ಅಪೊಸ್ತಲ 2:23 - ಕೊಡವ ಬೈಬಲ್

²³ ಆಚೇಂಗಿಯು, ದೇವ ತೀರ್ಮಾನ ಮಾಡ್‍ನ ಆಲೋಚನೆರನೆಕೆ ಪಿಂಞ ಮಿಂಞಕ್ ಎಂತಾಪಾಂದ್ ಗೊತ್ತುಳ್ಳ ಅಂವೊಂಡ ಗುಣತ್‍ರನೆಕೆ, ಅಂವೊನ ನಿಂಗಡ ಕೈಲ್ ದೇವ ಒಪ್ಪ್‌ಚಿಡ್‌ವಕ, ನಿಂಗ ಅಂವೊನ ಯೆಹೂದ್ಯ ಅಲ್ಲತಯಿಂಗಡ ಕೈಕ್ ಕೊಡ್‌ತಿರ. ಅಯಿಂಗ ಅಂವೊನ ಶಿಲುಬೇಕ್ ಇಟ್ಟಿತ್ ಕೊಂದತ್.

ಅಪೊಸ್ತಲ 2:23 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 50:20

ನಿಂಗ ನಾಕ್‍ ಕ್‍ೕಡ್‌ ಮಾಡಂಡೂಂದ್‌ ಗೇನ ಮಾಡಿರ. ಆಚೇಂಗಿ ದೇವ ಇದ್‌ನೆಲ್ಲ ನಲ್ಲಂಗೇ ಮಾಡ್‌ಚಿ. ಇಕ್ಕ ಎಚ್ಚಕೋ ಜನಡ ಜೀವತ್‌ನ ಉಳ್‌ಚಿಡ್‌ವಕ್‌ ನನ್ನ ಈ ಸ್ತಾನಕ್‌ ದೇವ ಕೊಂಡಬಂದಿಯೆ.

ಮತ್ತಾಯ 20:19

ಅಯಿಂಗ ಕೊಲ್ಲ್‌ವಕ್ ಒಪ್ಪ್‌ಚಿಡ್‌ವ. ಅಯಿಂಗ ಅಂವೊನ ನಾನಾತರ ಬೈಗಳ ಬೈಯುವ, ಚಾಟಿಲ್ ಪೊಯ್ಯುವ, ಪಿಂಞ ಶಿಲುಬೇಕ್ ಇಡ್‌ವಕಾಯಿತ್ ಯೆಹೂದ್ಯಂಗಲ್ಲತಯಿಂಗಡ ಕೈಯಿಕ್ ಒಪ್ಪ್‌ಚಿಡ್‌ವ. ಆಚೇಂಗಿ ಮೂಂದನೆ ದಿನ ಚಾವ್‍ಯಿಂಜ ಜೀವವಾಯಿತ್ ಅಂವೊ ಏವಾಂದ್ ಎಣ್ಣ್‌ಚಿ.

ಮತ್ತಾಯ 26:24

ದೇವಡ ವಾಕ್ಯತ್‍ಲ್ ಒಳ್‌ದ್‌ನನೆಕೆ ಮನುಷ್ಯಕುಮಾರ ಚಾವ. ಆಚೇಂಗಿ ಮನುಷ್ಯಕುಮಾರನ, ಏದ್ ಮನುಷ್ಯ ಪುಡ್‍ಚಿ ಕೊಡ್‍ಪ ಅಂವೊಂಗ್ ಅಯ್ಯೋ! ಆ ಮನುಷ್ಯ ಪುಟ್ಟತೆ ಇಂಜತೇಂಗಿ ಅಂವೊಂಗ್ ನಲ್ಲದಾಯಿತ್ಂಜತ್‍ೕಂದ್ ಎಣ್ಣ್‌ಚಿ.

ಮತ್ತಾಯ 27:35

ಅಂವೊನ ಶಿಲುಬೇಕ್ ಇಟ್ಟಿತಾನ ಪಿಂಞ ಸಿಪಾಯಿಯ ಅಂವೊಂಡ ಬಟ್ಟೇನ ಚೀಟಿ ಇಟ್ಟಿತ್ ಪಾಲ್ ಮಾಡಿತ್ ಎಡ್‍ತಂಡತ್.

