ಅಪೊಸ್ತಲ 15:20 - ಕೊಡವ ಬೈಬಲ್

²⁰ ಅದ್ಂಡ ಬದ್‍ಲ್ ಅಯಿಂಗ ವಿಗ್ರಹಕ್ ಅರ್ಪಿಚಿಟ್ಟ ಅಶುದ್ದ ಆನ ಕೂಳ್‍ಕ್, ಚೋರೆ ತಿಂಬಕ್, ನೆರ್‌ಕಿತ್ ಚತ್ತ್‌ಪೋನ ಪ್ರಾಣಿಯಡ ಯರ್ಚಿಕ್ ಪಿಂಞ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡೂಂದ್ ಅಯಿಂಗಕ್ ಕಾಗದತ್‍ನ ಒಳ್‍ದಿತ್ ಅಪ್ಪಣೆ ಕೊಡಕನ.

ಅಪೊಸ್ತಲ 15:20 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 35:2

ಅಕ್ಕ ಯಾಕೋಬ ತಾಂಡ ಮನೆಕಾರಳ ಪಿಂಞ ತಾಂಡ ಕೂಡೆ ಉಳ್ಳ ಎಲ್ಲಾ ಜನಳ ಕಾಕಿತ್: ನಿಂಗಡ ಪಕ್ಕ ಉಳ್ಳ ಪರದೇಶಿಯಡ ಮೂರ್ತಿಯಳ ಚಾಡಿತ್, ನಿಂಗಳ ಶುದ್ದಮಾಡಿಯಂಡ್, ಬಟ್ಟೆ ಬದ್‌ಲ್‌ ಮಾಡಿ.

ಆದ್ಯತ್‌ರ ಪುಸ್ತಕ 9:4

ಆಚೇಂಗಿ ಯರ್ಚಿನ, ಅದ್‌ಂಡ ಜೀವ ಆನ ಚೋರೆರೆ ಕೂಡೆ ನಿಂಗ ತಿಂಬಕ್ಕಾಗ.

ಅಪೊಸ್ತಲ 21:25

ಯೆಹೂದ್ಯಂಗ ಅಲ್ಲತ ಯೇಸುನ ನಂಬ್‍ನಯಿಂಗ: ವಿಗ್ರಹಕ್ ಅರ್ಪಿಚಿಟ್ಟ ಕೂಳ್‍ಕ್, ಚೋರೆ ತಿಂಬಕ್, ನೆರ್‌ಕಿತ್ ಚತ್ತ್‌ಪೋನ ಪ್ರಾಣಿಯಡ ಯರ್ಚಿಕ್ ಪಿಂಞ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡೂಂದ್ ನಂಗ ತೀರ್ಮಾನ ಮಾಡಿತ್ ಒಳ್‍ದಿಯೇಂದ್ ಎಣ್ಣ್‌ಚಿ.

1 ಕೊರಿಂಥ 5:11

ನಾನ್ ನಿಂಗಕ್ ಎಂತ ಒಳ್‍ದಿಯೆ ಎಣ್ಣ್‌ಚೇಂಗಿ, ಯೇಸು ಕ್ರಿಸ್ತನ ನಂಬ್‍ವಂವೋಂದ್ ಎಣ್ಣಿಯಂಡ್, ಆಚೇಂಗಿ ವ್ಯಬಿಚಾರ ಮಾಡಿಯಂಡ್, ದುಡ್ಡ್‌ರ ಮೇಲೆ ಅತಿ ಆಸೆ ಬೆಚ್ಚಂಡ್, ವಿಗ್ರಹ ಆರಾದನೆ ಮಾಡಿಯಂಡ್, ಬಜ್ಜಂಡ್, ಕುಡ್‌ಚಂಡ್, ಜನಳ ವಂಚನೆ ಮಾಡಿಯಂಡ್ ಉಳ್ಳಯಿಂಗಡ ಕೂಡೆ ಕೂಟ್ ಕೂಡತೀಂದ್ ಎಣ್ಣಿಯೆ. ಅಂತ ಜನಡ ಕೂಡೆ ಉಂಬಕ್ ಸಹ ಅಳ್‌ಕತಿ.

