ಅಪೊಸ್ತಲ 14:22 - ಕೊಡವ ಬೈಬಲ್

²² ಯೇಸುನ ನಂಬ್‍ನಯಿಂಗಡ ಮನಸ್ಸ್‌ನ ಗಟ್ಟಿ ಮಾಡಿತ್, ನೇರಾನ ನಂಬಿಕೇಲ್ ಸ್ತಿರವಾಯಿತ್ ನಿಕ್ಕಂಡೂಂದ್ ಬುದ್ದಿ ತಕ್ಕ್ ಎಣ್ಣಿತ್, ನಂಗ ದುಂಬ ಕಷ್ಟತ್‍ನ ಅನುಬವಿಚಿಟ್ಟಿತ್ ದೇವಡ ರಾಜ್ಯತ್‍ರ ಒಳ್‍ಕ್ ಕೂಡಂಡೂಂದ್ ಎಚ್ಚರ ಮಾಡಿತ್ ಅಯಿಂಗಳ ದೈರ್ಯಪಡ್‍ತ್‍ಚಿ.

ಅಪೊಸ್ತಲ 14:22 ပူးပေါင်းရင်းမြစ်များ

ಮತ್ತಾಯ 10:38

ದಾರ್ ತಾಂಡ ಶಿಲುಬೇನ ಎಡ್‍ತಂಡ್ ನಾಡ ಬಯ್ಯ ಬಪ್ಪ್‌ಲೆಯೋ ಅಂವೊ ನಾಡ ಶಿಷ್ಯನಾಯಿತ್‌ಪ್ಪಕ್ ಯೋಗ್ಯನಲ್ಲ.

ಮತ್ತಾಯ 16:24

ಅಕ್ಕ, ಯೇಸು ಅಂವೊಂಡ ಶಿಷ್ಯಂಗಳ ನೋಟುವಂಜಿ: ನಿಂಗಡಲ್ಲಿ ದಾರ್‌ಕೇಂಗಿ ನಾಡ ಶಿಷ್ಯನಾಯಿತ್ ಇಪ್ಪಕ್ ಕುಶಿ ಇಂಜತೇಂಗಿ, ಅಂವೊ ಅಂವೊಂಡ ಆಸೆನೆಲ್ಲಾ ಬುಟ್ಟಿತ್, ತಾಂಡ ಶಿಲುಬೇನ ನೇತಿಯಂಡ್ ನಾಡ ಬಯ್ಯತ್ ಬರಡ್.

ಮತ್ತಾಯ 19:24

ಪಣಕಾರಂಗ ಪರಲೋಕ ರಾಜ್ಯಕ್ ಪೋಪಕಿಂಜ ಚೂದ್‌ರ ಕಣ್ಣ್‌ಲ್ ಒರ್ ಒಂಟೆ ನುಗ್ಗ್‌ವದ್ ಸುಲಬಾಂದ್ ಎಣ್ಣ್‌ಚಿ.

ಮಾರ್ಕ 10:30

ಈ ಬದ್‌ಕ್‌ಲೇ, ದೇವಡ ವಿಷಯಕಾಯಿತ್ ಕಷ್ಟತ್‍ರ ಕೂಡೆ ಅಂವೊಂಗ್ ನೂರ್‌ರಚ್ಚಕ್ ಜಾಸ್ತಿ ಮನೆಮಠ, ಅಣ್ಣತಮ್ಮಣಂಗ, ಅಕ್ಕತಂಗೆಯ, ಅಪ್ಪವ್ವ, ಮಕ್ಕ, ತೋಟ ಬೇಲ್ ಎಲ್ಲಾ ಕ್‍ಟ್ಟುವ ಪಿಂಞ ಮಿಂಞತ್‍ರ ಲೋಕತ್‍ಲ್ ನಿತ್ಯ ಜೀವವು ಕ್‍ಟ್ಟ್‌ವಾಂದ್ ಎಣ್ಣ್‌ಚಿ.

