ಎಫೆಸ 5:25 - ಕೊಡವ ಬೈಬಲ್

²⁵ ವಡಿಯಂಗಳೇ, ನಿಂಗ ನಿಂಗಡ ಪೊಣ್ಣಾಳುವಳ ಪ್ರೀತಿ ಮಾಡಂಡು, ಕ್ರಿಸ್ತ ಸಹ ಅನ್ನನೆ ಸಬೇನ ಪ್ರೀತಿ ಮಾಡಿತ್, ಅಂವೊನೇ ಅವಕಾಯಿತ್ ತಾಂಡ ಜೀವತ್‍ನ ಕೊಡ್‍ತತ್.

ಎಫೆಸ 5:25 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 2:24

ಈ ಕಾರಣತ್‌ಂಜ ಒರ್‌ ಮನುಷ್ಯ ತಾಂಡ ಅಪ್ಪನ ಅವ್ವನ ಬುಟ್ಟಿತ್, ತಾಂಡ ಪೊಣ್ಣ್‌ರ ಕೂಡೆ ಕೂಡಿತ್, ಅಯಿಂಗ ದಂಡಾಳು ಒರೇ ತಡಿಯಾಯಿತ್ತಿಪ್ಪ.

ಆದ್ಯತ್‌ರ ಪುಸ್ತಕ 24:67

ಅಲ್ಲಿಂಜ ಇಸಾಕ ಅವಳ ತಾಂಡ ಅವ್ವ ಸಾರಳಂಡ ಗುಡಾರಕ್‌ ಕಾಕಿಯಂಡ್‌ ಪೋಯಿತ್, ರೆಬೆಕ್ಕಳ ಮಂಗಲ ಕಯಿಚತ್. ಅವ ಅಂವೊಂಡ ಪೊಣ್ಣ್‌ ಆಚಿ. ಅಂವೊ ಅವಳ ಪ್ರೀತಿ ಮಾಡಿತ್‌ ತಾಂಡ ಅವ್ವ ಚತ್ತ ದುಃಖತ್‌ನ ಮರ್‌ಂದತ್.

ಮತ್ತಾಯ 20:28

ಅನ್ನನೆ, ಮನುಷ್ಯಕುಮಾರ ಸಹ ಬೋರೆಯಿಂಗಡಿಂಜ ಸೇವೆ ಮಾಡ್‌ಚಿಟ್ಟ್‌ವಕಾಯಿತ್ ಬಂದಿತ್ತ್‌ಲ್ಲೆ. ಆಚೇಂಗಿ ಸೇವೆ ಮಾಡ್‌ವಕಾಯಿತು, ದುಂಬ ಜನಳ ಬುಡ್‍ಗಡೆ ಮಾಡ್‌ವಕ್ ತಾಂಡ ಜೀವತ್‍ನ ಕೊಡ್‍ಪಕಾಯಿತು ಬಂದಿಯೇಂದ್ ಎಣ್ಣ್‌ಚಿ.

ಯೋಹಾನ 6:51

ನಾನೇ ಪರಲೋಕತ್ಂಜ ಬಂದ ಜೀವತ್‍ರ ಒಟ್ಟಿ; ಈ ಒಟ್ಟಿನ ತಿಂಬಯಿಂಗ ಎಕ್ಕಾಲು ಬದ್‍ಕ್‍ವ; ನಾನ್ ತಪ್ಪ ಒಟ್ಟಿ ನಾಡ ತಡಿಯೇ. ಈ ಲೋಕತ್‍ರ ಜನ ನಿತ್ಯ ಜೀವ ಪಡೆಯುವಕಾಯಿತ್ ನಾನ್ ನಾಡ ತಡೀನ ತಪ್ಪೀಂದ್ ಎಣ್ಣ್‌ಚಿ.

ಅಪೊಸ್ತಲ 20:28

ಆನಗುಂಡ್, ನಿಂಗಡ ವಿಷಯತ್‍ಲ್ ಪಿಂಞ ದೇವ ತಾಂಡ ಸ್ವಂತ ಚೋರೆಯಿಂಜ ಸಂಪಾದನೆ ಮಾಡ್‍ನ, ಸಬೇನ ನಡ್‍ತುವ ವಿಷಯತ್‍ಲು ಎಚ್ಚರತ್‍ಲ್ ಇರಿ. ಪವಿತ್ರಾತ್ಮ, ಅಂವೊಂಡ ಕೊರಿರ ಗುಂಪ್‍ರನೆಕೆ ಉಳ್ಳ ಸಬೆರ ಜನಕ್ ಸಬೆರ ಪೆರಿಯಯಿಂಗಳಾಯಿತ್ ನಿಂಗಳ ನೇಮಿಚಿಟ್ಟತ್.