1 ಕೊರಿಂಥ 6:13

ನಿಂಗ ಕೆಲಕಾಯಿತ್ ಕೂಳ್, ಕೂಳ್‍ಕಾಯಿತ್ ಕೆಲಾಂದ್ ಎಣ್ಣುವಿರ, ಅದ್ ನೇರ್. ಆಚೇಂಗಿಯು, ದೇವ ಅದ್ ದಂಡನೂ ಪಾಳ್ ಮಾಡ್‌ವ. ಆನಗುಂಡ್ ನಿಂಗ, ಈ ತಡಿನ ಲೈಂಗಿಕ ಕುಶಿಕಾಯಿತ್‍ೕಂದ್‌ ಎಣ್ಣ್‌ವಕ್ ಕಯ್ಯುಲೆ. ಅದ್ ಒಡೆಯಂಗಾಯಿತ್ ಮಾಡ್‍ನದ್, ಒಡೆಯ ನಂಗಡ ತಡಿಕ್ ಜವಾಬ್ದಾರನಾಯಿತ್ ಉಂಡ್.

1 ಕೊರಿಂಥ 6:18

ಲೈಂಗಿಕ ಪಾಪತ್ಂಜ ಓಡಿ ಪೋಯಿ! ಒರ್ ಮನುಷ್ಯ ಮಾಡ್‌ವ ಬೋರೆ ಏದ್ ಪಾಪವು ಅಂವೊಂಡ ತಡಿಕ್ ಪೊರಮೆ ಆಯಿತಿಪ್ಪ, ಆಚೇಂಗಿ ಲೈಂಗಿಕ ಪಾಪ ಮಾಡ್‌ವಂವೊ ತಾಂಡ ಸ್ವಂತ ತಡಿಕ್ ವಿರೋದವಾಯಿತ್ ಪಾಪ ಮಾಡ್‌ವ.

1 ಕೊರಿಂಥ 6:9

ಅನೀತಿ ಮಾಡ್‌ವಯಿಂಗ ದೇವಡ ರಾಜ್ಯಕ್ ಬಾದ್ಯತೆ ಉಳ್ಳಯಿಂಗಳಾಯಿತ್ ಇಪ್ಪುಲೇಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ನಿಂಗ ಮೋಸ ಪೋಕತಿ; ಕಳ್ಳ ಸಂಬಂದ ಉಳ್ಳಯಿಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವ ಆಣಾಳ್‌ಂಗ, ಆಣ್-ಆಣ್, ಪೊಣ್ಣಾಳ್-ಪೊಣ್ಣಾಳ್ ವ್ಯಬಿಚಾರ ಮಾಡ್‌ವಯಿಂಗ,

1 ಕೊರಿಂಥ 7:2

ಆಚೇಂಗಿ, ಇಚ್ಚಕ್ ಲೈಂಗಿಕ ಪಾಪತ್‍ರ ಸೋದನೆ ಉಳ್ಳಗುಂಡ್ ಪ್ರತಿಯೊರ್ ಮನುಷ್ಯಂಗು ಒರ್ ಸ್ವಂತ ಪೊಣ್ಣ್ ಬೋಂಡು, ಪ್ರತಿಯೊರ್ ಪೊಣ್ಣಾಳ್‍ಕು ಒರ್ ಸ್ವಂತ ವಡಿಯ ಬೋಂಡು.

