ಇಬ್ರಿಯ 10:34 - ಕೊಡವ ಬೈಬಲ್

³⁴ ಕ್ರಿಸ್ತಂಗಾಯಿತ್ ಜೈಲ್‍ಲ್ ಕೈದಿಯಾಯಿತ್ ಇಂಜಯಿಂಗಕ್ ಕನಿಕರ ಕಾಟಿತುಳ್ಳಿರ, ನಿಂಗಡ ಆಸ್ತಿ ನಿಂಗಳ ಬುಟ್ಟಿತ್ ಪೋಪಕ, ನಿಂಗಕ್ ಪರಲೋಕತ್‍ಲ್ ಇದ್‌ಂಗಿಂಜ ಚಾಯಾನದು, ಪಾಳಾಯಿ ಪೋಕತದುವಾಯಿತುಳ್ಳ ಆಸ್ತಿ ಉಂಡ್‍ೕಂದ್ ಗೊತ್ತಾನಗುಂಡ್, ಸುಲ್‌ಗೆ ಮಾಡ್‌ವಕ್ ಕುಶೀಲ್ ಬುಟ್ಟಿರ.

ಇಬ್ರಿಯ 10:34 ပူးပေါင်းရင်းမြစ်များ

ಮತ್ತಾಯ 19:21

ಅದ್ಂಗ್ ಯೇಸು: ನೀನ್ ಒರ್ ಕುತ್ತವು ಇಲ್ಲತೆ ಬದ್‍ಕಂಡೂಂದ್ ನೀಕ್ ಆಸೆ ಉಂಡೇಂಗಿ, ಮನೆಕ್ ಪೋಯಿತ್, ನೀಡ ಪಕ್ಕ ಉಳ್ಳ ಆಸ್ತಿನೆಲ್ಲ ಮಾರ್‌ವಂಜಿ ಆ ಪಣತ್‍ನ ಗರೀಬಂಗಕ್ ಕೊಡ್, ಅಕ್ಕ ಪರಲೋಕತ್‍ಲ್ ನೀಕ್ ಐಶ್ವರ್ಯ ದುಂಬಿತ್ ಕ್‍ಟ್ಟುವ, ಪಿಂಞ ನಾಡ ಬಯ್ಯ ಬಾಂದ್ ಯೇಸು ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 10:42

ಆಚೇಂಗಿ, ಒಂದ್ ಮಾತ್ರ ಬೋಂಡಿಯೆ. ಮರಿಯ ಅವಡ ಹೃದಯತ್ಂಜ ಎಡ್‌ಪಕಯ್ಯತ ನಲ್ಲ ಬಾಗತ್‍ನ ಗೊತ್ತ್ ಮಾಡಿತುಂಡ್‍ೕಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 12:33

ನಿಂಗಡ ಪಕ್ಕ ಉಳ್ಳ ಐಶ್ವರ್ಯತ್‍ನ ಮಾರಿತ್, ಬಂದ ಪಣತ್‍ನ ಗರೀಬಂಗಕ್ ದಾನಮಾಡಿ, ಇದ್ ನಿಂಗಕ್ ಪರಲೋಕತ್‍ಲ್ ಆಸ್ತಿ ಕೂಟಿ ಬೆಚ್ಚನೆಕೆ. ಪರಲೋಕತ್‍ಲ್ ಉಳ್ಳ ಪಣಚೀಲಕ್ ತೂತ ಇಲ್ಲೆ. ಅಲ್ಲಿ ಉಳ್ಳ ನಿಂಗಡ ಐಶ್ವರ್ಯತ್‍ನ ಕಳ್ಳಂಗ ಕಟ್ಟಂಡ್ ಪೋಪದು ಇಲ್ಲೆ, ಪುಳು ತಿಂಬದು ಇಲ್ಲೆ. ಅದ್ ಬದ್ರವಾಯಿತ್ ಇಪ್ಪ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 9:25

ಮನುಷ್ಯ ಈ ಲೋಕತ್‍ಲ್ ಉಳ್ಳಾನೆಲ್ಲಾ ತಾಂಗ್ ಸ್ವಂತವಾಯಿತ್ ಮಾಡ್‍ಚೇಂಗಿಯು, ತಾಂಡ ಜೀವನತ್‌ನ ಪಾಳ್ ಮಾಡ್‍ಚೇಂಗಿ, ಅಂವೊಂಗ್ ಎಂತ ಪ್ರಯೋಜನ?

