ಅಪೊಸ್ತಲ 27:1 - ಕೊಡವ ಬೈಬಲ್

¹ ನಂಗ ಸಮುದ್ರ ಮಾರ್ಗವಾಯಿತ್ ಇತಾಲ್ಯ ದೇಶಕ್ ಪೋಕಂಡೂಂದ್ ತೀರ್ಮಾನ ಮಾಡ್‍ನ ಪಿಂಞ ಔಗುಸ್ತ ಎಣ್ಣುವ ಚಕ್ರವರ್ತಿರ ಪೆದ ಉಳ್ಳ ಪಟಾಲತ್‍ರ ನೂರ್ ಸಿಪಾಯಿಯಂಗಡ ಅದಿಕಾರಿಯಾನ ಯೂಲ್ಯ ಎಣ್ಣ್‌ವಂವೊಂಡ ಪಕ್ಕ ಪೌಲ ಪಿಂಞ ಅಂವೊಂಡ ಕೂಡೆ ಇಂಜ ಚೆನ್ನ ಕೈದಿಯಳ ಒಪ್ಪ್‌ಚಿಟ್ಟತ್.

ಅಪೊಸ್ತಲ 27:1 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 50:20

ನಿಂಗ ನಾಕ್‍ ಕ್‍ೕಡ್‌ ಮಾಡಂಡೂಂದ್‌ ಗೇನ ಮಾಡಿರ. ಆಚೇಂಗಿ ದೇವ ಇದ್‌ನೆಲ್ಲ ನಲ್ಲಂಗೇ ಮಾಡ್‌ಚಿ. ಇಕ್ಕ ಎಚ್ಚಕೋ ಜನಡ ಜೀವತ್‌ನ ಉಳ್‌ಚಿಡ್‌ವಕ್‌ ನನ್ನ ಈ ಸ್ತಾನಕ್‌ ದೇವ ಕೊಂಡಬಂದಿಯೆ.

ಜ್ಞಾನತ್‌ರ ಪಡಿಮ 19:21

ಮನುಷ್ಯಂಡ ಮನಸ್ಸ್‌ಲ್‌ ಅನೇಕ ಯೋಜನೆ, ಆಚೇಂಗಿಯು ಯೆಹೋವಂಡ ಚಿತ್ತವೇ ನೆರವೇರುವ.

ಮತ್ತಾಯ 27:54

ನೂರ್ ಸಿಪಾಯಿಯಂಗಡ ಅದಿಕಾರಿ ಪಿಂಞ ಅಂವೊಂಡ ಕೂಡೆ ನಿಂದಂಡ್ ಯೇಸುನ ನೋಟಿಯಂಡಿಂಜ ಜನ ಬೂಕಂಪ ಪಿಂಞ ಅಲ್ಲಿ ಆಪಾನೆಲ್ಲಾ ಕಂಡಿತ್, ಬೊತ್ತಿತ್: ಈ ಮನುಷ್ಯ ನೇರಾಯಿತ್ ದೇವಡ ಮೋಂವೊನಾಯಿತ್ಂಜತ್ ಎಣ್ಣಿಯಂಡ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 23:47

ನೂರ್ ಪಡೆಯಾಳಿಯಡ ಅದಿಕಾರಿ, ಯೇಸುಕ್ ಇನ್ನನೆ ಎಲ್ಲಾ ಆನದ್‍ನ ಕಂಡಿತ್, ಈ ಮನುಷ್ಯ ನೇರಾಯಿತು ನೀತಿವಂತನೇ ಎಣ್ಣಿಯಂಡ್ ದೇವನ ತುದಿಚತ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 7:2

ಅಲ್ಲಿ ನೂರ್ ಸಿಪಾಯಿಯಂಗಕ್ ಅದಿಕಾರಿಯಾಯಿತ್ಂಜ ರೋಮ್ ರಾಜ್ಯತ್‍ರ ಒರ್ ಅದಿಕಾರಿಕ್ ಕುಶಿಯುಳ್ಳ ಒರ್ ಆಳ್‍ಕ್ ದುಂಬ ಕಾಯಿಲೆ ಬಂದಿತ್ ಚಾವನೆಕೆ ಇಂಜತ್.

ಅಪೊಸ್ತಲ 10:1

ಇತಾಲ್ಯ ಪಟಾಲ ಎಣ್ಣುವ ಪಟಾಲತ್‌ಲ್ ನೂರ್ ಸಿಪಾಯಿಯಂಗಕ್ ಅದಿಪತಿಯಾಯಿತ್ಂಜ ಕೊರ್ನೇಲ್ಯ ಎಣ್ಣುವ ಪೆದ ಉಳ್ಳ ಒರ್ ಮನುಷ್ಯ ಕೈಸರೈ ಪಟ್ಟಣತ್‍ಲ್ ಇಂಜತ್.

