ಅಪೊಸ್ತಲ 26:16 - ಕೊಡವ ಬೈಬಲ್

¹⁶ ಇಕ್ಕ, ನೀನ್ ಎದ್ದಿತ್ ನಿಂದ, ನಿನ್ನ ನಾಡ ಸೇವಕನಾಯಿತು, ಸಾಕ್ಷಿಯಾಯಿತು ನೇಮಿಚಿಡುವಕಾಯಿತ್ ನಾನ್ ನೀಕ್ ಪ್ರತ್ಯಕ್ಷ ಆನ. ಇಂದ್ ನೀನ್ ನಾಡ ವಿಷಯವಾಯಿತ್ ಕಂಡಾನ, ಮಿಂಞಕ್ ನಾನ್ ನೀಕ್ ಕಾಂಬ್‍ಚಿಡುವಕುಳ್ಳಾನ ಈ ಲೋಕಕ್ ನೀನ್ ಎಣ್ಣಂಡು.

ಅಪೊಸ್ತಲ 26:16 ပူးပေါင်းရင်းမြစ်များ

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 1:2

ಯೇಸುರ ಸೇವೇನ ಆದಿಯಿಂಜಲೆ ಕಣ್ಣಾರೆ ಕಂಡಿತ್ ದೇವಡ ವಾಕ್ಯತ್‍ನ ನಂಗಕ್ ಬೋದನೆ ಮಾಡ್‍ನಯಿಂಗ ಒಪ್ಪ್‌ಚಿಟ್ಟ ಪ್ರಕಾರ ಅಯಿಂಗ ಒಳ್‍ದ್‍ಚಿ.

ಅಪೊಸ್ತಲ 1:17

ಯೂದ ನಂಗಡ ಕೂಟ್‌ಲ್ ಒಬ್ಬನಾಯಿತ್ಂಜತ್. ದೇವಡ ಸೇವೇಲ್ ಪಾಲ್‍ದಾರನಾಯಿತ್ಂಜತ್.

ಅಪೊಸ್ತಲ 1:25

ಈ ದಂಡಾಳ್‌ರ ಕೂಟ್‌ಲ್ ದಾರ್‍ೕಂದ್ ಗೊತ್ತ್ ಮಾಡಿತ್ ಕಾಟ್‍ೕಂದ್ ಪ್ರಾರ್ಥನೆ ಮಾಡ್‍ಚಿ. ಎನ್ನಂಗೆಣ್ಣ್‌ಚೇಂಗಿ, ಯೂದ ಈ ಅಪೊಸ್ತಲ ಸ್ತಾನತ್ಂಜ, ಮೋಸ ಮಾಡಿತ್, ಅಂವೊಂಗ್ ತಕ್ಕ ಜಾಗಕ್ ಪೋಚಿ.

ಅಪೊಸ್ತಲ 20:24

ಆಚೇಂಗಿ, ಇದ್‍ನೆಲ್ಲ ನೋಟಿತ್ ನಾಕ್ ಬೇಜಾರ್ ಆಪುಲೆ, ನಾಡ ಪ್ರಾಣತ್‍ನ ಸಹ ನಾನ್ ಬಲ್ಯದಾಯಿತ್ ಗೇನ ಮಾಡುಲೆ. ನಾಡ ಓಟತ್‍ನ ಕುಶೀಲ್ ಪೂರ್ತಿಮಾಡ್‌ವಕು, ಒಡೆಯನಾನ ಯೇಸು ನಾಕ್ ಒಪ್ಪ್‌ಚಿಟ್ಟ ದೇವಡ ಕೃಪೇರ ನಲ್ಲ ಸುದ್ದಿನ ಸಾಕ್ಷಿ ಕೊಡ್‍ಪದ್‍ನ ನೆರೆವೇರಿಚಿಡುವಕು ಮಾತ್ರ ನಾನ್ ಕುಶಿ ಪಡುವಿ.

