ಇಬ್ರಿಯ 6:18 - ಕೊಡವ ಬೈಬಲ್

¹⁸ ಆನಗುಂಡ್ ದೇವ ತಾಂಡ ವಾಗ್ದಾನತ್‍ನ ಪಿಂಞ ಆಣೆನ ನಂಗಕ್ ತಂದಿತುಂಡ್. ಈ ದಂಡ್ ವಿಷಯವು ಎಕ್ಕಾಲು ಬದ್‍ಲ್ ಆಪುಲೆ. ಅಂವೊ ಇನ್ನನೆ ಎನ್ನಂಗ್ ಮಾಡ್‍ಚೇಂಗಿ, ದೇವ ಪೊಟ್ಟ್ ಪರಿವಕ್ ಸಾದ್ಯತೆ ಇಲ್ಲೆ. ಆನಗುಂಡ್ ನಂಗಡ ಮಿಂಞಕ್ ಬೆಚ್ಚಿತುಳ್ಳ ನಿರಿಕ್ಷೇನ ಗಟ್ಟಿಯಾಯಿತ್ ಪುಡ್‌ಚಿತ್, ಬಚಾವಾಪಕ್ ಅಂವೊಂಡ ಪಕ್ಕ ಓಡಿ ಬಂದ ನಂಗಕ್ ದುಂಬ ನಿಶ್ಚಯ ಉಂಡ್.

ಇಬ್ರಿಯ 6:18 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 19:22

ಆಚೇಂಗಿ ಬೆರಿಯ ಅಲ್ಲಿಕ್‌ ಓಡಿ ಪೋಯಿತ್‌ ಬಚಾವ್‌ ಮಾಡಿಯ. ನೀನ್‌ ಅಲ್ಲಿ ಎತ್ತ್‌ವಕತ್ತನೆ ನಾನ್‌ ಒಂದು ಮಾಡ್‌ವಕ್‌ ಕಯ್ಯುಲೇಂದ್‌ ಎಣ್ಣ್‌ಚಿ. ಇದ್‌ನಗುಂಡ್‌ ಆ ಊರ್‌ಕ್‌ ಚೋಗಾರ್‌ಂದ್‌ ಪೆದ ಕ್‌ಟ್ಟ್‌ಚಿ.

ಜ್ಞಾನತ್‌ರ ಪಡಿಮ 3:18

ಜ್ಞಾನತ್‌ನ ನಂಬ್‌ನಯಿಂಗಕ್‌ ಜ್ಞಾನ ಜೀವತಪ್ಪ ಮರವಾಯಿತ್‌ಪ್ಪ. ಅದ್‌ನ ಗಟ್ಟಿಯಾಯಿತ್‌ ಪುಡ್‌ಚಯಿಂಗ ಆಶೀರ್ವಾದ ಪಡ್‌ಂದಯಿಂಗಳಾಯಿತ್‌ಪ್ಪ.

ಜ್ಞಾನತ್‌ರ ಪಡಿಮ 4:13

ಬೋದನೇನ ಗಟ್ಟಿಯಾಯಿತ್‌ ಪುಡ್‌ಚ, ಅದ್‌ನ ಬುಟ್ಟಿತ್‌ ಪೋಕತೆ; ಅದ್‌ನ ಬದ್ರತ್‌ಲ್‌ ಕಾಪಾಡ್, ಅದೇ ನೀಡ ಜೀವ.

ಮತ್ತಾಯ 24:35

ಬಾನ ಬೂಮಿ ಎಲ್ಲಾ ನಾಶ ಆಪ, ಆಚೇಂಗಿ ನಾಡ ತಕ್ಕ್ ನಾಶ ಆಪುಲೆ.

ಮತ್ತಾಯ 3:7

ದುಂಬ ಫರಿಸಾಯಂಗ ಪಿಂಞ ಸದ್ದುಕಾಯಂಗ, ಯೋಹಾನಂಡ ಪಕ್ಕ ದೀಕ್ಷಾಸ್ನಾನ ಎಡ್‌ಪಕಾಯಿತ್ ಬಂದಂಡುಳ್ಳದ್‌ನ ಕಂಡಿತ್: ಕ್ಯಾರೆಬಳೆ ಮುರಿಪಾಂಬ್ ಜಾತಿಯಳೇ! ದೇವಡ ಚೆಡಿಯಿಂಜ ಬಚಾವಾಪಕ್ ಕಯ್ಯೂಂದ್ ನಿಂಗಕ್ ದಾರ್ ಎಣ್ಣಿ ಕೊಡ್‍ತತ್?

