ಯಾಕೋಬ 1:27 - ಕೊಡವ ಬೈಬಲ್

²⁷ ತಬ್ಬಲಿ ಮಕ್ಕ ಪಿಂಞ ವಿದವೆಯಿಂಗಡ ಕಷ್ಟತ್‍ಲ್ ಸಹಾಯ ಮಾಡ್‍ವದ್ ಪಿಂಞ ಈ ಲೋಕತ್‍ರ ಪಾಪ ಅಂವೊನ ದೋಷ ಮಾಡತನೆಕೆ ಕಾಪಾಡಿಯಂಡ್ ಬದ್‍ಕ್‍ವದ್ ಇನ್ನತಾನ ವಿಷಯವೇ, ಅಪ್ಪನಾನ ದೇವಡ ಮಿಂಞತ್ ಶುದ್ದವಾನ ಕಳಂಗ ಇಲ್ಲತ ಬಕ್ತಿಯಾಯಿತ್‌ಪ್ಪ.

ಯಾಕೋಬ 1:27 ပူးပေါင်းရင်းမြစ်များ

ಮತ್ತಾಯ 12:32

ಆನಗುಂಡ್, ಮನುಷ್ಯಕುಮಾರಂಗ್ ವಿರೋದವಾಯಿತ್ ತಕ್ಕ್ ಪರಿಯುವಂಗಕ್ ಮನ್ನಿಪ್ ಕ್‍ಟ್ಟ್‌ವ, ಆಚೇಂಗಿ ಪವಿತ್ರಾತ್ಮಂಗ್ ವಿರೋದವಾಯಿತ್ ತಕ್ಕ್ ಪರಿಯುವಂಗಕ್, ಈ ಲೋಕತ್‌ಲು ಪರಲೋಕತ್‌ಲು ಮನ್ನಿಪ್ ಕ್‍ಟ್ಟ್‌ಲೆ.

ಮತ್ತಾಯ 5:8

ಶುದ್ದ ಹೃದಯ ಉಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ; ಅಯಿಂಗ ದೇವನ ಕಾಂಬ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 1:6

ಅಯಿಂಗ ದಂಡಾಳು ದೇವಡ ಎಲ್ಲಾ ಕಾನೂನ್ ಪ್ರಕಾರ, ಆಜ್ಞೆರ ಪ್ರಕಾರ ನೀತಿವಂತಯಿಂಗಳಾಯಿತ್, ಏದ್ ಮನುಷ್ಯನು ಕುತ್ತ ಪರಿಯುವಕ್ ಕಯ್ಯತ ಬದ್‍ಕ್‍ನ ಬದ್‍ಕಿಯಂಡ್ ಇಂಜತ್.

ರೋಮ್ 12:2

ಇಂಞು ಮಿಂಞಕ್ ಈ ಲೋಕತ್‍ರ ರೀತಿಕ್ ಒತ್ತಂಡ್ ಪೋಕತಿ. ನಲ್ಲದಾಯಿತು, ಯೋಗ್ಯವಾಯಿತು, ಪೂರ್ತಿಯಾಯಿತುಳ್ಳ ದೇವಡ ಚಿತ್ತ ಎಂತ್‍ೕಂದ್ ಗೊತ್ತಾಪಕಾಯಿತ್, ನಿಂಗಡ ಮನಸ್ಸ್‌ನ ಪುದಿಯದ್ ಮಾಡಿಯಂಡ್ ಬದ್‍ಲಾಯಂಡಿರಿ.

ರೋಮ್ 2:13

ನ್ಯಾಯಪ್ರಮಾಣತ್‍ನ ಕ್‍ೕಪಯಿಂಗ ದೇವಡ ಮಿಂಞತ್ ನೀತಿವಂದಯಿಂಗ ಅಲ್ಲ, ಅದ್ಂಡ ಪ್ರಕಾರ ನಡ್‍ಪಯಿಂಗಳೇ ನೀತಿವಂತಯಿಂಗಳಾಪ.