ಮಾರ್ಕ 9:47

ಅನ್ನನೆ ನಿಂಗಡ ಕಣ್ಣ್ ಪಾಪ ಮಾಡ್‌ವಕ್ ಕಾರಣವಾಯಿತ್ ಇಂಜತೇಂಗಿ, ಆ ಕಣ್ಣ್‌ನ ಬಲ್‍ಚಿತ್ ಚಾಡಿರ್. ದಂಡ್ ಕಣ್ಣ್ ಉಳ್ಳಂವೊನಾಯಿತ್ ನರಕಕ್ ಪೋಪಗಿಂಜ ಒರೇ ಕಣ್ಣ್‌ಲ್ ದೇವಡ ರಾಜ್ಯಕ್ ಪೋಪದ್ ನಲ್ಲದ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 24:26

ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಮಹಿಮೆಪಡ್‍ವಕ್ ಮಿಂಞ ಇನ್ನನೆಲ್ಲ ಕಷ್ಟ ಅನುಬವಿಚಿಡಡೂಂದ್ ನಿಂಗಕ್ ಗೊತ್ತ್‌ಲ್ಲೆಯಾಂದ್ ಪ್ರಶ್ನೆ ಇಟ್ಟತ್.

ಯೋಹಾನ 15:18

ಈ ಲೋಕತ್‍ರ ಜನ ನಿಂಗಳ ವಿರೋದ ಮಾಡ್‍ಚೇಂಗಿ, ಅಯಿಂಗ ನಿಂಗಕ್ ಮಿಂಞ ನನ್ನ ವಿರೋದ ಮಾಡ್‍ಚೀಂದ್ ನಿಂಗ ಗೇನ ಮಾಡಿಯೊಳಿ.

ಯೋಹಾನ 15:20

ಒರ್ ಎಜಮಾನಗಿಂಜ ಆಳ್ ಬಲ್ಯಂವೊನಾಯಿತ್‌ಪ್ಪುಲೇಂದ್ ನಾನ್ ನಿಂಗಕ್ ಎಣ್ಣ್‌ನ ತಕ್ಕ್‌ನ ನಿಂಗ ಗೇನ ಮಾಡಿಯೊಳಿ. ಅಯಿಂಗ ನಾಕ್ ಹಿಂಸೆ ತಂದಕ ನಿಂಗಕು ಹಿಂಸೆ ತಪ್ಪ; ಅಯಿಂಗ ನಾಡ ತಕ್ಕ್‌ರ ಪ್ರಕಾರ ನಡ್ಂದತೇಂಗಿ, ನಿಂಗಡ ತಕ್ಕ್‌ರ ಪ್ರಕಾರ ಸಹ ನಡ್‍ಪ.

ಯೋಹಾನ 16:33

ನಿಂಗಕ್ ನಾಡಲ್ಲಿ ಸಮಾದಾನ ಇಕ್ಕಂಡೂಂದ್ ನಾನ್ ನಿಂಗಕ್ ಇದ್‍ನೆಲ್ಲಾ ಎಣ್ಣಿಯೆ. ಲೋಕತ್‍ಲ್ ನಿಂಗಕ್ ಕಷ್ಟ ಉಂಡ್ ಆಚೇಂಗಿಯು ದೈರ್ಯತ್‍ಲ್ ಇರಿ; ನಾನ್ ಲೋಕತ್‍ನ ಗೆದ್ದಿಯೇಂದ್ ಎಣ್ಣ್‌ಚಿ.

ಯೋಹಾನ 3:5

ಯೇಸು ಅಂವೊಂಗ್: ಒಬ್ಬ, ನೀರ್ಂಜಲು ಪವಿತ್ರಾತ್ಮತ್‌ಂಜಲು ಪುಟ್ಟತೆ ಪೋಚೇಂಗಿ ದೇವಡ ರಾಜ್ಯಕ್ ಪೋಪಕ್ ಕಯ್ಯುಲೇಂದ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.