1 ಕೊರಿಂಥ 8:1

ಇಕ್ಕ, ನಿಂಗ ಕ್‍ೕಟ ವಿಗ್ರಹಕ್ ಅರ್ಪಿಚಿಟ್ಟ ಆಹಾರತ್‍ರ ವಿಷಯತ್, ನಾನ್ ಎಣ್ಣ್‌ವಿ. ನಂಗಕೆಲ್ಲಾರ್‌ಕೂ ಈ ವಿಷಯತ್ ಅರಿವ್ ಉಂಡ್‍ೕಂದ್ ನಂಗಕ್ ಗೊತ್ತುಂಡ್. ಬುದ್ದಿ ಆಂಗಾರತ್‍ನ ಉಂಟ್ ಮಾಡ್‌ವ, ಆಚೇಂಗಿ ಪ್ರೀತಿ ಬೋರೆಯಿಂಗಳ ಬಲಪಡ್‍ತ್‍ವಕ್ ಸಹಾಯ ಮಾಡ್‌ವ.

2 ಕೊರಿಂಥ 12:21

ಪುನಃ ನಾನ್ ನಿಂಗಡ ಪಕ್ಕ ಬಪ್ಪಕ, ನಾಡ ದೇವ ನಿಂಗಡ ಮಿಂಞ ನನ್ನ ತಗ್ಗ್‌ಚಿಡುವಕಾಯಿತ್, ಮಿಂಞ ಪಾಪ ಮಾಡ್‍ನ ದುಂಬ ಜನ ಅಯಿಂಗ ಮಾಡ್‍ನ ಅಶುದ್ದತ್‍ನ, ಲೈಂಗಿಕ ಪಾಪತ್‍ನ ಪಿಂಞ ತಡೀರ ಮೋಹತ್‍ನ ಬುಟ್ಟಿತ್ ಪಶ್ಚಾತಾಪ ಪಡತೆ ಇಪ್ಪದ್‍ನ ಕಂಡಿತ್ ನಾನ್ ದುಃಖಪಡುವಕ್ ಇಪ್ಪೋಂದ್ ನಾಕ್ ಪೋಡಿ ಆಯಂಡುಂಡ್.

ಗಲಾತ್ಯ 5:19

ಮನುಷ್ಯಂಡ ಪಾಪತ್‍ರ ಗುಣ ಮಾಡ್‌ವ ಕಾರ್ಯವೆಲ್ಲಾ ಪೊರಮೆ ಕಾಂಬಕ್ ಕಯ್ಯು. ಅದೆಲ್ಲ ಎಂತ ಎಣ್ಣ್‌ಚೇಂಗಿ: ಲೈಂಗಿಕ ಪಾಪ, ನೀತಿಯಿಲ್ಲತ ಕಾರ್ಯ, ತಡೀರ ಮೋಹ,

ಎಫೆಸ 5:3

ದೇವಡ ಮಕ್ಕಕ್ ಯೋಗ್ಯವಲ್ಲತ ಏದ್ ಲೈಂಗಿಕ ಪಾಪವು, ಅಶುದ್ದ ಕಾರ್ಯವು, ಏದ್ ಬೋಂಡತ ಆಸೆಯು, ಇದ್ಂಡ ಪೆದ ಸಹ ನಿಂಗಡ ಮದ್ಯತ್‍ಲ್ ಇಪ್ಪಕ್ಕಾಗ.

ಕೊಲೊಸ್ಸೆ 3:5

ಆನಗುಂಡ್, ಲೈಂಗಿಕ ಪಾಪ, ಪವಿತ್ರಯಿಲ್ಲತ ವಿಷಯ, ಇಚ್ಛೆ, ಕೆಟ್ಟ ಆಸೆ, ದುಷ್ಟತನ, ಅತಿ ಆಸೆಯಾಯಿತುಳ್ಳ ವಿಗ್ರಹ ಆರಾದನೆ, ಈ ಲೋಕತ್‍ರ ಗುಣವಾಯಿತುಳ್ಳ ಇದೆಲ್ಲಾ ನಿಂಗಡಿಂಜ ಪಾಳ್ ಆಪನೆಕೆ ಬುಡ್‍ವಿರ.

1 ಥೆಸಲೊನೀಕ 4:3

ನಿಂಗ ಪವಿತ್ರವಾನಯಿಂಗಳಾಯಿತ್ ಬದ್‍ಕಂಡೂಂದ್ ಉಳ್ಳದೇ ದೇವಡ ಚಿತ್ತ. ಆನಗುಂಡ್ ನಿಂಗ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡು.