ಗಲಾತ್ಯ 1:4

ಅಂವೊ ನಂಗಳ ಇಕ್ಕತ್‍ರ ಮೋಸವಾನ ಲೋಕತ್ಂಜ ಕಾಪಾಡ್‌ವಕಾಯಿತ್, ನಂಗಡ ಅಪ್ಪನಾನ ದೇವಡ ಚಿತ್ತತ್‍ರನೆಕೆ ನಂಗಡ ಪಾಪಕಾಯಿತ್ ಅಂವೊನ ಚಾವ್‍ಕ್ ಒಪ್ಪ್‌ಚಿಟ್ಟತ್.

ಗಲಾತ್ಯ 3:11

ಅನ್ನನೆ ಆಚೇಂಗಿ, ನ್ಯಾಯಪ್ರಮಾಣತ್‍ಲ್ ಎಣ್ಣ್‌ನನೆಕೆ ಮಾಡ್‌ವಕ್ ಎಚ್ಚಕ್ ಪ್ರಯತ್ನ ಪಟ್ಟತೇಂಗಿಯು, ದೇವಡ ಪಕ್ಕ ಒಬ್ಬನು ಸಮಾದಾನ ಆಪಕ್ ಕಯ್ಯುಲೇಂದ್ ಉಳ್ಳದ್ ಚಾಯಿತೆ ಗೊತ್ತಾಯಂಡುಂಡ್. ದೇವಡ ವಾಕ್ಯತ್‍ಲ್ ನಂಬಿಕೇರ ಮೂಲಕ ನೀತಿವಂತಯಿಂಗ ಬದ್‌ಕ್‌ವಾಂದ್ ಎಣ್ಣಿತುಂಡ್.

ಗಲಾತ್ಯ 5:6

ನಂಗಡ ನಂಬಿಕೆ ಯೇಸು ಕ್ರಿಸ್ತಂಡ ಮೇಲೆ ಇಂಜತೇಂಗಿ, ಸುನ್ನತಿ ಮಾಡಿತ್ಂಜತೇಂಗಿಯು, ಮಾಡತ ಇಂಜತೇಂಗಿಯು, ಅದ್ ಒಂದು ಲೆಕ್ಕ ಆಪುಲೆ. ಅದ್ಂಡ ಬದ್‍ಲಾಯಿತ್ ನಂಬಿಕೇಲ್, ಪ್ರೀತಿರಗುಂಡ್ ನಂಗ ಮಾಡ್‌ವ ಕಾರ್ಯವೇ ಮುಕ್ಯವಾನದ್.

ಗಲಾತ್ಯ 6:14

ಆಚೇಂಗಿ, ನಾಕ್ ಕ್ರಿಸ್ತಂಡ ಶಿಲುಬೇರ ವಿಷಯತ್‍ನ ಬುಟ್ಟಿತ್ ಬೋರೆ ಏದ್ ವಿಷಯತ್‍ಲು ಹೊಗಳಿಚಿಡುವದ್ ಬೋಂಡ; ಈ ಲೋಕ ಅಂವೊನಗುಂಡ್ ನಾಕಾಯಿತ್ ಶಿಲುಬೇಲ್ ಉಂಡ್, ನಾನ್ ಸಹ ಈ ಲೋಕತ್‍ರ ಆಸೆಕೆಲ್ಲಾ ನನ್ನ ಶಿಲುಬೇಕ್ ಇಟ್ಟಿಯೆ.

ಎಫೆಸ 2:2

ಅದ್‍ಲ್, ಪಂಡ್ ನಿಂಗ, ಈ ಲೋಕತ್‍ರ ಪದ್ದತಿರ ಪ್ರಕಾರ, ಪಿಂಞ ದೇವಡ ವಾಕ್ಯಕ್ ತಗ್ಗಿತ್ ನಡ್‍ಕತ ಜನತ್‍ರ ಮದ್ಯತ್‍ಲ್, ಇಕ್ಕ ಕ್ರಿಯೆ ಮಾಡಿಯಂಡುಳ್ಳ ದೆವ್ವ ಲೋಕತ್‍ರ ಅದಿಕಾರತ್‍ರ ಅದಿಕಾರಿಯಡ ಆತ್ಮತ್‍ರ ಪ್ರಕಾರ ಬದ್‍ಕಿಯಂಡಿಂಜಿರ.

