ಕೊಲೊಸ್ಸೆ 3:5 - ಕೊಡವ ಬೈಬಲ್

⁵ ಆನಗುಂಡ್, ಲೈಂಗಿಕ ಪಾಪ, ಪವಿತ್ರಯಿಲ್ಲತ ವಿಷಯ, ಇಚ್ಛೆ, ಕೆಟ್ಟ ಆಸೆ, ದುಷ್ಟತನ, ಅತಿ ಆಸೆಯಾಯಿತುಳ್ಳ ವಿಗ್ರಹ ಆರಾದನೆ, ಈ ಲೋಕತ್‍ರ ಗುಣವಾಯಿತುಳ್ಳ ಇದೆಲ್ಲಾ ನಿಂಗಡಿಂಜ ಪಾಳ್ ಆಪನೆಕೆ ಬುಡ್‍ವಿರ.

ಕೊಲೊಸ್ಸೆ 3:5 ပူးပေါင်းရင်းမြစ်များ

ಮತ್ತಾಯ 15:19

ಎನ್ನನೆ ಎಣ್ಣ್‌ಚೇಂಗಿ, ಹೃದಯತ್ಂಜಲೇ ಕೆಟ್ಟ ಗೇನ, ಕೊಲೆ, ವ್ಯಬಿಚಾರ, ಲೈಂಗಿಕ ಪಾಪ, ಕಕ್ಕಂಡೂ, ಪೊಟ್ಟ್ ಪರಿಯಂಡು, ಪೊಟ್ಟ್ ಸಾಕ್ಷಿ ಪರಿಯಂಡು, ಬೋರೆಯಿಂಗಳ ನಾಶ ಮಾಡ್‌ವಕ್ ಕೆಟ್ಟ ತಕ್ಕ್ ಪರಿಯಂಡೂಂದ್ ಉಳ್ಳ ಗೇನ ಎಲ್ಲಾ ಬಪ್ಪ.

ರೋಮ್ 1:26

ಇನ್ನನೆ ಮಾಡ್‌ನಾನಗುಂಡ್ ದೇವ ಅಯಿಂಗಳ ಅಸಹ್ಯ ಕಾರ್ಯಕ್ ಒಪ್ಪ್‌ಚಿಟ್ಟ್‌ರ್‌ತ್; ಪೊಣ್ಣಾಳ್‍ವ ಕೂಡೆ ಸ್ವಬಾವಿಕ ಸಂಬಂದತ್‍ನ, ಸ್ವಬಾವಕ್ ವಿರೋದವಾಯಿತ್ ಮೋಹಕ್ ಪಾಚೆಪಣೆ ಮಾಡಿರ್‌ತ್.

ರೋಮ್ 1:29

ಅಯಿಂಗ ಎಲ್ಲಾ ವಿದವಾನ ದುಷ್ಟತನತ್‍ಲ್, ಕೇಡ್‍ಲ್, ದ್ರೋಹ ಮಾಡ್‌ವದ್‍ಲ್, ಪಣತ್‍ರ ಆಸೇಲ್, ಆಂಗಾರತ್‍ಲ್, ಕೊಲೆ ಮಾಡ್‌ವದ್‍ಲ್, ತರ್ಕ ಮಾಡ್‌ವದ್‍ಲ್, ಕೆಟ್ಟ ಆಸೇಲ್, ವಂಚನೆಲ್, ಒಟ್ಟೆಕಿಚ್ಚ್‌ಲ್ ದುಂಬಿತುಂಡ್.

ರೋಮ್ 6:13

ನಿಂಗ ನಿಂಗಡ ತಡೀರ ಬಾಗತ್‍ನ ಅನೀತಿರ ಆಯುದವಾಯಿತ್ ಪಾಪಕ್ ಒಪ್ಪ್‌ಚಿಡತೆ, ನಿಂಗಳ ಚತ್ತಯಿಂಗಡ ಮದ್ಯತ್ಂಜ ಜೀವತ್‍ಲ್ ಬಂದಯಿಂಗಡನೆಕೆ, ದೇವಕ್ ಒಪ್ಪ್‌ಚಿಟ್ಟಿತ್ ನಿಂಗಡ ತಡೀರ ಬಾಗತ್‍ನ ನೀತಿರ ಆಯುದವಾಯಿತ್ ದೇವಕ್ ಅರ್ಪಣೆ ಮಾಡಿ.

