ಗಲಾತ್ಯ 4:9 - ಕೊಡವ ಬೈಬಲ್

⁹ ಆಚೇಂಗಿ, ಇಕ್ಕ ನಿಂಗಕ್ ದೇವ ದಾರ್‍ೕಂದ್ ಗೊತ್ತುಂಡ್. ಇನ್ನನೆ ಎಣ್ಣ್‌ವಕ್ ಕಯ್ಯು, ನಿಂಗ ದಾರ್‍ೕಂದ್ ದೇವಕು ಗೊತ್ತುಂಡ್. ಪಿಂಞ ಎನ್ನಂಗ್ ನಿಂಗ ಬಯ್ಯಕ್ ಪೋಯಿತ್ ಪುನಃ ಶಕ್ತಿಯಿಲ್ಲತ, ಪ್ರಯೋಜನ ಇಲ್ಲತ ಈ ಲೋಕತ್‍ರ ಆತ್ಮೀಯ ಅದಿಕಾರಕ್ ಅಡಿಯಾಳಾಯಿತ್ ಇರಂಡು?

ಗಲಾತ್ಯ 4:9 ပူးပေါင်းရင်းမြစ်များ

ಜ್ಞಾನತ್‌ರ ಪಡಿಮ 2:5

ಇದ್‌ನೆಲ್ಲಾ ಮಾಡ್‌ಚೇಂಗಿ, ಯೆಹೋವಂಗ್‌ ಬೊತ್ತ್‌ವದ್‌ ಎಂತ ಎಣ್ಣಿಯಂಡ್‌ ನೀಕ್‌ ಅರ್ಥ ಆಪ, ದೇವಡ ಅರಿವ್‌ ನೀಕ್‌ ಕ್‌ಟ್ಟುವ.

ಮತ್ತಾಯ 11:27

ನಾಡ ಅಪ್ಪ ನಾಕ್ ಎಲ್ಲಾನ ಒಪ್ಪ್‌ಚಿಟ್ಟತ್; ಅಪ್ಪನ ಬುಟ್ಟಿತ್ ಬೋರೆ ದಾರ್‌ಕು ಮೋಂವೊನ ಗೊತ್ತಿಪ್ಪುಲೆ; ಇಂಞು, ಮೋಂವೊನು, ಮೋಂವೊ ದಾರ್‌ಕ್ ಅಪ್ಪನಾನ ದೇವನ ಕಾಂಬ್‍ಚಿಡ್‍ವಕ್ ಚಿತ್ತ ಉಂಡೋ, ಅಂವೊನಲ್ಲತೆ ಬೋರೆ ದಾರ್‌ಕು ಅಪ್ಪನ ಗೊತ್ತಾಪುಲೆ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 5:38

ಆಂಡ ಬದ್‍ಲ್ ಪುದಿಯ ದ್ರಾಕ್ಷಿರಸತ್‍ನ ಪುದಿಯ ಚೀಲಕ್ ಬೂಕಂಡು. ಅಕ್ಕ ದಂಡು ಚಾಯಿಪ್ಪ.

ಯೋಹಾನ 10:14

ನಾನೇ ನಲ್ಲ ಕೊರಿ ಕಾಪಂವೊ; ನಾಡ ಅಪ್ಪಂಗ್ ನನ್ನ ಚಾಯಿತೆ ಗೊತ್ತುಳ್ಳನೆಕೆ ಪಿಂಞ ನಾಕ್ ನಾಡ ಅಪ್ಪನ ಚಾಯಿತೆ ಗೊತ್ತುಳ್ಳನೆಕೆ, ನಾಕ್ ನಾಡ ಕೊರಿಯಳ ಚಾಯಿ ಗೊತ್ತುಂಡ್, ನಾಡ ಕೊರಿಯಕೂ ನನ್ನ ಚಾಯಿತೆ ಗೊತ್ತುಂಡ್.