ಅಪೊಸ್ತಲ 21:19

ಪೌಲ ಅಯಿಂಗಕೆಲ್ಲ ವಂದನೆ ಎಣ್ಣಿತ್, ತಾಂಡ ಸೇವೇನಗುಂಡ್ ದೇವ ಯೆಹೂದ್ಯಂಗಲ್ಲತ ಬೋರೆ ಜನಡ ಮದ್ಯತ್‍ಲ್ ಮಾಡ್‍ನ ಕಾರ್ಯತ್‍ನ ಒಂದೊಂದಾಯಿತ್ ವಿವರಿಚಿಟ್ಟತ್.

ಅಪೊಸ್ತಲ 22:10

ಅಕ್ಕ ನಾನ್: ಒಡೆಯನೇ, ನಾನ್ ಎಂತ ಮಾಡಂಡೂಂದ್ ಕ್‍ೕಟ. ಅದ್ಂಗ್ ಒಡೆಯ: ನೀನ್ ಎದ್ದಿತ್ ದಮಸ್ಕ ಪಟ್ಟಣತ್‍ರ ಒಳ್‍ಕ್ ಪೋ, ನೀನ್ ಎಂತ ಮಾಡಡೂಂದ್ ನೇಮಿಚಿಟ್ಟದ್‍ನೆಲ್ಲ ಅಲ್ಲಿ ನೀಕ್ ಅರಿಚಿಡ್‍ವಾಂದ್ ಎಣ್ಣ್‌ಚಿ.

ಅಪೊಸ್ತಲ 23:11

ಆ ದಿವಸ ಬಯಿಟ್, ಒಡೆಯ ಪೌಲಂಡ ಪಕ್ಕ ನಿಂದಿತ್ ದೈರ್ಯವಾಯಿತ್ ಇರ್; ನೀನ್ ಯೆರೂಸಲೇಮ್‍ಲ್ ನಾಡ ಸಂಗತಿನ ಸಾಕ್ಷಿಯಾಯಿತ್ ಎಣ್ಣ್‌ನನೆಕೆ, ರೋಮ್ ಪಟ್ಟಣತ್‌ಲು ಸಾಕ್ಷಿ ಎಣ್ಣಂಡೂಂದ್ ಎಣ್ಣ್‌ಚಿ.

ಅಪೊಸ್ತಲ 26:15

ಅಕ್ಕ ನಾನ್: ಒಡೆಯನೇ, ನೀನ್ ದಾರ್‍ೕಂದ್ ಕ್‍ೕಪಕ, ಒಡೆಯ: ನೀನ್ ಹಿಂಸೆ ಮಾಡಿಯಂಡುಳ್ಳ ಯೇಸು ನಾನೇ.

ಅಪೊಸ್ತಲ 6:4

ಅಕ್ಕ, ನಂಗ ಪ್ರಾರ್ಥನೆ ಮಾಡ್‌ವಕು, ದೇವಡ ವಾಕ್ಯತ್‍ನ ಬೋದನೆ ಮಾಡ್‌ವಕು ನಂಗಡ ಸಮಯತ್‍ನ ಅರ್ಪಿಚಿಡ್‌ವಕ್ ಕಯ್ಯು.

ರೋಮ್ 1:5

ಅಂವೊಂಡ ಮೂಲಕ ಅಂವೊಂಡ ಪೆದಕಾಯಿತ್, ನಂಗ ಯೆಹೂದ್ಯಂಗ ಅಲ್ಲತ ಎಲ್ಲಾ ಜನಡ ಮದ್ಯತ್‍ಲ್ ಪೋಯಿತ್ ದೇವಡ ವಿಷಯತ್‍ನ ಪ್ರಚಾರ ಮಾಡ್‌ವಕ್ ಅಪೊಸ್ತಲಂಗಕಾನ ಅದಿಕಾರವು, ಬಾಗ್ಯವು ದೇವ ನಂಗಕ್ ತಂದಿತುಂಡ್. ಅದ್‍ನಗುಂಡ್ ಅಂವೊನ ನಂಬಿತ್, ಅಂವೊಂಗ್ ಬಗ್ಗಿತ್ ದೇವಕ್ ಮಹಿಮೆ ಕೊಂಡ್ ಬಪ್ಪ.

