ಅಪೊಸ್ತಲ 18:27 - ಕೊಡವ ಬೈಬಲ್

²⁷ ಅಲ್ಲಿಂಜ ಅಖಾಯ ಪ್ರಾಂತ್ಯಕ್ ಪೋಂಡೂಂದ್ ಅಂವೊ ಗೇನ ಮಾಡ್‌ವಕ, ಯೇಸುನ ನಂಬ್‍ನ ಅಣ್ಣತಮ್ಮಣಂಗ ಅಂವೊಂಗ್ ಪುರ್‌ಡ್ ಕೊಡ್‍ತತ್. ಈಂಗ ಅಖಾಯ ಪ್ರಾಂತ್ಯತ್‍ಲ್ ಉಳ್ಳ ಯೇಸುನ ನಂಬ್‍ನಯಿಂಗ, ಇಂವೊನ ಸ್ವೀಕಾರ ಮಾಡ್‌ವಕಾಯಿತ್, ಕಾಗದ ಒಳ್‍ದಿ ಕೊಡ್‍ತತ್. ಅನ್ನನೆ ಇಂವೊ ಅಲ್ಲಿ ಎತ್ತ್‌ನ ಪಿಂಞ, ಅಲ್ಲಿ ದೇವಡ ಕೃಪೇರಗುಂಡ್ ನಂಬ್‍ನಯಿಂಗಕ್ ದುಂಬ ಪ್ರಯೋಜನವಾಯಿತ್ಂಜತ್.

ಅಪೊಸ್ತಲ 18:27 ပူးပေါင်းရင်းမြစ်များ

ಅಪೊಸ್ತಲ 1:15

ಇನ್ನನೆ ಇಪ್ಪಕ, ಒರು ದಿವಸ, ಅಲ್ಲಿ ಕೂಡಿ ಬಂದಿತ್ಂಜ ನೂಯಿಟ ಇರ್‌ವದ್ ಶಿಷ್ಯಂಗಡ ಮದ್ಯತ್ ಪೇತ್ರ ಎದ್ದ್ ನಿಪ್ಪಂಜಿ, ತಕ್ಕ್ ಪರಿಯುವಕ್ ಸುರು ಮಾಡ್‍ಚಿ.

ಅಪೊಸ್ತಲ 11:26

ಅಂವೊನ ಅಲ್ಲಿ ಕಂಡಿತ್ ಅಂತಿಯೋಕ್ಯಕ್ ಕಾಕಿಯಂಡ್ ಬಾತ್. ಅಲ್ಲಿ ಅಯಿಂಗ ಒರ್ ಕಾಲಕತ್ತನೆ ಸಬೆರ ಜನಡ ಕೂಡೆ ಇಂಜಿತ್, ದುಂಬ ಜನಡ ಗುಂಪ್‌ಕ್ ಬೋದನೆ ಮಾಡಿಯಂಡಿಂಜತ್. ಅಂತಿಯೋಕ್ಯ ಪಟ್ಟಣತ್‍ಲ್ಲೇ ಯೇಸುನ ನಂಬ್‍ನಯಿಂಗಕ್ ಕ್ರಿಸ್ತಂಗಾಂದ್ ಆದ್ಯತ್ ಪೆದ ಕ್‍ಟ್ಟ್‌ಚಿ.

ಅಪೊಸ್ತಲ 15:34

ಆಚೇಂಗಿ ಸೀಲಂಗ್ ಅಲ್ಲಿ ಇಪ್ಪದ್ ನಲ್ಲದ್‍ೕಂದ್ ಗೇನ ಆ‍ಚಿ.

ಅಪೊಸ್ತಲ 18:12

ಗಲ್ಲಿಯೋನ ಎಣ್ಣ್‌ವಂವೊ ಅಖಾಯ ಪ್ರಾಂತ್ಯತ್‍ರ ಅದಿಪತಿಯಾಯಿತಿಪ್ಪಕ, ಯೆಹೂದ್ಯಂಗ ಒಕ್ಕಚೆ ಪೌಲಂಗ್ ವಿರೋದವಾಯಿತ್ ಎದ್ದಿತ್, ಗಲ್ಲಿಯೋನಂಡ ನ್ಯಾಯಸ್ತಾನತ್‍ರ ಮಿಂಞಕ್ ಪೌಲನ ಕೊಂಡ್ ಬಾತ್.

ಅಪೊಸ್ತಲ 18:18

ಪೌಲ ದುಂಬ ದಿವಸ ಕೊರಿಂಥ ಪಟ್ಟಣತ್‍ಲ್ ಯೇಸುನ ನಂಬ್‍ನ ಅಣ್ಣತಮ್ಮಣಂಗಡ ಕೂಡೆ ಇಂಜ ಪಿಂಞ, ದೇವಡ ಮಕ್ಕಡಯಿಂಜ ಪೊರಟತ್. ತಾಂಗ್ ಒರ್ ಪರ್‍ಕೆ ಇಂಜಗುಂಡ್ ಕೆಂಕ್ರೆಯ ಊರ್‌ಲ್ ಮಂಡೆನ ಬೋಳ್‍ಚಿಟ್ಟಂಡ್, ಸಿರಿಯ ದೇಶಕ್ ಪೋಪಕಾಯಿತ್ ಹಡಗ್‍ನ ಪತ್ತ್‌ಚಿ. ಪ್ರಿಸ್ಕಿಲ್ಲಳು ಅಕ್ವಿಲನು ಅಂವೊಂಡ ಕೂಡೆ ಪೊರಟ್ ಪೋಚಿ.

