ಅಪೊಸ್ತಲ 2:10 - ಕೊಡವ ಬೈಬಲ್

¹⁰ ಪೊಂತ, ಆಸ್ಯ, ಫ್ರುಗ್ಯ, ಪಂಫುಲ್ಯ, ಐಗುಪ್ತ ದೇಶತ್‍ಲ್ ಉಳ್ಳಯಿಂಗಳು, ಕುರೇನೆರ ಸುತ್ತ್‌ಮುತ್ತ್‌ಲ್ ಉಳ್ಳ ಲಿಬ್ಯ ಪ್ರಾಂತ್ಯತ್‍ಲ್ ಉಳ್ಳಯಿಂಗಳು, ರೋಮ್ ಪಟ್ಟಣತ್ಂಜ ಬಂದಯಿಂಗಳು, ಯೆಹೂದ್ಯಂಗಳು, ಯೆಹೂದ್ಯ ಪದ್ದತಿಕ್ ಕೂಡ್‍ನಯಿಂಗಳು,

ಅಪೊಸ್ತಲ 2:10 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 12:10

ಈ ಸಮಯತ್‌ಲ್‌ ಆ ದೇಶತ್‌ಲ್‌ ಬರಗಾಲ ಇಂಜತ್. ಅಲ್ಲಿ ಬರಗಾಲ ಕಠಿಣವಾಯಿತ್‌ ಇಂಜನಗುಂಡ್‌ ಚೆನ್ನಕಾಲ ಐಗುಪ್ತ ದೇಶತ್‌ಲ್‌ ಇಪ್ಪಕ್‌ ಪೋಚಿ.

ಎಸ್ತೆರ್‌ 8:17

ರಾಜಂಡ ತೀರ್ಮಾನ ಪ್ರಕಟ ಆನ ಪ್ರತಿಯೊರ್‌ ಪ್ರಾಂತ್ಯತ್‌ಲ್, ಪಟ್ಟಣತ್‌ಲ್‌ ಇಂಜ ಯೆಹೂದ್ಯಂಗಕ್‌ ಕುಶಿಯು, ಸಂತೋಷವು ಇಂಜತ್. ಅಯಿಂಗ ಕುಶೀಲ್‌ ಪಿಂಞ ಕೊಂಡಾಟತ್‌ಲ್‌ ನಲ್ಲ ಗದ್ದಾಳ ಮಾಡಿತ್‌ ಉಂಡತ್. ದೇಶತ್‌ರ ಸುಮಾರ್‌ ಜನ ಯೆಹೂದ್ಯಂಗಕ್‌ ಪೋಡಿಚಿಟ್ಟಂಡ್‌ ಯೆಹೂದ್ಯ ಮಾರ್‌ಗಕ್‌ ಕೂಡ್‌ಚಿ.

ಮತ್ತಾಯ 2:15

ಹೆರೋದ ರಾಜ ಚತ್ತ್‌ಪೋಪಕತ್ತನೆ ಅಲ್ಲೇ ಇಂಜತ್. ಐಗುಪ್ತ ದೇಶತ್ಂಜ ನಾಡ ಮೋಂವೊನ ಬಪ್ಪ್‌ಚಿಟ್ಟತ್‍ೕಂದ್ ಪ್ರವಾದಿಯಡ ಮೂಲಕ ದೇವ ಎಣ್ಣ್‌ನದ್ ನೆರೆವೇರುವನೆಕೆ ಇನ್ನನೆ ಆಚಿ.

ಮತ್ತಾಯ 23:15

ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ! ಒಬ್ಬನ ನಿಂಗಡ ಕೂಟ್‍ಕ್ ಕೊಂಡ್ ಬಪ್ಪಕಾಯಿತ್, ಬೂಮಿನ ಸಮುದ್ರತ್‍ನ ಸುತ್ತಿತ್ ಬಪ್ಪಿರ. ಒಬ್ಬ ನಿಂಗಡ ಮಾರ್ಗಕ್ ಕೂಡ್‍ನ ಪಿಂಞ ಅಂವೊನ ನಿಂಗಕಿಂಜ ದಂಡ್ ಪಾಲ್ ನರಕತ್‍ಲ್ ಇಪ್ಪನೆಕೆ ಮಾಡ್‌ವಿರ.

