23 ನಿಂಗಡ ಮನಸ್ಸ್‌ಲ್, ಪುದಿಯ ಆತ್ಮತ್‍ರಗುಂಡ್ ಬದ್‍ಲಾನಯಿಂಗಳಾಯಿತ್,
ಇಂಞು ಮಿಂಞಕ್ ಈ ಲೋಕತ್‍ರ ರೀತಿಕ್ ಒತ್ತಂಡ್ ಪೋಕತಿ. ನಲ್ಲದಾಯಿತು, ಯೋಗ್ಯವಾಯಿತು, ಪೂರ್ತಿಯಾಯಿತುಳ್ಳ ದೇವಡ ಚಿತ್ತ ಎಂತ್‍ೕಂದ್ ಗೊತ್ತಾಪಕಾಯಿತ್, ನಿಂಗಡ ಮನಸ್ಸ್‌ನ ಪುದಿಯದ್ ಮಾಡಿಯಂಡ್ ಬದ್‍ಲಾಯಂಡಿರಿ.
ಅನ್ನನೆ, ಅಪ್ಪನಾನ ದೇವಡ ಮಹಿಮೇರಗುಂಡ್, ಕ್ರಿಸ್ತನ ಚತ್ತಯಿಂಗಡ ಮದ್ಯತ್ಂಜ ಎಪ್ಪ್‌ಚಿಟ್ಟನೆಕೆ, ನಂಗಳು, ಪುದಿಯ ಜೀವ ಕ್‍ಟ್ಟ್‌ನಯಿಂಗಳಾಯಿತ್ ನಡ್‍ಕಂಡೂಂದ್, ಅಂವೊಂಡ ಚಾವ್‍ಲ್ ನಂಗ ಪಾಲದಾರಂಗಳಾಪನೆಕೆ, ದೀಕ್ಷಾಸ್ನಾನತ್‍ರ ಮೂಲಕ ಕ್ರಿಸ್ತಂಡ ಕೂಡೆ ನಂಗಳ ಪೂತ್ತತ್.
ಪಾಪತ್‍ರ ಗುಣ ಕಾಟಿತಪ್ಪ ಬಟ್ಟೇಲ್ ನಡ್‍ಕಂಡೂಂದ್ ಉಳ್ಳ ಗೇನ, ನಂಗಳ ಆತ್ಮೀಯ ಚಾವ್‍ಕ್ ಬಲ್‍ಚಂಡ್ ಪೋಪ; ಆಚೇಂಗಿ, ದೇವಡ ಆತ್ಮ ಕಾಟಿತಪ್ಪ ಬಟ್ಟೇಲ್ ನಡ್‍ಕಂಡೂಂದ್ ಉಳ್ಳ ಗೇನ ನಂಗಳ ನೇರಾನ ಜೀವಕ್ ಪಿಂಞ ಸಮಾದಾನ ಉಳ್ಳ ಬದ್‍ಕ್‍ಕ್ ನಡ್‍ತಿಯಂಡ್ ಪೋಪ.
ಎನ್ನನೆ ಎಣ್ಣ್‌ಚೇಂಗಿ, ನಲ್ಲ ಕೆಲಸ ಮಾಡ್‌ವಕಾಯಿತ್ ನಂಗಳ ಪುದಿಯದಾಯಿತ್ ಕ್ರಿಸ್ತ ಯೇಸುರಲ್ಲಿ ಸೃಷ್ಟಿ ಮಾಡ್‍ನ ದೇವಡ ಕ್ರಿಯೇಯಾಯಿತುಂಡ್; ಅದ್‍ಲ್ ನಂಗ ನಡ್‍ಕಂಡೂಂದ್ ದೇವ ಮಿಂಞಲೇ ತಯಾರ್ ಮಾಡಿತುಂಡ್.
ಇಕ್ಕ ನಿಂಗ, ಒರ್ ಪುದಿಯ ಮನುಷ್ಯಂಡ ಗುಣತ್‍ನ ಇಟ್ಟಿತುಳ್ಳಿರ. ನಿಂಗಡಲ್ಲಿ ಈ ಪುದಿಯ ಮನುಷ್ಯನ ಸೃಷ್ಟಿ ಮಾಡ್‍ನ ದೇವ, ನಿಂಗ ಕ್ರಿಸ್ತನ ಪೂರ್ತಿಯಾಯಿತ್ ಅರಿಯಂಡೂಂದ್ ನಿಂಗಳ ಪುದಿಯದಾಯಿತ್ ಬದ್‍ಲ್ ಮಾಡಿಯಂಡ್ ಉಂಡ್.
ನಂಗ ಮಾಡ್‍ನ ನೀತಿರ ಕೆಲಸತ್‍ರಗುಂಡ್ ನಂಗಳ ರಕ್ಷಣೆ ಮಾಡತೆ, ಅಂವೊಂಡ ಕರುಣೇರಗುಂಡ್ ನಂಗಳ ರಕ್ಷಣೆ ಮಾಡ್‍ಚಿ. ಅನ್ನನೆ ನಂಗಡ ಪಾಪತ್‍ನ ಕತ್ತಿತ್, ಪುನಃ ಪುದಿಯದಾಯಿತ್ ಪುಟ್ಟಿತುಳ್ಳನೆಕೆ ನಂಗಕ್ ಪುದಿಯ ಜೀವ ತಂದಿತ್, ನಂಗಡ ಮನಸ್ಸ್‌ನ ಪವಿತ್ರಾತ್ಮಂಡ ಮೂಲಕ ಬದ್‍ಲ್ ಮಾಡ್‍ಚಿ.
ಅದ್ಂಗಾಯಿತ್, ನಿಂಗಡ ಮನಸ್ಸ್‌ನ ಗಟ್ಟಿಯಾಯಿತ್ ನಿಂಗಡ ಪುಡ್‍ತತ್‍ಲ್ ಬೆಚ್ಚೊಳಿ. ನಿಂಗ ಎಲ್ಲಾರು ತನ್ನಡಕತ್‍ಲ್ ನಿಂಗಡ ಮನಸ್ಸ್‌ನ ಎಚ್ಚರತ್‍ಲ್ ಬೆಚ್ಚಂಡ್, ಯೇಸು ಕ್ರಿಸ್ತ ಪುನಃ ಬಪ್ಪಕ, ನಿಂಗಕ್ ಕ್‍ಟ್ಟ್‌ವ ಕೃಪೇರ ಮೇಲೆ ಪೂರ್ತಿ ನಿರೀಕ್ಷೆ ಉಳ್ಳಯಿಂಗಳಾಯಿತಿರಿ.