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 2:25

ಆ ಸಮಯತ್‍ಲ್ ಯೆರೂಸಲೇಮ್‍ಲ್ ಸಿಮೆಯೋನ ಎಣ್ಣುವ ಒರ್ ಮನುಷ್ಯ ವಾಸ ಮಾಡಿಯಂಡ್ ಇಂಜತ್. ಅಂವೊ ನೀತಿವಂತನು, ದೇವಡ ಬಕ್ತನು ಆಯಿತ್ಂಜತ್. ಅಂವೊ ಇಸ್ರಾಯೇಲ್ ಜನಡ ರಕ್ಷಣೆಕಾಯಿತ್ ಪಾರಕಾತಂಡಿಂಜತ್. ಅಂವೊ ಪವಿತ್ರಾತ್ಮ ದುಂಬಿತ್ಂಜತ್.

ರೋಮ್ 15:5

ನಂಗಕ್ ಪೊರುಮೆ ಪಿಂಞ ಪುರ್‌ಡ್ ಕೊಡ್‍ಪ ದೇವ, ಕ್ರಿಸ್ತ ಯೇಸುಕ್ ತಗ್ಗಿತ್ ನಡ್ಂದಂಡ್ ಒರೇ ಮನಸ್ಸ್ ಉಳ್ಳಯಿಂಗಳಾಯಿತ್ ಇಪ್ಪಕ್ ನಿಂಗಕ್ ಸಹಾಯ ಮಾಡಡ್.

ರೋಮ್ 3:25

ತಾಂಡ ಚೋರೆರ ಮೂಲಕ ನಂಬಿಕೆ ಇಡ್‌ವಯಿಂಗಡ ಪಾಪತ್‍ರ ಪರಿಹಾರವಾಯಿತ್ ಆಪನೆಕೆ ಯೇಸುನ ಎಲ್ಲಾಡ ಮಿಂಞತ್ ಅರ್ಪಣೆ ಮಾಡ್‍ಚಿ. ಇನ್ನನೆ ದೇವ ನೀತಿಯುಳ್ಳಂವೋಂದ್ ನಿರೂಬಿಚಿಟ್ಟತ್. ಎನ್ನಂಗೆಣ್ಣ್‌ಚೇಂಗಿ, ದೇವ ತಾಂಡ ಪೊರುಮೇಲ್, ಕಯಿಂಜ ಕಾಲತ್‍ಲ್ ಮಾಡ್‍ನ ಪಾಪತ್‍ನ ಕಾಂಗತನೆಕೆ ಇಂಜತ್.

ರೋಮ್ 3:4

ಅನ್ನನೆ ಆಪುಲೆ. ನೀನ್ ಎಣ್ಣುವದ್ ಸತ್ಯಾಂದ್ ಎಲ್ಲಾರ್‌ಕು ಗೊತ್ತಾಂಡು, ಪಿಂಞ ನೀಡ ನ್ಯಾಯತ್‍ನ ವಿಚಾರಣೆ ಮಾಡ್‌ವಕ ನೀಕ್ ಜಯ ಕ್‍ಟ್ಟಂಡೂಂದ್ ಒಳ್‍ದಿತುಳ್ಳನೆಕೆ, ದೇವ ಮಾತ್ರ ಸತ್ಯವಂತಂವೊ, ಮನುಷ್ಯಂಗೆಲ್ಲಾ ಪೊಟ್ಟ್ ಪರಿಯುವಯಿಂಗಾಂದ್ ಆಚಿ.

ರೋಮ್ 5:5

ಈ ನಿರೀಕ್ಷೆ ನಂಗಳ ನಿರಾಶೆ ಮಾಡುಲೆ, ಎನ್ನಂಗೆಣ್ಣ್‌ಚೇಂಗಿ, ನಂಗಕ್ ತಂದಿತುಳ್ಳ ಪವಿತ್ರಾತ್ಮತ್‍ರಗುಂಡ್ ದೇವಡ ಪ್ರೀತಿ ನಂಗಡ ಹೃದಯತ್‍ಲ್ ಬೂಕಿತುಂಡ್.

ಫಿಲಿಪ್ಪಿ 2:1

ಕ್ರಿಸ್ತನ ನಂಬಿತ್ ಅಂವೊಂಡ ಕೂಟ್‌ಲ್ ಕೂಡ್‍ನಗುಂಡ್ ನಿಂಗಕ್ ಎಂತೇಂಗಿ ಒತ್ತಾಸೆ ಉಂಡಾ? ಅಂವೊಂಡ ಪ್ರೀತಿಲ್ ನಿಂಗಕ್ ಎಂತೇಂಗಿ ಸುಕ ಉಂಡಾ? ಪವಿತ್ರಾತ್ಮತ್‍ರ ಶಕ್ತಿ ಕ್‍ಟ್ಟಿತ್ ನಿಂಗಕ್ ಎಂತೇಂಗಿ ಐಕ್ಯ ಉಂಡಾ? ನಿಂಗಡ ಮನಸ್ಸ್‌ಲ್ ಎಂತೇಂಗಿ ಕನಿಕರ, ದಯೆ ಉಂಡಾ?