ಅಪೊಸ್ತಲ 10:22

ಅದ್ಂಗ್ ಅಯಿಂಗ: ಕೊರ್ನೇಲ್ಯ ಎಣ್ಣಿತ್ ನೂರ್ ಸಿಪಾಯಿಯಂಗಕ್ ಅದಿಪತಿಯಾನ ಒಬ್ಬ ಉಂಡ್. ಅಂವೊ ನೀತಿವಂತವೊನು ದೇವಡ ಬಕ್ತಿ ಉಳ್ಳಂವೊನು ಯೆಹೂದ್ಯ ಜನಾಂಗಡಡೆಲ್ ನಲ್ಲರಿಕೆ ಪಡ್ಂದಂವೊನು ಆಯಿತುಂಡ್. ನಿನ್ನ ಅಂವೊಂಡ ಮನೆಕ್ ಕಾಕಿತ್, ನೀನ್ ಎಣ್ಣುವ ಬೋದನೆನ ಅಂವೊ ಕ್‍ೕಕಂಡೂಂದ್ ಒರ್ ದೇವದೂತಡಿಂಜ ಅಂವೊ ಅಪ್ಪಣೆ ಪಡ್ಂದತ್.

ಅಪೊಸ್ತಲ 16:10

ಅಂವೊಂಗ್ ಆ ದರ್ಶನ ಕ್‍ಟ್ಟ್‌ನ ಪಿಂಞ, ದೇವ ಆ ಸೀಮೆಲ್ ಉಳ್ಳಯಿಂಗಕ್ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕ್ ನಂಗಳ ಕಾಕ್‍ಚೀಂದ್ ನಂಗಕ್ ಕಂಡಿತವಾಯಿತ್ ಗೊತ್ತಾನಗುಂಡ್, ನಂಗ ಮಕೆದೋನ್ಯಕ್ ಪೋಪಕ್ ಪ್ರಯತ್ನಪಟ್ಟತ್.

ಅಪೊಸ್ತಲ 18:2

ಯೆಹೂದ್ಯ ಜನಯೆಲ್ಲ ರೋಮ್ ರಾಜ್ಯತ್‍ರ ಪ್ರಾಂತ್ಯತ್‍ನ ಬುಟ್ಟಿತ್ ಬೋರೆ ಜಾಗಕ್ ಪೋಂಡೂಂದ್ ಕ್ಲೌದ್ಯ ಚಕ್ರವರ್ತಿ ಹುಕುಮ್ ಕೊಡ್‌ತಿತ್ಂಜತ್. ಆನಗುಂಡ್ ಇತಾಲ್ಯ ರಾಜ್ಯತ್ಂಜ ಬಂದಿತ್ಂಜ, ಪೊಂತ ದೇಶತ್‍ಲ್ ಪುಟ್ಟ್‌ನಂವೊನಾನ ಅಕ್ವಿಲ ಎಣ್ಣುವ ಒರ್ ಯೆಹೂದ್ಯ ಪಿಂಞ ಅಂವೊಂಡ ಪೊಣ್ಣ್ ಪ್ರಿಸ್ಕಿಲ್ಲ ಪುದಿಯದಾಯಿತ್ ಕೊರಿಂಥ ಪಟ್ಟಣಕ್ ಬಂದಿತ್ಂಜತ್. ಪೌಲಂಗ್ ಅಯಿಂಗಳ ಪರಿಚಯ ಆಚಿ.

ಅಪೊಸ್ತಲ 19:21

ಇನ್ನನೆಲ್ಲ ಆನ ಪಿಂಞ ಪೌಲ, ತಾನ್ ಮಕೆದೋನ್ಯಕ್ ಪೋಪಕ್ ಮಿಂಞ ಅಖಾಯ ಪಟ್ಟಣಕ್ ಪೋಯಿತ್, ಬಯ್ಯ ಯೆರೂಸಲೇಮ್‌ಕ್ ಪೋಪೀಂದ್ ಅಂವೊಂಡ ಆತ್ಮತ್‍ಲ್ ಗೇನ ಮಾಡಿತ್: ನಾನ್ ಅಲ್ಲಿಕ್ ಪೋನ ಪಿಂಞ ರೋಮ್ ಪಟ್ಟಣಕ್ ಪೋಂಡೂಂದ್ ಎಣ್ಣ್‌ಚಿ.

