ಆದ್ಯತ್‌ರ ಪುಸ್ತಕ 26:24 - ಕೊಡವ ಬೈಬಲ್

²⁴ ಆ ಬಯಿಟ್ ಯೆಹೋವ ಅಂವೊಂಗ್‌ ಕಾಂಬ್‌ಚಿಟ್ಟಿತ್: ನಾನ್‌ ನೀಡ ಅಪ್ಪನಾನ ಅಬ್ರಹಾಮಂಡ ದೇವ, ಆನಗುಂಡ್‌ ನೀನ್‌ ಬೊತ್ತತೆ, ನಾನ್‌ ನೀಡ ಕೂಡೆ ಉಳ್ಳ. ನಾಡ ಸೇವಕನಾನ ಅಬ್ರಹಾಮನಗುಂಡ್, ನಿನ್ನ ಆಶೀರ್ವಾದ ಮಾಡಿತ್, ನೀಡ ಸಂತಾನತ್‌ನ ಬಲ್ಯದ್‌ ಮಾಡುವೀಂದ್‌ ಎಣ್ಣ್‌ಚಿ.

ಆದ್ಯತ್‌ರ ಪುಸ್ತಕ 26:24 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 13:16

ನೀಡ ಸಂತಾನತ್‌ನ ಬೂಮಿರ ದೂಳ್‌ರಚ್ಚಕ್‌ ಬಲ್ಯದ್‌ ಮಾಡುವಿ. ಒಬ್ಬಂಗ್‌ ಬೂಮಿರ ದೂಳ್‌ನ ಲೆಕ್ಕ ಮಾಡುವಕ್‌ ಕಯ್ಯುವದಾಚೇಂಗಿ, ನೀಡ ಸಂತಾನತ್‌ನ ಸಹ ಲೆಕ್ಕ ಮಾಡುವಕ್‌ ಕಯ್ಯು.

ಆದ್ಯತ್‌ರ ಪುಸ್ತಕ 15:1

ಈ ಘಟನೆಯೆಲ್ಲಾ ಆನ ಪಿಂಞ ಅಬ್ರಾಮಂಗ್‌ ಯೆಹೋವ ದರ್ಶನತ್‌ಲ್‌ ಬಂದಿತ್: ಅಬ್ರಾಮನೇ ನೀನ್‌ ಬೊತ್ತತೆ; ನಾನ್‌ ನೀಕ್‌ ಎದೆತಟ್ಟ್‌ ಆಯಿತ್‌ಪ್ಪಿ. ನೀಡ ಬಹುಮಾನ ಬಲ್ಯದಾಯಿತ್‌ಪ್ಪಾಂದ್‌ ಎಣ್ಣ್‌ಚಿ.

ಆದ್ಯತ್‌ರ ಪುಸ್ತಕ 17:7

ನೀಕು ನೀಡ ಬಯ್ಯ ಬಪ್ಪ ನೀಡ ಮಕ್ಕಡ ಸಂತಾನಕು ನಾನ್‌ ಯೆಹೋವನಾನ ದೇವನಾಯಿತ್‌ಪ್ಪಕಾಯಿತ್‌ ನಾಕು ನೀಕು, ನೀಡ ಬಯ್ಯ ಬಪ್ಪ ಮಕ್ಕಡ ಸಂತಾನತ್‌ರ ಮದ್ಯತ್‌ಲ್, ನಾಡ ಒಪ್ಪಂದತ್‌ನ ನಿತ್ಯ ಒಪ್ಪಂದವಾಯಿತ್‌ ಸ್ತಾಪನೆ ಮಾಡುವಿ.

ಆದ್ಯತ್‌ರ ಪುಸ್ತಕ 17:8

ನೀನ್‌ ಪರದೇಶಿಯಾಯಿತ್‌ ವಾಸ ಮಾಡಿಯಂಡುಳ್ಳ ಕಾನಾನ್‌ ದೇಶತ್‌ನೆಲ್ಲಾ ನೀಕು ನೀಡ ಬಯ್ಯ ಬಪ್ಪ ನೀಡ ಮಕ್ಕಡ ಸಂತಾನಕು ಕಾಲಕಾಲಕ್‌ ಸ್ವಂತವಾಯಿತ್‌ ಕೊಡ್‌ತಿತ್‌ ನಾನ್‌ ಅಯಿಂಗಕ್‌ ಯೆಹೋವನಾನ ದೇವನಾಯಿತ್‌ ಇಪ್ಪೀಂದ್‌ ಎಣ್ಣ್‌ಚಿ.

