ಅಪೊಸ್ತಲ 11:24 - ಕೊಡವ ಬೈಬಲ್

²⁴ ಬಾರ್ನಬ ದುಂಬ ನಲ್ಲಂವೊನಾಯಿತ್‌ಂಜತ್. ಅಂವೊ ಪವಿತ್ರಾತ್ಮತ್‍ಲ್ ದುಂಬ್‍ನಂವೊನು, ನಂಬಿಕೇಲ್ ದೃಡವುಳ್ಳಂವೊನಾಯಿತು ಇಂಜತ್. ಆನಗುಂಡ್ ದುಂಬ ಜನ ಒಡೆಯಂಡ ಪಕ್ಕ ಕೂಡ್‍ಚಿ.

ಅಪೊಸ್ತಲ 11:24 ပူးပေါင်းရင်းမြစ်များ

ಜ್ಞಾನತ್‌ರ ಪಡಿಮ 12:2

ನಲ್ಲ ಮನುಷ್ಯಂಗ್‌ ಯೆಹೋವಂಡ ದಯೆ ಇಪ್ಪ. ಆಚೇಂಗಿ ಕೆಟ್ಟ ಗೇನ ಉಳ್ಳಂವೊಂಗ್‌ ದಂಡನೆ ಕ್‌ಟ್ಟುವ .

ಜ್ಞಾನತ್‌ರ ಪಡಿಮ 13:22

ಒರ್‌ ನಲ್ಲ ಮನುಷ್ಯ ತಾಂಡ ಕ್‌ರ್‌ಮಕ್ಕಕ್‌ ಬಾದ್ಯತೆನ ಬೆಚ್ಚಿತ್‌ ಪೋಪ. ಆಚೇಂಗಿ ಪಾಪಿಯಡ ಐಶ್ವರ್ಯ ನೀತಿವಂತಯಿಂಗಕಾಯಿತ್‌ ಕೂಟಿಬೆಚ್ಚನೆಕೆ ಆಪ.

ಜ್ಞಾನತ್‌ರ ಪಡಿಮ 14:14

ನಂಬಿಕೆಯಿಂಜ ದೂರ ಪೋನ ಮನುಷ್ಯ ಅಂವೊ ಮಾಡ್‌ನ ಕಾರ್ಯಕ್‌ ತಕ್ಕಂತ ದಂಡನೆನ ಅನುಬವಿಚಿಡುವ. ಒರ್‌ ನಲ್ಲ ಮನುಷ್ಯ ಅಂವೊ ಮಾಡ್‌ನ ನಲ್ಲ ಕಾರ್ಯಕ್‌ ತಕ್ಕಂತ ಪ್ರತಿಫಲತ್‌ಲ್‌ ತೃಪ್ತಿಯಾಪ.

ಮತ್ತಾಯ 12:35

ಒರ್ ನಲ್ಲ ಮನುಷ್ಯ ತಾಂಡ ನಲ್ಲ ಹೃದಯತ್‍ಲ್ ಕೂಟಿ ಬೆಚ್ಚಿತುಳ್ಳ ಬಂಡಾರತ್‍ಂಜ, ನಲ್ಲ ವಿಷಯತ್‍ನ ಎಡ್‌ತ್‌ ಕಾಟ್‍ವ, ಕೆಟ್ಟ ಮನುಷ್ಯ ಅಂವೊಂಡ ಕೆಟ್ಟ ಹೃದಯತ್‍ಲ್ ಕೂಟಿ ಬೆಚ್ಚಿತುಳ್ಳ ಬಂಡಾರತ್‍ಂಜ ಕೆಟ್ಟದ್‍ನ ಪರಿವ.

ಮತ್ತಾಯ 19:17

ಅದ್ಂಗ್ ಯೇಸು: ನಲ್ಲದ್ ಎಂತದ್‍ೕಂದ್ ನನ್ನ ಎನ್ನಂಗ್ ಕ್‍ೕಪಿಯ? ದೇವ ಒಬ್ಬನೇ ನಲ್ಲಂವೊ. ಆಚೇಂಗಿ, ನೀಕ್ ನಿತ್ಯ ಜೀವ ಕ್‍ಟ್ಟ್‌ವಕ್ ನೀನ್ ಒಂದ್ ಮಾಡಂಡು. ನ್ಯಾಯಪ್ರಮಾಣ ಎಣ್ಣ್‌ನನೆಕೆ ಮಾಡಂಡೂಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 23:50

