ಯಾಕೋಬ 2:5 - ಕೊಡವ ಬೈಬಲ್

⁵ ನಾಡ ಪ್ರೀತಿರ ಅಣ್ಣತಮ್ಮಣಂಗಳೇ, ಕ್‍ೕಳಿ; ದೇವ ಈ ಲೋಕತ್‍ರ ಬಡವಂಗಳ, ನಂಬಿಕೇಲ್ ಐಶ್ವರ್ಯ ಉಳ್ಳಯಿಂಗಳಾಯಿತ್, ಅಂವೊನ ಪ್ರೀತಿ ಮಾಡ್‌ವಯಿಂಗಕ್ ಅಂವೊ ವಾಗ್ದಾನ ಮಾಡ್‍ನ ರಾಜ್ಯತ್‍ನ ಆಳುವಯಿಂಗಳಾಯಿತ್ ಗೊತ್ತ್ ಮಾಡಿತಲ್ಲ?

ಯಾಕೋಬ 2:5 ပူးပေါင်းရင်းမြစ်များ

ಜ್ಞಾನತ್‌ರ ಪಡಿಮ 13:7

ಒಂದು ಇಲ್ಲತಂವೊ ತನ್ನ ಐಶ್ವರ್ಯವಂತಂವೊನಾಯಿತ್‌ ಕಾಂಬ್‌ಚಿಡುವಂವೊನು ಉಂಡ್; ದುಂಬ ಐಶ್ವರ್ಯವ ಉಳ್ಳಂವೊ ತನ್ನ ಗರಿಬಂಡನೆಕೆ ಕಾಂಬ್‌ಚಿಡುವಂವೊನು ಉಂಡ್.

ಜ್ಞಾನತ್‌ರ ಪಡಿಮ 7:24

ಆನಗುಂಡ್‌ ಮಕ್ಕಳೇ, ನಾಡ ತಕ್ಕ್‌ನ ಕ್‍ೕಳಿ, ನಾನ್‌ ಎಣ್ಣುವ ತಕ್ಕ್‌ಕ್‌ ಕೆಮಿ ಕೊಡಿ.

ಜ್ಞಾನತ್‌ರ ಪಡಿಮ 8:32

ಆನಗುಂಡ್‌ ಮಕ್ಕಳೇ, ನಾಡ ತಕ್ಕ್‌ನ ಕ್‍ೕಳಿ. ನಾನ್‌ ಎಣ್ಣ್‌ವಾನ ಕ್‍ೕಟಿತ್‌ ಅದ್‌ಂಗ್‌ ಬಗ್ಗಿತ್‌ ನಡ್‌ಪಯಿಂಗ ಆಶೀರ್ವಾದ ಪಡ್‌ಂದಯಿಂಗ.

ಮತ್ತಾಯ 11:5

ಕುರ್‌ಡಂಗ ಕಂಡಂಡುಂಡ್, ಕುಂಟಂಗ ನಡ್ಂದಂಡುಂಡ್, ಕುಷ್ಟರೋಗಿಯಂಗ ವಾಸಿ ಆಯಂಡುಂಡ್, ಕಿವ್‍ಡಂಗ್ ಕ್‍ೕಟಂಡು, ಚತ್ತಯಿಂಗ ಎದ್ದಡುಂಡ್, ಗರೀಬಂಗಕ್ ನಲ್ಲ ಸುದ್ದಿ ಪ್ರಚಾರ ಆಯಂಡುಂಡ್.

ಮತ್ತಾಯ 25:34

ಅಕ್ಕ ರಾಜ ತಾಂಡ ಬಲ್‌ತೆ ಬರಿಲ್ ಉಳ್ಳ ಜನಳ ನೋಟಿತ್: ನಾಡ ಅಪ್ಪಂಡ ಆಶೀರ್ವಾದ ಪಡ್ಂದಯಿಂಗಳೇ ಬಾರಿ, ಈ ಲೋಕ ಸೃಷ್ಟಿ ಆಪಕ್ ಮಿಂಞ ತಯಾರ್ ಮಾಡ್‍ನ ನಿಂಗಡ ರಾಜ್ಯತ್‍ನ ಎಡ್‌ತೊಳಿ.

