ಅಪೊಸ್ತಲ 28:4 - ಕೊಡವ ಬೈಬಲ್

⁴ ಆ ಪಾಂಬ್ ಪೌಲಂಡ ಕೈಯಿಲ್ ತೂಂಗಿಯಂಡ್ ಇಪ್ಪದ್‍ನ ಆ ದ್ವೀಪತ್‍ರ ಜನ ಕಾಂಬಕ, ಈ ಮನುಷ್ಯ ಒರ್ ಕೊಲೆಗಾರನಾಯಿತ್ ಇಕ್ಕೂಂದ್ ಕಾಂಬ; ಸಮುದ್ರತ್‍ಂಜ ತಪ್ಪಿಚಿಟ್ಟಂಡ್ ಬಂದತೇಂಗಿಯು, ನ್ಯಾಯ ಇಂವೊನ ಬದ್‍ಕ್‍ವಕ್ ಬುಡ್‍ಲೇಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

ಅಪೊಸ್ತಲ 28:4 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 3:1

ಯೆಹೋವನಾನ ದೇವ ಸೃಷ್ಟಿ ಮಾಡ್‌ನ ಎಲ್ಲಾ ಕಾಡ್‌ ಪ್ರಾಣಿಯಕಿಂಜ ಪಾಂಬ್ ತಂತ್‌ರ ಬುದ್ದಿ ಉಳ್ಳದಾಯಿತ್‌ಂಜತ್. ಅದ್‌ ಪೊಣ್ಣಾಳ್‌ರ ಪಕ್ಕ ಬಂದಿತ್: ಈ ತೋಟತ್‌ರ ಮರತ್‌ರ ಪಣ್ಣ್‌ಲ್‌ ಒಂದ್‌ ಸಹ ನಿಂಗ ತಿಂಬಕ್ಕಾಗಾಂದ್‌ ದೇವ ನೇರಾಯಿತು ಎಣ್ಣ್‌ಚಾಂದ್‌ ಕ್‍ೕಟತ್.

ಜ್ಞಾನತ್‌ರ ಪಡಿಮ 28:17

ತಾನ್‌ ಕೊಲೆಮಾಡ್‌ನ ಅಪರಾದಕಾಯಿತ್‌ ಒಬ್ಬ ಕುಂಡ್‌ಕ್‌ ಓಡಿಪೋಪ. ಅಂವೊಂಗ್‌ ಸಹಾಯ ಮಾಡತಿ.

ಮತ್ತಾಯ 23:35

ನೀತಿವಂತಂವೊನಾನ ಕೊಲೆಯಾನ ಹಾಬೇಲಂಡ ಚೋರೆಯಿಂಜ ಪುಡ್‌ಚಿತ್, ಬಲಿ ಕೊಡ್‍ಪ ಜಾಗಕು ದೇವಾಲಯಕು ಮದ್ಯತ್‍ಲ್ ಕೊಲೆಯಾನ ಬರಕೀಯಂಡ ಮೋಂವೊನಾನ ಜಕರಿಯಂಡ ಚೋರೆಕತ್ತನೆ ಈ ಲೋಕತ್‍ರ ಮೇಲೆ ಚೆಲ್ಲ್‌ನ ಎಲ್ಲಾ ನೀತಿವಂತಯಿಂಗಡ ಚೋರೆಯಿಂಜ ಬಪ್ಪಂತ ಅಪರಾದ ನಿಂಗಡ ಮೇಲೆ ಬೂವ.

ಮತ್ತಾಯ 27:25

ಅಕ್ಕ ಎಲ್ಲಾ ಜನಳು ಒಮ್ಮಕೆ: ಅಂವೊಂಡ ಚಾವ್‍ರ ಜವಾಬ್ದಾರಿ ನಂಗಡ ಮೇಲೆ ಪಿಂಞ ನಂಗಡ ಮಕ್ಕಡ ಮೇಲೆ ಇರಡ್‍ೕಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 13:2

ಅದ್ಂಗ್ ಯೇಸು: ಗಲಿಲಾಯ ಜನಳ ಅನ್ನನೆ ಕೊಂದಾಂಗ್, ಅಯಿಂಗ ಗಲಿಲಾಯತ್‍ಲ್ ಉಳ್ಳ ಎಲ್ಲಾ ಜನಕಿಂಜ ದುಂಬ ಪಾಪಾ ಮಾಡ್‌ನಯಿಂಗಾಂದ್ ನಿಂಗ ಗೇನ ಮಾಡ್‌ವಿರ?