ಮಾರ್ಕ 15:24

ಅಕ್ಕ ಅಂವೊನ ಶಿಲುಬೇಕ್ ಇಟ್ಟತ್. ಯೇಸುರ ಬಟ್ಟೇನ ಬಾಗ ಮಾಡಿತ್, ಅಯಿಂಗ ಚೀಟಿ ಇಟ್ಟಿತ್ ದಾರ್‌ಕ್ ಎದೇದ್ ಬಟ್ಟೆ ಕ್‍ಟ್ಟುವ ಎಣ್ಣಿಯಂಡ್ ನೋಟಿತ್ ಎಡ್‍ತಂಡತ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 22:22

ಮನುಷ್ಯಕುಮಾರ ದೇವ ತೀರ್ಮಾನ ಮಾಡ್‍ನನೆಕೆ ಚತ್ತ್ ಪೋಪ, ಆಚೇಂಗಿ ಅಂವೊನ ಕಾಟಿ ಕೊಡ್‌ಪಂವೊಂಗ್ ಅಯ್ಯೋಂದ್ ಯೇಸು ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 22:37

ಎನ್ನಂಗ್ ಎಣ್ಣ್‌ಚೇಂಗಿ, ಅಂವೊ ಕ್ರೂರ ಪಾಪ ಮಾಡ್‍ನ ಕಳ್ಳಂಗಡ ಕೂಟ್‌ಲ್ ಒಬ್ಬನಾಯಿತ್ ಕಾಕ್‍ವಾಂದ್ ಒಳ್‍ದಿತುಳ್ಳ ದೇವಡ ವಾಕ್ಯ ಪೂರ್ತಿ ಆಂಡೂಂದ್ ಎಣ್ಣ್‌ವಿ. ನಾಡ ವಿಷಯವೆಲ್ಲ ಪೂರ್ತಿಯಾಪ ಕಾಲ ಬಾತ್‍ೕಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 23:33

ಅದ್ಂಗ್ ಮಂಡೆರ ಓಡ್‍ೕಂದ್ ಅರ್ಥ ಆಪ ಕಪಾಲಸ್ಥಲ ಎಣ್ಣುವ ಜಾಗಕ್ ಬಪ್ಪಕ ಯೇಸುರ ಬಲ್‌ತೆ ಬರಿಲ್ ಒರ್ ಕಳ್ಳನ, ಎಡ್‍ತೆ ಬರಿಲ್ ಒರ್ ಕಳ್ಳನ ಶಿಲುಬೇಕ್ ಇಟ್ಟತ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 24:20

ನಂಗಡ ಮುಕ್ಯ ಯಾಜಕಂಗ ಪಿಂಞ ಅದಿಕಾರಿಯಂಗ ಅಂವೊನ ಕೊಲ್ಲ್‌ವಕ್ ತೀರ್ಪ್ ಮಾಡ್‌ವಕಾಯಿತ್ ಒಪ್ಪ್‌ಚಿಟ್ಟತ್, ಪಿಂಞ ಅಯಿಂಗ ಶಿಲುಬೇಕ್ ಇಟ್ಟತ್.

ಯೋಹಾನ 19:18

ಅಲ್ಲಿ ಅಂವೊನ ಶಿಲುಬೇಕ್ ಆಣಿ ಅಡಿಚಿತ್ ಇಟ್ಟತ್; ಅಂವೊಂಡ ಕೂಡೆ ಇಂಞು ದಂಡಾಳ್‌ನ ಯೇಸುರ ಅಪ್ಪರ ಇಪ್ಪರ ಶಿಲುಬೇಕ್ ಇಟ್ಟತ್. ಯೇಸು ಅಯಿಂಗಡ ಮದ್ಯತ್‍ಲ್ ಶಿಲುಬೇಲ್ ಇಂಜತ್.

ಯೋಹಾನ 19:24

ಅಕ್ಕ ಸಿಪಾಯಿಯಂಗ: ಇದ್‍ನ ನಂಗ ಕೀತ್‌ವಕ್ಕಾಗ, ಈ ಬಟ್ಟೇಕ್ ನಂಗ ಚೀಟಿ ಇಡ್‌ವಂಜಿ ಆ ಚೀಟಿ ದಾರ್‌ಕ್ ಕ್‍ಟ್ಟ್‌ವ ಅಂವೊ ಇದ್‍ನ ಎಡ್‌ಕಡ್‍ೕಂದ್ ಎಣ್ಣ್‌ಚಿ. ನಾಡ ಬಟ್ಟೇನ ಪಾಲ್ ಮಾಡಿಯಂಡತ್, ನಾಡ ಬಟ್ಟೇಕಾಯಿತ್ ಚೀಟಿ ಇಟ್ಟತ್‍ೕಂದ್ ದೇವಡ ವಾಕ್ಯತ್‍ಲ್ ಒಳ್‍ದ್‍ನದ್ ನೆರವೇರ್‌ವನೆಕೆ ಸಿಪಾಯಿಯಂಗ ಇನ್ನನೆ ಮಾಡ್‍ಚಿ.