ಗಲಾತ್ಯ 1:4

ಅಂವೊ ನಂಗಳ ಇಕ್ಕತ್‍ರ ಮೋಸವಾನ ಲೋಕತ್ಂಜ ಕಾಪಾಡ್‌ವಕಾಯಿತ್, ನಂಗಡ ಅಪ್ಪನಾನ ದೇವಡ ಚಿತ್ತತ್‍ರನೆಕೆ ನಂಗಡ ಪಾಪಕಾಯಿತ್ ಅಂವೊನ ಚಾವ್‍ಕ್ ಒಪ್ಪ್‌ಚಿಟ್ಟತ್.

ಗಲಾತ್ಯ 2:20

ನಾನ್ ಕ್ರಿಸ್ತಂಡ ಕೂಡೆ ಶಿಲುಬೇಲ್ ಚತ್ತ್ ಪೋಯೆ. ಆಚೇಂಗಿ, ಬದ್‍ಕಿಯಂಡುಂಡ್; ಇಂಞು ಮಿಂಞಕ್ ನಾನ್ ಅಲ್ಲ, ಕ್ರಿಸ್ತನೇ ನಾಡ ಒಳ್‍ಲ್ ಬದ್‍ಕ್‍ವ; ನಾನ್ ಇಕ್ಕ ತಡೀಲ್ ಬದ್‍ಕಿಯಂಡುಳ್ಳದ್ ಎನ್ನನೆ ಎಣ್ಣ್‌ಚೇಂಗಿ, ನಾಡ ಮೇಲೆ ದುಂಬ ಪ್ರೀತಿ ಬೆಚ್ಚಿತ್, ತಾಂಡ ಜೀವತ್‍ನ ಒಪ್ಪ್‌ಚಿಟ್ಟ ದೇವಡ ಮೋಂವೊಂಡ ಮೇಲೆ ಉಳ್ಳ ನಂಬಿಕೇಲ್ ಬದ್‍ಕಿಯಂಡುಂಡ್.

ಎಫೆಸ 5:2

ಕ್ರಿಸ್ತ ನಂಗಳ ಪ್ರೀತಿ ಮಾಡಿತ್, ನಂಗಕಾಯಿತ್, ದೇವಕ್ ಎನ್ನನೆ ಅಂವೊನನೇ ಒರ್ ಸುಗಂದ ವಾಸನೆರ ಕಾಣಿಕೆಯಾಯಿತು, ಬಲಿಯಾಯಿತು ಒಪ್ಪ್‌ಚಿಟ್ಟತೋ ಅನ್ನನೆ ನಿಂಗಳು ಸಹ ಪ್ರೀತಿಲ್ ನಡ್‌ಕಂಡು.

ಎಫೆಸ 5:24

ಆನಗುಂಡ್, ಸಬೆ ಕ್ರಿಸ್ತಂಗ್ ತಗ್ಗಿತ್ ನಡ್‍ಪನೆಕೆ, ಪೊಣ್ಣಾಳುವಳೇ ನಿಂಗಡ ಸ್ವಂತ ವಡಿಯಂಗಕ್ ಎಲ್ಲಾ ವಿಷಯತ್‍ಲು ತಗ್ಗಿತ್ ನಡ್‌ಕಂಡು.

ಎಫೆಸ 5:28

ಅನ್ನನೆ ವಡಿಯಂಗಳು, ನಿಂಗಡ ಸ್ವಂತ ತಡೀನ ಪ್ರೀತಿ ಮಾಡ್‌ವನೆಕೆ, ನಿಂಗಡ ಪೊಣ್ಣಾಳುವಳ ಪ್ರೀತಿ ಮಾಡಂಡು; ತಾಂಡ ಪೊಣ್ಣ್‌ನ ಪ್ರೀತಿ ಮಾಡ್‌ವಂವೊ ಅಂವೊನ ಅಂವೊನೇ ಪ್ರೀತಿ ಮಾಡಿಯಂಡುಂಡ್.

ಎಫೆಸ 5:33

ಎನ್ನನೆ ಆಚೇಂಗಿಯು, ಪ್ರತಿ ಒಬ್ಬನು ಅಂವೊನ ತಾನೆ ಪ್ರೀತಿ ಮಾಡ್‌ವನೆಕೆ ತಾಂಡ ಪೊಣ್ಣ್‌ನ ಪ್ರೀತಿ ಮಾಡಂಡು; ಪ್ರತಿ ಪೊಣ್ಣಾಳು ಅವಡ ವಡಿಯಂಗ್ ಮರ್ಯಾದೆ ಕೊಡ್‍ಕಂಡು.