ಅಪೊಸ್ತಲ 21:32

ಅಕ್ಕಣೆ, ಅಂವೊ ಸಿಪಾಯಿಯಂಗಳ ಪಿಂಞ ಅದಿಕಾರಿಯಳ ಕೂಟಿಯಂಡ್, ಅಯಿಂಗಡ ಪಕ್ಕ ಬೆರಿಯ ಬಾತ್. ಜನ, ಸೇನೆರ ಅದಿಪತಿನ ಪಿಂಞ ಸಿಪಾಯಿಯಂಗಳ ಕಾಂಬಕ ಪೌಲನ ಪೊಯ್ಯುವಾನ ನಿಪ್ಪ್‌ಚಿಟ್ಟತ್.

ಅಪೊಸ್ತಲ 22:26

ಈ ತಕ್ಕ್‌ನ ನೂರ್ ಸಿಪಾಯಿಯಂಗಡ ಅದಿಕಾರಿ ಕ್‍ೕಪಕ, ಸೇನೆರ ಅದಿಕಾರಿರ ಪಕ್ಕ ಪೋಯಿತ್: ನೀನ್ ಮಾಡಂಡೂಂದ್ ಆಜ್ಞೆ ಇಟ್ಟ ವಿಷಯತ್‍ಲ್ ಎಚ್ಚರವಾಯಿತಿರ್, ಈ ಮನುಷ್ಯ ರೋಮ್ ರಾಜ್ಯತ್‍ರ ಪ್ರಜೆಯಾಯಿತುಂಡ್‍ೕಂದ್ ಎಣ್ಣ್‌ಚಿ.

ಅಪೊಸ್ತಲ 23:11

ಆ ದಿವಸ ಬಯಿಟ್, ಒಡೆಯ ಪೌಲಂಡ ಪಕ್ಕ ನಿಂದಿತ್ ದೈರ್ಯವಾಯಿತ್ ಇರ್; ನೀನ್ ಯೆರೂಸಲೇಮ್‍ಲ್ ನಾಡ ಸಂಗತಿನ ಸಾಕ್ಷಿಯಾಯಿತ್ ಎಣ್ಣ್‌ನನೆಕೆ, ರೋಮ್ ಪಟ್ಟಣತ್‌ಲು ಸಾಕ್ಷಿ ಎಣ್ಣಂಡೂಂದ್ ಎಣ್ಣ್‌ಚಿ.

ಅಪೊಸ್ತಲ 23:17

ಅಕ್ಕ ಪೌಲ, ಅಲ್ಲಿಯಿಂಜ ನೂರ್ ಸಿಪಾಯಿಯಂಗಡ ಅದಿಕಾರಿ ಒಬ್ಬನ ಕಾಕಿತ್: ಈ ಬಾಲೆಕಾರನ ಸೇನೆರ ಅದಿಕಾರಿಯಡ ಪಕ್ಕ ಕಾಕಿಯಂಡ್ ಪೋ; ಅಂವೊಂಡ ಪಕ್ಕ ಎಣ್ಣ್‌ವಕ್ ಒರ್ ವಿಷಯ ಉಂಡ್‍ೕಂದ್ ಎಣ್ಣ್‌ಚಿ.

ಅಪೊಸ್ತಲ 24:23

ಪಿಂಞ ಅಂವೊ, ನೂರ್ ಸಿಪಾಯಿಯಂಗಡ ಅದಿಕಾರಿನ ನೋಟಿತ್: ಪೌಲನ ಜೈಲ್‌ಕ್ ಕಾಕಿಯಂಡ್ ಪೋಪಕ್ ಎಣ್ಣ್‌ಚಿ. ಆಚೇಂಗಿ, ಪೌಲನ ಒರ್ ಕೈದಿರನೆಕೆ ನಡ್‍ತ್‍ವಕಾಪಾಂದು, ಅಂವೊಂಗ್ ಸೇವೆ ಮಾಡ್‌ವಕ್ ಬಪ್ಪ ಅಂವೊಂಡ ಸ್ನೇಹಿತಂಗಳ ತಡೆ ಮಾಡ್‌ವಕ್ಕಾಗಾಂದು ಹುಕುಮ್ ಕೊಡ್‍ತತ್.

ಅಪೊಸ್ತಲ 25:12

ಅಕ್ಕ, ಫೆಸ್ತ ತಾಂಡ ಆಲೋಚನೆ ಅದಿಕಾರಿಯಂಗಡ ಕೂಡೆ ಆಲೋಚನೆ ಮಾಡ್‍ನ ಪಿಂಞ ಪೌಲಂಗ್: ನೀನ್ ಕೈಸರಂಡ ಪಕ್ಕ ಪೋಕಂಡೂಂದ್ ಎಣ್ಣಿತುಳ್ಳಿಯ, ಅನ್ನನೆ ಕೈಸರಂಡ ಪಕ್ಕ ಪೋಂದ್ ಅಪ್ಪಣೆ ಕೊಡ್‍ತತ್.