ಅಪೊಸ್ತಲ 11:23

ಅಂವೊ ಅಲ್ಲಿಕ್ ಎತ್ತಿತ್ ದೇವಡ ಕೃಪೇನ ದೃಡವಾಯಿತ್ ಕಾಂಬಕ, ಅಂವೊಂಗ್ ದುಂಬ ಕುಶಿಯಾಯಿತ್, ಅಯಿಂಗಳ ನೋಟಿತ್, ಅಯಿಂಗ ತ್‍ೕರ ಹೃದಯತ್‍ಲ್ ಒಡೆಯಂಗ್ ನಂಬಿಕಸ್ತಂಗಳಾಯಿತ್ ಇಪ್ಪಕ್ ಪುರ್‌ಡ್ ಕೊಡ್‍ತತ್.

ಅಪೊಸ್ತಲ 11:26

ಅಂವೊನ ಅಲ್ಲಿ ಕಂಡಿತ್ ಅಂತಿಯೋಕ್ಯಕ್ ಕಾಕಿಯಂಡ್ ಬಾತ್. ಅಲ್ಲಿ ಅಯಿಂಗ ಒರ್ ಕಾಲಕತ್ತನೆ ಸಬೆರ ಜನಡ ಕೂಡೆ ಇಂಜಿತ್, ದುಂಬ ಜನಡ ಗುಂಪ್‌ಕ್ ಬೋದನೆ ಮಾಡಿಯಂಡಿಂಜತ್. ಅಂತಿಯೋಕ್ಯ ಪಟ್ಟಣತ್‍ಲ್ಲೇ ಯೇಸುನ ನಂಬ್‍ನಯಿಂಗಕ್ ಕ್ರಿಸ್ತಂಗಾಂದ್ ಆದ್ಯತ್ ಪೆದ ಕ್‍ಟ್ಟ್‌ಚಿ.

ಅಪೊಸ್ತಲ 11:29

ಅಕ್ಕ ಯೇಸುನ ನಂಬ್‍ನ ಓರೋರ್ ಅಣ್ಣತಮ್ಮಣಂಗಳು ಅಯಿಂಗಯಿಂಗಕ್ ಕಯ್ಯುವಚ್ಚಕ್ ಯೂದಾಯ ಪ್ರಾಂತ್ಯತ್‍ಲ್ ವಾಸ ಮಾಡಿಯಂಡುಳ್ಳ ಯೇಸುನ ನಂಬ್‍ನಯಿಂಗಕ್ ಸಹಾಯ ಮಾಡ್‌ವಕ್ ತೀರ್ಮಾನ ಎಡ್‍ತತ್.

ಅಪೊಸ್ತಲ 13:43

ಸಬಾಮಂದಿತ್‍ಲ್ ಕೂಡ್‍ನ ಜನ ಪೋನ ಪಿಂಞ, ಚೆನ್ನ ಯೆಹೂದ್ಯಂಗ ಪಿಂಞ ಯೆಹೂದ್ಯ ನಂಬಿಕೇಕ್ ಬಂದ ಬಕ್ತಿಯುಳ್ಳಯಿಂಗ, ಪೌಲ ಪಿಂಞ ಬಾರ್ನಬಂಡ ಕೂಟ್‍ಕ್ ಕೂಡ್‍ಚಿ. ಈಂಗ ಅಯಿಂಗಡ ಕೂಡೆ ತಕ್ಕ್ ಪರ್ಂದಂಡ್, ದೇವಡ ಕೃಪೇಲ್ ಸ್ತಿರವಾಯಿತ್ ನಿಪ್ಪಕ್ ಅಯಿಂಗಕ್ ಆಲೋಚನೆ ಕೊಡ್‍ತತ್.