ಅಪೊಸ್ತಲ 13:27

ಯೆರೂಸಲೇಮ್‍ಲ್ ವಾಸ ಮಾಡಿಯಡಿಂಜ ಜನಳು, ಅಯಿಂಗಡ ಅದಿಕಾರಿಯಳು ಯೇಸು ದಾರ್‍ೕಂದ್ ಗೊತ್ತ್‌ಮಾಡಿತ್‌ಲ್ಲೆ. ಪ್ರತಿ ವಾರ ಅಯಿಂಗಡ ಸಬಾಮಂದಿರತ್‍ಲ್ ಓದ್‍ವ ಪ್ರವಾದಿಯಂಗಡ ವಾಕ್ಯತ್‍ಲ್ ಉಳ್ಳ ಅಂವೊಂಡ ವಿಷಯಕೂಡೆ ಅಯಿಂಗಕ್ ಅರ್ಥ ಆಯಿತ್‌ಲ್ಲೆ. ಅದ್ಂಗ್ ಬದ್‍ಲ್ ಅಂವೊ ಚಾವನೆಕೆ ತೀರ್ಪ್ ಮಾಡಿತ್, ಪ್ರವಾದಿಯಂಗ ಎಣ್ಣ್‌ನ ವಾಕ್ಯತ್‍ನ ನೆರೆವೇರಿಚಿಟ್ಟತ್.

ಅಪೊಸ್ತಲ 15:18

ಈ ಬೂಲೋಕ ಸೃಷ್ಟಿ ಆಪಕ್ ಮಿಂಞಲೇ, ಎಲ್ಲಾ ಎನ್ನನೆ ಆಪಾಂದ್ ಗೊತ್ತುಳ್ಳ ದೇವ ಇನ್ನನೆ ಎಣ್ಣ್‌ಚೀಂದ್ ಒಳ್‍ದಿ ಬೆಚ್ಚಿತುಂಡ್.

ಅಪೊಸ್ತಲ 2:36

ಆನಗುಂಡ್ ನಿಂಗ ಶಿಲುಬೇಕ್ ಇಟ್ಟ ಈ ಯೇಸುನ ದೇವ ಒಡೆಯನಾಯಿತು ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನಾಯಿತು ಮಾಡಿತುಂಡ್‍ೕಂದ್ ಇಸ್ರಾಯೇಲ್ ಜನಕೆಲ್ಲ ಕಂಡಿತವಾಯಿತ್ ಗೊತ್ತಿರಂಡೂಂದ್ ಎಣ್ಣ್‌ಚಿ.

ಅಪೊಸ್ತಲ 3:18

ಆಚೇಂಗಿಯು, ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಇನ್ನನೆ ಕಷ್ಟಪಡಂಡೂಂದ್ ದೇವ ತಾಂಡ ಎಲ್ಲಾ ಪ್ರವಾದಿಯಂಗಡ ಮೂಲಕ ಮಿಂಞಲೇ ಎಣ್ಣ್‌ನಾನ ಪೂರೈಚಿಡ್‌ವಕ್ ಇನ್ನನೆ ಮಾಡ್‍ಚಿ.

ಅಪೊಸ್ತಲ 4:28

ನೀಡ ಅದಿಕಾರತ್ಂಜ, ನೀಡ ಚಿತ್ತತ್‍ರನೆಕೆ ನೀನ್ ತೀರ್ಮಾನ ಮಾಡ್‍ನನೆಕೆ ಅಯಿಂಗ ಇದ್‍ನೆಲ್ಲ ಮಾಡ್‍ಚಿ.

ಅಪೊಸ್ತಲ 5:28

ನಿಂಗ ಈ ಪೆದತ್‍ಲ್ ಬೋದನೆ ಮಾಡ್‌ವಕ್ಕಾಗಾಂದ್ ನಂಗ ನಿಂಗಕ್ ಕಂಡಿತವಾಯಿತ್ ಆಜ್ಞೆ ಮಾಡ್‍ಚಲ್ಲಾ? ಆಚೇಂಗಿಯು, ಇಕ್ಕ ನೋಟಿ: ಯೆರೂಸಲೇಮ್‍ನ ನಿಂಗಡ ಬೋದನೆಯಿಂಜ ದುಂಬ್‌ಚಿಟ್ಟಿತ್, ಆ ಮನಷ್ಯನ ಕೊಂದ ಅಪರಾದತ್‍ನ ನಂಗಡ ಮೇಲೆ ಇಡ್‌ವಕ್ ತೀರ್ಮಾನ ಮಾಡಿತುಳ್ಳಿರಾಂದ್ ಎಣ್ಣ್‌ಚಿ.