ರೋಮ್ 15:16

ಅದ್ ಎಂತ ಎಣ್ಣ್‌ಚೇಂಗಿ, ಯೆಹೂದ್ಯಲ್ಲತಯಿಂಗ ಒರ್ ಬಲಿರನೆಕೆ ಪವಿತ್ರಾತ್ಮತ್‍ರಗುಂಡ್ ಶುದ್ದ ಆಯಿತ್, ದೇವಕ್ ಒರ್ ಕುಶೀರ ಬಲಿಯಾಪನೆಕೆ, ನಲ್ಲ ಸುದ್ದಿರ ದೇವಡ ಯಾಜಕನಾಯಿತ್, ಯೇಸು ಕ್ರಿಸ್ತಂಡ ಸೇವಕನಾಯಿತ್ ಯೆಹೂದ್ಯಲ್ಲತಯಿಂಗಕ್ ನಾನ್ ಆನ.

2 ಕೊರಿಂಥ 4:1

ದೇವ ಅಂವೊಂಡ ಕರುಣೇಲ್ ಈ ಸೇವೇನ ನಂಗಕ್ ಕೊಡ್‍ತಿತುಳ್ಳಾಂಗ್, ನಂಗ ತಳ್ಂದ್ ಪೋಯಂಡಿಲ್ಲೆ.

2 ಕೊರಿಂಥ 5:18

ಇದೆಲ್ಲಾ ದೇವಡಗುಂಡ್ ಆನದ್; ಅಂವೊ ಯೇಸು ಕ್ರಿಸ್ತನಗುಂಡ್ ನಂಗಡ ಮೇಲೆ ಇಂಜ ವಿರೋದತ್‍ನ ಕಳೆಂದಿತ್ ತಾಂಡಕೂಡೆ ನಂಗಳ ಸಮಾದಾನ ಮಾಡ್‍ಚಿ. ಪಿಂಞ ವಿರೋದತ್‍ನ ಕಳೆಂದಿತ್ ಸಮಾದಾನ ಮಾಡ್‌ವ ಸೇವೇನೆ ನಂಗಕ್ ಒಪ್ಪ್‌ಚಿಟ್ಟತ್.

ಗಲಾತ್ಯ 1:12

ಇದ್ ನಾಕ್ ಒರ್ ಮನುಷ್ಯಡಿಂಜ ಕ್‍ಟ್ಟ್‌ನದು ಅಲ್ಲ, ದಾರೂ ಬೋದನೆ ಮಾಡ್‌ನದು ಅಲ್ಲ. ಬದ್‍ಲಾಯಿತ್, ಯೇಸು ಕ್ರಿಸ್ತನೇ ಇದ್‍ನ ನಾಕ್ ಕಾಂಬ್‍ಚಿಟ್ಟತ್.