ಅಪೊಸ್ತಲ 14:20

ಪಿಂಞ, ಯೇಸುನ ನಂಬ್‍ನಯಿಂಗ ಅಂವೊಂಡ ಸುತ್ತ್‌ಲ್ ನಿಂದಂಡಿಪ್ಪಕ ಅಂವೊ, ಎದ್ದಿತ್ ಊರ್‌ರ ಒಳ್‍ಕ್ ಪೋಚಿ. ಪಿತ್ಯಾಂದ್ ಬಾರ್ನಬಂಡ ಕೂಡೆ ದೆರ್ಬೆಕ್ ಪೊರಟತ್.

ಅಪೊಸ್ತಲ 14:28

ಪಿಂಞ ಅಯಿಂಗ ಯೇಸುನ ನಂಬ್‍ನಯಿಂಗಡ ಕೂಡೆ ಅಲ್ಲಿಯೇ ದುಂಬ ಕಾಲ ಇಂಜತ್.

ಅಪೊಸ್ತಲ 15:32

ಯೂದ ಪಿಂಞ ಸೀಲ ಪ್ರವಾದಿಯಳಾಯಿತ್ ಇಂಜಗುಂಡ್, ಅಲ್ಲಿ ಇಂಜ ಯೇಸುನ ನಂಬ್‍ನಯಿಂಗಕ್ ದುಂಬ ಬೋದನೆ ಮಾಡಿತ್, ಅಯಿಂಗಳ ದೈರ್ಯಪಡ್‍ತಿತ್ ದೃಡಪಡ್‍ತ್‍ಚಿ.

ಅಪೊಸ್ತಲ 15:41

ಅಕ್ಕ ಅಯಿಂಗ ಅಲ್ಲಿಂಜ ಪೊರಟಿತ್ ಸಿರಿಯ ಕಿಲಿಕ್ಯ ಸೀಮೆಲ್ ಪ್ರಯಾಣ ಮಾಡಿತ್, ಅಲ್ಲಿ ಇಂಜ ಸಬೇನೆಲ್ಲ ದೃಡಪಡ್‍ತ್‍ಚಿ.

ಅಪೊಸ್ತಲ 18:23

ಪೌಲ ಅಂತಿಯೋಕ್ಯತ್‍ಲ್ ಚೆನ್ನ ಸಮಯ ಇಂಜಿತ್, ಅಲ್ಲಿಂಜ ಪುನಃ ಕ್ರಮವಾಯಿತ್ ಗಲಾತ್ಯ ಪಿಂಞ ಫ್ರುಗ್ಯ ಸೀಮೆಲ್ ಪ್ರಯಾಣ ಮಾಡಿತ್ ಯೇಸುನ ನಂಬ್‍ನಯಿಂಗಳ ಎಲ್ಲಾ ದೃಡಪಡ್‍ತ್‍ಚಿ.

ಅಪೊಸ್ತಲ 6:7

ದೇವಡ ವಾಕ್ಯ ಎಲ್ಲಾ ಜಾಗಕ್ ಪಬ್ಬಿಯಂಡಿಂಜತ್; ಯೇಸುನ ನಂಬ್‍ನಯಿಂಗಡ ಸಂಖ್ಯೆ ಯೆರೂಸಲೇಮ್‍ಲ್ ದುಂಬ ಆಯಂಡಿಂಜತ್; ದುಂಬ ಯಾಜಕಂಗಳು ಕ್ರಿಸ್ತಂಡ ನಂಬಿಕೇಕ್ ಬಾತ್.

ಅಪೊಸ್ತಲ 9:16

ಅಂವೊ ನಾಡ ಪೆದತ್‍ರಗುಂಡ್ ಎಚ್ಚಕ್ ಹಿಂಸೆ ಅನುಬವಿಚಿಡಂಡೂಂದ್ ನಾನ್ ಅಂವೊಂಗ್ ಕಾಟಿ ಕೊಡ್‌ಪೀಂದ್ ಎಣ್ಣ್‌ಚಿ.