ಅಪೊಸ್ತಲ 5:30

ನಿಂಗ ಶಿಲುಬೇಲ್ ಇಟ್ಟಿತ್ ಕೊಂದ ಯೇಸುನ, ನಂಗಡ ಅಜ್ಜಂಗಡ ದೇವ, ಚಾವ್‍ಯಿಂಜ ಎಪ್ಪ್‌ಚಿ.

ಅಪೊಸ್ತಲ 7:52

ನಿಂಗಡ ಮುತ್ತಜ್ಜಂಗ ಏದ್ ಪ್ರವಾದಿಕ್ ಹಿಂಸೆ ಕೊಡ್‍ಕತೆ ಇಂಜತ್? ನೀತಿವಂತಂವೊ ಒಬ್ಬ ಬಪ್ಪಾಂದ್ ಎಣ್ಣಿಯಂಡಿಂಜ ಪ್ರವಾದಿಯಳ ಸಹ ಕೊಲೆ ಮಾಡ್‍ಚಿ. ಇಕ್ಕ, ನಿಂಗ ಅನ್ನನೆ ಬಂದಂವೊನ ಪುಡ್‌ಚಿತ್ ಕೊಲ್ಲ್‌ವಕ್ ಒಪ್ಪ್‌ಚಿಡ್‌ವಕ, ಅದ್ಂಗ್ ನಿಂಗ ಪಾಲ್‍ದಾರಂಗಳಾಯಿತುಳ್ಳಿರ.

ರೋಮ್ 2:12

ನ್ಯಾಯಪ್ರಮಾಣ ಇಲ್ಲತೆ ಪಾಪ ಮಾಡ್‌ವಯಿಂಗ, ನ್ಯಾಯಪ್ರಮಾಣ ಇಲ್ಲತೆ ನಾಶ ಆಯಿಪೋಪ, ದಾರೆಲ್ಲ ನ್ಯಾಯಪ್ರಮಾಣಕ್ ಒಳಪಟ್ಟಿತ್ ಪಾಪ ಮಾಡ್‍ಚೋ ಅಯಿಂಗಕ್ ನ್ಯಾಯಪ್ರಮಾಣತ್‍ರಗುಂಡ್ ನ್ಯಾಯತೀರ್ಪ್ ಕ್‍ಟ್ಟ್‌ವ.

ರೋಮ್ 4:17

ದುಂಬ ಜಾತಿಯಂಗಕ್ ನಿನ್ನ ಅಪ್ಪನಾಯಿತ್ ಮಾಡ್‌ವೀಂದ್ ಒಳ್‍ದಿತುಳ್ಳನೆಕೆ, ಅಂವೊ ನಂಬ್‍ನಂವೊಂಡ ಮಿಂಞತ್ ಪಿಂಞ ಚತ್ತಯಿಂಗಳ ಪುನಃ ಜೀವತ್‍ಲ್ ಕೊಂಡ್ ಬಪ್ಪಂವೊಂಡ ಮಿಂಞತ್ ಪಿಂಞ ಇಲ್ಲತದ್‍ನ ಉಳ್ಳನೆಕೆ ಕಾಕ್‍ವಂವೊನಾಯಿತ್ತುಳ್ಳ ದೇವಡ ಮಿಂಞತ್‍ಲ್ ನಂಗ ಎಲ್ಲಾರ್‌ಕು ಅಪ್ಪನಾಯಿತ್ ಆಚಿ.

1 ಥೆಸಲೊನೀಕ 2:15

ಅಲ್ಲಿಯತ್‍ರ ಯೆಹೂದ್ಯಂಗ, ಒಡೆಯನಾನ ಯೇಸುನ ಪಿಂಞ ಪ್ರವಾದಿಯಳ ಕೊಂದಯಿಂಗ. ಇಕ್ಕ ನಂಗಕ್ ಹಿಂಸೆ ಕೊಡ್‌ತಂಡ್, ದೇವಕ್ ಕುಶಿಯಿಲ್ಲತಯಿಂಗಳಾಯಿತ್ ಉಂಡ್. ಜನಳ ಅಯಿಂಗ ದ್ವೇಶ ಮಾಡಿಯಂಡುಂಡ್.