ಮತ್ತಾಯ 27:32

ಅಂವೊನ ಕಾಕಿಯಂಡ್ ಪೋಪಕ, ಕುರೇನ್ಯ ಊರ್‌ಕ್ ಕೂಡ್‍ನ ಸೀಮೋನ ಎಣ್ಣ್‌ವಂವೊನ ಕಂಡತ್. ಸಿಪಾಯಿಯ ಯೇಸುರ ಶಿಲುಬೇನ ಪೊರ್‍ಪಕ್ ಅಂವೊನ ಒತ್ತಾಯ ಮಾಡ್‍ಚಿ.

ಮಾರ್ಕ 15:21

ಯೇಸುನ ಕೊಲ್ಲುವಕ್ ಕಾಕಿಯಂಡ್ ಪೋಯಂಡಿಪ್ಪಕ, ಬಟ್ಟೇಲ್, ಕುರೇನ್ಯ ಊರಿಂಜ ಬಂದಡಿಂಜ ಸೀಮೋನನ ಕಂಡತ್. ಅಂವೊ ಅಲೆಕ್ಸಾಂದ್ರ ಪಿಂಞ ರೂಫ ಎಣ್ಣುವಯಿಂಗಡ ಅಪ್ಪ. ಸಿಪಾಯಿಯ ಅಂವೊನ ಒತ್ತಾಯ ಮಾಡಿತ್ ಯೇಸುರ ಶಿಲುಬೇನ ಎಡ್‍ತಂಡ್ ಪೋಪಕ್ ಎಣ್ಣ್‌ಚಿ.

ಅಪೊಸ್ತಲ 11:20

ಆಚೇಂಗಿ, ಅಯಿಂಗಡಲ್ಲಿ ಕುಪ್ರ ಪಿಂಞ ಕುರೇನ್ಯತ್ಂಜ ಅಂತಿಯೋಕ್ಯ ಪಟ್ಟಣಕ್ ಪೋನ ಚೆನ್ನ ಜನ, ಯೆಹೂದ್ಯ ಅಲ್ಲತ ಜನಕ್ ಒಡೆಯನಾನ ಯೇಸುರ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕ್ ಸುರು ಮಾಡ್‍ಚಿ.

ಅಪೊಸ್ತಲ 13:1

ಅಂತಿಯೋಕ್ಯ ಪಟ್ಟಣತ್‍ರ ಸಬೇಲ್, ಚೆನ್ನ ಜನ ಪ್ರವಾದಿಯಂಗಳಾಯಿತು, ಚೆನ್ನ ಜನ ಬೋದನೆಕಾರಂಗಳಾಯಿತು ಇಂಜತ್. ಅಯಿಂಗ ದಾರ್ ಎಣ್ಣ್‌ಚೇಂಗಿ ಬಾರ್ನಬ, ನೀಗರ್‍ಂದ್ ಜನ ಕಾಕುವ ಸಿಮೆಯೋನ, ಕುರೇನ್ಯ ಊರ್‍ಕಾರನಾನ ಲೂಕ್ಯ, ಪಲಸ್ತೀನ ದೇಶತ್‍ಲ್ ಕಾಲ್ ಬಾಗಕ್ ಅದಿಪತಿಯಾಯಿತ್ಂಜ ಹೆರೋದ ಅಂತಿಪ ಎಣ್ಣ್‌ವಂವೊಂಡ ಕೂಡೆ ಬೊಳ್ಂದ ಮೆನಹೇನ ಪಿಂಞ ಸೌಲ ಎಣ್ಣ್‌ವಯಿಂಗಳೇ.

ಅಪೊಸ್ತಲ 13:13

ಅಲ್ಲಿಂಜ ಪೌಲ ಪಿಂಞ ಅಂವೊಂಡ ಕೂಡೆಯಿಂಜ ಎಲ್ಲಾರು ಪಾಫೋಸ್ ಎಣ್ಣುವ ಪಟ್ಟಣತ್‍ನ ಬುಟ್ಟಿತ್ ಸಮುದ್ರ ಮಾರ್ಗವಾಯಿತ್ ಪಂಫುಲ್ಯ ಸೀಮೆಕ್ ಕೂಡ್‍ನ ಪೆರ್ಗೆ ಎಣ್ಣುವ ಪಟ್ಟಣಕ್ ಬಾತ್. ಅಲ್ಲಿಕತ್ತನೆ ಅಯಿಂಗಡ ಕೂಡೆ ಬಂದಂಡಿಂಜ ಯೋಹಾನ ಅಯಿಂಗಳ ಬುಟ್ಟಿತ್ ಪುನಃ ಯೆರೂಸಲೇಮ್‌ಕ್ ವಾಪಸ್ ಪೋಚಿ.