ಕೊಲೊಸ್ಸೆ 1:23

ನಿಂಗಕ್ ಕ್‍ಟ್ಟ್‌ನ ಈ ನಲ್ಲ ಸುದ್ದಿರ ನಂಬಿಕೇನ ಗಟ್ಟಿಯಾಯಿತ್ ಪುಡ್‍ಚಂಡ್, ಸ್ತಿರವಾಯಿತ್, ದೃಡವಾಯಿತ್ ನಿಂದಂಡಿಂಜತೇಂಗಿ ನಿಂಗಕ್ ಅನ್ನನೆ ಕ್‍ಟ್ಟುವ. ಈ ನಲ್ಲ ಸುದ್ದಿ, ಈ ಲೋಕತ್‍ರ ಎಲ್ಲಾ ಸೃಷ್ಟಿಕ್ ಅರಿಚಿಟ್ಟಂಡುಂಡ್, ಅದ್ಂಗಾಯಿತ್, ಪೌಲನಾನ ನಾನ್ ದೇವಡ ಸೇವಕನಾಯಿತ್ ಉಳ್ಳ.

ಕೊಲೊಸ್ಸೆ 1:27

ಯೆಹೂದ್ಯಂಗಲ್ಲತ ಜನಕಾಯಿತ್ ಅಂವೊ ಬೆಚ್ಚಿತುಳ್ಳ ಈ ಐಶ್ವರ್ಯವಾನ ಮಹಿಮೇರ ಗುಟ್ಟ್‌ನ, ದೇವ ತಾಂಡ ಮಕ್ಕಕ್ ಕಾಂಬ್‍ಚಿಡಂಡೂಂದ್ ಉಳ್ಳದೇ ಅಂವೊಂಡ ಚಿತ್ತ. ಆ ಗುಟ್ಟ್ ಎಂತ ಎಣ್ಣ್‌ಚೇಂಗಿ, ಕ್ರಿಸ್ತ ನಿಂಡಗಲ್ಲಿ ಉಂಡ್, ಅದ್ ಮಹಿಮೇರೆ ನಿರೀಕ್ಷೆಯೇ.

ಕೊಲೊಸ್ಸೆ 1:5

ನೇರಾನ ಸುದ್ದಿಯಾನ ದೇವಡ ನಲ್ಲ ಸುದ್ದಿ ನಿಂಗಡ ಪಕ್ಕ ಆದ್ಯವಾಯಿತ್ ಬಂದಿತ್ ನಿಂಗಕ್ ಗೊತ್ತಾನ ಕಾಲತ್ಂಜ, ನಿಂಗ ಇನ್ನನೆ ಮಾಡಿಯಂಡ್, ನಿಂಗಕಾಯಿತ್ ಪರಲೋಕತ್‍ಲ್ ಬದ್ರವಾಯಿತ್ ಬೆಚ್ಚಿತುಳ್ಳ ನಿರೀಕ್ಷೆಕಾಯಿತ್ ಪಾರಕಾತಂಡ್ ಉಳ್ಳಿರ.

1 ಥೆಸಲೊನೀಕ 1:10

ಇದ್‍ಲ್ಲತೆ, ಚತ್ತಯಿಂಗಡ ಮದ್ಯತ್ಂಜ ಜೀವವಾಯಿತ್ ಪುನಃ ಎಪ್ಪ್‌ಚಿಟ್ಟಂವೊನು, ಮನುಷ್ಯಂಗಕ್ ದೇವ ತಪ್ಪ ಶಿಕ್ಷೆಯಿಂಜ ನಂಗಳ ಕಾಪಾಡ್‌ವಂವೊನು ಆಯಿತುಳ್ಳ ದೇವಡ ಮೋಂವೊನಾನ ಯೇಸು ಪರಲೋಕತ್ಂಜ ಪುನಃ ಬಪ್ಪಾನ ನೋಟಿಯಂಡ್ ಪಾರಕಾತಂಡ್ ಉಳ್ಳಿರಾಂದ್ ಸಹ ಅಯಿಂಗ ನಂಗಕ್ ಎಣ್ಣಿಯಂಡುಂಡ್.