ಮತ್ತಾಯ 5:3

ಆತ್ಮತ್‍ಲ್ ಗರೀಬ ಆಯಿತುಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ; ಪರಲೋಕ ರಾಜ್ಯ ಅಯಿಂಗಡದಾಯಿತ್‌ಪ್ಪ.

ಮಾರ್ಕ 7:14

ಇಂಞೊಮ್ಮ ಅಂವೊ ಜನಡ ಗುಂಪ್‍ನ ಕಾಕುವಂಜಿ, ಅಯಿಂಗಳ ನೋಟಿತ್: ನಿಂಗ ಇದ್‍ನ ಚಾಯಿ ಕ್‍ೕಳಿ, ನಾಡ ತಕ್ಕ್‌ನ, ಕ್‍ೕಟಂಡ್ ಅರ್ಥ ಮಾಡಿಯೊಳಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 12:21

ಅಕ್ಕು, ಈ ಲೋಕತ್‍ರ ಐಶ್ವರ್ಯತ್‍ನ ಪರಲೋಕತ್‍ಲ್ ಉಳ್‍ಕೆ ಮಾಡತೆ ಅಯಿಂಗಕಾಯಿತ್ ಉಳ್‍ಕೆ ಮಾಡ್‌ವಯಿಂಗಕ್ ಇನ್ನನೆ ಆಪಾಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 12:32

ನಾಡ ಶಿಷ್ಯಂಗಳೇ, ನಿಂಗ ಒಂದು ಇಲ್ಲತ ನಾಡ ಒರ್ ಚೆರಿಯ ಗುಂಪಾಯಿತ್ ಉಂಡೇಂಗಿಯು, ಬೊತ್ತತಿ, ಎನ್ನಂಗೆಣ್ಣ್‌ಚೇಂಗಿ ಅಪ್ಪನಾನ ದೇವ ಅಂವೊ ಆಳುವ ರಾಜ್ಯತ್‍ಲ್ ನಿಂಗ ಬದ್‍ಕ್‍ವಕಾಯಿತ್ ನಿಂಗಳ ಕುಶೀಲ್ ಗೊತ್ತ್ ಮಾಡಿತುಂಡ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 16:22

ಇನ್ನನೆ ಇಪ್ಪಕ ಬಿಕ್ಷೆಕಾರ ಚತ್ತ್ ಪೋಚಿ. ಅಂವೊನ ದೇವದೂತಂಗ ಎಡ್‍ತಂಡ್ ಪೋಯಿತ್ ಅಬ್ರಹಾಮಂಡ ಪಕ್ಕ ಅಳ್‍ಪ್‍ಚಿಟ್ಟತ್. ಪಿಂಞ ಆ ಐಶ್ವರ್ಯವಂತಂವೊನು ಚತ್ತ್ ಪೋಚಿ, ಅಂವೊನ ಪೂತತ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 16:25

ಅಕ್ಕ ಅಬ್ರಹಾಮ: ಮೋಂವೊನೇ, ನೀಕ್ ಬೋಂಡಿಯಾನ ಸುಕತ್‌ನ ನೀಡ ಜೀವಮಾನತ್‌ಲೆ ಅನುಬವಿಚಿಟ್ಟಿತ್ತುಳ್ಳಿಯ. ಅಕ್ಕ ಲಾಜರ ಕಷ್ಟಪಟ್ಟಂಡಿಂಜದ್‍ನ ನೀಕ್ ಗೇನ ಇಲ್ಲೆಯಾ? ಇಕ್ಕ ಲಾಜರಂಗ್ ಸುಕ, ನೀಕ್ ಕಷ್ಟ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 22:29

ಆನಗುಂಡ್, ನಾಡ ಅಪ್ಪ ನಾಕ್ ಒರ್ ರಾಜ್ಯತ್‍ನ ತಂದನೆಕೆ, ನಾನ್ ನಿಂಗಕು ತಪ್ಪಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 6:20

ಅಕ್ಕ ಯೇಸು, ಅಂವೊಂಡ ಶಿಷ್ಯಂಗಳ ನೋಟಿತ್: ಗರೀಬಂಗಳಾಯಿತುಳ್ಳ ನಿಂಗ ಆಶೀರ್ವಾದ ಪಡ್ಂದಯಿಂಗ, ದೇವಡ ರಾಜ್ಯ ನಿಂಗಡ‌ದ್!