ಅಪೊಸ್ತಲ 13:43

ಸಬಾಮಂದಿತ್‍ಲ್ ಕೂಡ್‍ನ ಜನ ಪೋನ ಪಿಂಞ, ಚೆನ್ನ ಯೆಹೂದ್ಯಂಗ ಪಿಂಞ ಯೆಹೂದ್ಯ ನಂಬಿಕೇಕ್ ಬಂದ ಬಕ್ತಿಯುಳ್ಳಯಿಂಗ, ಪೌಲ ಪಿಂಞ ಬಾರ್ನಬಂಡ ಕೂಟ್‍ಕ್ ಕೂಡ್‍ಚಿ. ಈಂಗ ಅಯಿಂಗಡ ಕೂಡೆ ತಕ್ಕ್ ಪರ್ಂದಂಡ್, ದೇವಡ ಕೃಪೇಲ್ ಸ್ತಿರವಾಯಿತ್ ನಿಪ್ಪಕ್ ಅಯಿಂಗಕ್ ಆಲೋಚನೆ ಕೊಡ್‍ತತ್.

ಅಪೊಸ್ತಲ 14:24

ಅಲ್ಲಿಂಜ ಪಿಸಿದ್ಯ ಸೀಮೆನ ದಾಟಿತ್ ಪಂಫುಲ್ಯ ಸೀಮೆಕ್ ಬಂತ್,

ಅಪೊಸ್ತಲ 15:38

ಆಚೇಂಗಿ, ಪೌಲ: ಪಂಫುಲ್ಯ ನಾಡ್‍ಲ್ ನಂಗ ಇಪ್ಪಕ, ಮಾರ್ಕ ದೇವಡ ಸೇವೆ ಮಾಡ್‌ವಕ್ ನಂಗಡ ಕೂಡೆ ಬರತೆ, ನಂಗಳ ಬುಟ್ಟಿತ್ ಪೋನಗುಂಡ್, ಇಕ್ಕ ಅಂವೊನ ಕಾಕಿಯಂಡ್ ಪೋಪದ್ ಚಾಯಾಪುಲೇಂದ್ ಎಣ್ಣ್‌ಚಿ.

ಅಪೊಸ್ತಲ 16:6

ಆಸ್ಯ ಸೀಮೆಲ್ ದೇವಡ ವಾಕ್ಯತ್‍ನ ಎಣ್ಣ್‌ವಕ್ಕಾಗಾಂದ್ ಪವಿತ್ರಾತ್ಮ ಅಯಿಂಗಳ ತಡೆ ಮಾಡ್‍ನಗುಂಡ್, ಅಯಿಂಗ ಫ್ರುಗ್ಯ ಪಿಂಞ ಗಲಾತ್ಯ ಪ್ರಾಂತ್ಯತ್‍ಲ್ ಪ್ರಯಾಣ ಮಾಡಿಯಂಡಿಂಜತ್.

ಅಪೊಸ್ತಲ 17:21

(ಅಥೇನ ಪಟ್ಟಣಕಾರಂಗಳು, ಅಲ್ಲಿ ವಾಸ ಇಂಜ ಬೋರೆ ಜನಳು, ಇನ್ನನೆ ಪುದಿಯ ಪುದಿಯ ವಿಷಯತ್‍ನ ಎಣ್ಣ್‌ವದ್ ಪಿಂಞ ಕ್‍ೕಪದ್‍ನ ಬುಟ್ಟತೇಂಗಿ ಬೋರೆ ಒಂದಾಂಗು ಸಮಯ ಕೊಡ್‍ಪಯಿಂಜಿಲೆ).

ಅಪೊಸ್ತಲ 18:2

ಯೆಹೂದ್ಯ ಜನಯೆಲ್ಲ ರೋಮ್ ರಾಜ್ಯತ್‍ರ ಪ್ರಾಂತ್ಯತ್‍ನ ಬುಟ್ಟಿತ್ ಬೋರೆ ಜಾಗಕ್ ಪೋಂಡೂಂದ್ ಕ್ಲೌದ್ಯ ಚಕ್ರವರ್ತಿ ಹುಕುಮ್ ಕೊಡ್‌ತಿತ್ಂಜತ್. ಆನಗುಂಡ್ ಇತಾಲ್ಯ ರಾಜ್ಯತ್ಂಜ ಬಂದಿತ್ಂಜ, ಪೊಂತ ದೇಶತ್‍ಲ್ ಪುಟ್ಟ್‌ನಂವೊನಾನ ಅಕ್ವಿಲ ಎಣ್ಣುವ ಒರ್ ಯೆಹೂದ್ಯ ಪಿಂಞ ಅಂವೊಂಡ ಪೊಣ್ಣ್ ಪ್ರಿಸ್ಕಿಲ್ಲ ಪುದಿಯದಾಯಿತ್ ಕೊರಿಂಥ ಪಟ್ಟಣಕ್ ಬಂದಿತ್ಂಜತ್. ಪೌಲಂಗ್ ಅಯಿಂಗಳ ಪರಿಚಯ ಆಚಿ.