1 ತಿಮೊಥೆಯ 1:1

ನಂಗಡ ರಕ್ಷಕನಾನ ದೇವ ಪಿಂಞ ನಂಗಡ ನಿರೀಕ್ಷೆಯಾಯಿತುಳ್ಳ ಒಡೆಯನಾನ ಯೇಸು ಕ್ರಿಸ್ತಂಡ ಆಜ್ಞೆರ ಪ್ರಕಾರ, ಯೇಸು ಕ್ರಿಸ್ತಂಡ ಅಪೊಸ್ತಲನಾಯಿತುಳ್ಳ ಪೌಲನಾನ ನಾನ್,

1 ತಿಮೊಥೆಯ 6:12

ನಂಬಿಕೇರ ನಲ್ಲ ಪೋರಾಟತ್‍ನ ಪೋರಾಡ್, ನಿತ್ಯ ಜೀವತ್‍ನ ಗಟ್ಟಿಯಾಯಿತ್ ಪುಡ್‌ಚ; ಇದ್ಂಗಾಯಿತ್ ದೇವ ನಿನ್ನ ಕಾಕಿತುಂಡ್; ಅಕ್ಕ, ನೀನ್ ದುಂಬ ಜನಡ ಮಿಂಞತ್‍ಲ್ ನೀಡ ನಂಬಿಕೇರ ವಿಷಯತ್ ನೇರಾನ ಸಾಕ್ಷಿ ಕೊಡ್‍ತಿತುಳ್ಳಿಯ.

2 ತಿಮೊಥೆಯ 2:13

ಅಂವೊಂಗ್ ನಂಗ ನಂಬಿಕಸ್ತನಾಯಿತ್‌ಲ್ಲೇಂಗಿಯೂ ಅಂವೊ ನಂಬಿಕಸ್ತನಾಯಿತಿಪ್ಪ. ಎನ್ನಂಗೆಣ್ಣ್‌ಚೇಂಗಿ ಅಂವೊ ತಾಂಡ ಗುಣಕ್ ವಿರೋದವಾಯಿತ್ ಮಾಡ್‌ವಕ್ ಕಯ್ಯುಲೆ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 1:2

ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ, ಕರುಣೆ ಪಿಂಞ ಸಮಾದಾನ ಕ್‍ಟ್ಟಡ್.

ಇಬ್ರಿಯ 11:7

ನಂಬಿಕೇರ ಮೂಲಕ ನೋಹ, ಅಂವೊ ಬದ್‍ಕಿಯಂಡ್ ಇಂಜ ಕಾಲತ್‍ಲ್, ಮಿಂಞಕ್ ಬಪ್ಪಕುಳ್ಳ ವಿಷಯತ್‍ಲ್ ದೇವಡಿಂಜ ಎಚ್ಚರ ಕ್‍ಟ್ಟಿತ್, ದೇವಡ ಬಕ್ತಿ ಉಳ್ಳಂವೊನಾಯಿತ್, ತಾಂಡ ಮನೆಲ್ ಉಳ್ಳಯಿಂಗಳ ಕಾಪಾಡ್‌ವಕ್ ಒರ್ ಕಪ್ಪಲ್‌ನ ಮಾಡ್‍ಚಿ; ಅದ್‍ನಗುಂಡ್, ಈ ಲೋಕಕ್ ದಂಡೆನೇರ ತೀರ್ಪ್ ಕ್‍ಟ್ಟ್‌ಚೀಂದ್ ತೀರ್ಪ್ ಮಾಡಿತ್, ನಂಬಿಕೇರ ಮೂಲಕ ಕ್‍ಟ್ಟುವ ನೀತಿಕ್ ಬಾದ್ಯತೆ ಕ್‌ಟ್ಟ್‌ನಂವೊನಾಚಿ.

ಇಬ್ರಿಯ 3:11

ಈ ಜನ ಆರಾಮ್‍ಲ್ ಇಪ್ಪಕ್ ನಾನ್ ತಪ್ಪ ಜಾಗಕ್ ಕಂಡಿತವಾಯಿತ್ ಎತ್ತುಲೇಂದ್ ನಾಡ ಚೆಡಿಲ್ ಆಣೆ ಇಟ್ಟಿಯೆ.

