ಎಫೆಸ 1:7 - ಕೊಡವ ಬೈಬಲ್

⁷ ಅಂವೊಂಡ ಕೃಪೇರ ಐಶ್ವರ್ಯತ್‍ರಗುಂಡ್, ಅಂವೊಂಡ ಮೋಂವೊಂಡ ಚೋರೆರ ಮೂಲಕ ನಂಗಡ ಪಾಪಕ್ ಮನ್ನಿಪ್ ಕ್‍ಟ್ಟಿತ್, ವಿಮೋಚನ ಕ್‍ಟ್ಟ್‌ಚಿ.

ಎಫೆಸ 1:7 ပူးပေါင်းရင်းမြစ်များ

ಯೋನ ಪ್ರವಾದಿರ ಪ್ರವಾದನೆ ಪುಸ್ತಕ 4:2

ಅಕ್ಕ ಅಂವೊ ಯೆಹೋವನ ನೋಟಿತ್‌ ಬೋಡ್‌ಚಿ: ಓ ಯೆಹೋವನೇ, ನಾನ್‌ ನಾಡ ದೇಶತ್‌ ಇಪ್ಪಕಲೇ ಇನ್ನನೆ ಆಪಾಂದ್‌ ಎಣ್ಣ್‌ನಲ್ಲ? ಅದ್‌ಂಗಾಯಿತ್‌ ನಾನ್‌ ಮಿಂಞಲೇ ತಾರ್ಷೀಷ್‌ಕ್‌ ಓಡಿಪೋನ. ನೀನ್‌ ದಯೆ, ಕನಿಕರ, ದೀರ್‌ಗ ಶಾಂತಿ, ಬಲ್ಯ ಕೃಪೆ ಉಳ್ಳಂವೊನು, ದಾರ್‌ನೊ ನಾಶ ಮಾಡುವಕ್‌ ಕುಶಿ ಪಡತೆ ನೀಡ ಮನಸ್ಸ್‌ನ ಬದ್‌ಲ್‌ಚಿಡುವ ದೇವಾಂದು ನಾಕ್‍ ಗೊತ್ತುಂಡ್.

ಮತ್ತಾಯ 20:28

ಅನ್ನನೆ, ಮನುಷ್ಯಕುಮಾರ ಸಹ ಬೋರೆಯಿಂಗಡಿಂಜ ಸೇವೆ ಮಾಡ್‌ಚಿಟ್ಟ್‌ವಕಾಯಿತ್ ಬಂದಿತ್ತ್‌ಲ್ಲೆ. ಆಚೇಂಗಿ ಸೇವೆ ಮಾಡ್‌ವಕಾಯಿತು, ದುಂಬ ಜನಳ ಬುಡ್‍ಗಡೆ ಮಾಡ್‌ವಕ್ ತಾಂಡ ಜೀವತ್‍ನ ಕೊಡ್‍ಪಕಾಯಿತು ಬಂದಿಯೇಂದ್ ಎಣ್ಣ್‌ಚಿ.

ಮತ್ತಾಯ 26:28

ಇದ್, ಪಾಪಕ್ ಮನ್ನಿಪ್ ಕ್‍ಟ್ಟ್‌ವಕ್, ದುಂಬ ಜನಕಾಯಿತ್ ಬೂಕ್‌ವ ಪುದಿಯ ಒಪ್ಪಂದತ್‍ರ ನಾಡ ಚೋರೆಯಾಯಿತುಂಡ್.

ಮತ್ತಾಯ 6:12

ನಂಗಕ್ ವಿರೋದವಾಯಿತ್ ಪಾಪ ಮಾಡ್‍ನಯಿಂಗಳ ನಂಗ ಮನ್ನಿಚಿಡ್‌ವನೆಕೆ, ನಂಗಡ ಪಾಪತ್‍ನ ಮನ್ನಿಚಿಡ್;

ಮಾರ್ಕ 14:24

ಅಕ್ಕ ಅಂವೊ ಅಯಿಂಗಳ ನೋಟಿತ್: ಇದ್ ದುಂಬ ಜನಕಾಯಿತ್ ಬೂಕ್‌ವ ಪುದಿಯ ಒಪ್ಪಂದತ್‍ರ ನಾಡ ಚೋರೆ,

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 1:77

ಪಾಪಕ್ ಮನ್ನಿಪ್ಪ್ ಕ್‍ಟ್ಟಿತ್ ರಕ್ಷಣೆ ಎನ್ನನೆ ಕ್‍ಟ್ಟ್‌ವಾಂದ್, ಜನಕ್ ಎಣ್ಣಿಕೊಡ್‍ಪಿಯ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 24:47