ಅಪೊಸ್ತಲ 21:33

ಅಕ್ಕ ಸೇನೆರ ಅದಿಪತಿ ಪೌಲಂಡ ಪಕ್ಕ ಬಂದಿತ್ ಅಂವೊನ ಪುಡ್‌ಚಿತ್, ಅಂವೊನ ದಂಡ್ ಸರ್ಪಣಿಲ್ ಕೆಟ್ಟ್‌ವಕ್ ಆಜ್ಞೆ ಕೊಡ್‍ತತ್. ಪಿಂಞ ಸೇನೆರ ಅದಿಪತಿ, ಇಂವೊ ದಾರ್? ಇಂವೊ ಎಂತ ಮಾಡ್‍ಚೀಂದ್ ಕ್‍ೕಟತ್.

ಅಪೊಸ್ತಲ 28:20

ಈ ಕಾರಣಕಾಯಿತೇ ನಾನ್ ನಿಂಗಳ ಕಂಡಿತ್ ತಕ್ಕ್ ಪರಿಯಂಡೂಂದ್ ಕಾಕ್‍ಚಿಟ್ಟಿಯೇ. ಇಸ್ರಾಯೇಲ್ ಜನಡ ನಂಬಿಕೇರ ನಿರೀಕ್ಷೆಕಾಯಿತ್ ಮಾತ್ರ ನಾನ್ ಇನ್ನನೆ ಸರ್ಪಣಿಲ್ ಕೈದಿಯಾಯಿತ್ ಉಳ್ಳ್‌ಂದ್ ಎಣ್ಣ್‌ಚಿ.

ಅಪೊಸ್ತಲ 5:41

ಯೇಸುರ ಪೆದಕಾಯಿತ್ ಅವಮಾನ ಪಡುವಕ್ ದೇವ ಅಯಿಂಗಳ ಯೋಗ್ಯ ಉಳ್ಳಯಿಂಗಳಾಯಿತ್ ನೋಟ್‍ನಗುಂಡ್, ಅಪೊಸ್ತಲಂಗ ಅಲ್ಲಿಂಜ ಕುಶೀಲ್ ಪೊರಟಿತ್ ಪೋಚಿ.

2 ಕೊರಿಂಥ 5:1

ಇಕ್ಕ, ಈ ಲೋಕತ್‍ರ ಗುಡಾರವಾಯಿತುಳ್ಳ ಮಣ್ಣ್‌ರ ಮನೇರನೆಕೆ ಉಳ್ಳ ನಂಗಡ ತಡಿ ಪಾಳಾಯಿ ಪೋಚೇಂಗಿಯು, ಕೈಯಿಲ್ ಮಾಡತ, ದೇವ ಕೆಟ್ಟ್‌ನ ನಿತ್ಯ ಮನೆಲ್ ನಂಗಕಾಯಿತ್ ಮಾಡ್‍ನ ನಿತ್ಯ ತಡಿ ಪರಲೋಕತ್‍ಲ್ ಬೆಚ್ಚಿತುಂಡ್‍ೕಂದ್ ನಂಗಕ್ ಗೊತ್ತುಂಡ್.

ಎಫೆಸ 3:1

ಇದ್ಂಗಾಯಿತ್ ಪೌಲನಾನ ನಾನ್, ಯೆಹೂದ್ಯಂಗಲ್ಲತಯಿಂಗಳಾನ ನಿಂಗಳಗುಂಡ್, ಕ್ರಿಸ್ತ ಯೇಸುಕಾಯಿತ್ ಕೈದಿಯಾಯಿತ್ ಉಳ್ಳ.

ಎಫೆಸ 4:1

ಆನಗುಂಡ್, ದೇವ ನಿಂಗಳ ಕಾಕ್‍ನನೆಕೆ, ನಿಂಗ ಅದ್ಂಗ್ ಯೋಗ್ಯವಾನ ಬದ್‍ಕ್‍ನ ಬಾಳಡೂಂದ್ ಒಡೆಯಂಗಾಯಿತ್ ಕೈದಿಯಾಯಿತ್ ಉಳ್ಳ ನಾನ್, ನಿಂಗಳ ಬೋಡುವಿ.

ಎಫೆಸ 6:20

ದೇವಡ ನಲ್ಲ ಸುದ್ದಿರ ಗುಟ್ಟ್‌ನ ಎಣ್ಣುವಕ್ ಸರಿಯಾನ ಬಾಕ್ ನಾಕ್ ಕ್‍ಟ್ಟ್‌ವಕಾಯಿತ್‌ ಪ್ರಾರ್ಥನೆ ಮಾಡಿ.