1 ಪೇತ್ರ 1:2

ಅಪ್ಪನಾನ ದೇವ ಎಲ್ಲಾಕಿಂಜ ಮಿಂಞ ಎಂತ ತೀರ್ಮಾನ ಮಾಡಿತ್ಂಜತೋ, ಅನ್ನನೆ ನಿಂಗಳ ಅಂವೊ ಗೊತ್ತ್ ಮಾಡಿತ್, ನಿಂಗ ಯೇಸು ಕ್ರಿಸ್ತಂಗ್ ಬಗ್ಗಿತ್ ನಡ್‍ಪನೆಕೆ, ಅಂವೊಂಡ ಚೋರೆರ ಮೂಲಕ ನಿಂಗ, ನಿಂಗಡ ಪಾಪತ್ಂಜ ಶುದ್ದ ಆಪನೆಕೆ, ಅಂವೊಂಡ ಆತ್ಮತ್‍ರ ಮೂಲಕ ನಿಂಗಳ ಬೋರೆ ಮಾಡಿತ್ ಶುದ್ದಮಾಡ್‍ಚಿ. ದುಂಬ್‍ನ ಕೃಪೆಯು ಸಮಾದಾನವು ನಿಂಗಕ್ ಇಂಞು ಕ್‍ಟ್ಟಡ್.

1 ಪೇತ್ರ 1:20

ಅಂವೊ, ಬೂಲೋಕ ಉಂಟಾಪಕ್ ಮಿಂಞಲೇ ಗೊತ್ತ್ ಮಾಡ್‍ನಂವೊನಾಯಿತ್ಂಜತ್. ಆಚೇಂಗಿ, ಈ ಆಕೀರ್ ಕಾಲತ್‍ಲ್ ಅಂವೊಂಡ ಮೂಲಕ ನಿಂಗಕಾಯಿತ್ ಕಾಂಬ್‍ಚಿಟ್ಟತ್.

1 ಪೇತ್ರ 2:8

ಆ ಕಲ್ಲ್ ಮನುಷ್ಯಂಗಳ ತಡ್‍ಪಕು ಬೂವಕು ಮಾಡ್‌ವ ಬಂಡೆಯಾಯಿತ್ ಆಚಿ. ಅಯಿಂಗ ದೇವಡ ಉಪದೇಶಕ್ ಬಗ್ಗ್‌ಚಿಡತಗುಂಡ್ ಅದ್ ತಡ್‍ತಂಡುಂಡ್, ಅದ್ಂಗೇ ಅಯಿಂಗಳ ನೇಮಿಚಿಟ್ಟಯಿಂಗಳಾಯಿತುಂಡ್.

ಯೂದ ಒಳ್‍ದ್‍ನ ಕಾಗದ 1:4

ಎನ್ನಂಗೆಣ್ಣ್‌ಚೇಂಗಿ, ದೇವಡ ಮೇಲೆ ದಂಗೆ ಮಾಡ್‌ವ ಚೆನ್ನ ಜನ ನಿಂಗಕ್ ಗೊತ್ತಿಲ್ಲತೆ ನಿಂಗಡ ಸಬೇಲ್ ನುಗ್ಗಿತ್, ದೇವಡ ಕೃಪೆ ನಂಗಳ ಕಾಮಾಬಿಲಾಷೆ ಪಾಪ ಮಾಡ್‌ವಕ್ ಅನುಮತಿ ಕೊಡ್‍ತಿತುಂಡ್‍ೕಂದ್ ಎಣ್ಣಿಯಂಡ್, ಯೇಸು ಕ್ರಿಸ್ತ ಒಬ್ಬನೇ ನಂಗಡ ಮೇಲೆ ಎಲ್ಲಾ ಅದಿಕಾರ ಉಳ್ಳ ಒಡೆಯಾಂದ್ ಉಳ್ಳಾನ ಒತ್ತಂಡಿಲ್ಲೆ. ಅಯಿಂಗಡ ತೀರ್ಪ್‌ನ ಪಂಡೇ ದೇವ ಒಳ್‍ದಿ ಬೆಚ್ಚಿತುಂಡ್.

ಪ್ರಕಟನೆ 13:8

ಈ ಲೋಕತ್‍ರ ಸುರುಯಿಂಜ, ಮಿಂಞಲೇ ಬಲಿಯಾಯಿತ್ ಇಂಜ ಕೊರಿಕುಟ್ಟಿಯಾನವೊಂಡ ಜೀವತ್‍ರ ಪುಸ್ತಕತ್‍ಲ್ ಪೆದ ಒಳ್‌ದಿತಿಲ್ಲತ ಎಲ್ಲಾರು ಆ ಮೃಗತ್‍ನ ಆರಾದನೆ ಮಾಡ್‌ವ.