ಇಂಞು: ಯೆರೂಸಲೇಮ್ಂಜ ಎಲ್ಲಾ ದೇಶತ್‍ರ ಜನಕ್ ಪಾಪಕ್ಷಮೆ ಕ್‍ಟ್ಟ್‌ವಕ್ ದೇವಡ ಪಕ್ಕ ತಿರಿಗಿತ್ ಬರಂಡೂಂದ್ ನಾಡ ಅದಿಕಾರತ್‍ಲ್ ಪ್ರಚಾರ ಮಾಡೀಂದ್ ಎಣ್ಣಿ ಕೊಡ್‍ತತ್.

ಯೋಹಾನ 20:23

ನಿಂಗ ದಾಡ ಪಾಪತ್‍ನ ಮನ್ನಿಚಿಡ್‌ವಿರ, ಆ ಪಾಪತ್ಂಜ ಅಯಿಂಗಕ್ ಮನ್ನಿಪ್ ಕ್‍ಟ್ಟುವ, ದಾಡ ಪಾಪತ್‍ನ ಮನ್ನಿಚಿಡುಲೆ ಅಯಿಂಗಕ್ ಆ ಪಾಪತ್ಂಜ ಮನ್ನಿಪ್ ಕ್‍ಟ್ಟ್‌ಲೇಂದ್ ಎಣ್ಣ್‌ಚಿ.

ಅಪೊಸ್ತಲ 10:43

ಅಂವೊಂಡ ಮೇಲೆ ನಂಬಿಕೆ ಇಡ್‍ವಯಿಂಗಕ್ ಅಂವೊಂಡ ಪೆದತ್‍ರ ಶಕ್ತಿಯಿಂಜ ಅಯಿಂಗಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ವಾಂದ್ ಎಲ್ಲಾ ಪ್ರವಾದಿಯಂಗಳು ಅಂವೊಂಡ ವಿಷಯತ್‍ನೇ ಎಣ್ಣ್‌ಚಿ.

ಅಪೊಸ್ತಲ 2:38

ಪೇತ್ರ ಅಯಿಂಗಕ್: ನಿಂಗಡ ಪಾಪಕ್ ಪರಿಹಾರ ಕ್‍ಟ್ಟ್‌ವಕಾಯಿತ್ ನಿಂಗ ಒಬ್ಬೊಬ್ಬನು ದೇವಡ ಪಕ್ಕ ಪಶ್ಚಾತಾಪ ಪಟ್ಟಿತ್, ಯೇಸುರ ಪೆದತ್‍ಲ್ ದೀಕ್ಷಾಸ್ನಾನ ಎಡ್‌ತೊಳಿ. ಅಕ್ಕ ನಿಂಗ ಪವಿತ್ರಾತ್ಮಂಡ ವರತ್‍ನ ಪಡೆಯುವಿರ.

ಅಪೊಸ್ತಲ 20:28

ಆನಗುಂಡ್, ನಿಂಗಡ ವಿಷಯತ್‍ಲ್ ಪಿಂಞ ದೇವ ತಾಂಡ ಸ್ವಂತ ಚೋರೆಯಿಂಜ ಸಂಪಾದನೆ ಮಾಡ್‍ನ, ಸಬೇನ ನಡ್‍ತುವ ವಿಷಯತ್‍ಲು ಎಚ್ಚರತ್‍ಲ್ ಇರಿ. ಪವಿತ್ರಾತ್ಮ, ಅಂವೊಂಡ ಕೊರಿರ ಗುಂಪ್‍ರನೆಕೆ ಉಳ್ಳ ಸಬೆರ ಜನಕ್ ಸಬೆರ ಪೆರಿಯಯಿಂಗಳಾಯಿತ್ ನಿಂಗಳ ನೇಮಿಚಿಟ್ಟತ್.