ಫಿಲಿಪ್ಪಿ 1:7

ನಿಂಗ ನಾಡ ಹೃದಯತ್‍ಲ್ ಎಕ್ಕಾಲು ವಾಸಮಾಡಿಯಂಡುಳ್ಳಗುಂಡ್, ನಿಂಗ ಎಲ್ಲಾಡ ವಿಷಯತ್‍ಲ್ ನಾನ್ ಇನ್ನನೆ ಎಣ್ಣ್‌ವದ್ ನಾಕ್ ಚಾಯೀಂದ್ ಕಾಂಬ. ದೇವ ನಾಡ ಮೇಲೆ ಕಾಂಬ್‍ಚಿಟ್ಟ ವಿಶೇಷವಾನ ಕೃಪೇರ ವಿಷಯತ್‍ಲ್, ನಾನ್ ಜೈಲ್‍ಲ್ ಇಪ್ಪಕಲು, ನಲ್ಲ ಸುದ್ದಿರ ವಿಷಯತ್‍ಲ್ ಜವಾಬ್ ಕೊಡ್‌ತಂಡ್ ಸ್ತಾಪನೆ ಮಾಡ್‌ವಕಲು, ನಾಡ ಕೂಡೆ ಪಾಲ್‍ದಾರಂಗಳಾಯಿತ್ ಉಳ್ಳಿರ.

ಕೊಲೊಸ್ಸೆ 1:5

ನೇರಾನ ಸುದ್ದಿಯಾನ ದೇವಡ ನಲ್ಲ ಸುದ್ದಿ ನಿಂಗಡ ಪಕ್ಕ ಆದ್ಯವಾಯಿತ್ ಬಂದಿತ್ ನಿಂಗಕ್ ಗೊತ್ತಾನ ಕಾಲತ್ಂಜ, ನಿಂಗ ಇನ್ನನೆ ಮಾಡಿಯಂಡ್, ನಿಂಗಕಾಯಿತ್ ಪರಲೋಕತ್‍ಲ್ ಬದ್ರವಾಯಿತ್ ಬೆಚ್ಚಿತುಳ್ಳ ನಿರೀಕ್ಷೆಕಾಯಿತ್ ಪಾರಕಾತಂಡ್ ಉಳ್ಳಿರ.

1 ತಿಮೊಥೆಯ 6:19

ಇನ್ನನೆ ಮಾಡ್‍ಚೇಂಗಿ, ಬಪ್ಪಕುಳ್ಳ ಯುಗಕಾಯಿತ್ ಅಯಿಂಗಡ ಬಂಡಾರತ್‌ಲ್ ಕೂಟಿ ಬೆಪ್ಪನೆಕೆ ಚಾಯಿ ಅಡಿಪಾಯ ಇಡ್‌ವ. ಅಕ್ಕ ಅಯಿಂಗ ಸತ್ಯವಾನ ಬದ್‍ಕ್‍ನ ಅನುಬವಿಚಿಡುವಾಂದ್ ನೀನ್ ಅಯಿಂಗಕ್ ಎಣ್ಣಿ ಕೊಡ್.

2 ತಿಮೊಥೆಯ 1:16

ದೇವ ಒನೇಸಿಫೊರಂಡ ಮನೆಕ್ ಕರುಣೆ ಕಾಟಡ್. ಎನ್ನಂಗೆಣ್ಣ್‌ಚೇಂಗಿ ಅಂವೊ ದುಂಬ ಕುರಿ ಬಂತ್ ನಾಕ್ ಪುರ್‌ಡ್ ಕೊಡ್‍ತತ್; ಪಿಂಞ ನಾನ್ ಕೈದಿಯಾಯಿತ್ ಇಂಜತೇಂಗಿಯು ಅಂವೊ ಞಾಣ ಪಟ್ಟಿತ್ತ್‌ಲ್ಲೆ.

2 ತಿಮೊಥೆಯ 2:9

ಈ ನಲ್ಲ ಸುದ್ದಿರಗುಂಡ್, ನನ್ನ ಕೊಲೆಗಾರನೆಕೆ ಸರ್ಪಣಿಲ್ ಕೆಟ್ಟಿತ್, ನಾನ್ ಕಷ್ಟಪಟ್ಟಂಡ್ ಉಳ್ಳ. ಆಚೇಂಗಿ ದೇವಡ ವಾಕ್ಯ ಬಂದನೆ ಆಯಿತ್‌ಲ್ಲೆ.

2 ತಿಮೊಥೆಯ 4:8

ಆನಗುಂಡ್, ಇಕ್ಕ ನಾಕ್ ನೀತಿರ ಕಿರೀಟ ಬೆಚ್ಚಿತುಂಡ್. ನೀತಿಯುಳ್ಳ ನ್ಯಾಯಕಾರನಾನ ಒಡೆಯ ಆ ದಿವಸತ್‍ಲ್ ಅದ್‍ನ ನಾಕ್ ತಪ್ಪ; ನಾಕ್ ಮಾತ್ರ ಅಲ್ಲ, ಅಂವೊ ಪುನಃ ಬಪ್ಪದ್‍ನ ಕಾಂಬಕ್ ಪಾರಕಾತಂಡುಳ್ಳ ಎಲ್ಲಾರ್‌ಕು ಅದ್‍ನ ತಪ್ಪ.