ಇಬ್ರಿಯ 3:6

ಆಚೇಂಗಿ ಕ್ರಿಸ್ತ, ದೇವಡ ಮನೇಕಿಂಜ ಬಲ್ಯಂವೊನಾಯಿತ್ ಒರ್ ಮೋಂವೊಂಡನೆಕೆ ಸತ್ಯವಂತಂವೊನಾಯಿತುಂಡ್; ನಂಗಡ ನಿರೀಕ್ಷೇರಗುಂಡ್ ಕ್‍ಟ್ಟುವ ದೈರ್ಯ ಪಿಂಞ ಹೆಮ್ಮೆನ ಕಡೇಕತ್ತನೆ ಗಟ್ಟಿಯಾಯಿತ್ ಪುಡ್‍ಚಂಡ್ ಇಂಜತೇಂಗಿ ನಂಗಳೇ ಅಂವೊಂಡ ಮನೇಯಾಯಿತ್‌ಪ್ಪ.

ಇಬ್ರಿಯ 6:17

ಅನ್ನನೆ ದೇವ ಸಹ, ವಾಗ್ದಾನ ಮಾಡ್‍ನದ್‍ನ ಪಡೆಯುವಯಿಂಗಕ್, ತಾಂಡ ಆಲೋಚನೆರ ಬದ್‍ಲಾಕತ ನಿಶ್ಚಯತ್‍ನ ಪೂರ್ತಿಯಾಯಿತ್ ಕಾಂಬ್‍ಚಿಡುವಕ್ ಕುಶಿಪಟ್ಟಗುಂಡ್, ಒರೇ ಆಣೆರ ಮೂಲಕ ಸ್ತಿರಪಡ್‍ತ್‍ಚಿ.

ಇಬ್ರಿಯ 7:19

ನ್ಯಾಯಪ್ರಮಾಣ ಒರ್ ವಿಷಯತ್‍ನ ಕೂಡೆ ಪೂರ್ತಿ ಮಾಡ್‌ವಕಿಂಜಿಲೆ. ಆಚೇಂಗಿ, ಅದ್ಂಗಿಂಜ ಬಲ್ಯ ನಿರಿಕ್ಷೇರ ನಂಬಿಕೆ ಪೂರ್ತಿ ಮಾಡ್‌ವಕಾಯಿತ್ ಇಕ್ಕ ಕ್‍ಟ್ಟ್‌ಚಿ. ಅದ್ಂಡ ಮೂಲಕ ನಂಗ ದೇವಡ ಪಕ್ಕ ಪೋಯಂಡುಂಡ್.

ಇಬ್ರಿಯ 7:21

ಆಚೇಂಗಿ, ಯೇಸು ಆಣೆ ಇಟ್ಟಿತ್ ಯಾಜಕನಾಪಕ, ಒಡೆಯ ಸತ್ಯ ಮಾಡ್‍ಚಿ, ಅಂವೊಂಡ ಮನಸ್ಸ್ ಬದ್‍ಲಾಪದು ಇಲ್ಲೆ. ನೀನ್ ಎಕ್ಕಾಲು ಯಾಜಕನಾಯಿತ್ ಇಪ್ಪಿಯಾಂದ್ ದೇವ ಎಣ್ಣ್‌ಚಿ.

1 ಯೋಹಾನ 1:10

ನಂಗ ಪಾಪ ಮಾಡಿತ್‌ಲ್ಲೇಂದ್ ಎಣ್ಣ್‌ಚೇಂಗಿ ದೇವನ ನಂಗ ಪೊಟ್ಟ್‌ಪರಿಯುಂವೊನಾಯಿತ್ ಮಾಡ್‌ವನೆಕೆ. ಅಂವೊಂಡ ವಾಕ್ಯ ನಂಗಡಲ್ಲಿ ಇಲ್ಲೆ.

1 ಯೋಹಾನ 5:10

ಆನಗುಂಡ್ ದೇವಡ ಮೋಂವೊಂಡಲ್ಲಿ ನಂಬಿಕೆ ಇಟ್ಟಿತುಳ್ಳಯಿಂಗಡ ಹೃದಯತ್‍ಲ್ ಈ ಸಾಕ್ಷಿ ಉಂಡ್. ಆಚೇಂಗಿ ದಾರೆಲ್ಲಾ ದೇವನ ನಂಬುಲೆಯೋ ಅಯಿಂಗ ಅಂವೊನ ಪೊಟ್ಟ್‌ಮಾರಿಯಾಯಿತ್ ಮಾಡಿಯಂಡುಂಡ್. ಎನ್ನನೆ ಎಣ್ಣ್‌ಚೇಂಗಿ ದೇವ ತಾಂಡ ಮೋಂವೊಂಡ ವಿಷಯತ್‍ಲ್ ಎಣ್ಣ್‌ನ ಸಾಕ್ಷಿನ ಅಯಿಂಗ ನಂಬಿತ್‌ಲ್ಲೆ.