ಗಲಾತ್ಯ 2:2

ನಾನ್ ಪೋಯಿತೇ ಪೋಕಂಡೂಂದ್ ನಾಡ ಮನಸ್ಸ್‌ಲ್ ದೇವ ಎಣ್ಣ್‌ನಗುಂಡ್ ನಾನ್ ಅಲ್ಲಿಕ್ ಪೋಯೆ. ನಾನ್ ಅಲ್ಲಿ ಇಪ್ಪಕ, ಅಲ್ಲಿಯತ್‍ರ ಸಬೆರ ಮುಕ್ಯಪ್ಪಟಯಿಂಗಕ್, ನಾನ್ ಯೆಹೂದ್ಯರಲ್ಲತಯಿಂಗಡ ಮದ್ಯತ್‍ಲ್ ಬೋದನೆ ಮಾಡ್‌ವ ನಲ್ಲ ಸುದ್ದಿರ ವಿಷಯ ಚಾಯಿ ಗೊತ್ತಾಂಡೂಂದ್ ಒಬ್ಬೊಬ್ಬಂಗಕು ವಿವರಿಚಿಟ್ಟಿಯೆ; ಅಯಿಂಗಳು ನಾನು, ಈ ವಿಷಯತ್‍ಲ್ ಒತ್ತೊರ್ಮೆಲ್ ಇರಂಡೂಂದ್ ನಾನ್ ಇನ್ನನೆ ಮಾಡಿಯೆ. ಇಲ್ಲತೆಪೋಚೇಂಗಿ, ನಾನ್ ಇಲ್ಲಿಕತ್ತನೆ ಮಾಡ್‍ನದ್ ಪಿಂಞ ಮಾಡಿಯಂಡುಳ್ಳದ್ ಪಾಳಾಯಿ ಪೋಪಾಂದ್ ನಾಕ್ ಪೋಡಿಯಿಂಜತ್.

ಎಫೆಸ 3:3

ಅದ್ ಎಂತ ಎಣ್ಣ್‌ಚೇಂಗಿ, ಯೆಹೂದ್ಯಂಗ ಅಲ್ಲತಯಿಂಗಕ್ ದೇವ ಬೆಚ್ಚಿತುಳ್ಳ ಗುಟ್ಟ್‌ನ ನಾನ್ ಗೊತ್ತಾಪನೆಕೆ ಕಾಂಬ್‍ಚಿಟ್ಟತ್. ಇದ್ಂಡ ವಿಷಯತ್‍ನ ನಾನ್ ಮಿಂಞಲೇ ಚೆನ್ನ ಒಳ್‍ದಿತುಂಡ್.

ಕೊಲೊಸ್ಸೆ 1:23

ನಿಂಗಕ್ ಕ್‍ಟ್ಟ್‌ನ ಈ ನಲ್ಲ ಸುದ್ದಿರ ನಂಬಿಕೇನ ಗಟ್ಟಿಯಾಯಿತ್ ಪುಡ್‍ಚಂಡ್, ಸ್ತಿರವಾಯಿತ್, ದೃಡವಾಯಿತ್ ನಿಂದಂಡಿಂಜತೇಂಗಿ ನಿಂಗಕ್ ಅನ್ನನೆ ಕ್‍ಟ್ಟುವ. ಈ ನಲ್ಲ ಸುದ್ದಿ, ಈ ಲೋಕತ್‍ರ ಎಲ್ಲಾ ಸೃಷ್ಟಿಕ್ ಅರಿಚಿಟ್ಟಂಡುಂಡ್, ಅದ್ಂಗಾಯಿತ್, ಪೌಲನಾನ ನಾನ್ ದೇವಡ ಸೇವಕನಾಯಿತ್ ಉಳ್ಳ.

ಕೊಲೊಸ್ಸೆ 1:25

ನಿಂಗಕ್ ನಲ್ಲದಾಂಡೂಂದ್, ದೇವ ನಾಕ್ ಅಪ್ಪಣೆ ತಂದಿತುಳ್ಳ ಆ ಸೇವೆಯಾನ ದೇವಡ ವಾಕ್ಯತ್‍ನ ಪೂರ್ತಿಯಾಯಿತ್ ಗೊತ್ತ್ ಮಾಡಿ ಕೊಡ್‍ಪಕ್ ನಾನ್ ಸೇವಕನಾಯಿತ್ ಆನ.

ಕೊಲೊಸ್ಸೆ 1:7

ಅದ್‍ನ ನಿಂಗ ನಂಗಡ ಕೂಡೆ ಸೇವೆ ಮಾಡ್‌ವ ಪ್ರೀತಿರ ಎಪಫ್ರಯಿಂಜ ಪಡಿಚಿರ. ಅಂವೊ ನಿಂಗಕಾಯಿತ್ ಕ್ರಿಸ್ತಂಡಲ್ಲಿ ನೇರಾನ ಸೇವಕನಾಯಿತುಂಡ್.