ಕೊಲೊಸ್ಸೆ 3:19

ವಡಿಯಂಗಳೇ, ನಿಂಗ ನಿಂಗಡ ಪೊಣ್ಣಾಳುವಳ ಪ್ರೀತಿ ಮಾಡಂಡು, ಅಯಿಂಗಡ ಮೇಲೆ ಕಯಿಪ್‌ಲ್ ಇಪ್ಪಕ್ಕಾಗ.

1 ತಿಮೊಥೆಯ 2:6

ಎಲ್ಲಾ ಜನಳು ಬುಡ್‍ಗಡೆ ಆಂಡೂಂದ್ ಅದ್ಂಗುಳ್ಳ ಬೆಲೆಯಾಯಿತ್ ಅಂವೊನ ಅಂವೊನಾಯಿತೇ ಬಲಿಯಾಪನೆಕೆ ಮರಣಕ್ ಒಪ್ಪ್‌ಚಿಟ್ಟಂವೊನು ಅಂವೊನೇ. ತಕ್ಕ ಸಮಯತ್‍ಲ್ ದೇವ ಈ ನಲ್ಲ ಸುದ್ದಿನ ಈ ಲೋಕಕ್ ಕೊಡ್‌ತಿತುಂಡ್.

1 ಪೇತ್ರ 3:7

ಅನ್ನನೆ, ವಡಿಯಂಗಳೇ! ನಿಂಗಡ ಪೊಣ್ಣಾಳುವ ತಡೀಲ್ ಬೆಲ ಇಲ್ಲತಯಿಂಗಳಾಯಿತ್ ಉಳ್ಳಾಂಗ್, ನಿಂಗಡ ಪ್ರಾರ್ಥನೆಕ್ ತಡೆ ಬರತನೆಕೆ, ಜ್ಞಾನತ್‍ಲ್ ಅಯಿಂಗಡ ಕೂಡೆ ಬದ್‌ಕಿತ್, ನಿಂಗಡ ಕೂಡೆ ಅಯಿಂಗಳು ಕೃಪೇರ ನಿತ್ಯ ಜೀವಕ್ ಪಾಲ್‍ದಾರಂಗಳಾನಗುಂಡ್, ಅಯಿಂಗಕ್ ಬೋಂಡಿಯಾನ ಮರ್ಯಾದೆನ ಕೊಡ್‍ಕಂಡು.

ಪ್ರಕಟನೆ 1:5

ನೇರಾನ ಸಾಕ್ಷಿ ಉಳ್ಳಂವೊನಾಯಿತು, ಚತ್ತಯಿಂಗಡ ಮದ್ಯತ್ಂಜ ಆದ್ಯವಾಯಿತ್ ಜೀವತ್‍ಲ್ ಎದ್ದಂವೊನಾಯಿತು, ಈ ಲೋಕತ್‍ರ ರಾಜಂಗಕೆಲ್ಲಾ ಅದಿಪತಿಯಾಯಿತು ಉಂಡ್. ಅಂವೊ ನಂಗಳ ಪ್ರೀತಿ ಮಾಡಿತ್, ತಾಂಡ ಸ್ವಂತ ಚೋರೆನಗುಂಡ್ ನಂಗಳ ಪಾಪತ್ಂಜ ಬುಡ್‍ಗಡೆ ಮಾಡಿತ್,

ಪ್ರಕಟನೆ 5:9

ನೀನ್ ಈ ಪುಸ್ತಕತ್‍ನ ಎಡ್‍ಪಕು, ಅದ್ಂಡ ಮುದ್ರೆಯಳ ಪೊಳಿಪಕು ಯೋಗ್ಯನಾಯಿತುಳ್ಳಿಯ; ಎನ್ನಂಗೆಣ್ಣ್‌ಚೇಂಗಿ, ನೀನ್ ಮಿಂಞಲೇ ಬಲಿಯಾಯಿತ್, ಎಲ್ಲಾ ಕುಲತ್ಂಜ, ಎಲ್ಲಾ ತಕ್ಕ್‌ಯಿಂಜ, ಎಲ್ಲಾ ಜನತ್‍ಂಜ, ಎಲ್ಲಾ ಜಾತಿಯಿಂಜ ಜನಳ ದೇವಕಾಯಿತ್ ನೀಡ ಚೋರೆನಗುಂಡ್ ಬುಡ್‍ಗಡೆ ಮಾಡಿತ್,