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 13:4

ಅನ್ನನೆ: ಸಿಲೊವಾಮ್‌ಲ್ ಗೋಪುರ ಬುದ್ದಿತ್ ಪದನೆಟ್ಟ್ ಜನ ಚತ್ತ್ ಪೋಚಲ್ಲ! ಅದ್ಂಗ್ ಎಂತ ಎಣ್ಣುವಿರ? ಆ ಜನ ಯೆರೂಸಲೇಮ್‍ಲ್ ಉಳ್ಳ ಎಲ್ಲಾ ಜನಕಿಂಜ ದುಂಬ ಪಾಪ ಮಾಡ್‌ನಯಿಂಗಾಂದ್ ಗೇನ ಮಾಡ್‌ವಿರ?

ಯೋಹಾನ 7:24

ಪೊರಮೆ ಉಳ್ಳದ್‍ನ ಕಂಡಿತ್ ನ್ಯಾಯತೀರ್ಪ್ ಮಾಡತಿ. ನೀತಿಯಾಯಿತ್ ನ್ಯಾಯತೀರ್ಪ್ ಮಾಡೀಂದ್ ಎಣ್ಣ್‌ಚಿ.

ಅಪೊಸ್ತಲ 28:2

ಆ ದ್ವೀಪತ್‍ರ ಜನಾಂಗ, ನಂಗಕ್ ಗೊತ್ತ್‌ಲ್ಲತಯಿಂಗಳಾಯಿತ್ ಇಂಜತೇಂಗಿಯು ನಂಗಕ್ ದುಂಬ ಕನಿಕರ ಕಾಟ್‍ಚಿ. ಆ ಸಮಯತ್‍ಲ್ ಮಳೆಯು ಕುಳ್‍ರು ದುಂಬ ಇಂಜಗುಂಡ್, ತಿತ್ತ್ ಇಟ್ಟಿತ್ ನಂಗಳ ಕೂಟಿಯಂಡತ್.

ಅಪೊಸ್ತಲ 28:3

ಪೌಲ ಒರ್ ಕೆಟ್ಟ್ ಪುಳ್ಳಿನ ಎಡ್‍ತಿತ್ ತಿತ್ತ್‌ಕ್ ಇಡ್‍ವಕ, ದುಂಬ ಉಷ್ಣ ಇಂಜಗುಂಡ್ ಒರ್ ವಿಷ ಪಾಂಬ್ ಪುಳ್ಳಿಯಿಂಜ ಪೊರಮೆ ಬಂತ್ ಪೌಲಂಡ ಕೈಯಿನ ಗಟ್ಟಿಯಾಯಿತ್ ಪುಡ್‌ಚಿರ್‌ತ್.

ಅಪೊಸ್ತಲ 28:5

ಆಚೇಂಗಿ ಪೌಲ, ಅಂವೊಂಡ ಕೈಯಿನ ಪುಡ್‌ಚ ಪಾಂಬ್‍ನ ಕೊಡ್‍ಕಿತ್ ತಿತ್ತ್‌ಕ್ ಇಟ್ಟತ್. ಅಂವೊಂಗ್ ಒರ್ ತೊಂದರೆಯು ಆಯಿತ್‌ಲ್ಲೆ.

ಪ್ರಕಟನೆ 21:8

ಆಚೇಂಗಿ, ಬೊತ್ತಿಯಂಡುಳ್ಳಯಿಂಗಳು, ನಂಬಿಕೆ ಇಲ್ಲತಯಿಂಗಳು, ಅಶುದ್ದವಾಯಿತುಳ್ಳಯಿಂಗಳು, ಕೊಲೆ ಮಾಡ್‌ವಯಿಂಗಳು, ವ್ಯಬಿಚಾರ ಮಾಡ್‌ವಯಿಂಗಳು, ಮಾಟಮಂತ್ರ ಮಾಡ್‌ವಯಿಂಗಳು, ವಿಗ್ರಹ ಆರಾದನೆ ಮಾಡ್‌ವಯಿಂಗಳು, ಪೊಟ್ಟ್ ಪರಿಯುವ ಎಲ್ಲಾರು ದಂಡನೆ ಚಾವಾಯಿತುಳ್ಳ ಗಂಧಕತ್‍ಲ್ ತಿತ್ತ್ ಕತ್ತಿಯಂಡಿಪ್ಪ ಕಡಲ್‍ಲ್ ಪಾಲ್‍ದಾರಂಗಳಾಪಾಂದ್ ಎಣ್ಣ್‌ಚಿ.