ಅಪೊಸ್ತಲ 25:25

ಇಂವೊ ಮರಣ ಶಿಕ್ಷೆಕ್ ಕಾರಣವಾಯಿತ್ ಒಂದು ಮಾಡಿತ್‌ಲ್ಲೇಂದ್ ನಾಕ್ ಗೊತ್ತಾಚಿ. ಆಚೇಂಗಿ, ಇಂವೊ ಚಕ್ರವರ್ತಿರ ಪಕ್ಕ ನ್ಯಾಯಕಾಯಿತ್ ನಿಪ್ಪಕ್ ಬೋಡ್‍ನಗುಂಡ್ ಇಂವೊನ ಅಯಿಪಕ್ ತೀರ್ಮಾನ ಮಾಡಿಯೆ.

ಅಪೊಸ್ತಲ 27:11

ಆಚೇಂಗಿ ನೂರ್ ಸಿಪಾಯಿಯಡ ಅದಿಪತಿ, ಪೌಲ ಎಣ್ಣುವ ತಕ್ಕ್‌ಕಿಂಜ ಹಡಗ್‍ರ ನಾಯಕ ಪಿಂಞ ಹಡಗ್‍ರ ಎಜಮಾನ ಎಣ್ಣುವ ತಕ್ಕ್‌ಕ್ ದುಂಬ ಕೆಮಿ ಕೊಡ್‍ತತ್.

ಅಪೊಸ್ತಲ 27:43

ಆಚೇಂಗಿ ನೂರ್ ಸಿಪಾಯಿಯಂಗಡ ಅದಿಕಾರಿ, ಪೌಲನ ಕಾಪಾಡ್‌ವಕ್ ಮನಸ್ಸ್ ಬೆಚ್ಚಿತ್, ಅಯಿಂಗಡ ಆಲೋಚನೆನ ತಡ್‍ತತ್. ಅಂವೊ ಅಯಿಂಗಕ್: ಮೀಂದಿತ್ ಪೋಪಯಿಂಗ ನೀರ್‌ಕ್ ಪಾರಿತ್, ಮಿಂಞ ಕರೆಕ್ ಪೋಕಡೂಂದ್ ಎಣ್ಣ್‌ಚಿ.

ಅಪೊಸ್ತಲ 27:6

ಅಲ್ಲಿ ಅಲೆಕ್ಸಾಂದ್ರಿಯ ಪಟ್ಟಣತ್ಂಜ ಇತಾಲ್ಯ ದೇಶಕ್ ಪೋಪ ಒರ್ ಹಡಗ್‍ನ ನೂರ್ ಸಿಪಾಯಿಯಡ ಅದಿಕಾರಿ ಕಂಡಿತ್, ನಂಗಳ ಆ ಹಡಗ್‍ಲ್ ಪತ್ತ್‌ಚಿಟ್ಟತ್.

ಅಪೊಸ್ತಲ 28:1

ನಂಗೆಲ್ಲಾರು ಸಮುದ್ರತ್‍ರ ಕರೆಕ್ ಪೋಯಿತ್ ಎತ್ತ್‌ನ ಪಿಂಞ ಆ ದ್ವೀಪತ್‍ರ ಪೆದ ಮೆಲೀತೇಂದ್ ನಂಗಕ್ ಗೊತ್ತಾಚಿ.

ಅಪೊಸ್ತಲ 28:16

ನಂಗ ರೋಮ್ ಪಟ್ಟಣಕ್ ಎತ್ತ್‌ವಕ, ಪೌಲ, ಅಂವೊನ ಕಾತಂಡಿಂಜ ಸಿಪಾಯಿರ ಕೂಡೆ ಬೋರೆಯಾಯಿತ್ ಇಪ್ಪಕ್ ಅನುಮತಿ ಕ್‍ಟ್ಟ್‌ಚಿ.

ಇಬ್ರಿಯ 13:24

ನಿಂಗಳ ನಡ್‌ತ್‌ವಯಿಂಗಕ್ ಪಿಂಞ ಅಲ್ಲಿಯತ್‍ರ ದೇವಡ ಮಕ್ಕಕೆಲ್ಲ ನಂಗಡ ವಂದನೆ ಎಣ್ಣಿ. ಇತಾಲ್ಯ ದೇಶತ್‍ಲ್ ಉಳ್ಳ ದೇವಡ ಮಕ್ಕ ಎಲ್ಲಾರು ನಿಂಗಕ್ ವಂದನೆ ಎಣ್ಣಿಯಂಡುಂಡ್.