ರೋಮ್ 6:6

ನಂಗ ಇಂಞು ಮಿಂಞಕ್ ಪಾಪಕ್ ಆಳಾಯಿತ್ ಬದ್‍ಕತೆ, ಪಾಪತ್‍ರ ತಡಿ ಪಾಳಾಯಿ ಪೋಪಕ್, ನಂಗಡ ಪಳೆಯ ಮನುಷ್ಯನ ಅಂವೊಂಡ ಕೂಡೆ ಶಿಲುಬೇಲ್ ಇಟ್ಟಿತಾಚೀಂದ್ ನಂಗಕ್ ಗೊತ್ತುಂಡ್.

ರೋಮ್ 7:23

ಆಚೇಂಗಿಯು, ನಾಡ ಬುದ್ದಿರ ಕಾನೂನ್‍ಕ್ ವಿರೋದವಾಯಿತ್ ಪೋರಾಡಿಯಂಡಿಪ್ಪ ಬೋರೆ ಒರ್ ಕಾನೂನ್‌ನ ನಾಡ ತಡೀರ ಬಾಗತ್‍ಲ್ ಉಳ್ಳದ್ ನಾಕ್ ಗೊತ್ತಾಯಂಡುಂಡ್; ಅದ್ ನಾಡ ತಡೀರ ಬಾಗತ್‍ಲ್ ವಾಸ ಮಾಡಿಯಂಡುಳ್ಳ ಪಾಪತ್‍ರ ಕಾನೂನ್‍ಕ್ ನನ್ನ ಕೈದಿಯಾಯಿತ್ ಮಾಡಿರ್‌ತ್.

ರೋಮ್ 7:5

ನಂಗ ನಂಗಡ ಪಾಪತ್‍ರ ಗುಣಕ್ ಅಡಿಯಾಳಾಯಿತಿಪ್ಪಕ, ನ್ಯಾಯಪ್ರಮಾಣತ್‍ರಗುಂಡ್ ಎದ್ದಿತ್ ಬಂತ್ ಪಾಪತ್‍ರ ಇಚ್ಛೆ, ಚಾವ್‍ರ ಫಲ ತಪ್ಪನೆಕೆ, ನಂಗಡ ತಡೀರ ಬಾಗತ್‍ಲ್ ಕ್ರಿಯೆ ಮಾಡ್‍ಚಿ.

ರೋಮ್ 8:13

ಪಾಪತ್‍ರ ಗುಣತ್‍ಲ್ ನಿಂಗ ಬದ್‍ಕಿಯಂಡ್ ಇಂಜತೇಂಗಿ, ನಿಂಗ ಚತ್ತ್ ಪೋಪಿರ; ಪವಿತ್ರಾತ್ಮತ್‍ರಗುಂಡ್ ತಡೀರ ಕ್ರಿಯೇನ ನಿಂಗ ಪಾಳ್ ಮಾಡ್‍ಚೇಂಗಿ, ನಿಂಗ ಬದ್‍ಕ್‍ವಿರ.

1 ಕೊರಿಂಥ 5:1

ನಿಂಗಡ ಮದ್ಯತ್‍ಲ್ ವ್ಯಬಿಚಾರ ಕಾರ್ಯ ಆಯಂಡುಂಡ್‍ೕಂದ್ ನೇರಾಯಿತು ಜನ ಪುಕಾರ್ ಮಾಡಿಯಂಡುಂಡ್. ಒಬ್ಬ ಅಂವೊಂಡ, ಚಿಕ್ಕವ್ವಡ ಕೂಡೆ ಬುದ್ದಂಡ್ ಉಂಡ್‍ೕಂದ್ ನಾಕ್ ಸುದ್ದಿ ಬಾತ್. ಈ ತರ ಕಾರ್ಯ ದೇವನ ಗೊತ್ತಿಲ್ಲತ ಜನ ಕೂಡೆ ಮಾಡ್‌ಲೆಲ್ಲಾ?

1 ಕೊರಿಂಥ 6:11

ನಿಂಗಡಲ್ಲಿ ಚೆನ್ನ ಜನ ಇನ್ನನೆ ಇಂಜಿರ. ಆಚೇಂಗಿಯು, ದೇವ ಇಕ್ಕ ನಿಂಗಳ ಒಡೆಯನಾನ ಯೇಸು ಕ್ರಿಸ್ತಂಡ ಪೆದತ್‍ಲು, ನಂಗಡ ದೇವಡ ಆತ್ಮತ್ಂಜಲು ಕತ್ತಿತ್, ಪವಿತ್ರವಾನಯಿಂಗಳಾಯಿತು, ನೀತಿವಂತಯಿಂಗಳಾಯಿತು ಮಾಡ್‍ಚಿ.