ಯೋಹಾನ 10:27

ನಾಡ ಕೊರಿಯ ನಾಡ ಸದ್ದ್‌ನ ಕ್‍ೕಪ; ನಾಕ್ ಅಯಿಂಗಳ ಗೊತ್ತುಂಡ್, ಅಯಿಂಗ ನಾಡ ಬಯ್ಯ ಬಪ್ಪ.

ಯೋಹಾನ 17:3

ಸತ್ಯ ದೇವನಾಯಿತುಳ್ಳ ನೀನ್ ಒಬ್ಬನ ಪಿಂಞ ನೀನ್ ಅಯಿಚ ಯೇಸು ಕ್ರಿಸ್ತನ ಗೊತ್ತಾಪದೇ ನಿತ್ಯ ಜೀವ.

ರೋಮ್ 8:29

ದೇವ ತಾಂಡ ದುಂಬ ಮಕ್ಕಡಲ್ಲಿ ತಾಂಡ ಮೋಂವೊ ಆದ್ಯಂವೊನಾಯಿತಿಪ್ಪಕಾಯಿತ್, ದೇವ ದಾರ್‌ನ ಮಿಂಞಲೇ ಗೊತ್ತ್ ಮಾಡ್‍ಚೋ, ಅಯಿಂಗಳ ತಾಂಡ ಮೋಂವೊಂಡ ರೂಪತ್‍ರನೆಕೆ ಇಪ್ಪಕಾಯಿತ್ ಮಿಂಞಲೇ ತೀರ್ಮಾನ ಮಾಡ್‍ಚಿ.

ರೋಮ್ 8:3

ಅದ್ ಎನ್ನನೆ ಎಣ್ಣ್‌ಚೇಂಗಿ, ನಂಗಡೊಳ್‌ಲ್ ಉಳ್ಳ ಏದು ಮಾಡ್‌ವಕ್ ಕಯ್ಯತ ಪಾಪತ್‍ರ ಗುಣತ್‍ರಗುಂಡ್, ನ್ಯಾಯಪ್ರಮಾಣಕ್ ಏದು ಮಾಡ್‌ವಕ್ ಕಯ್ಯತ ಪೋಚಿ. ಆನಗುಂಡ್ ನ್ಯಾಯಪ್ರಮಾಣ ಮಾಡ್‌ವಕ್ ಕಯ್ಯತದ್‍ನ, ನಂಗಕ್ ಮಾಡ್‌ವಕಾಯಿತ್, ದೇವ ಅಂವೊಂಡ ಮೋಂವೊನ ಪಾಪತ್‍ರ ಗುಣ ಉಳ್ಳ ನಂಗಡ ತಡಿರನೆಕೆ ಉಳ್ಳ ಶರೀರತ್‍ಲ್ ಪಿಂಞ ಅಂವೊನ ಪಾಪಕ್ ಯಾಗವಾಯಿತ್ ಅಯಿಚತ್. ಅನ್ನನೆ ಅಂವೊ ಪಾಪತ್‍ನ ತಡೀಲ್ ತೀರ್ಪ್ ಮಾಡ್‍ಚಿ.

1 ಕೊರಿಂಥ 13:12

ಇಕ್ಕ, ನಂಗಡ ಬದ್‍ಕ್‍ನ, ಒರ್ ಕನ್ನಡಿಲ್ ಕಾಂಬನೆಕೆ ನೆಳನ ನೋಟಿಯಂಡುಂಡ್. ಅಕ್ಕ ನಂಗ ಚಾಯಿತೆ ನೇರಾನದ್‌ನ ಕಾಂಬ. ಇಕ್ಕ ನಾನ್ ನೋಟಿಯಂಡುಳ್ಳದ್ ಪರಿಪೂರ್ಣವಾನದ್ ಅಲ್ಲ, ಆಚೇಂಗಿ, ದೇವಕ್ ನನ್ನ ಪೂರ್ತಿ ಗೊತ್ತುಳ್ಳನೆಕೆ, ನಾನು ಎಲ್ಲಾನ ಚಾಯಿ ಅರ್ಥ ಮಾಡ್‌ವಕ್ ಅಕ್ಕ ಕಯ್ಯು.