ಅಪೊಸ್ತಲ 3:19

ಆನಗುಂಡ್, ನಿಂಗಡ ಪಾಪವೆಲ್ಲ ಅಳಸಿ ಪೋಪಕಾಯಿತ್ ಪಶ್ಚಾತಾಪ ಪಟ್ಟಿತ್, ನಿಂಗ ದೇವಡ ಪಕ್ಕ ತಿರಿಗಿ. ಪಿಂಞ ಒಡೆಯಂಡಿಂಜ, ನಿಂಗಕ್ ಆರಾಮ್‍ರ ಕಾಲ ಕ್‍ಟ್ಟ್‌ವನೆಕೆ ಮಾಡ್‌ವ.

ರೋಮ್ 2:4

ಅಥವ, ನಿಂಗ ಪಶ್ಚಾತಾಪ ಪಟ್ಟಿತ್ ದೇವಡ ಕಡೇಕ್ ಬಪ್ಪಕ್ ದೇವಡ ದಯೆ ನಿಂಗಳ ಕಾಕಿಯಂಡ್ ಉಂಡ್‍ೕಂದ್ ಗೊತ್ತಿಲ್ಲತೆ, ದೇವಡ ದಾರಾಳವಾಯಿತುಳ್ಳ ದಯೆ, ಸಯಿಸುವ ಗುಣ ಪಿಂಞ ತಾಳ್ಮೆ ಇನ್ನತಾನ ಐಶ್ವರ್ಯತ್‍ನ ಅಲ್ಲಗೆಳೆಯುವಿರ?

ರೋಮ್ 3:24

ಅಂವೊಂಡ ಇನಾಮ್‍ರ ಕೃಪೇರ ಮೂಲಕ, ಯೇಸು ಕ್ರಿಸ್ತಂಡ ವಿಮೋಚನತ್‍ರಗುಂಡ್ ಮಾತ್ರ ನೀತಿವಂತಯಿಂಗಳಾಯಂಡುಂಡ್.

ರೋಮ್ 3:25

ತಾಂಡ ಚೋರೆರ ಮೂಲಕ ನಂಬಿಕೆ ಇಡ್‌ವಯಿಂಗಡ ಪಾಪತ್‍ರ ಪರಿಹಾರವಾಯಿತ್ ಆಪನೆಕೆ ಯೇಸುನ ಎಲ್ಲಾಡ ಮಿಂಞತ್ ಅರ್ಪಣೆ ಮಾಡ್‍ಚಿ. ಇನ್ನನೆ ದೇವ ನೀತಿಯುಳ್ಳಂವೋಂದ್ ನಿರೂಬಿಚಿಟ್ಟತ್. ಎನ್ನಂಗೆಣ್ಣ್‌ಚೇಂಗಿ, ದೇವ ತಾಂಡ ಪೊರುಮೇಲ್, ಕಯಿಂಜ ಕಾಲತ್‍ಲ್ ಮಾಡ್‍ನ ಪಾಪತ್‍ನ ಕಾಂಗತನೆಕೆ ಇಂಜತ್.

ರೋಮ್ 9:23

ತಾಂಡ ಮಹಿಮೆಕಾಯಿತ್ ತಯಾರ್ ಮಾಡ್‍ನ ಕನಿಕರತ್‍ರ ಪಾತ್ರವಾಯಿತುಳ್ಳ ನಂಗಡ ಮೇಲೆ ತಾಂಡ ಮಹಿಮೇರ ಐಶ್ವರ್ಯತ್‍ನ ಕಾಂಬ್‍ಚಿಡುವಕ್ ಕುಶಿಯುಳ್ಳಂವೊನಾಯಿತು,

1 ಕೊರಿಂಥ 1:30

ಅನ್ನನೆ, ದೇವ ನಿಂಗಳ ಕ್ರಿಸ್ತ ಯೇಸುರ ಕೂಡೆ ಐಕ್ಯತ್‍ಲ್ ಕೂಟಿತುಂಡ್. ಆನಗುಂಡ್ ದೇವ, ಕ್ರಿಸ್ತನ ನಂಗಕ್ ಜ್ಞಾನವಾಯಿತ್ ಮಾಡಿತುಂಡ್. ಅಂವೊಂಡ ಮೂಲಕ ನಂಗಳ, ದೇವಡ ಮಿಂಞತ್‍ಲ್ ನೀತಿವಂತಯಿಂಗಳಾಯಿತು, ಪವಿತ್ರ ಜನಳಾಯಿತು ಪಿಂಞ ನಂಗಕ್ ವಿಮೋಚನ ಕ್‍ಟ್ಟುವನೆಕೆ ಮಾಡಿತುಂಡ್.