ರೋಮ್ 8:17

ಇಕ್ಕ, ನಂಗ ಮಕ್ಕಾಳಾಯಿತ್ಂಜತೇಂಗಿ ಬಾದ್ಯೆತೆಕಾರಂಗಳಾಯಿತ್ ಉಂಡ್, ದೇವಡ ಹಕ್ಕ್‌ದಾರಂಗಳು, ಕ್ರಿಸ್ತಂಡ ಕೂಡೆ ಹಕ್ಕ್‌ದಾರಂಗಳಾಯಿತುಂಡ್, ಕ್ರಿಸ್ತಂಡ ಕೂಡೆ ಕಷ್ಟಪಟ್ಟತೇಂಗಿ, ಅಂವೊಂಡ ಕೂಡೆ ನಂಗಳು ಸಹ ಮಹಿಮೆನ ಪಡೆಯುವ.

1 ಕೊರಿಂಥ 1:8

ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ದಿವಸತ್‍ಲ್ ನಿಂಗ ಒರ್ ತಪ್ಪು ಇಲ್ಲತಯಿಂಗಳಾಯಿತ್ ನಿಪ್ಪಕ್ ಕಡೇಕತ್ತನೆ ಅಂವೊ ನಿಂಗಳ ಸ್ತಿರಪಡ್‍ತ್‌ವ.

ಫಿಲಿಪ್ಪಿ 1:29

ನಿಂಗಕ್, ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಬೆಪ್ಪ ಬಾಗ್ಯ ಮಾತ್ರ ಅಲ್ಲ, ಅಂವೊಂಗಾಯಿತ್ ನೊಂಬಲ ಎಡ್‍ತವಕೂ ಬಾಗ್ಯ ಕ್‍ಟ್ಟ್‌ಚಿ.

ಕೊಲೊಸ್ಸೆ 1:23

ನಿಂಗಕ್ ಕ್‍ಟ್ಟ್‌ನ ಈ ನಲ್ಲ ಸುದ್ದಿರ ನಂಬಿಕೇನ ಗಟ್ಟಿಯಾಯಿತ್ ಪುಡ್‍ಚಂಡ್, ಸ್ತಿರವಾಯಿತ್, ದೃಡವಾಯಿತ್ ನಿಂದಂಡಿಂಜತೇಂಗಿ ನಿಂಗಕ್ ಅನ್ನನೆ ಕ್‍ಟ್ಟುವ. ಈ ನಲ್ಲ ಸುದ್ದಿ, ಈ ಲೋಕತ್‍ರ ಎಲ್ಲಾ ಸೃಷ್ಟಿಕ್ ಅರಿಚಿಟ್ಟಂಡುಂಡ್, ಅದ್ಂಗಾಯಿತ್, ಪೌಲನಾನ ನಾನ್ ದೇವಡ ಸೇವಕನಾಯಿತ್ ಉಳ್ಳ.

1 ಥೆಸಲೊನೀಕ 3:13

ಇನ್ನನೆ, ನಂಗಡ ಒಡೆಯನಾನ ಯೇಸು ಕ್ರಿಸ್ತ ತಾಂಡ ಪವಿತ್ರವಾನಯಿಂಗಡ ಕೂಡೆ ಪುನಃ ಬಪ್ಪಕಾಪಕ, ದೇವಡ ಸನ್ನಿದಾನತ್‍ಲ್ ನಿಂಗೆಲ್ಲಾರು ಒರ್ ತಪ್ಪಿಲ್ಲತನೆಕೆ, ಪವಿತ್ರವಾನಯಿಂಗಳಾಯಿತ್ ಇಪ್ಪಕ್ ನಿಂಗಡ ಹೃದಯತ್‍ನ ಸ್ತಿರಪಡ್‍ತಡ್.