ಯೋಹಾನ 7:48

ಫರಿಸಾಯಂಗ ಅಥವ ಅದಿಕಾರಿಯಂಗ ದಾರೇಂಗಿ ಅಂವೊನ ನಂಬಿತುಂಡಾ?

ಅಪೊಸ್ತಲ 7:2

ಅದ್ಂಗ್ ಸ್ತೆಫನ: ಅಣ್ಣತಮ್ಮಣಂಗಳೇ, ಪೆರಿಯಯಿಂಗಳೇ, ನಾನ್ ಎಣ್ಣ್‌ವಾನ ಕ್‍ೕಳಿ. ನಂಗಡ ಅಜ್ಜನಾನ ಅಬ್ರಹಾಮ ಖಾರಾನ ಎಣ್ಣ್‌ವ ಊರ್‌ಲ್ ಬಂದಿತ್ ವಾಸ ಮಾಡ್‌ವಕ್ ಮಿಂಞ, ಅಂವೊ ಮೆಸೊಪೊತಾಮ್ಯ ನಾಡ್‍ಲ್ ಇಪ್ಪಕಲೆ ಮಹಿಮೇರ ದೇವ ಅಂವೊಂಗ್ ಪ್ರತ್ಯಕ್ಷ ಆಚಿ.

ರೋಮ್ 8:17

ಇಕ್ಕ, ನಂಗ ಮಕ್ಕಾಳಾಯಿತ್ಂಜತೇಂಗಿ ಬಾದ್ಯೆತೆಕಾರಂಗಳಾಯಿತ್ ಉಂಡ್, ದೇವಡ ಹಕ್ಕ್‌ದಾರಂಗಳು, ಕ್ರಿಸ್ತಂಡ ಕೂಡೆ ಹಕ್ಕ್‌ದಾರಂಗಳಾಯಿತುಂಡ್, ಕ್ರಿಸ್ತಂಡ ಕೂಡೆ ಕಷ್ಟಪಟ್ಟತೇಂಗಿ, ಅಂವೊಂಡ ಕೂಡೆ ನಂಗಳು ಸಹ ಮಹಿಮೆನ ಪಡೆಯುವ.

1 ಕೊರಿಂಥ 2:9

ದೇವಡ ವಾಕ್ಯತ್‍ಲ್ ಒಳ್‍ದ್‍ನ ಪ್ರಕಾರ: ದೇವ, ಅಂವೊಂಡ ಮೇಲೆ ಪ್ರೀತಿ ಉಳ್ಳಯಿಂಗಕ್ ತಯಾರ್ ಮಾಡಿತುಳ್ಳದ್‍ನ, ಒರ್ ಕಣ್ಣ್ ಕಂಡಿತು ಇಲ್ಲೆ, ಕೆಮಿ ಕ್‍ೕಟಿತು ಇಲ್ಲೆ, ಅದ್ಂಡ ಗೇನ ಮನುಷ್ಯಂಡ ಹೃದಯತ್‍ಲ್ ಪುಟ್ಟಿತು ಇಲ್ಲೆ.

2 ಕೊರಿಂಥ 4:15

ದೇವಡ ಕೃಪೆ ದುಂಬ ಜನಡ ಪಕ್ಕ ಪೋಯಂಡ್, ದೇವಡ ಮಹಿಮೆಕಾಯಿತ್ ಅಂವೊಂಗ್ ವಂದನೆ ಎಣ್ಣುವದ್ ಅದಿಯಾಯಂಡಿಪ್ಪನೆಕೆ ಇದೆಲ್ಲಾ ನಿಂಗಕಾಯಿತ್ ಆಯಂಡುಂಡ್.

2 ಕೊರಿಂಥ 6:10

ದುಃಖತ್‍ಲ್ ಇಂಜತೇಂಗಿಯು, ಎಕ್ಕಾಲು ಕುಶೀಲ್ ಉಳ್ಳಯಿಂಗಳಾಯಿತು, ಗರಿಬಂಗಳಾಯಿತ್ ಇಂಜತೇಂಗಿಯು, ದುಂಬ ಜನಳ ಐಶ್ವರ್ಯವಂತಯಿಂಗಳಾಯಿತ್ ಮಾಡ್‌ವಯಿಂಗಳಾಯಿತು, ಒಂದು ಇಲ್ಲತಯಿಂಗಳಾಯಿತ್ ಇಂಜತೇಂಗಿಯು, ಎಲ್ಲಾ ಉಳ್ಳಯಿಂಗಡನೆಕೆ ನಂಗಳ ಕಾಂಬ್‍ಚಿಟ್ಟಂಡುಂಡ್.