2 ಕೊರಿಂಥ 8:9

ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗಕ್ ಗೊತ್ತುಂಡ್; ಅಂವೊ ಐಶ್ವರ್ಯವಂತಂವೊನಾಯಿತ್ ಇಂಜತೇಂಗಿಯು, ಅಂವೊಂಡ ಗರೀಬತನತ್‍ರಗುಂಡ್ ನಿಂಗ ಐಶ್ವರ್ಯವಂತಯಿಂಗಳಾಯಿತ್ ಆಪನೆಕೆ ಅಂವೊ ನಿಂಗಕಾಯಿತ್ ಗರೀಬನಾಚಿ.

ಎಫೆಸ 1:14

ಅಂವೊಂಡ ಮಕ್ಕಳಾಯಿತ್ ಉಳ್ಳ ನಂಗಕ್ ಅಂವೊ ವಾಗ್ದಾನ ಮಾಡ್‍ನನೆಕೆ, ಪೂರ್ತಿ ವಿಮೋಚನ ಕ್‌ಟ್ಟ್‌ವಾಂದ್ ಪವಿತ್ರಾತ್ಮನೇ ನಂಗಕ್ ದೀರ್ಗ ಸಾಕ್ಷಿಯಾಯಿತ್ ಉಂಡ್. ಅಂವೊಂಡ ಮಹಿಮೆನ ನಂಗ ಕೊಂಡಾಡಂಡೂಂದ್ ಅಂವೊ ಇನ್ನನೆ ಮಾಡ್‍ಚಿ.

ಎಫೆಸ 1:18

ಅಂವೊ ನಿಂಗಳ ಕಾಕ್‍ನಗುಂಡ್ ನಿಂಗಕುಳ್ಳ ನಿರೀಕ್ಷೆ ಎಂತದ್‍ೕಂದು, ದೇವಡ ಮಕ್ಕಡ ಪಕ್ಕ ನಂಗಕುಳ್ಳ ಬಾದ್ಯತೆರ ಮಹಿಮೇರ ಐಶ್ವರ್ಯ ಎಂತದ್‍ೕಂದ್ ಗೊತ್ತಾಪಕು,

ಎಫೆಸ 1:6

ಅನ್ನನೆ, ದೇವ ಪ್ರೀತಿ ಮಾಡ್‌ವ ಅಂವೊಂಡ ಮೋಂವೊಂಡಲ್ಲಿ ನಂಗಡ ಮೇಲೆ ಇನಾಮಾಯಿತ್ ಬೂಕ್‌ನ ಅಂವೊಂಡ ಮಹಿಮೇರ ಕೃಪೆಕಾಯಿತ್ ಅಂವೊನ ತುದಿಪನೆಕೆ ಮಾಡ್‍ಚಿ.

ಎಫೆಸ 1:8

ಅನ್ನನೆ ಆ ಕೃಪೇನ ಎಲ್ಲಾ ಜ್ಞಾನತ್ಂಜಲು, ಎಲ್ಲಾ ಬುದ್ದಿಯಿಂಜಲು ನಂಗಕ್ ದುಂಬ ಜಾಸ್ತಿ ತಂದಿತುಂಡ್.

ಎಫೆಸ 2:4

ಆಚೇಂಗಿ, ಕರುಣೆ ದುಂಬ್‍ನ ದೇವನಾನ ಅಂವೊ ನಂಗಡ ಮೇಲೆ ಬೆಚ್ಚ ಬಲ್ಯ ಪ್ರೀತಿರಗುಂಡ್,

ಎಫೆಸ 3:16

ನಿಂಗ ಅಂವೊಂಡ ಪವಿತ್ರಾತ್ಮತ್‍ರ ಶಕ್ತಿರ ಮೂಲಕ ನಿಂಗಡ ಒಳ್‍ಲ್ ಉಳ್ಳ ಮನುಷ್ಯಂಡಲ್ಲಿ ಅಂವೊಂಡ ಮಹಿಮೇರ ಐಶ್ವರ್ಯತ್‍ರಗುಂಡ್ ನಿಂಗ ಬಲಪಡಂಡೂಂದು,

ಎಫೆಸ 3:8

ದೇವಡ ಮಕ್ಕಡಲ್ಲಿ ಎಲ್ಲಾಡಕಿಂಜ ಚೆರಿಯಂವೊನಾನ ನಾಕ್, ಕ್ರಿಸ್ತಂಡ ಲೆಕ್ಕ ಮಾಡ್‌ವಕ್ ಕಯ್ಯತಚ್ಚಕ್ ಉಳ್ಳ ಐಶ್ವರ್ಯತ್‍ನ ಯೆಹೂದ್ಯಂಗಲ್ಲತ ಜನಕ್ ಅರಿಚಿಡುವಕುಳ್ಳ ಈ ಕೃಪೆ ನಾಕ್ ಕ್‍ಟ್ಟ್‌ಚಿ.