2 ತಿಮೊಥೆಯ 1:8

ಆನಗುಂಡ್, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ವಿಷಯತ್ ಸಾಕ್ಷಿ ಪರಿಯುವಕ್ ಪಿಂಞ ಅಂವೊನಗುಂಡ್ ಕೈದಿಯಾಯಿತುಳ್ಳ ನಾಡ ವಿಷಯತ್ ಞಾಣ ಪಡತೆ. ಅದ್ಂಗ್ ಬದ್‍ಲ್ ದೇವ ಕೊಡ್‍ಪ ಶಕ್ತಿಯಿಂಜ ದೇವಡ ನಲ್ಲ ಸುದ್ದಿಕಾಯಿತ್ ನಾಡ ಕೂಡೆ ಕಷ್ಟಪಡ್‌ವಕ್ ತಯಾರಾಯಿತಿರ್.

2 ತಿಮೊಥೆಯ 3:12

ಎನ್ನನಾಚೇಂಗಿಯು, ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಇಟ್ಟಿತ್ ದೇವಡ ಬಕ್ತಿಲ್ ಬದ್‍ಕಂಡೂಂದ್ ಆಸೆ ಪಡ್‌ವಯಿಂಗ ಹಿಂಸೆನ ಅನುಬವಿಚಿಡುವ.

1 ಪೇತ್ರ 2:21

ಇದ್ಂಗಾಯಿತೇ ದೇವ ನಿಂಗಳ ಕಾಕಿಯತ್, ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತನು ನಿಂಗಕಾಯಿತ್ ಪಾಡ್‍ಪಟ್ಟಿತ್ ನಿಂಗ ಅಂವೊಂಡ ಬಟ್ಟೇಲ್ ಬಪ್ಪಕಾಯಿತ್ ಅಂವೊನ ಒರ್ ಉದಾರಣೆಯಾಯಿತ್ ಮಾಡ್‍ಚಿ.

1 ಪೇತ್ರ 5:10

ಯೇಸು ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ನಂಗಳ ತಾಂಡ ನಿತ್ಯ ಮಹಿಮೇಕ್ ಕಾಕ್‍ನ ಕೃಪೆ ದುಂಬ್‍ನ ದೇವ, ಚೆನ್ನ ಕಾಲ ಕಷ್ಟ ಅನುಬವಿಚಿಡುವ ನಿಂಗಳ ಚಾಯಿ ಮಾಡಿತ್, ಬಲಪಡ್‍ತಿತ್, ಸ್ತಿರಪಡ್‌ತಿತ್, ನಿಪ್ಪ್‌ಚಿಡಡ್.

1 ಪೇತ್ರ 5:9

ನಂಬಿಕೇಲ್ ದೈರ್ಯವಾಯಿತ್ ಇಂಜಂಡ್, ಅಂವೊಂಗ್ ಎದ್‍ರಾಯಿತ್ ನಿಲ್ಲಿ. ಈ ಲೋಕತ್‍ಲ್ ಉಳ್ಳ ನಿಂಗಡ ಎಲ್ಲಾ ಅಣ್ಣತಮ್ಮಣಂಗ ಇದೇ ತರ ಕಷ್ಟತ್‍ಲ್ ಬದ್‍ಕಿಯಂಡ್ ಉಳ್ಳದ್ ನಿಂಗಕ್ ಗೊತ್ತುಂಡಲ್ಲ!

2 ಪೇತ್ರ 1:11

ಇನ್ನನೆ ನಂಗಡ ಒಡೆಯನು ರಕ್ಷಕನುವಾಯಿತುಳ್ಳ ಯೇಸು ಕ್ರಿಸ್ತಂಡ ನಿತ್ಯ ರಾಜ್ಯತ್‍ರ ಒಳ್‍ಕ್ ಪೋಪಕುಳ್ಳ ಪೂರ್ತಿ ಸತ್ಕಾರ ನಿಂಗಕ್ ಕ್‍ಟ್ಟುವ.