1 ತಿಮೊಥೆಯ 1:5

ಈ ಆಜ್ಞೆರ ಉದ್ದೇಶ ಎಂತ ಎಣ್ಣ್‌ಚೇಂಗಿ, ಶುದ್ದವಾನ ಹೃದಯತ್‍ಲ್, ನಲ್ಲ ಮನಸಾಕ್ಷಿಲ್, ಕಪಟ ಇಲ್ಲತ ನಂಬಿಕೆಯಿಂಜ ಬಪ್ಪ ನೇರಾನ ಪ್ರೀತಿಲ್ ದುಂಬಿತಿರಂಡೂಂದ್ ಎಣ್ಣ್‌ವದೇ.

1 ತಿಮೊಥೆಯ 5:4

ಆಚೇಂಗಿ ಅವಕ್ ಮಕ್ಕ, ಕ್‍ರ್‍ಮಕ್ಕ ಉಂಡೇಂಗಿ, ಅಯಿಂಗ ಆದ್ಯವಾಯಿತ್ ತಾಂಡ ಸ್ವಂತ ಕುಟುಂಬತ್‍ನ ದೇವಡ ಬಕ್ತಿಲ್ ನೋಟಂಡು. ಅನ್ನನೆ ಮಾಡ್‍ಚೇಂಗಿ, ಪೆತ್ತಯಿಂಗ ಮಾಡ್‍ನ ಎಲ್ಲಾ ನಲ್ಲ ಕಾರ್ಯಕ್ ಬದ್‍ಲಾಯಿತ್ ಅಯಿಂಗಳ ಚಾಯಿತೆ ನೋಟ್‍ವಕ್, ಅಯಿಂಗ ಪಡಿಪ. ಇದ್ ದೇವನ ಕುಶಿಪಡ್‌ತ್‌ವ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2:12

ಆನಗುಂಡ್ ಈ ಕೃಪೆ ದೇವಡ ಮೇಲೆ ಬಕ್ತಿಲ್ ಬದ್‍ಕ್‍ವಕ್ ಪಿಂಞ ಈ ಲೋಕತ್‍ರ ಮೇಲೆ ಉಳ್ಳ ಆಸೇನ ಬುಟ್ಟಿತ್ ಬದ್‍ಕ್‍ವಕ್ ನಂಗಕ್ ಎಣ್ಣಿ ಕೊಡ್‍ಪ. ಪಾಪ ದುಂಬ್‍ನ ಈ ಲೋಕತ್‍ಲ್, ನಂಗ ಜ್ಞಾನ ಉಳ್ಳಯಿಂಗಳಾಯಿತ್, ನೀತಿ ಉಳ್ಳಯಿಂಗಳಾಯಿತ್ ದೇವಡ ಮೇಲೆ ಬಕ್ತಿ ಉಳ್ಳಯಿಂಗಳಾಯಿತ್ ಬದ್‍ಕ್‍ವಕ್ ಸಹಾಯ ಮಾಡ್‌ವ.

ಯಾಕೋಬ 3:17

ಆಚೇಂಗಿ ಪರಲೋಕತ್ಂಜ ಬಪ್ಪ ಜ್ಞಾನ, ಆದ್ಯವಾಯಿತ್, ನಂಗಳ ಶುದ್ದ ಮಾಡ್‌ವ, ಅದ್ ಸಮಾದಾನ ಉಳ್ಳದಾಯಿತು ಅಡಕ ಉಳ್ಳದಾಯಿತು ಕುಶಿ ಉಳ್ಳದಾಯಿತು ಇಪ್ಪ. ಅದ್‍ಲ್ ಕರುಣೆ ಪಿಂಞ ನಲ್ಲ ಫಲ ದುಂಬಿತ್, ಎಲ್ಲಾ ಮನುಷ್ಯಂಗಕು ಒರೇ ತರ ಮರ್ಯಾದೆ ಮಾಡಿತ್, ಕಪಟ ಇಲ್ಲತ ಶುದ್ದ ನಂಬಿಕೆ ಉಳ್ಳದಾಯಿತಿಪ್ಪ.

ಯಾಕೋಬ 3:9

ಅದೇ ನಾವ್‌ಲ್ ನಂಗಡ ಅಪ್ಪನಾನ ದೇವನ ತುದಿಚಿತ್ ಕೊಂಡಾಡುವ; ದೇವಡ ರೂಪತ್‌ಲ್ ಸೃಷ್ಟಿ ಮಾಡ್‍ನ ಮನುಷ್ಯಂಗಳ ಅದೇ ನಾವ್ಂಜ ಶಾಪ ಇಡ್‌ವ.