1 ಕೊರಿಂಥ 6:13

ನಿಂಗ ಕೆಲಕಾಯಿತ್ ಕೂಳ್, ಕೂಳ್‍ಕಾಯಿತ್ ಕೆಲಾಂದ್ ಎಣ್ಣುವಿರ, ಅದ್ ನೇರ್. ಆಚೇಂಗಿಯು, ದೇವ ಅದ್ ದಂಡನೂ ಪಾಳ್ ಮಾಡ್‌ವ. ಆನಗುಂಡ್ ನಿಂಗ, ಈ ತಡಿನ ಲೈಂಗಿಕ ಕುಶಿಕಾಯಿತ್‍ೕಂದ್‌ ಎಣ್ಣ್‌ವಕ್ ಕಯ್ಯುಲೆ. ಅದ್ ಒಡೆಯಂಗಾಯಿತ್ ಮಾಡ್‍ನದ್, ಒಡೆಯ ನಂಗಡ ತಡಿಕ್ ಜವಾಬ್ದಾರನಾಯಿತ್ ಉಂಡ್.

1 ಕೊರಿಂಥ 6:18

ಲೈಂಗಿಕ ಪಾಪತ್ಂಜ ಓಡಿ ಪೋಯಿ! ಒರ್ ಮನುಷ್ಯ ಮಾಡ್‌ವ ಬೋರೆ ಏದ್ ಪಾಪವು ಅಂವೊಂಡ ತಡಿಕ್ ಪೊರಮೆ ಆಯಿತಿಪ್ಪ, ಆಚೇಂಗಿ ಲೈಂಗಿಕ ಪಾಪ ಮಾಡ್‌ವಂವೊ ತಾಂಡ ಸ್ವಂತ ತಡಿಕ್ ವಿರೋದವಾಯಿತ್ ಪಾಪ ಮಾಡ್‌ವ.

2 ಕೊರಿಂಥ 12:21

ಪುನಃ ನಾನ್ ನಿಂಗಡ ಪಕ್ಕ ಬಪ್ಪಕ, ನಾಡ ದೇವ ನಿಂಗಡ ಮಿಂಞ ನನ್ನ ತಗ್ಗ್‌ಚಿಡುವಕಾಯಿತ್, ಮಿಂಞ ಪಾಪ ಮಾಡ್‍ನ ದುಂಬ ಜನ ಅಯಿಂಗ ಮಾಡ್‍ನ ಅಶುದ್ದತ್‍ನ, ಲೈಂಗಿಕ ಪಾಪತ್‍ನ ಪಿಂಞ ತಡೀರ ಮೋಹತ್‍ನ ಬುಟ್ಟಿತ್ ಪಶ್ಚಾತಾಪ ಪಡತೆ ಇಪ್ಪದ್‍ನ ಕಂಡಿತ್ ನಾನ್ ದುಃಖಪಡುವಕ್ ಇಪ್ಪೋಂದ್ ನಾಕ್ ಪೋಡಿ ಆಯಂಡುಂಡ್.

ಗಲಾತ್ಯ 5:24

ಯೇಸು ಕ್ರಿಸ್ತಂಡ ಕೂಡೆ ಐಕ್ಯತ್‍ಲ್ ಉಂಡ್‍ೕಂದ್ ಎಣ್ಣ್‌ವಯಿಂಗೆಲ್ಲಾ, ಅಯಿಂಗಡ ಪಾಪತ್‍ರ ಗುಣತ್‍ನ, ಅದ್ಂಡ ಆಸೆ ಪಿಂಞ ಇಚ್ಛೆನೆಲ್ಲಾ ಶಿಲುಬೇಲ್ ಇಟ್ಟಿತ್‌ಪ್ಪ.

ಎಫೆಸ 4:19

ಸೊಯ ತಪ್ಪಿತ್, ಎಲ್ಲಾ ಅಶುದ್ದ ಕ್ರಿಯೇನ ಕುಶೀಲ್ ಮಾಡಿಯಂಡಿಪ್ಪಕಾಯಿತ್, ಲೈಂಗಿಕ ಪಾಪಕ್ ಅಯಿಂಗಳ ಅಯಿಂಗ ಒಪ್ಪ್‌ಚಿಟ್ಟಯಿಂಗಾಳಾಯಿತುಂಡ್.