ಅಪೊಸ್ತಲ 18:23

ಪೌಲ ಅಂತಿಯೋಕ್ಯತ್‍ಲ್ ಚೆನ್ನ ಸಮಯ ಇಂಜಿತ್, ಅಲ್ಲಿಂಜ ಪುನಃ ಕ್ರಮವಾಯಿತ್ ಗಲಾತ್ಯ ಪಿಂಞ ಫ್ರುಗ್ಯ ಸೀಮೆಲ್ ಪ್ರಯಾಣ ಮಾಡಿತ್ ಯೇಸುನ ನಂಬ್‍ನಯಿಂಗಳ ಎಲ್ಲಾ ದೃಡಪಡ್‍ತ್‍ಚಿ.

ಅಪೊಸ್ತಲ 2:11

ಕ್ರೇತ್ಯಯಿಂಗಳೂ ಪಿಂಞ ಅರಬಿ ದೇಶತಯಿಂಗಳಾನ ನಂಗಡ ನಂಗಡ ಬಾಷೆಲ್ ಈಂಗ ದೇವ ಮಾಡ್‍ನ ಅದ್ಬುತ ಕಾರ್ಯತ್‍ನ ತಕ್ಕ್ ಪರಿವಾನ ಕ್‍ೕಟಂಡುಂಡಲ್ಲಾಂದ್ ಎಣ್ಣ್‌ಚಿ.

ಅಪೊಸ್ತಲ 23:11

ಆ ದಿವಸ ಬಯಿಟ್, ಒಡೆಯ ಪೌಲಂಡ ಪಕ್ಕ ನಿಂದಿತ್ ದೈರ್ಯವಾಯಿತ್ ಇರ್; ನೀನ್ ಯೆರೂಸಲೇಮ್‍ಲ್ ನಾಡ ಸಂಗತಿನ ಸಾಕ್ಷಿಯಾಯಿತ್ ಎಣ್ಣ್‌ನನೆಕೆ, ರೋಮ್ ಪಟ್ಟಣತ್‌ಲು ಸಾಕ್ಷಿ ಎಣ್ಣಂಡೂಂದ್ ಎಣ್ಣ್‌ಚಿ.

ಅಪೊಸ್ತಲ 27:5

ಪಿಂಞ ಕಿಲಿಕ್ಯ ಪಂಫುಲ್ಯ ಸೀಮೆರ ಸಮುದ್ರತ್‍ರ ಮಾರ್ಗವಾಯಿತ್ ಪ್ರಯಾಣ ಮಾಡಿತ್, ಲುಕೀಯ ಸೀಮೆಲ್ ಉಳ್ಳ ಮುರ ಎಣ್ಣುವ ಪಟ್ಟಣಕ್ ಬಾತ್.

ಅಪೊಸ್ತಲ 28:15

ಅಲ್ಲಿಂಜ ಯೇಸುನ ನಂಬ್‍ನ ಅಣ್ಣತಮ್ಮಣಂಗ, ನಂಗ ಬಪ್ಪದ್‍ನ ಕ್‍ೕಟಿತ್, ನಂಗಳ ಕಾಂಬಕಾಯಿತ್ ಚೆನ್ನ ಜನ ಅಪ್ಪಿಯ ಪೇಟೆಕತ್ತನೆಯು, ಚೆನ್ನ ಜನ ತ್ರಿಛತ್ರ ಎಣ್ಣುವ ಜಾಗಕತ್ತನೆಯು ಬಾತ್. ಅಯಿಂಗಳ ನೋಟಿತ್ ಪೌಲ ದೇವಕ್ ವಂದನೆ ಮಾಡಿತ್, ದೈರ್ಯ ಎಡ್‍ತಂಡತ್.