1 ಕೊರಿಂಥ 15:34

ಏದ್ ಬೋದನೆ ಸರಿಯಾನದೊ, ಅದ್‍ನ ಮಾತ್ರ ಗೇನ ಮಾಡಿಯಂಡಿರಿ, ಪಾಪ ಮಾಡ್‌ವದ್‍ನ ನಿಪ್ಪ್‌ಚಿಡಿ, ನಿಂಗಡಲ್ಲಿ ಚೆನ್ನ ಜನಕ್ ದೇವ ದಾರ್‍ೕಂದ್ ಗೊತ್ತಿಲ್ಲತೆ ಉಳ್ಳಿರ. ನಿಂಗಕ್ ಞಾಣ ಆಪಕಾಯಿತ್ ಇದ್‍ನ ಎಣ್ಣ್‌ವಿ.

1 ಕೊರಿಂಥ 8:3

ಆಚೇಂಗಿ ದೇವನ ಪ್ರೀತಿ ಮಾಡ್‍ವಂವೊನ, ದೇವಕ್ ಗೊತ್ತಿಪ್ಪ.

2 ಕೊರಿಂಥ 11:20

ಒಬ್ಬ ನಿಂಗಳ ಅಡಿಮೆ ಪಡ್‍ತ್‍ಚೇಂಗಿಯು, ಒಬ್ಬ ನಿಂಗಳ ಮುಗ್ಗ್‌ಚಿಟ್ಟತೇಂಗಿಯು, ಒಬ್ಬ ನಿಂಗಳ ಪುಡ್‌ಚಿತ್ ಕೊಂಡ್ ಪೋಚೇಂಗಿಯು, ಒಬ್ಬ ತನ್ನ ತಾನೆ ಕೊಚ್ಚ್‌ತೇಂಗಿಯು, ಒಬ್ಬ ನಿಂಗಡ ಮೂಡ್‍ಕ್ ಪೊಜ್ಜತೇಂಗಿಯು ನಿಂಗ ಸಹಿಸಿಯಂಡಿಂಜಿರ.

2 ಕೊರಿಂಥ 4:6

ಇರ್‌ಟ್‌ಂಜ ಬೊಳಿನ ಮಿನ್ನ್‌ವಕ್ ಎಣ್ಣ್‌ನ ದೇವ, ಯೇಸು ಕ್ರಿಸ್ತಂಡ ಮೂಡ್‍ಲ್ ಉಳ್ಳ ತಾಂಡ ಮಹಿಮೇರ ಜ್ಞಾನತ್‍ರ ಬೊಳಿನ ತಪ್ಪಕಾಯಿತ್, ನಂಗಡ ಹೃದಯತ್‍ಲ್ ಮಿನ್ನ್‌ಚಿ.

ಗಲಾತ್ಯ 3:3

ಪವಿತ್ರಾತ್ಮತ್‍ಲ್ ಕ್ರಿಸ್ತ ಬದ್‍ಕ್‍ನ ಸುರು ಮಾಡ್‍ನ ನಿಂಗ, ಎನ್ನಂಗ್ ನಿಂಗಡ ಸ್ವಂತ ಶಕ್ತಿಲ್ ಸರಿಯಾಯಿತ್ ಬದ್‍ಕಂಡೂಂದ್ ಪ್ರಯತ್ನ ಪಟ್ಟಂಡುಳ್ಳಿರಾ? ನಿಂಗ ಇಚ್ಚಕ್ ಬುದ್ದಿ ಇಲ್ಲತಯಿಂಗಳಾಯಿತ್ ಉಳ್ಳಿರಾ?

ಗಲಾತ್ಯ 4:3

ನಂಗ ಸಹ ಕ್ರಿಸ್ತನ ಗೊತ್ತಾಪಕ್ ಮಿಂಞ ಅನ್ನನೆ ಇಂಜತ್. ನಂಗ ಚೆರಿಯ ಮಕ್ಕಳಾಯಿತ್‌ಪ್ಪಕ, ಈ ಲೋಕತ್‍ರ ಆತ್ಮೀಯ ಅದಿಕಾರಕ್ ಆಡಿಯಾಳಾಯಿತ್ಂಜತ್.