ಕೊಲೊಸ್ಸೆ 2:11

ಅದಲ್ಲತೆ, ನಿಂಗ ಕ್ರಿಸ್ತಂಡಲ್ಲಿ ಉಳ್ಳಗುಂಡ್, ಯೆಹೂದ್ಯಂಗ, ತಡೀಲ್ ಮಾಡ್‌ವ ಸುನ್ನತಿರನೆಕೆ ಅಲ್ಲ, ಆಚೇಂಗಿ ತಡೀಲ್ ಪಾಪ ವಾಸ ಮಾಡ್‌ವ ನಂಗಡ ಪಾಪತ್‍ರ ಗುಣತ್‍ನ ಕೆತ್ತಿತ್ ಕಳೆಯುವನೆಕೆ ಕ್ರಿಸ್ತಂಡಿಲ್ಲಿ ಆತ್ಮೀಯ ಸುನ್ನತಿ ಪಡ್ಂದಿತುಳ್ಳಿರ.

1 ಥೆಸಲೊನೀಕ 4:3

ನಿಂಗ ಪವಿತ್ರವಾನಯಿಂಗಳಾಯಿತ್ ಬದ್‍ಕಂಡೂಂದ್ ಉಳ್ಳದೇ ದೇವಡ ಚಿತ್ತ. ಆನಗುಂಡ್ ನಿಂಗ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡು.

1 ಥೆಸಲೊನೀಕ 4:5

ದೇವನ ನಂಬತಯಿಂಗ ಪಿಂಞ ಗೊತ್ತಿಲ್ಲತಯಿಂಗ ಬದ್‍ಕ್‍ವನೆಕೆ, ಮೋಹತ್‍ಲ್ ಬದ್‍ಕವಕ್ಕಾಗ.

1 ತಿಮೊಥೆಯ 6:10

ದುಡ್ಡ್‌ರ ಮೇಲೆ ಉಳ್ಳ ಪ್ರೀತಿ ಎಲ್ಲಾ ತರ ಕ್‍ೕಡ್‍ಕ್ ಮೂಲ ಕಾರಣವಾಯಿತುಂಡ್. ಚೆನ್ನ ಜನ ದುಡ್ಡ್‌ರ ಮೇಲೆ ಉಳ್ಳ ಅತಿ ಆಸೆರಗುಂಡ್ ದೇವಡ ಮೇಲೆ ಉಳ್ಳ ನಂಬಿಕೇನ ಬುಟ್ಟಿತ್, ದುಂಬ ನೊಂಬಲತ್‍ಲ್ ಅಯಿಂಗಳ, ಅಯಿಂಗಳೇ ಕುತ್ತಿಯಂಡುಂಡ್.

ಇಬ್ರಿಯ 12:16

ದಾರ್ ಒಬ್ಬನು ವೇಶಿತನ ಮಾಡ್‌ವಂವೊನಾಯಿತ್ ಇಪ್ಪಕ್ಕಾಗ. ಏಸಾ ಎಣ್ಣ್‌ವಂವೊ ಬರಿ ಕೂಳ್‍ಕಾಯಿತ್ ತಾಂಡ ಅಪ್ಪಯಿಂಜ ಕ್‍ಟ್ಟುವ ಆದ್ಯ ಮೋಂವೊಂಡ ಆಶೀರ್ವಾದತ್‍ನ ಮಾರ್‍ನನೆಕೆ ಬಕ್ತಿ ಇಲ್ಲತಂವೊನಾಯಿತು ಇಪ್ಪಕ್ಕಾಗ.

ಇಬ್ರಿಯ 13:4

ಮಂಗಲತ್‍ನ ಎಲ್ಲಾರು ಗನಪಡ್‌ತಂಡು, ಮಂಗಲ ಕಯಿಚಯಿಂಗ ಅಯಿಂಗಯಿಂಗಡ ವಡಿಯ ಪೊಣ್ಣ್‌ಕ್ ನಂಬಿಕಸ್ತಯಿಂಗಳಾಯಿತ್ ಇಕ್ಕಂಡು; ವೇಶಿಯಳ ಪಿಂಞ ವ್ಯಬಿಚಾರ ಮಾಡ್‌ವಯಿಂಗಳ ದೇವ ನ್ಯಾಯತೀರ್ಪ.