ಆದ್ಯತ್‌ರ ಪುಸ್ತಕ 21:17

ಆ ಕ್‌ಣ್ಣಂಡ ಮೊರೆನ ದೇವ ಕ್‍ೕಟತ್. ದೇವದೂತ ಬಾನತ್‌ಂಜ ಹಾಗರನ ಕಾಕಿತ್: ಹಾಗರಳೇ, ನೀಕ್‌ ಎಂತ ಆಚಿ? ಬೊತ್ತತೆ, ಆ ಕ್‌ಣ್ಣ ಬುದ್ದಂಡಲ್ಲಿಂಜ ಮೊರ್‌ಡೊದ್‌ನ ದೇವ ಕ್‍ೕಟತ್.

ಆದ್ಯತ್‌ರ ಪುಸ್ತಕ 22:17

ನಾನ್‌ ನಿನ್ನ ನೇರಾಯಿತು ಆಶೀರ್ವಾದ ಮಾಡಿತ್, ನೀಡ ಸಂತಾನತ್‌ನ ಬಾನತ್‌ ಮೀನ್‌ರನೆಕೆಯು, ಕಡಕರೆಲ್‌ ಉಳ್ಳ ಮಣತ್‌ರನೆಕೆಯು ಲೆಕ್ಕ ಮಾಡುವಕಯ್ಯತಚ್ಚಕ್‌ ಆಪನೆಕೆ ಮಾಡುವಿ. ನೀಡ ಸಂತಾನಕಾರಂಗ ಅಯಿಂಗಡ ಶತ್‌ರುವಳ ಚೋಪ್‌ಚಿಡುವಾಂದು,

ಆದ್ಯತ್‌ರ ಪುಸ್ತಕ 22:19

ಅಲ್ಲಿಂಜ ಅಬ್ರಹಾಮ ತಾಂಡ ಆಳ್‌ವಡ ಪಕ್ಕ ತಿರಿತ್‌ ಬಾತ್. ಅಯಿಂಗೆಲ್ಲಾರು ಬೇರ್ಷೆಬಕ್‌ ಪೊರ್‌ಟತ್; ಅಬ್ರಹಾಮ ಬೇರ್ಷೆಬಲ್‌ ವಾಸ ಮಾಡ್‌ಚಿ.

ಆದ್ಯತ್‌ರ ಪುಸ್ತಕ 24:12

ಅಂವೊ ಅಲ್ಲಿಂಜ: ನಾಡ ಎಜಮಾನಂಗ್‌ ದೇವನಾಯಿತುಳ್ಳ ಯೆಹೋವನೇ, ಇಂದ್‌ ನಾನ್‌ ಇಲ್ಲಿಕ್‌ ಬಂದ ವಿಷಯತ್‌ನ ನೆರವೀರಿಚಿಟ್ಟಿತ್‌ ನಾಡ ಎಜಮಾನಂಗ್‌ ಕರುಣೆ ಕಾಟ್.

ಆದ್ಯತ್‌ರ ಪುಸ್ತಕ 28:13

ಅದಾ, ಯೆಹೋವ ಮೊಟ್ಟ್‌ರ ಕೊಡಿಲ್‌ ನಿಂದಿತ್: ನಾನ್‌ ನೀಡ ಮುತ್ತಜ್ಜಂಗಳಾನ ಅಬ್ರಹಾಮಂಡ ದೇವನು ಇಸಾಕಂಡ ದೇವನು ಆನ ಯೆಹೋವ; ನೀನ್‌ ಬುದ್ದಂಡುಳ್ಳ ಬೂಮಿನ ನೀಕು ನೀಡ ಸಂತಾನಕು ತಪ್ಪಿ.

ಆದ್ಯತ್‌ರ ಪುಸ್ತಕ 28:15

ನಾನ್‌ ನೀಡ ಕೂಡೆ ಇಂಜಿತ್, ನೀನ್‌ ಪೋಪ ಜಾಗತ್‌ಲೆಲ್ಲ ನಾನ್‌ ನಿನ್ನ ಕಾಪಾಡಿತ್, ನಿನ್ನ ಈ ದೇಶಕ್‌ ಪುನಃ ತಿರಿತ್‌ ಕೊಂಡ ಬಪ್ಪಿ. ನಾನ್‌ ನೀಕ್‌ ವಾಗ್ದಾನ ಮಾಡ್‌ನದೆಲ್ಲ ನೆರವೇರಿಚಿಡುವಕತ್ತನೆ ನಿನ್ನ ನಾನ್‌ ಕೈ ಬುಡೆಲೇಂದ್‌ ಎಣ್ಣ್‌ಚಿ.