ಅಪೊಸ್ತಲ 6:5

ಸಬೇಲ್ ಇಂಜಯಿಂಗಕೆಲ್ಲಾ ಈ ಆಲೋಚನೆ ಕುಶಿಯಾಚಿ. ಅಕ್ಕ ಅಯಿಂಗ, ಪವಿತ್ರಾತ್ಮತ್‍ಲ್ ಪಿಂಞ ನಂಬಿಕೇಲ್ ದುಂಬ್‌ನಯಿಂಗಳಾನ ಸ್ತೆಫನ, ಪಿಂಞ ಫಿಲಿಪ್ಪ, ಪ್ರೊಖೋರ, ನಿಕನೋರ, ತಿಮೋನ, ಪರ್ಮೇನ ಪಿಂಞ ಯೆಹೂದ್ಯಂಗಡ ನಂಬಿಕೇಕ್ ಕೂಡ್‍ನ ಅಂತಿಯೋಕ್ಯ ಪಟ್ಟಣತ್‍ರ ನಿಕೊಲಾಯ ಎಣ್ಣ್‌ವಯಿಂಗಳ ಗೊತ್ತ್ ಮಾಡಿತ್ ಅಪೊಸ್ತಲಂಗಡ ಮಿಂಞತ್ ನಿಪ್ಪ್‌ಚಿಟ್ಟತ್.

ಅಪೊಸ್ತಲ 6:9

ಆಚೇಂಗಿ, ಸ್ತೆಫನನ ವಿರೋದಿಚಿಡ್‌ವಯಿಂಗ ಅಲ್ಲಿ ಇಂಜತ್. ಅಯಿಂಗ ದಾರ್ ಎಣ್ಣ್‌ಚೇಂಗಿ, ಕುರೇನ್ಯ, ಅಲೆಕ್ಸಾಂದ್ರಿಯ, ಕಿಲಿಕ್ಯ ಪಿಂಞ ಆಸ್ಯ ಪ್ರಾಂತ್ಯತ್ಂಜ ಬಂದ ಯೆಹೂದ್ಯಂಗಳಾಯಿತ್‌ಂಜತ್. ಅಯಿಂಗ ಲಿಬೆರ್ತೀನ ಎಣ್ಣುವ ಸಬಾಮಂದಿರಕ್ ಕೂಡ್‍ನಯಿಂಗಳಾಯಿತ್ಂಜತ್. ಅಯಿಂಗ ಸ್ತೆಫನಂಡ ಕೂಡೆ ತರ್ಕ ಮಾಡಿಯಂಡಿಂಜತ್.

ರೋಮ್ 1:15

ಆನಗುಂಡ್ ರೋಮ್ ಪಟ್ಟಣತ್‍ಲ್ ಉಳ್ಳ ನಿಂಗಕು ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕಾಯಿತ್ ನಿಂಗಡ ಪಕ್ಕ ಬಪ್ಪಕ್ ನಾಕ್ ಬಲ್ಯ ಆಸೆ ಉಂಡ್.

ರೋಮ್ 1:7

ದೇವ ನಿಂಗಳ ಪ್ರೀತಿ ಮಾಡಿತ್, ಪವಿತ್ರವಾನಯಿಂಗಳಾಯಿತ್ ಇಪ್ಪಕ್ ಕಾಕ್‍ಚಿ. ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು ಸಮಾದಾನವು ನಿಂಗಕ್ ಕ್‍ಟ್ಟಡ್.

2 ತಿಮೊಥೆಯ 1:17

ಆಂಡ ಬದ್‍ಲ್ ಅಂವೊ ರೋಮ್ ಪಟ್ಟಣಕ್ ಬಪ್ಪಕ, ದುಂಬ ಕಷ್ಟಪಟ್ಟಿತ್ ನನ್ನ ತ್‍ೕಡಿ ಕಂಡ್‌ಪುಡ್‌ಚತ್.

ಪ್ರಕಟನೆ 11:8

ಈ ಸಾಕ್ಷಿಯಡ ಚಾವ್ ತಡಿ, ಆ ಬಲ್ಯ ಪಟ್ಟಣತ್‍ರ ಬೀದಿಲ್ ಬುದ್ದಿತ್ ಇಪ್ಪ. ಆ ಪಟ್ಟಣಕ್ ಸೋದೋಮ್ಂದ್ ಪಿಂಞ ಐಗುಪ್ತಾಂದ್ ಒರ್ ಗುರ್‌ತಾಯಿತ್ ಎಣ್ಣುವ; ಇಲ್ಲಿಯೇ ನಂಗಡ ಒಡೆಯನ ಶಿಲುಬೇಲ್ ಇಟ್ಟತ್.