ಇಬ್ರಿಯ 13:5

ನಿಂಗ ಪಣ ಆಸೆ ಇಲ್ಲತಯಿಂಗಳಾಯಿತ್ ಬದ್‌ಕಿತ್, ನಿಂಗಕ್ ಉಳ್ಳದ್ ಮದೀಂದ್ ಗೇನ ಮಾಡಂಡು; ನಾನ್ ನಿನ್ನ ಬುಟ್ಟಿತ್ ಪೋಪದು ಇಲ್ಲೆ, ನಿನ್ನ ಕೈ ಬುಡ್‍ವದು ಇಲ್ಲೇಂದ್ ದೇವ ಎಣ್ಣಿಯಂಡುಂಡಲ್ಲ!

ಯಾಕೋಬ 4:1

ನಿಂಗಡಲ್ಲಿ ಎನ್ನಂಗಾಯಿತ್ ಯುದ್ದ ಮಾಡ್‌ವಿರ? ಜಗಳ ಮಾಡ್‌ವಿರ? ನಿಂಗಡ ಶರೀರತ್‌ನ ಅದಿಕಾರ ಮಾಡ್‌ವಕಾಯಿತ್ ನಿಂಗಡಲ್ಲಿ ಯುದ್ದ ಮಾಡ್‌ವ ಇಚ್ಛೆರಗುಂಡಲ್ಲ?

1 ಪೇತ್ರ 2:11

ನಾಡ ಪ್ರೀತಿರ ಜನಳೇ, ಈ ಲೋಕತ್‍ಲ್ ಚೆನ್ನ ಕಾಲ ಮಾತ್ರ ಬದ್‍ಕ್‍ವಯಿಂಗಳಾಯಿತ್, ಮನೆ ಇಲ್ಲತಯಿಂಗಡನೆಕೆ ಇಪ್ಪ ನಿಂಗಳ ನಾನ್ ಬೋಡ್‍ವದ್ ಎಂತ ಎಣ್ಣ್‌ಚೇಂಗಿ: ನಿಂಗಡ ಆತ್ಮಕ್ ವಿರೋದವಾಯಿತ್ ಯುದ್ದ ಮಾಡ್‌ವ ಪಾಪತ್‍ರ ಗುಣತ್‍ನ ಕಳೆಯಂಡು.

ಪ್ರಕಟನೆ 21:8

ಆಚೇಂಗಿ, ಬೊತ್ತಿಯಂಡುಳ್ಳಯಿಂಗಳು, ನಂಬಿಕೆ ಇಲ್ಲತಯಿಂಗಳು, ಅಶುದ್ದವಾಯಿತುಳ್ಳಯಿಂಗಳು, ಕೊಲೆ ಮಾಡ್‌ವಯಿಂಗಳು, ವ್ಯಬಿಚಾರ ಮಾಡ್‌ವಯಿಂಗಳು, ಮಾಟಮಂತ್ರ ಮಾಡ್‌ವಯಿಂಗಳು, ವಿಗ್ರಹ ಆರಾದನೆ ಮಾಡ್‌ವಯಿಂಗಳು, ಪೊಟ್ಟ್ ಪರಿಯುವ ಎಲ್ಲಾರು ದಂಡನೆ ಚಾವಾಯಿತುಳ್ಳ ಗಂಧಕತ್‍ಲ್ ತಿತ್ತ್ ಕತ್ತಿಯಂಡಿಪ್ಪ ಕಡಲ್‍ಲ್ ಪಾಲ್‍ದಾರಂಗಳಾಪಾಂದ್ ಎಣ್ಣ್‌ಚಿ.

ಪ್ರಕಟನೆ 22:15

ನಾಯಿಂಗ, ಮಾಟಮಂತ್ರ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವಯಿಂಗ, ಕೊಲೆಮಾಡ್‍ವಯಿಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗ, ಪೊಟ್ಟ್ ಪರಿಯುವಕ್ ಕುಶಿಪಟ್ಟಿತ್, ಅದ್ಂಡ ಪ್ರಕಾರ ಮಾಡ್‌ವಯಿಂಗ ಎಲ್ಲಾರು ಪಟ್ಟಣತ್‍ರ ಪೊರಮೆ ಇಪ್ಪ.