1 ಥೆಸಲೊನೀಕ 3:2

ಅದ್ಂಗಾಯಿತ್ ನಂಗ ತಿಮೊಥೆಯನ ನಿಂಗಡ ಪಕ್ಕ ಅಯಿಚತ್. ಅಂವೊ ನಂಗಡ ತಮ್ಮಣನು, ನಂಗಡ ಕೂಡೆ ದೇವಡ ಸೇವೆ ಮಾಡ್‌ವಂವೊನು, ಕ್ರಿಸ್ತಂಡ ನಲ್ಲ ಸುದ್ದಿರ ಸೇವೇಲ್ ನಂಗಡ ಕೂಡೆ ಪ್ರಚಾರ ಮಾಡ್‍ವಂವೊನಾಯಿತು ಉಂಡ್. ಅಂವೊ ನಿಂಗಡ ಪಕ್ಕ ಬಂದಿತ್, ನಿಂಗಡ ನಂಬಿಕೇನ ಸ್ತಿರಪಡ್‌ತಿತ್, ನಿಂಗ ಆತ್ಮೀಯ ಬದ್‍ಕ್‍ಲ್ ಬೂವತನೆಕೆ ಇಪ್ಪಕ್ ಸಹಾಯ ಮಾಡ್‌ವ.

1 ತಿಮೊಥೆಯ 1:12

ದೇವಡ ಸೇವೇನ ಮಾಡ್‌ವಕಾಯಿತ್ ನಾಕ್ ಶಕ್ತಿ ತಂದ ಒಡೆಯನಾನ ಯೇಸು ಕ್ರಿಸ್ತಂಗ್ ವಂದನೆ ಎಣ್ಣ್‌ವಿ. ಅಂವೊಂಗ್ ಸೇವೆ ಮಾಡ್‌ವಕ್ ನನ್ನ ಯೋಗ್ಯನಾಯಿತ್ ಗೇನ ಮಾಡಿತ್, ಅದ್ಂಗ್ ನನ್ನ ನೇಮಿಚಿಟ್ಟಾಂಗ್ ವಂದನೆ ಮಾಡ್‌ವಿ.

1 ತಿಮೊಥೆಯ 4:6

ನೀನ್ ಇದ್‍ನೆಲ್ಲ ಯೇಸುನ ನಂಬ್‍ನಯಿಂಗಕ್ ಬೋದನೆ ಮಾಡಿಯಂಡ್ ಬಾತೇಂಗಿ, ನಂಬಿಕೇಕ್ ಉಳ್ಳ ತಕ್ಕ್‌ಲು ನೀನ್ ಮಾಡಿಯಂಡುಳ್ಳ ನಲ್ಲ ಬೋದನೆಲು ಬೊಳ್ಂದಿತ್, ಯೇಸು ಕ್ರಿಸ್ತಂಗ್ ನಲ್ಲ ಸೇವಕನಾಯಿತ್ ಇಪ್ಪಿಯ.

2 ತಿಮೊಥೆಯ 4:5

ಆಚೇಂಗಿ ನೀನ್ ಎಲ್ಲಾ ವಿಷಯತ್‍ಲು ಮನಸ್ಸ್ ತೆಳ್ಂಗ್‍ನಂವೊನಾಯಿತ್ ಇರ್, ಕಷ್ಟ ಅನುಬವಿಚಿಡ್‍ವಕ್ ಕುಶಿ ಪಡ್, ನಲ್ಲ ಸುದ್ದಿರ ಬೋದನೆಕಾರಂಡ ಕರ್ತವ್ಯತ್‍ನ ಮಾಡ್, ದೇವ ನೀಕ್ ತಂದ ಸೇವೇನ ಪೂರ್ತಿಮಾಡ್.