2 ಕೊರಿಂಥ 8:9

ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗಕ್ ಗೊತ್ತುಂಡ್; ಅಂವೊ ಐಶ್ವರ್ಯವಂತಂವೊನಾಯಿತ್ ಇಂಜತೇಂಗಿಯು, ಅಂವೊಂಡ ಗರೀಬತನತ್‍ರಗುಂಡ್ ನಿಂಗ ಐಶ್ವರ್ಯವಂತಯಿಂಗಳಾಯಿತ್ ಆಪನೆಕೆ ಅಂವೊ ನಿಂಗಕಾಯಿತ್ ಗರೀಬನಾಚಿ.

ಎಫೆಸ 1:18

ಅಂವೊ ನಿಂಗಳ ಕಾಕ್‍ನಗುಂಡ್ ನಿಂಗಕುಳ್ಳ ನಿರೀಕ್ಷೆ ಎಂತದ್‍ೕಂದು, ದೇವಡ ಮಕ್ಕಡ ಪಕ್ಕ ನಂಗಕುಳ್ಳ ಬಾದ್ಯತೆರ ಮಹಿಮೇರ ಐಶ್ವರ್ಯ ಎಂತದ್‍ೕಂದ್ ಗೊತ್ತಾಪಕು,

ಎಫೆಸ 3:8

ದೇವಡ ಮಕ್ಕಡಲ್ಲಿ ಎಲ್ಲಾಡಕಿಂಜ ಚೆರಿಯಂವೊನಾನ ನಾಕ್, ಕ್ರಿಸ್ತಂಡ ಲೆಕ್ಕ ಮಾಡ್‌ವಕ್ ಕಯ್ಯತಚ್ಚಕ್ ಉಳ್ಳ ಐಶ್ವರ್ಯತ್‍ನ ಯೆಹೂದ್ಯಂಗಲ್ಲತ ಜನಕ್ ಅರಿಚಿಡುವಕುಳ್ಳ ಈ ಕೃಪೆ ನಾಕ್ ಕ್‍ಟ್ಟ್‌ಚಿ.

1 ಥೆಸಲೊನೀಕ 2:12

ದೇವ ಅಂವೊಂಡ ರಾಜ್ಯಕು, ಮಹಿಮೆಕು, ನಿಂಗ ಪಾಲ್‍ದಾರಂಗಳಾಯಿತ್ ಇಪ್ಪಕ್ ನಿಂಗಳ ಕಾಕ್‍ನಗುಂಡ್, ನಂಗ ನಿಂಗಕ್ ಬುದ್ದಿ ಎಣ್ಣಿಯಂಡ್, ಸಮಾದಾನ ಮಾಡಿಯಂಡ್, ದೇವಡ ಮಕ್ಕ ಎನ್ನನೆ ಇರಂಡುವೋ ಅನ್ನನೆ ಬದ್‍ಕಂಡೂಂದ್ ನಿಂಗಳ ಬೋಡಿಯಂಡಿಂಜತ್.

2 ಥೆಸಲೊನೀಕ 1:5

ನಿಂಗ ದೇವಡ ರಾಜ್ಯಕಾಯಿತ್ ಹಿಂಸೆನ ಸಹಿಸಿಯಂಡ್ ಉಳ್ಳಾಂಗ್, ಆ ರಾಜ್ಯಕ್ ನಿಂಗ ಯೋಗ್ಯವಾಯಿತ್ ಉಳ್ಳಿರಾಂದ್ ಪಿಂಞ ದೇವ ನ್ಯಾಯವಾನ ತೀರ್ಪ್ ತಪ್ಪಾಂದ್ ಎಣ್ಣ್‌ವಕ್ ನಿಂಗಡ ಸಹಿಸುವ ಗುಣವೇ ಸಾಕ್ಷಿಯಾಯಿತ್ ಉಂಡ್.