ಫಿಲಿಪ್ಪಿ 4:19

ನಾಡ ದೇವ ನಿಂಗಕ್ ಬೋಂಡಿಯಾನದ್‌ನೆಲ್ಲಾ, ದೇವಡ ದುಂಬ್‍ನ ಮಹಿಮೇರ ಐಶ್ವರ್ಯತ್‍ರಗುಂಡ್ ಯೇಸು ಕ್ರಿಸ್ತಂಡ ಮೂಲಕ ನಿಂಗಕ್ ತಪ್ಪ.

ಕೊಲೊಸ್ಸೆ 1:14

ಅಂವೊಂಡ ಮೋಂವೊಂಡಲ್ಲಿ ನಂಗಕ್ ಪಾಪತ್ಂಜ ವಿಮೋಚನವು, ಅಂವೊಂಡ ಚೋರೆಯಿಂಜ ನಂಗಡ ಪಾಪಕ್ ಮನ್ನಿಪ್ ಉಂಡ್.

ಕೊಲೊಸ್ಸೆ 1:27

ಯೆಹೂದ್ಯಂಗಲ್ಲತ ಜನಕಾಯಿತ್ ಅಂವೊ ಬೆಚ್ಚಿತುಳ್ಳ ಈ ಐಶ್ವರ್ಯವಾನ ಮಹಿಮೇರ ಗುಟ್ಟ್‌ನ, ದೇವ ತಾಂಡ ಮಕ್ಕಕ್ ಕಾಂಬ್‍ಚಿಡಂಡೂಂದ್ ಉಳ್ಳದೇ ಅಂವೊಂಡ ಚಿತ್ತ. ಆ ಗುಟ್ಟ್ ಎಂತ ಎಣ್ಣ್‌ಚೇಂಗಿ, ಕ್ರಿಸ್ತ ನಿಂಡಗಲ್ಲಿ ಉಂಡ್, ಅದ್ ಮಹಿಮೇರೆ ನಿರೀಕ್ಷೆಯೇ.

ಕೊಲೊಸ್ಸೆ 2:13

ನಿಂಗ, ನಿಂಗಡ ಪಾಪತ್‍ರಗುಂಡ್ ಪಿಂಞ ನಿಂಗಡ ಪಾಪತ್‍ರ ಗುಣ ನಿಂಗಳ ಬುಟ್ಟಿತ್ ಪೋಕತಗುಂಡ್ ಆತ್ಮೀಯ ಸುನ್ನತಿ ಮಾಡತಯಿಂಗಳಾಯಿತ್ ಚತ್ತ್ ಪೋಯಿತ್ಂಜಿರ. ಆಚೇಂಗಿ, ಕ್ರಿಸ್ತಂಡ ಕೂಡೆ ದೇವ ನಿಂಗಳ ಎಪ್ಪಿತ್ ಬದ್‍ಕ್‍ವಕ್ ಮಾಡಿತ್, ನಿಂಗಡ ಎಲ್ಲಾ ಪಾಪತ್‍ನ ಮನ್ನಿಚಿಟ್ಟಿತ್,

ಕೊಲೊಸ್ಸೆ 2:2

ನಾಡ ಕುಶಿ ಎಂತ ಎಣ್ಣ್‌ಚೇಂಗಿ, ಅಯಿಂಗಕ್ ಪುರ್‌ಡ್ ಕ್‍ಟ್ಟಿತ್, ಒಬ್ಬಂಡ ಮೇಲೆ ಒಬ್ಬಂಗ್ ಉಳ್ಳ ಪ್ರೀತಿಲ್ ಒಂದಾಯಿತ್ ಇರಂಡೂಂದ್ ಉಳ್ಳದೇ. ಪಿಂಞ ದೇವಡ ಗುಟ್ಟಾನ ಕ್ರಿಸ್ತನ ಅಯಿಂಗಕ್ ಪೂರ್ತಿ ನಿಶ್ಚಯವಾಯಿತ್ ಅರ್ಥ ಮಾಡ್‍ವಕಯ್ಯೂಂದ್ ಉಳ್ಳ ನಂಬಿಕೆ ಅಯಿಂಗಕ್ ಇರಂಡು.