ಅಪೊಸ್ತಲ 19:1

ಅಪೊಲ್ಲೋಸ ಕೊರಿಂಥ ಪಟ್ಟಣತ್‍ಲ್ ಇಪ್ಪಕ, ಪೌಲ ಅಲ್ಲಿಂಜ ಮುಕ್ಯ ಬಟ್ಟೇಲ್ ಪ್ರಯಾಣ ಮಾಡತೆ, ಊರ್‌ರ ಬಟ್ಟೇಲ್ ಪ್ರಯಾಣ ಮಾಡಿತ್ ಎಫೆಸ ಪಟ್ಟಣಕ್ ಎತ್ತ್‌ಚಿ. ಅಲ್ಲಿ, ಯೇಸುನ ನಂಬ್‍ನ ಚೆನ್ನ ಜನಳ ಕಂಡತ್.

ಅಪೊಸ್ತಲ 9:27

ಆಚೇಂಗಿ ಬಾರ್ನಬ ಅಂವೊನ ಕೂಟಿಯಂಡ್, ಅಪೊಸ್ತಲಂಗಡ ಪಕ್ಕ ಕಾಕಿಯಂಡ್ ಪೋಚಿ. ಬಾರ್ನಬ, ಅಯಿಂಗಕೆಲ್ಲ ಸೌಲ ಎನ್ನನೆ ಒಡೆಯನ ಬಟ್ಟೇಲ್ ಕಂಡತ್‍ೕಂದೂ, ಒಡೆಯ ಅಂವೊಂಡ ಕೂಡೆ ತಕ್ಕ್ ಪರ್ಂದದನೂ ಎಣ್ಣ್‌ಚಿ. ಅದಲ್ಲತೆ ದಮಸ್ಕತ್‍ಲ್ ಯೇಸುರ ಪೆದತ್‍ಲ್ ಇಂವೊ ದೈರ್ಯತ್‍ಲ್ ತಕ್ಕ್ ಪರ್ಂದದ್‍ನ ಸಹ ಅಯಿಂಗಕ್ ವಿವರಿಚಿಟ್ಟತ್.

ರೋಮ್ 1:5

ಅಂವೊಂಡ ಮೂಲಕ ಅಂವೊಂಡ ಪೆದಕಾಯಿತ್, ನಂಗ ಯೆಹೂದ್ಯಂಗ ಅಲ್ಲತ ಎಲ್ಲಾ ಜನಡ ಮದ್ಯತ್‍ಲ್ ಪೋಯಿತ್ ದೇವಡ ವಿಷಯತ್‍ನ ಪ್ರಚಾರ ಮಾಡ್‌ವಕ್ ಅಪೊಸ್ತಲಂಗಕಾನ ಅದಿಕಾರವು, ಬಾಗ್ಯವು ದೇವ ನಂಗಕ್ ತಂದಿತುಂಡ್. ಅದ್‍ನಗುಂಡ್ ಅಂವೊನ ನಂಬಿತ್, ಅಂವೊಂಗ್ ಬಗ್ಗಿತ್ ದೇವಕ್ ಮಹಿಮೆ ಕೊಂಡ್ ಬಪ್ಪ.

1 ಕೊರಿಂಥ 15:10

ಆಚೇಂಗಿ ನಾನ್ ಇಕ್ಕ ಇಪ್ಪದ್ ದೇವ ನಾಡ ಮೇಲೆ ಕಾಟ್‍ನ ಕೃಪೆ ಮಾತ್ರ. ಅಂವೊ ನಾಡ ಮೇಲೆ ಕಾಟ್‍ನ ಕನಿಕರ ಪಾಳಾಯಿ ಪೋಯಿತ್ತ್‌ಲ್ಲೆ. ಅದ್ಂಡ ಬದ್‍ಲ್ ಅಯಿಂಗ ಎಲ್ಲಾಕಿಂಜ ನಾನ್ ದುಂಬ ಕೆಲಸ ಮಾಡಿಯೆ, ಆಚೇಂಗಿಯು ನನ್ನಗುಂಡ್ ಅನ್ನನೆ ಆಪಕಿಂಜಿಲೆ. ನಾಡ ಮೇಲೆ ಉಳ್ಳ ದೇವಡ ಕೃಪೇನಗುಂಡ್ ನಾನ್ ಅನ್ನನೆ ಮಾಡ್‍ವಕಾಚಿ.

