿತು, ನಾನ್ ನೀಕ್ ಎಣ್ಣ್‌ನನೆಕೆ ಪಟ್ಟಣತ್ಂಜ ಪಟ್ಟಣಕ್ ಸಬೆರ ಪೆರಿಯಯಿಂಗಳ ನೇಮಿಚಿಡ್‌ವಕಾಯಿತು ನಾನ್ ನಿನ್ನ ಅಲ್ಲಿ ಬುಟ್ಟಿತ್ ಬಂದಿಯೆ.

ಇಬ್ರಿಯ 11:4

ನಂಬಿಕೇರ ಮೂಲಕ, ಹೇಬೆಲ ತಾಂಡ ಅಣ್ಣ ಕಾಯಿನ ಮಾಡ್‍ನ ಬಲಿಕಿಂಜ ವಿಶೇಷವಾನ ಬಿಲೀನ ದೇವಕ್ ಅರ್ಪಣೆ ಮಾಡ್‍ಚಿ; ಅದ್ಂಗಾಯಿತ್ ಅಂವೊಂಗ್ ನೀತಿವಂತಂವೋಂದ್ ಸಾಕ್ಷಿ ಕ್‍ಟ್ಟ್‌ಚಿ; ಹೇಬೆಲಂಡ ಕಾಣಿಕೆರ ವಿಷಯತ್ ದೇವ ಸಹ ಸಾಕ್ಷಿ ಕೊಡ್‍ತತ್, ಅಂವೊ ಚತ್ತ್ ಪೋಚೇಂಗಿಯು ಇಂದ್ ಸಹ ತಕ್ಕ್ ಪರ್ಂದಂಡುಂಡ್.

ಯಾಕೋಬ 3:18

ಸಮಾದಾನ ಮಾಡ್‌ವಯಿಂಗ ಸಮಾದಾನತ್‍ಲ್ ಬಿತ್ತುವ ಕುರು, ನೀತಿರ ಪಣ್ಣ್‌ನ ತಪ್ಪ.

1 ಪೇತ್ರ 3:15

ಆಚೇಂಗಿ, ಕ್ರಿಸ್ತಂಗ್ ನಿಂಗಡ ಹೃದಯತ್‍ಲ್ ಮರ್ಯಾದೆ ಕೊಡ್‍ಕಂಡು, ಅಂವೊನ ಒಡೆಯನಾಯಿತ್ ಗನಪಡ್‌ತಂಡು. ನಿಂಗಡ ನಿರಿಕ್ಷೇರ ವಿಷಯತ್ ದಾರಾಚೇಂಗಿ ಪ್ರಶ್ನೆ ಇಟ್ಟತೇಂಗಿ, ಅಯಿಂಗ ಎಲ್ಲಾರ್‌ಕು ಉತ್ತರ ಕೊಡ್‍ಪನೆಕೆ, ತಾಯಾರಾಯಿತ್ ಇರಿ. ಆಚೇಂಗಿ ಅದ್‍ನ ಮರ್ಯಾದೆಲ್ ಶಾಂತತ್‍ಲ್ ಮಾಡಂಡು.

1 ಪೇತ್ರ 3:2

ಪಿಂಞ ಅಯಿಂಗ ನಿಂಗಡ ಪವಿತ್ರವಾನ ಬಕ್ತಿಯುಳ್ಳ ನಡತೇನ ಕಾಂಬಕ ಅಯಿಂಗಳ ದೇವಡ ಪಕ್ಕ ಬಲಿಪಕ್ ಆಪ.

1 ಯೋಹಾನ 4:10

ನೇರಾನ ಪ್ರೀತಿ ಎಂತ ಎಣ್ಣ್‌ಚೇಂಗಿ, ನಂಗ ದೇವಡ ಮೇಲೆ ಬೆಚ್ಚ ಪ್ರೀತಿ ಅಲ್ಲ, ದೇವ ನಂಗಡ ಮೇಲೆ ಬೆಚ್ಚ ಪ್ರೀತಿಯೇ. ಅದ್, ನಂಗಡ ಪಾಪತ್‍ನ ಪರಿಹಾರ ಮಾಡ್‌ವಕ್ ದೇವ ತಾಂಡ ಒರೇ ಮೋಂವೊನ ಈ ಲೋಕಕ್ ಅಯಿಚದ್.

1 ಯೋಹಾನ 4:19

ನಂಗ ಪ್ರೀತಿ ಮಾಡ್‌ವಕ್ ಮಿಂಞ ದೇವ ನಂಗಳ ಪ್ರೀತಿ ಮಾಡ್‍ನಗುಂಡ್ ನಂಗ ಅಂವೊನ ಪ್ರೀತಿ ಮಾಡ್‌ವ.