1 ತಿಮೊಥೆಯ 2:6

ಎಲ್ಲಾ ಜನಳು ಬುಡ್‍ಗಡೆ ಆಂಡೂಂದ್ ಅದ್ಂಗುಳ್ಳ ಬೆಲೆಯಾಯಿತ್ ಅಂವೊನ ಅಂವೊನಾಯಿತೇ ಬಲಿಯಾಪನೆಕೆ ಮರಣಕ್ ಒಪ್ಪ್‌ಚಿಟ್ಟಂವೊನು ಅಂವೊನೇ. ತಕ್ಕ ಸಮಯತ್‍ಲ್ ದೇವ ಈ ನಲ್ಲ ಸುದ್ದಿನ ಈ ಲೋಕಕ್ ಕೊಡ್‌ತಿತುಂಡ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2:14

ಅಂವೊ, ನಂಗಳ, ನಂಗಡ ಎಲ್ಲಾ ಪಾಪತ್ಂಜ ಬುಡ್‍ಗಡೆ ಮಾಡಿತ್, ಅಂವೊಂಡ ಸ್ವಂತ ಜನವಾಯಿತ್ ಮಾಡ್‌ವಕಾಯಿತ್, ಎಲ್ಲಾ ನಲ್ಲ ಕೆಲಸತ್‍ನ ಕುಶೀಲ್ ಮಾಡ್‌ವಕ್ ಅರ್ಪಿಚಿಟ್ಟಯಂಗಳಾಯಿತ್ ಪಿಂಞ ನಂಗಳ ಶುದ್ದ ಮಾಡ್‌ವಕಾಯಿತ್ ಅಂವೊನ ಅಂವೊನೇ ನಂಗಕಾಯಿತ್ ಒಪ್ಪ್‌ಚಿಟ್ಟತ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3:6

ದೇವ ನಂಗಡ ರಕ್ಷಕನಾನ ಯೇಸು ಕ್ರಿಸ್ತಂಡ ಮೂಲಕ ನಂಗಕ್ ಅಂವೊಂಡ ಪವಿತ್ರಾತ್ಮತ್‍ನ ದಾರಾಳವಾಯಿತ್ ಕೊಡ್‌ತಿತುಂಡ್.

ಇಬ್ರಿಯ 9:22

ನ್ಯಾಯಪ್ರಮಾಣತ್‍ರನೆಕೆ, ಚೆನ್ನ ಬುಟ್ಟಿತ್, ಚೋರೆ ಎಲ್ಲಾನ ಶುದ್ದ ಮಾಡಿರ್‌ವ; ಚೋರೆ ಬೂಕತೆ ಪಾಪಕ್ ಮನ್ನಿಪ್ಪ್ ಇಲ್ಲೆ.

1 ಪೇತ್ರ 2:24

ಅಂವೊ ನಂಗಡ ಪಾಪತ್‍ನ ತಾಂಡ ತಡೀಲ್ ಎಡ್‍ತಂಡ್, ಶಿಲುಬೇಲ್ ಪೊರ್‌ತಂಡ್‌ ಚತ್ತತ್. ಆನಗುಂಡ್, ನಂಗ ಪಾಪಕ್ ಚತ್ತ್ ಪೋಯಿತ್ ನೀತಿಕ್ ಬದ್‍ಕ್‍ವನೆಕೆ ಆಚಿ. ಅಂವೊಂಡ ಗಾಯತ್‍ನಗುಂಡ್ ನಂಗ ವಾಸಿಯಾಚಿ.

1 ಪೇತ್ರ 3:18

ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತ ಸಹ ನಂಗಳ ದೇವಡ ಪಕ್ಕ ಕೊಂಡ್ ಬಪ್ಪಕಾಯಿತ್, ಅನೀತಿ ಉಳ್ಳಯಿಂಗಕ್ ಬದ್‍ಲಾಯಿತ್ ನೀತಿಯುಳ್ಳಂವೊನಾಯಿತ್ ಒರೇ ಕುರಿ ಪಾಪತ್‍ರಗುಂಡ್ ಕಷ್ಟಪಟ್ಟತ್; ಅಂವೊ ತಡೀಲ್ ಚತ್ತತ್, ಆತ್ಮತ್‍ಲ್ ಜೀವವಾಯಿತ್ ಬಾತ್.