ಆದ್ಯತ್‌ರ ಪುಸ್ತಕ 28:3

ಸರ್ವಶಕ್ತತನಾನ ದೇವ ನಿನ್ನ ಆಶೀರ್ವಾದ ಮಾಡಿತ್, ನೀಕ್‌ ದುಂಬ ಸಂತಾನ ಕೊಡ್‌ತಿತ್, ನೀಡಗೊಂಡ್‌ ದುಂಬ ಜನಾಂಗ ಪುಟ್ಟಚ್.

ಆದ್ಯತ್‌ರ ಪುಸ್ತಕ 30:27

ಆಚೇಂಗಿ ಲಾಬಾನ: ನೀಡ ಕಣ್ಣ್‌ಲ್‌ ನಾಕ್‍ ದಯೆ ಕ್‌ಟ್ಟಿತುಂಡೇಂಗಿ ನನ್ನ ಬುಟ್ಟಿತ್‌ ಪೋಕತೆ. ನೀಡಗುಂಡ್‌ ಯೆಹೋವ ನನ್ನ ಆಶೀರ್ವಾದ ಮಾಡಿತುಂಡ್‍ೕಂದ್‌ ನಾಕ್‍ ಸೂಷ್ಮತ್‌ಲ್‌ ಗೊತ್ತುಂಡ್‍ೕಂದ್‌ ಎಣ್ಣ್‌ಚಿ.

ಆದ್ಯತ್‌ರ ಪುಸ್ತಕ 31:5

ಅಯಿಂಗಳ ನೋಟಿತ್: ನಿಂಗಡ ಅಪ್ಪ ಮಿಂಞತ್‌ರನೆಕೆ ಇಲ್ಲೆ. ನಾಡ ವಿಷಯತ್‌ ಅಂವೊಂಡ ಗುಣ ದಂಡ್‌ ಮೂಂದ್‌ ದಿವಸಕ್‌ ಮಿಂಞ ಇಂಜನೆಕೆ ಇಲ್ಲತೆ ಬದ್‌ಲಾಯಿತ್‌ ಉಳ್ಳದ್‌ನ ಕಂಡಂಡುಳ್ಳ. ಆಚೇಂಗಿ ನಾಡ ಅಪ್ಪಂಡ ದೇವ ನಾಡ ಕೂಡೆ ಉಂಡ್.

ಆದ್ಯತ್‌ರ ಪುಸ್ತಕ 39:2

ಯೆಹೋವ ಯೋಸೇಫಂಡ ಕೂಡೆ ಇಂಜತ್. ಅಂವೊ ಕೈ ಬೆಪ್ಪ ಎಲ್ಲಾ ಕಾರ್ಯತ್‌ಲು ಅಬಿವೃದ್ದಿ ಪೊಂದ್‌ಚಿ. ಅಂವೊ ತಾಂಡ ಎಜಮಾನಂಡ ಮನೇಲ್‌ ವಾಸಮಾಡ್‌ಚಿ.

ಆದ್ಯತ್‌ರ ಪುಸ್ತಕ 39:3

ಯೆಹೋವ ಯೋಸೇಫಂಡ ಕೂಡೆ ಉಂಡ್‍ೕಂದು, ಅಂವೊ ಮಾಡುವ ಕೆಲಸತ್‌ನೆಲ್ಲ ಯೆಹೋವ ಅಬಿವೃದ್ದಿ ಮಾಡಿಯಂಡುಂಡೂಂದು ಪೋಟಿಫರ ಕಂಡತ್.

ಆದ್ಯತ್‌ರ ಪುಸ್ತಕ 46:1

ಇಸ್ರಾಯೇಲ್‌ ಅಂವೊಂಗ್‌ ಇಂಜ ಎಲ್ಲಾನ ಎಡ್‌ತಂಡ್‌ ಪ್ರಯಾಣ ಮಾಡಿತ್‌ ಬೇರ್ಷೇಬಕ್‌ ಬಂದಿತ್‌ ತಾಂಡ ಅಪ್ಪನಾನ ಇಸಾಕಂಡ ದೇವಕ್‌ ಬಲಿ ಕೊಡ್‌ತತ್.