ಇಬ್ರಿಯ 11:16

ಆಚೇಂಗಿ, ಅಯಿಂಗ ಬುಟ್ಟಿತ್ ಬಂದ ದೇಶಕಿಂಜ ವಿಶೇಷವಾಯಿತುಳ್ಳ ಪರಲೋಕತ್‍ರ ದೇಶತ್‍ನ ಕುಶಿಪಟ್ಟತ್; ಆನಗುಂಡ್ ದೇವ, ಅಯಿಂಗಡ ದೇವಾಂದ್ ಕಾಕುವಕ್ ಞಾಣ ಪಡುಲೆ; ಅಯಿಂಗಕಾಯಿತ್ ಒರ್ ಪಟ್ಟಣತ್‍ನ ತಯಾರ್ ಮಾಡ್‍ಚಿ.

ಇಬ್ರಿಯ 13:14

ಸ್ತಿರವಾನ ಪಟ್ಟಣ ನಂಗಕ್ ಇಲ್ಲಿ ಇಲ್ಲೆ, ಇಂಞು ಮಿಂಞಕ್ ಬಪ್ಪಕುಳ್ಳದ್‍ನ ನೋಟಿಯಂಡುಂಡ್.

ಇಬ್ರಿಯ 13:3

ಕ್ರಿಸ್ತಂಗಾಯಿತ್ ಕೈದಿಯಾಯಿತ್ ಇಪ್ಪಯಿಂಗಡ ಕೂಡೆ ನಿಂಗಳು ಕೈದಿಯಾಯಿತ್ ಇಪ್ಪನೆಕೆ ಗೇನ ಮಾಡಿಯೊಳಿ; ಅವಮಾನತ್‍ನ ಸಹಿಸಿಯಂಡ್ ಇಪ್ಪಯಿಂಗಳ ಗೇನ ಮಾಡಿತ್ ನಿಂಗಕು ಅನ್ನನೆ ಆನನೆಕೆ ಗೇನ ಮಾಡಿಯೊಳಿ.

ಇಬ್ರಿಯ 9:15

ಈ ಕಾರಣಕಾಯಿತ್, ಪಳೆಯ ಒಪ್ಪಂದತ್‍ರ ಕಾಲತ್‍ಲ್ ಆಯಂಡಿಂಜ ಅಕ್ರಮಕ್ ವಿಮೋಚನವಾಯಿತ್ ಅಂವೊ ಚತ್ತಿತ್, ವಾಗ್ದಾನ ಮಾಡ್‍ನ ನಿತ್ಯ ಬಾದ್ಯತೇನ ಅಂವೊ ಕಾಕ್‌ನಯಿಂಗ ಪಡೆಯಂಡೂಂದ್, ಪುದಿಯ ಒಪ್ಪಂದತ್‍ರ ಮದ್ಯಸ್ತನಾಯಿತ್ ಅಂವೊ ಆಚಿ.

ಯಾಕೋಬ 1:2

ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ಬಪ್ಪ ನಾನಾತರ ಪರೀಕ್ಷೆನ ಸಂತೋಷವಾಯಿತ್ ಎಡ್‌ತೊಳಿ.

1 ಪೇತ್ರ 1:4

ಒರ್‌ಕಾಲು ಬಾಡಿ ಪೋಕತ ಅಥವ ನಾಶ ಆಯಿ ಪೋಕತ, ಪಾಳಾಯಿ ಪೋಪಕ್ ಕಯ್ಯತ ಬಾದ್ಯತೇನ ಪರಲೋಕತ್‍ಲ್ ನಂಗಕಾಯಿತ್ ಬೆಚ್ಚಿತುಂಡ್.

1 ಯೋಹಾನ 3:2

ಪ್ರೀತಿರ ಮಕ್ಕಳೇ, ಇಕ್ಕ ನಂಗ ದೇವಡ ಮಕ್ಕಳಾಯಿತುಂಡ್. ಆಚೇಂಗಿ ಇಂಞು ಮಿಂಞಕ್ ನಂಗ ಎನ್ನನೆ ಇಪ್ಪಾಂದ್ ಅಂವೊ ಎಣ್ಣಿತ್‌ಲ್ಲೆ. ಆಚೇಂಗಿ ಕ್ರಿಸ್ತ ಪ್ರತ್ಯಕ್ಷ ಆಪಕ ನಂಗಳು ಅಂವೊಂಡನೆಕೆ ಇಪ್ಪಾಂದ್ ನಂಗಕ್ ಗೊತ್ತುಂಡ್, ಎನ್ನಂಗೆಣ್ಣ್‌ಚೇಂಗಿ ಅಂವೊ ಪ್ರತ್ಯಕ್ಷ ಆಪಕ ಅಂವೊ ಉಳ್ಳನೆಕೆ ನಂಗ ಅಂವೊನ ಕಾಂಬ.