1 ಕೊರಿಂಥ 16:3

ನಾನ್ ಬಪ್ಪಕ, ನಿಂಗ ಸಹಾಯ ಮಾಡ್‌ವಕಾಯಿತ್ ಕೂಟಿತ್ ಬೆಚ್ಚ ಪಣತ್‍ನ ಯೆರೂಸಲೇಮ್‌ಕ್ ಕೊಂಡ್ ಪೋಪಕ್ ದಾರ್‌ಕ್ ಯೋಗ್ಯತೆ ಉಂಡ್‍ೕಂದ್ ನಿಂಗ ಗೇನ ಮಾಡ್‍ವಿರೋ, ಅಯಿಂಗಡ ಪಕ್ಕ ಪಣತ್‍ನ ಕೊಡ್‌ತಿತ್, ಅಯಿಂಗಡ ಕೈಯಿಲ್ ಕಾಗದ ಕೊಡ್‌ತಿತ್ ನಾನ್ ಅಯಿಪಿ.

1 ಕೊರಿಂಥ 3:6

ನಾನ್ ಕುರುನ ಬಿತ್ತಿಯೆ, ಅಪೊಲ್ಲೋಸ ನೀರ್ ಬೂಕ್‌ಚ್. ಆಚೇಂಗಿ ದೇವನೇ ಗಿಡತ್‍ನ ಬೊಳಿಯುವಕ್ ಮಾಡ್‍ಚಿ.

2 ಕೊರಿಂಥ 1:24

ನಿಂಗಡ ನಂಬಿಕೇಕ್ ನಂಗ ಅದಿಕಾರ ಉಳ್ಳಯಿಂಗಳಾಯಿತ್ ಇಕ್ಕತೆ, ನಿಂಗಡ ಕುಶೀಕ್ ಸಹಾಯ ಮಾಡ್‌ವಯಿಂಗಳಾಯಿತುಂಡ್; ನಂಬಿಕೇರಗುಂಡ್ ನಿಂಗ ನಿಂದಂಡುಳ್ಳಿರಲ್ಲ.

ಫಿಲಿಪ್ಪಿ 1:25

ನಾಕ್ ಇದ್ ಚಾಯಿತೆ ಗೊತ್ತುಳ್ಳಗುಂಡ್, ನಾನ್ ನಿಂಗಕಾಯಿತ್ ಕಂಡಿತವಾಯಿತ್ ಬದ್‌ಕಿತ್, ನಿಂಗಡ ಕೂಡೆ ಇಂಜಿತ್ ನಿಂಗ ಮಿಂಞಕ್ ಪೋಪಾನ ನೋಟಿತ್, ನಿಂಗಡ ಕುಶೀರ ನಂಬಿಕೆ ದುಂಬ ಆಪನೆಕೆ ಸಹಾಯ ಮಾಡ್‌ವಿ.

ಫಿಲಿಪ್ಪಿ 1:29

ನಿಂಗಕ್, ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಬೆಪ್ಪ ಬಾಗ್ಯ ಮಾತ್ರ ಅಲ್ಲ, ಅಂವೊಂಗಾಯಿತ್ ನೊಂಬಲ ಎಡ್‍ತವಕೂ ಬಾಗ್ಯ ಕ್‍ಟ್ಟ್‌ಚಿ.

ಕೊಲೊಸ್ಸೆ 2:12

ನಿಂಗ ದೀಕ್ಷಾಸ್ನಾನ ಎಡ್‍ಪಕ, ಕ್ರಿಸ್ತಂಡ ಕೂಡೆ ಪೋಪನೆಕೆ ಪೋಯಿತ್ ಪಾಪತ್‍ರ ಚಾವ್ ತಡೀನ ಕುಂಡ್‌ಕ್ ಇಟ್ಟನೆಕೆ ಆಚಿ. ಅನ್ನನೆ ದೀಕ್ಷಾಸ್ನಾನತ್ಂಜ ನಿಂಗಳ ಅಂವೊಂಡ ಕೂಡೆ ಪುದಿಯ ಬದ್‍ಕ್‍ಕಾಯಿತ್ ಎಪ್ಪ್‌ಚಿ. ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತಂಡ ತಡೀನ ಚಾವ್‍ಯಿಂಜ ಪುನಃ ಜೀವತ್‍ಲ್ ಎಪ್ಪ್‌ಚಿಟ್ಟ ದೇವಡ ಬಲ್ಯ ಶಕ್ತಿನ ನಿಂಗ ನಂಬಿತುಳ್ಳಿರ.

ಕೊಲೊಸ್ಸೆ 4:10

ನಾಡ ಕೂಡೆ ಜೈಲ್‍ಲ್ ಉಳ್ಳ ಅರಿಸ್ತಾರ್ಕ ಪಿಂಞ ಬಾರ್ನಬಂಡ ಅಕ್ಕಂಡ ಮೋಂವೊನಾನ ಮಾರ್ಕ ಸಹ ನಿಂಗಕ್ ವಂದನೆ ಎಣ್ಣಿಯಂಡುಂಡ್. (ಮಾರ್ಕಂಡ ವಿಷಯತ್ ನಿಂಗಕ್ ಮಿಂಞಲೇ ಅಪ್ಪಣೆ ಕ್‍ಟ್ಟಿತುಂಡ್; ಅಂವೊ ಬಪ್ಪಕ, ನಿಂಗ ಅಂವೊನ ಸತ್ಕಾರ ಮಾಡಂಡು).