ಎಫೆಸ 1:17

ಯೇಸು ಕ್ರಿಸ್ತಂಡ ಒಡೆಯನು, ಮಹಿಮೇರ ಅಪ್ಪನು ಆಯಿತುಳ್ಳ ದೇವನ, ನಿಂಗ ಚಾಯಿತೆ ಗೊತ್ತಾಪಕುಳ್ಳ ಜ್ಞಾನತ್‍ನ ಪಿಂಞ ಪ್ರಕಟನೆನ ತಪ್ಪ ಪವಿತ್ರಾತ್ಮತ್‍ನ ನಿಂಗಕ್ ತರಂಡೂಂದ್ ಪ್ರಾರ್ಥನೆ ಮಾಡಿಯಂಡುಳ್ಳ.

2 ತಿಮೊಥೆಯ 2:19

ಆಚೇಂಗಿಯು ದೇವಡ ವಾಕ್ಯತ್‍ರ ಅಡಿಪಾಯ ಗಟ್ಟಿಯಾಯಿತ್ ನಿಂದಿತುಂಡ್. ಅದ್‍ಲ್: ಒಡೆಯಂಗ್ ಅಂವೊಂಡ ಜನ ದಾರ್‍ೕಂದ್ ಗೊತ್ತುಂಡ್‍ೕಂದ್ ಪಿಂಞ ದೇವಡ ಪೆದತ್‍ನ ಎಣ್ಣುವ ಎಲ್ಲಾ ಜನಳು ಕೆಟ್ಟ ಕೆಲಸತ್‍ನ ಬುಟ್ಟಿತ್ ದೂರ ಆಂಡೂಂದ್ ದೇವಡ ವಾಕ್ಯತ್‍ಲ್ ಎಣ್ಣಿತುಂಡ್.

ಇಬ್ರಿಯ 7:18

ಮಿಂಞತ್‍ರ ಆಜ್ಞೆ ಬಲಹೀನದಾಯಿತು ಪ್ರಯೋಜನ ಇಲ್ಲತದಾಯಿತು ಇಂಜಗುಂಡ್ ಅದ್‍ನ ಬದ್‍ಲ್ ಮಾಡ್‍ಚಿ.

2 ಪೇತ್ರ 2:20

ಒಡೆಯನಾನ ಯೇಸು ಕ್ರಿಸ್ತನ ಗೊತ್ತಾಯಿತ್, ಈ ಲೋಕತ್‍ರ ಪಾಳ್ ಪಾಪತ್ಂಜ ಬಚಾವಾನಯಿಂಗ ಪುನಃ ಅದ್‍ಲ್ ಚಿಕ್ಕಿತ್ ಪೋನಕ ಅಯಿಂಗಕ್ ಬಪ್ಪಕುಳ್ಳ ಸ್ತಿತಿ ಮಿಂಞತ್‍ರ ಸ್ತಿತಿಕಿಂಜ ಮೋಸವಾಯಿತ್‌ಪ್ಪ.

1 ಯೋಹಾನ 5:20

ದೇವಡ ಮೋಂವೊ ಬಂತ್ ನೇರಾನ ದೇವ ದಾರ್‍ೕಂದ್ ನಂಗಕ್ ಗೊತ್ತಾಪನೆಕೆ ಅರ್ಥ ಮಾಡಿತಾತ್. ಇಕ್ಕ ನಂಗ ಅಂವೊಂಡ ಮೋಂವೊಂಡ ಕೂಡೆ ಐಕ್ಯತ್‍ಲ್ ಬದ್‍ಕಿಯಂಡುಳ್ಳಗುಂಡ್, ನಂಗೆಲ್ಲಾ ನಿತ್ಯ ಜೀವವಾಯಿತುಳ್ಳ ನೇರಾನ ದೇವಡ ಐಕ್ಯತ್‍ಲ್ ಬದ್‍ಕಿಯಂಡುಂಡ್.