1 ಯೋಹಾನ 2:12

ಪ್ರೀತಿರ ಚೆರಿಯ ಮಕ್ಕಳೇ, ಕ್ರಿಸ್ತಂಡ ಪೆದತ್‍ರಗುಂಡ್ ನಿಂಗಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ನಗುಂಡ್ ನಿಂಗಕ್ ಇದ್‍ನ ಒಳ್‍ದ್‍ವಿ.

1 ಯೋಹಾನ 2:2

ಅಂವೊನೇ ನಂಗಡ ಪಾಪತ್‍ನ ಪರಿಹಾರ ಮಾಡ್‌ವ ಬಲಿ ಅರ್ಪಣೆ. ನಂಗಡ ಪಾಪಕಾಯಿತ್ ಮಾತ್ರ ಅಲ್ಲ, ಲೋಕತ್‍ಲ್ ಉಳ್ಳ ಎಲ್ಲಾ ಜನಡ ಪಾಪಕು ತ್ಯಾಗ ಅರ್ಪಣೆಯಾಯಿತುಂಡ್.

1 ಯೋಹಾನ 4:10

ನೇರಾನ ಪ್ರೀತಿ ಎಂತ ಎಣ್ಣ್‌ಚೇಂಗಿ, ನಂಗ ದೇವಡ ಮೇಲೆ ಬೆಚ್ಚ ಪ್ರೀತಿ ಅಲ್ಲ, ದೇವ ನಂಗಡ ಮೇಲೆ ಬೆಚ್ಚ ಪ್ರೀತಿಯೇ. ಅದ್, ನಂಗಡ ಪಾಪತ್‍ನ ಪರಿಹಾರ ಮಾಡ್‌ವಕ್ ದೇವ ತಾಂಡ ಒರೇ ಮೋಂವೊನ ಈ ಲೋಕಕ್ ಅಯಿಚದ್.

ಪ್ರಕಟನೆ 14:4

ಈಂಗಳೇ ಪೊಣ್ಣಾಳ್‍ರಗುಂಡ್ ಅಶುದ್ದ ಆಕತ, ಕನ್ನಿ ಮೂಡಿಯರನೆಕೆ ಶುದ್ದವಾಯಿತ್ ಇಂಜಯಿಂಗ. ಕೊರಿಕುಟ್ಟಿಯಾನಂವೊ ಎಲ್ಲಿಯೆಲ್ಲಾ ಪೋಪ, ಅಂವೊಂಡ ಬಯ್ಯಕ್ ಪೋಪಯಿಂಗ ಈಂಗಳೇ. ಅಯಿಂಗ ಜನಡ ಮದ್ಯತ್ಂಜ ದೇವಕಾಯಿತ್ ಪಿಂಞ ಕೊರಿಕುಟ್ಟಿಯಾನವೊಂಗಾಯಿತ್ ಆದ್ಯ ಪಣ್ಣಾಯಿತ್ ವಿಮೋಚನ ಆನಯಿಂಗ.

ಪ್ರಕಟನೆ 5:9

ನೀನ್ ಈ ಪುಸ್ತಕತ್‍ನ ಎಡ್‍ಪಕು, ಅದ್ಂಡ ಮುದ್ರೆಯಳ ಪೊಳಿಪಕು ಯೋಗ್ಯನಾಯಿತುಳ್ಳಿಯ; ಎನ್ನಂಗೆಣ್ಣ್‌ಚೇಂಗಿ, ನೀನ್ ಮಿಂಞಲೇ ಬಲಿಯಾಯಿತ್, ಎಲ್ಲಾ ಕುಲತ್ಂಜ, ಎಲ್ಲಾ ತಕ್ಕ್‌ಯಿಂಜ, ಎಲ್ಲಾ ಜನತ್‍ಂಜ, ಎಲ್ಲಾ ಜಾತಿಯಿಂಜ ಜನಳ ದೇವಕಾಯಿತ್ ನೀಡ ಚೋರೆನಗುಂಡ್ ಬುಡ್‍ಗಡೆ ಮಾಡಿತ್,