ಯಾಕೋಬ 4:4

ನಿಯತಿ ಇಲ್ಲತ ಜನಳೇ, ಈ ಬೂಲೋಕತ್‌ರ ಕೂಡೆ ಕೂಟ್ ಉಂಡೇಂಗಿ ದೇವನ ಅಲ್ಲಗೆಳೆದಿತ್, ದೂರ ಮಾಡ್‌ನನೆಕೇಂದ್ ಗೊತ್ತ್‌ಲ್ಲೆಯ? ಆನಗುಂಡ್ ಈ ಬೂಲೋಕತ್‌ರ ಕೂಡೆ ಕೂಟ್ ಬೆಪ್ಪಕ್ ಕುಶಿ ಉಳ್ಳಯಿಂಗ ದೇವಕ್ ಶತ್ರು ಆಯಿಪೋಪ.

2 ಪೇತ್ರ 1:4

ಇದ್‍ನಗುಂಡ್, ಅಂವೊ ನಂಗಕ್ ದುಂಬ ಬಲ್ಯ ಬೆಲೆಯುಳ್ಳ ವಾಗ್ದಾನವೆಲ್ಲ ತಂದಿಯತ್. ಅನ್ನನೆ, ಇದ್ಂಡ ಮೂಲಕ ದೇವಡ ಗುಣತ್‍ಲ್ ನಂಗ ಪಾಲ್‍ದಾರಂಗಳಾಯಿತ್ ಈ ಲೋಕತ್‍ಲ್ ಉಳ್ಳ ಇಚ್ಛೆರ ಮೂಲಕ ಬಪ್ಪ ಕ್‍ೕಡ್‍ಕ್ ತಪ್ಪ್‌ಚಿಡ್‌ವನೆಕೆ ಮಾಡ್‍ಚಿ.

2 ಪೇತ್ರ 2:20

ಒಡೆಯನಾನ ಯೇಸು ಕ್ರಿಸ್ತನ ಗೊತ್ತಾಯಿತ್, ಈ ಲೋಕತ್‍ರ ಪಾಳ್ ಪಾಪತ್ಂಜ ಬಚಾವಾನಯಿಂಗ ಪುನಃ ಅದ್‍ಲ್ ಚಿಕ್ಕಿತ್ ಪೋನಕ ಅಯಿಂಗಕ್ ಬಪ್ಪಕುಳ್ಳ ಸ್ತಿತಿ ಮಿಂಞತ್‍ರ ಸ್ತಿತಿಕಿಂಜ ಮೋಸವಾಯಿತ್‌ಪ್ಪ.

2 ಪೇತ್ರ 3:14

ಆನಗುಂಡ್ ನಾಡ ಪ್ರೀತಿರ ಜನಳೇ, ಇನ್ನತದೆಲ್ಲ ಬಪ್ಪಾಂದ್ ಪಾರಕಾತಂಡ್ ಉಳ್ಳಾಂಗ್, ನಿಂಗ ಏದ್ ತಪ್ಪಿಲ್ಲತಯಿಂಗಳಾಯಿತು, ಕುತ್ತ ಇಲ್ಲತಯಿಂಗಳಾಯಿತು, ಅಂವೊಂಡ ಕೂಡೆ ಸಮಾದಾನತ್‍ಲ್ ಇಪ್ಪಯಿಂಗಳಾಯಿತ್ ಎಚ್ಚರತ್‍ಲ್ ಇರಂಡು.

1 ಯೋಹಾನ 5:18

ದೇವಡ ಮಕ್ಕ ಪಾಪ ಮಾಡಿಯಂಡೇ ಇಪ್ಪುಲೇಂದ್ ನಂಗಕ್ ಗೊತ್ತುಂಡ್, ಎನ್ನಂಗೆಣ್ಣ್‌ಚೇಂಗಿ ದೇವಡ ಮೋಂವೊ ಅಯಿಂಗಳ ಬದ್ರವಾಯಿತ್ ಕಾಪಾಡ್‌ವ. ಪಿಂಞ ಸೈತಾನ ಅಯಿಂಗಳ ತೊಂದರೆ ಮಾಡ್‌ವಕ್ ಕಯ್ಯುಲೆ.