1 ತಿಮೊಥೆಯ 6:18

ನಲ್ಲದ್ ಮಾಡ್‌ವದ್‍ಲ್, ಸಹಾಯ ಮಾಡ್‌ವದ್‍ಲ್ ಐಶ್ವರ್ಯವಂತಂಗಳಾಯಿತ್, ಉದಾರ ಮನಸ್ಸ್‌ಲ್ ಕೊಡ್‍ಪಯಿಂಗಳಾಯಿತ್, ಅಯಿಂಗಡದ್‍ನ ಕಷ್ಟತ್‍ಲ್ ಉಳ್ಳಯಿಂಗಕ್ ಕೊಡ್‍ಪಕ್ ಎಣ್ಣ್.

2 ತಿಮೊಥೆಯ 4:18

ಅಕ್ಕು, ದೇವ ನನ್ನ ಎಲ್ಲಾ ಸೈತಾನಂಡ ಕ್‍ೕಡಿಂಜ ಕಾಪಾಡಿತ್, ಅಂವೊಂಡ ಪಕ್ಕ ಪರಲೋಕ ರಾಜ್ಯಕ್ ಕೂಟಿಯೊವ. ನಿತ್ಯ ನಿತ್ಯಕೂ ಅಂವೊಂಗ್ ಮಹಿಮೆ ಕ್‍ಟ್ಟಡ್.

2 ತಿಮೊಥೆಯ 4:8

ಆನಗುಂಡ್, ಇಕ್ಕ ನಾಕ್ ನೀತಿರ ಕಿರೀಟ ಬೆಚ್ಚಿತುಂಡ್. ನೀತಿಯುಳ್ಳ ನ್ಯಾಯಕಾರನಾನ ಒಡೆಯ ಆ ದಿವಸತ್‍ಲ್ ಅದ್‍ನ ನಾಕ್ ತಪ್ಪ; ನಾಕ್ ಮಾತ್ರ ಅಲ್ಲ, ಅಂವೊ ಪುನಃ ಬಪ್ಪದ್‍ನ ಕಾಂಬಕ್ ಪಾರಕಾತಂಡುಳ್ಳ ಎಲ್ಲಾರ್‌ಕು ಅದ್‍ನ ತಪ್ಪ.

ಇಬ್ರಿಯ 11:26

ಐಗುಪ್ತ ದೇಶತ್‍ರ ಆಸ್ತಿಕಿಂಜ ಕ್ರಿಸ್ತಂಗಾಯಿತ್ ಕ್‍ಟ್ಟುವ ಅವಮಾನತ್‍ನ ಬಲ್ಯ ಆಸ್ತಿಯಾಯಿತ್ ಲೆಕ್ಕ ಮಾಡಿತ್, ಇಂಞು ಮಿಂಞಕ್ ಬಪ್ಪಕುಳ್ಳ ಪ್ರತಿಫಲಕಾಯಿತ್ ನೋಟಿಯಂಡಿಂಜತ್.

ಯಾಕೋಬ 1:12

ಸೋದನೆನ ಸಹಿಸುವ ಮನುಷ್ಯ ಆಶೀರ್ವಾದ ಪಡ್ಂದಂವೊ; ಎನ್ನಂಗೆಣ್ಣ್‌ಚೇಂಗಿ ಅಂವೊ ಚೋತ್‍ಪೋಯಿತಿಲ್ಲೇಂದ್ ಗೊತ್ತಾನ ಪಿಂಞ, ದೇವನ ಪ್ರೀತಿಚಿಡ್‌ವಯಿಂಗಕಾಯಿತ್ ದೇವ ವಾಗ್ದಾನ ಮಾಡ್‍ನ ನಿತ್ಯ ಜೀವತ್‍ರ ಕಿರೀಟ ಅಂವೊಂಗ್ ಕ್‍ಟ್ಟ್‌ವ.

ಯಾಕೋಬ 1:16

ನಾಡ ಅಣ್ಣತಮ್ಮಣಂಗಳೇ, ನಿಂಗ ಮೋಸ ಪೋಕತಿ.

ಯಾಕೋಬ 1:19

ನಾಡ ಅಣ್ಣತಮ್ಮಣಂಗಳೇ! ಎಲ್ಲಾರು ಕ್‍ೕಪಕ್ ಚುರ್‌ಕಾಯಿತು, ತಕ್ಕ್ ಪರಿಯುವಕ್ ನಿದಾನವಾಯಿತು, ಚೆಡಿ ಮಾಡ್‌ವಕ್ ತಾಳ್ಮೆಯಾಯಿತು ಇಕ್ಕಂಡು.