ಯೂದ ಒಳ್‍ದ್‍ನ ಕಾಗದ 1:3

ನಾಡ ಪ್ರೀತಿರ ಜನಳೇ, ನಂಗಕೆಲ್ಲಾರ್‌ಕು ಕ್‍ಟ್ಟ್‌ನ ರಕ್ಷಣೆರ ವಿಷಯತ್‍ನ ನೇರಾಯಿತ್ ಒಳ್‍ದ್‍ವಕ್ ಇಂಜ, ಆಚೇಂಗಿ ಇಕ್ಕ, ದೇವ ಅಂವೊಂಡ ಮಕ್ಕಳಾಯಿತ್ ಮಾಡ್‍ನಯಿಂಗಕ್ ಒಮ್ಮಕೆ ಒಪ್ಪ್‌ಚಿಟ್ಟ ನಂಬಿಕೆಕಾಯಿತ್ ನಿಂಗ ದೈರ್ಯತ್‍ಲ್ ಪೊರಾಡಂಡೂಂದ್ ಎಚ್ಚರ ಮಾಡಿತ್ ಒಳ್‍ದ್‍ವಕ್ ಅವಸ್ಯ ಉಂಡ್‍ೕಂದ್ ನಾಕ್ ತೋಂದ್‍ಚಿ.

ಪ್ರಕಟನೆ 1:9

ನಿಂಗಡ ಅಣ್ಣನು, ಯೇಸುಕಾಯಿತ್ ಬಪ್ಪ ಹಿಂಸೆಕು, ಅಂವೊಂಡ ರಾಜ್ಯಕು, ಅಂವೊಂಡ ಪೊರುಮೆಕು ನಿಂಗಡ ಕೂಡೆ ಪಾಲ್‍ದಾರನಾಯಿತುಳ್ಳ ಯೋಹಾನನಾನ ನಾನ್ ದೇವಡ ವಾಕ್ಯಕಾಯಿತು, ಯೇಸುರ ವಿಷಯತ್ ಸಾಕ್ಷಿಕಾಯಿತು ಪತ್ಮೊಸ್ ಎಣ್ಣುವ ದ್ವೀಪತ್‍ಲ್ ಇಂಜ.

ಪ್ರಕಟನೆ 2:10

ನೀಕ್ ಬಪ್ಪಕುಳ್ಳ ಕಷ್ಟತ್‍ರ ವಿಷಯತ್ ನೀಕ್ ಏದ್ ಪೋಡಿಯು ಬೋಂಡ; ಇದಾ, ನಿಂಗಳ ಪರೀಕ್ಷೆ ಮಾಡ್‌ವಕಾಯಿತ್ ಸೈತಾನ ನಿಂಗಡಲ್ಲಿ ಚೆನ್ನ ಜನಳ ಜೈಲ್‌ಕ್ ಇಡ್‌ವ, ಪತ್ತ್ ದಿನ ಹಿಂಸೆ ಪಡ್‌ವಿರ. ಆಚೇಂಗಿ ಚಾವಕತ್ತನೆ ನಂಬಿಕಸ್ತಂಗಳಾಯಿತಿರಿ. ಅಕ್ಕ, ಜೀವತ್‍ರ ಕಿರೀಟತ್‍ನ ನೀಕ್ ತಪ್ಪಿ.

ಪ್ರಕಟನೆ 7:14

ಅಕ್ಕ ನಾನ್: ಸ್ವಾಮೀ, ನೀಕೇ ಎಲ್ಲಾ ಗೊತ್ತುಂಡ್‍ೕಂದ್ ಎಣ್ಣಿಯೆ. ಅಕ್ಕ ಅಂವೊ: ಈಂಗ ಬಲ್ಯ ಹಿಂಸೆಯಿಂಜ ಬಂದಯಿಂಗ; ಈಂಗ ಅಯಿಂಗಡ ಬಟ್ಟೇನ ಕೊರಿಕುಟ್ಟಿರ ಚೋರೆಲ್ ನೆಲೆಚಿತ್ ಬೊಳ್‍ತದಾಯಿತ್ ಮಾಡ್‍ಚಿ.