ಇಬ್ರಿಯ 12:16

ದಾರ್ ಒಬ್ಬನು ವೇಶಿತನ ಮಾಡ್‌ವಂವೊನಾಯಿತ್ ಇಪ್ಪಕ್ಕಾಗ. ಏಸಾ ಎಣ್ಣ್‌ವಂವೊ ಬರಿ ಕೂಳ್‍ಕಾಯಿತ್ ತಾಂಡ ಅಪ್ಪಯಿಂಜ ಕ್‍ಟ್ಟುವ ಆದ್ಯ ಮೋಂವೊಂಡ ಆಶೀರ್ವಾದತ್‍ನ ಮಾರ್‍ನನೆಕೆ ಬಕ್ತಿ ಇಲ್ಲತಂವೊನಾಯಿತು ಇಪ್ಪಕ್ಕಾಗ.

ಇಬ್ರಿಯ 13:4

ಮಂಗಲತ್‍ನ ಎಲ್ಲಾರು ಗನಪಡ್‌ತಂಡು, ಮಂಗಲ ಕಯಿಚಯಿಂಗ ಅಯಿಂಗಯಿಂಗಡ ವಡಿಯ ಪೊಣ್ಣ್‌ಕ್ ನಂಬಿಕಸ್ತಯಿಂಗಳಾಯಿತ್ ಇಕ್ಕಂಡು; ವೇಶಿಯಳ ಪಿಂಞ ವ್ಯಬಿಚಾರ ಮಾಡ್‌ವಯಿಂಗಳ ದೇವ ನ್ಯಾಯತೀರ್ಪ.

1 ಪೇತ್ರ 4:3

ಕಯಿಂಜ ಕಾಲತ್‍ಲ್ ನಂಗ ದೇವನ ಗೊತ್ತ್‌ಲ್ಲತಯಿಂಗ ಎನ್ನನೆ ಬದ್‍ಕಂಡೂಂದ್ ಗೇನಮಾಡ್‍ಚೋ ಅನ್ನನೆ ಬೋಂಡಿಯಚ್ಚಕ್ ಬದ್‍ಕಿರ್‌ತ್. ಅಕ್ಕ ನಂಗ ತಡೀರ ಮೋಹತ್‍ಲ್, ಇಚ್ಛೆಲ್ ನಡ್‌ದಂಡ್, ಕುಡಿಚಂಡ್, ಕೂಟ್‌ಕಳಿ ಮಾಡ್‌ವಯಿಂಗಳಾಯಿತ್, ಕುಡ್‍ಕಂಗಳಾಯಿತ್ ಅಸಹ್ಯವಾನ ವಿಗ್ರಹ ಆರಾದನೆ ಮಾಡಿಯಂಡ್ ಇಂಜತ್.

ಪ್ರಕಟನೆ 10:2

ಅಂವೊಂಡ ಕೈಯಿಲ್ ತೊರ್‌ಂದಿತ್‌ಂಜ ಒರ್ ಚೆರಿಯ ಪುಸ್ತಕ ಇಂಜತ್. ಅಂವೊ ತಾಂಡ ಬಲ್‌ತೆ ಕಾಲ್‌ನ ಸಮುದ್ರತ್‍ರ ಮೇಲೆ ಬೆಚ್ಚತ್. ಅಂವೊಂಡ ಎಡ್‍ತೆ ಕಾಲ್‌ನ ಬೂಮಿರ ಮೇಲೆ ಬೆಚ್ಚಿತ್,

ಪ್ರಕಟನೆ 10:8

ಪರಲೋಕತ್ಂಜ ನಾಕ್ ಕ್‍ೕಟ ವಾಣಿ ಇಂಞೊಮ್ಮ ನಾಡ ಕೂಡೆ ತಕ್ಕ್ ಪರ್ಂದಿತ್: ನೀನ್ ಪೋಯಿತ್ ಸಮುದ್ರತ್‍ರ ಮೇಲೆಯು, ಬೂಮಿರ ಮೇಲೆಯು ನಿಂದಂಡುಳ್ಳ ದೂತಂಡ ಕೈಯಿಂಜ ತೊರ್‌ಂದಿತುಳ್ಳ ಆ ಚೆರಿಯ ಪುಸ್ತಕತ್‍ನ ಎಡ್‍ತಾಂದ್ ಎಣ್ಣ್‌ಚಿ.