ಮತ್ತಾಯ 22:32

ಅನ್ನನಾಚೇಂಗಿ ಅಂವೊ ಚತ್ತ್ ಪೋನಯಿಂಗಕ್ ದೇವ ಅಲ್ಲ ಆಚೇಂಗಿ ಜೀವತ್‍ಲ್ ಉಳ್ಳಯಿಂಗಕ್ ದೇವನಾಯಿತುಂಡ್‍ೕಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 12:32

ನಾಡ ಶಿಷ್ಯಂಗಳೇ, ನಿಂಗ ಒಂದು ಇಲ್ಲತ ನಾಡ ಒರ್ ಚೆರಿಯ ಗುಂಪಾಯಿತ್ ಉಂಡೇಂಗಿಯು, ಬೊತ್ತತಿ, ಎನ್ನಂಗೆಣ್ಣ್‌ಚೇಂಗಿ ಅಪ್ಪನಾನ ದೇವ ಅಂವೊ ಆಳುವ ರಾಜ್ಯತ್‍ಲ್ ನಿಂಗ ಬದ್‍ಕ್‍ವಕಾಯಿತ್ ನಿಂಗಳ ಕುಶೀಲ್ ಗೊತ್ತ್ ಮಾಡಿತುಂಡ್.

ಅಪೊಸ್ತಲ 7:32

ನಾನ್ ನೀಡ ಮುತ್ತಜ್ಜಂಗಳಾನ ಅಬ್ರಹಾಮ, ಇಸಾಕ ಪಿಂಞ ಯಾಕೋಬಂಡ ದೇವಾಂದ್ ಎಣ್ಣ್‌ಚಿ. ಅಕ್ಕ ಮೋಶೆ ಪೋಡಿಲ್ ನಡ್‍ಗಿತ್, ಆ ಪೊದೆರ ಪಕ್ಕ ಪೋಪಕ್ ದೈರ್ಯ ಇಲ್ಲತಂವೊನಾಯಿತ್‌ಂಜತ್.

ಇಬ್ರಿಯ 11:16

ಆಚೇಂಗಿ, ಅಯಿಂಗ ಬುಟ್ಟಿತ್ ಬಂದ ದೇಶಕಿಂಜ ವಿಶೇಷವಾಯಿತುಳ್ಳ ಪರಲೋಕತ್‍ರ ದೇಶತ್‍ನ ಕುಶಿಪಟ್ಟತ್; ಆನಗುಂಡ್ ದೇವ, ಅಯಿಂಗಡ ದೇವಾಂದ್ ಕಾಕುವಕ್ ಞಾಣ ಪಡುಲೆ; ಅಯಿಂಗಕಾಯಿತ್ ಒರ್ ಪಟ್ಟಣತ್‍ನ ತಯಾರ್ ಮಾಡ್‍ಚಿ.

ಇಬ್ರಿಯ 13:6

ಆನಗುಂಡ್, ನಂಗ ದೈರ್ಯವಾಯಿತ್: ಒಡೆಯ ನಾಕ್ ಸಹಾಯ ಮಾಡ್‌ವಂವೊ, ನಾಕ್ ಪೋಡಿ ಇಲ್ಲೆ, ಮನುಷ್ಯ ನಾಕ್ ಎಂತ ಮಾಡ್‌ವಾಂದ್ ಎಣ್ಣುವಕ್ ಆಪಲ್ಲಾ?

ಪ್ರಕಟನೆ 1:17

ನಾನ್ ಅಂವೊನ ಕಾಂಬಕ, ಚತ್ತನೆಕೆ ಅಂವೊಂಡ ಕಾಲ್‌ಕ್ ಬುದ್ದ್ ಪೋನ; ಆಚೇಂಗಿ, ಅಂವೊ ತಾಂಡ ಬಲ್‌ತೆ ಕೈಯಿನ ನಾಡ ಮೇಲೆ ಬೆಚ್ಚಿತ್, ನನ್ನ ನೋಟಿತ್: ನೀನ್ ಬೊತ್ತತೆ, ನಾನ್ ಆದ್ಯವು ಆಕೀರು, ಜೀವ ಉಳ್ಳಂವೊನು ಆಯಿತುಂಡ್.