ಯಾಕೋಬ 1:9

ಒರ್ ಗರೀಬನ, ದೇವ ಬಲ್ಯ ಸ್ತಾನತ್‍ಲ್ ಬೆಚ್ಚಿತುಳ್ಳಗುಂಡ್ ಅಂವೊ ಕುಶಿ ಪಡಂಡು.

1 ಪೇತ್ರ 1:4

ಒರ್‌ಕಾಲು ಬಾಡಿ ಪೋಕತ ಅಥವ ನಾಶ ಆಯಿ ಪೋಕತ, ಪಾಳಾಯಿ ಪೋಪಕ್ ಕಯ್ಯತ ಬಾದ್ಯತೇನ ಪರಲೋಕತ್‍ಲ್ ನಂಗಕಾಯಿತ್ ಬೆಚ್ಚಿತುಂಡ್.

2 ಪೇತ್ರ 1:11

ಇನ್ನನೆ ನಂಗಡ ಒಡೆಯನು ರಕ್ಷಕನುವಾಯಿತುಳ್ಳ ಯೇಸು ಕ್ರಿಸ್ತಂಡ ನಿತ್ಯ ರಾಜ್ಯತ್‍ರ ಒಳ್‍ಕ್ ಪೋಪಕುಳ್ಳ ಪೂರ್ತಿ ಸತ್ಕಾರ ನಿಂಗಕ್ ಕ್‍ಟ್ಟುವ.

ಪ್ರಕಟನೆ 2:9

ನೀಕುಳ್ಳ ಹಿಂಸೆನ ಪಿಂಞ ನೀನ್ ಐಶ್ವರ್ಯವಂತಂವೊನಾಯಿತ್ ಇಂಜತೇಂಗಿಯು ಗರೀಬನಾಯಿತ್ ಇಪ್ಪದ್ ನಾಕ್ ಗೊತ್ತುಂಡ್. ಪಿಂಞ ಯೆಹೂದ್ಯಂಗಾಂದ್ ಎಣ್ಣ್‌ಚೇಂಗಿಯು ಯೆಹೂದ್ಯ ಅಲ್ಲತಯಿಂಗಳಾಯಿತ್ ಅಯಿಂಗ ಎಣ್ಣುವ ದೂಷಣೆ ನಾಕ್ ಗೊತ್ತುಂಡ್. ಅಯಿಂಗ ಸೈತಾನಂಡ ಸಬಾಮಂದಿರಕ್ ಕೂಡ್‍ನಯಿಂಗಳಾಯಿತುಂಡ್.

ಪ್ರಕಟನೆ 21:7

ದಾರೆಲ್ಲಾ ಗೆಲ್ಲುವ ಅಯಿಂಗ, ಎಲ್ಲಾಂಗು ಬಾದ್ಯಕಾರಂಗಳಾಯಿತ್ ಇಪ್ಪ. ನಾನ್ ಅಂವೊಂಡ ದೇವನಾಯಿತಿಪ್ಪಿ ಅಂವೊ ನಾಡ ಮೋಂವೊನಾಯಿತ್‌ಪ್ಪ.

ಪ್ರಕಟನೆ 3:18

ನೀನ್ ಐಶ್ವರ್ಯವಂತನಾಪಕ್, ತಿತ್ತ್‌ಲ್ ಇಟ್ಟಿತ್ ಎಡ್‌ತ ಪೊನ್ನ್‌ನ ಪಿಂಞ ನೀಡ ಅವಮಾನವಾಯಿತುಳ್ಳ ಬೆತ್ತಲೇನ ಮುಚ್ಚ್‌ವಕ್ ಬೊಳ್‍ತ ಬಟ್ಟೇನ ನಾಡ ಕೈಯಿಂಜ ಕ್ರಯಕ್ ಎಡ್‌ತ ಪಿಂಞ ನೀಡ ಕಣ್ಣ್ ಕಾಂಬನೆಕೆ, ಕಣ್ಣ್‌ಕ್ ಮದ್ದ್ ಇಡ್‍ೕಂದ್ ನಾನ್ ನೀಕ್ ಬುದ್ದಿ ಎಣ್ಣ್‌ವಿ.