ಪ್ರಕಟನೆ 2:14

ಆಚೇಂಗಿಯು, ನೀಡ ಮೇಲೆ ಚೆನ್ನ ವಿಷಯತ್ ನಾಕ್ ಕುತ್ತ ಪರಿಯುವನೆಕೆ ಉಂಡ್; ಇಸ್ರಾಯೇಲ್ ಜನ ವಿಗ್ರಹಕ್ ಅರ್ಪಿಚಿಟ್ಟದ್‍ನ ತಿಂಬಕು, ವ್ಯಬಿಚಾರ ಮಾಡ್‌ವಕು ಕಾರಣವಾಯಿತ್ಂಜ ಬಾಲಾಕ ಎಣ್ಣುವ ರಾಜಂಗ್ ವಂಚನೆರ ಬೋದನೆ ಮಾಡ್‍ನ ಪ್ರವಾದಿಯಾನ ಬಿಳಾಮ ಎಣ್ಣ್‌ವಂವೊಂಡ ಬೋದನೆರ ಪ್ರಕಾರ ನಡ್‍ಪಯಿಂಗಳು ನೀಡ ಕೂಡೆ ಉಂಡ್.

ಪ್ರಕಟನೆ 2:20

ಆಚೇಂಗಿಯು, ನೀಡ ಮೇಲೆ ಚೆನ್ನ ವಿಷಯತ್ ನಾಕ್ ಕುತ್ತ ಪರಿಯುವನೆಕೆ ಉಂಡ್; ಅದ್ ಎಂತ ಎಣ್ಣ್‌ಚೇಂಗಿ, ಯೆಜೆಬೇಲಾಂದ್ ಎಣ್ಣುವ ಒರ್ ಪೊಣ್ಣಾಳ್, ನಾನೇ ಪ್ರವಾದೀಂದ್ ಎಣ್ಣಿಯಂಡ್, ನಾಡ ಸೇವಕಂಗ ವ್ಯಬಿಚಾರ ಪಾಪ ಮಾಡ್‌ವಕು, ವಿಗ್ರಹಕ್ ಅರ್ಪಿಚಿಟ್ಟದ್‍ನ ತಿಂಬಕು ಬೋದನೆ ಮಾಡಿತ್, ಅಯಿಂಗಳ ವಂಚನೆ ಮಾಡ್‌ವಕ್ ನೀನ್ ಜಾಗ ಕೊಡ್‍ತಂಡುಂಡ್.

ಪ್ರಕಟನೆ 9:20

ಇನ್ನನೆಲ್ಲಾ ಆಚೇಂಗಿಯು, ಈ ಹಿಂಸೆರಗುಂಡ್ ಚಾವತೆ ಬಾಕಿ ಇಂಜ ಜನ, ಪೊನ್ನ್, ಬೊಳಿ, ಚೆಂಬ್, ಕಲ್ಲ್, ಮರ ಇನ್ನತಾನಗುಂಡ್ ಮಾಡ್‍ನ ಕಾಂಬಕು, ಕ್‍ೕಪಕು, ನಡ್‌ಪಕು ಕಯ್ಯತ ವಿಗ್ರಹಕ್ ಪೂಜೆ ಮಾಡತನೆಕೆ ಪಿಂಞ ಕೂಳಿಯಂಗಕ್ ಪೂಜೆ ಮಾಡತನೆಕೆ ಅಯಿಂಗಡ ಕ್ರಿಯೇನ ಬುಟ್ಟಿತ್ ಪಶ್ಚಾತಾಪ ಪಟ್ಟಿತ್‌ಲ್ಲೆ.