ದೇವಡ ರಾಜ್ಯ ಬಪ್ಪಕ್ ಪಾರಕಾತಂಡ್ ಇಂಜ ಯೆಹೂದ್ಯತ್‍ರ ಅರಿಮಥಾಯ ಊರ್‍ಂಜ ಬಂದ ಯೋಸೇಫ ಎಣ್ಣ್‌ವಂವೊ ಇಂಜತ್. ಅಂವೊ ನಲ್ಲಂವೊನು ನೀತಿವಂತಂವೊನು ಆಯಿತ್ಂಜತ್. ಅಂವೊ ಅಲ್ಲಿಯತ್‍ರ ಯೆಹೂದ್ಯ ಕಾನೂನ್‌ರ ಸಬೆರ ಒರ್ ಮರ್ಯಾದೆ ಉಳ್ಳ ಮನುಷ್ಯನಾಯಿತ್ಂಜತ್.

ಯೋಹಾನ 7:12

ಯೇಸುರ ವಿಷಯತ್‍ಲ್ ಜನಾಂಗ ಗೊಣಗಿಯಂಡ್ ಇಂಜತ್. ಚೆನ್ನ ಜನ: ಅಂವೊ ನಲ್ಲಂವೋಂದ್ ಎಣ್ಣ್‌ಚಿ; ಚೆನ್ನ ಜನ: ಅನ್ನನೆ ಅಲ್ಲ, ಅಂವೊ ಜನಳ ಮೋಸಮಾಡಿಯಂಡುಂಡ್‍ೕಂದ್ ಎಣ್ಣಿಯಂಡಿಂಜತ್.

ಅಪೊಸ್ತಲ 11:21

ದೇವಡ ಶಕ್ತಿ ಅಯಿಂಗಡ ಕೂಡೆ ಇಂಜತ್. ಬಲ್ಯ ಜನಡ ಗುಂಪ್ ನಂಬಿತ್, ಒಡೆಯಂಡ ಪಕ್ಕ ತಿರ್‍ಗ್‍ಚಿ.

ಅಪೊಸ್ತಲ 2:4

ಅಕ್ಕ ಅಯಿಂಗೆಲ್ಲಾರು ಪವಿತ್ರಾತ್ಮತ್‍ಲ್ ದುಂಬಿತ್ ಆ ಆತ್ಮ ಒಬ್ಬೊಬ್ಬಂಗ್ ಶಕ್ತಿ ಕೊಡ್‍ತನೆಕೆ ಅಯಿಂಗಕ್ ಗೊತ್ತಿಲ್ಲತ ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿಯುವಕ್ ಸುರು ಮಾಡ್‍ಚಿ.

ಅಪೊಸ್ತಲ 2:47

ದೇವನ ತುದಿಚಂಡ್, ಜನಡ ದಯೇನ ಪಡ್ಂದಯಿಂಗಳಾಯಿತ್‌ಂಜತ್. ರಕ್ಷಣೆ ಪಡ್ಂದಯಿಂಗಳ ದೇವ ದಿನಾಲು ಅಯಿಂಗಡ ಕೂಟ್‍ಕ್ ಕೂಟಿಯಂಡಿಂಜತ್.

ಅಪೊಸ್ತಲ 24:16

ಇದ್‍ನಗುಂಡ್, ದೇವಡ ವಿಷಯತ್‍ಲು ಮನುಷ್ಯಂಗಡ ವಿಷಯತ್‍ಲು ನಾನ್ ಕುತ್ತ ಇಲ್ಲತ ಮನಸಾಕ್ಷಿಲ್ ಇಪ್ಪಕ್ ಪ್ರಯತ್ನಪಟ್ಟಂಡುಳ್ಳ.

ಅಪೊಸ್ತಲ 5:14

ಆಚೇಂಗಿಯು ಇಂಞು ದುಂಬ ಆಣಾಳು ಪೊಣ್ಣಾಳು ಒಡೆಯನ ನಂಬಿತ್ ಅಯಿಂಗಡ ಕೂಟ್‍ಕ್ ಕೂಡಿಯಂಡೇ ಇಂಜತ್.

ಅಪೊಸ್ತಲ 6:3

ಆನಗುಂಡ್, ಅಣ್ಣತಮ್ಮಣಂಗಳೇ, ಇಕ್ಕ ನಿಂಗಡಲ್ಲಿ ಪವಿತ್ರಾತ್ಮತ್‍ಲ್ ಪಿಂಞ ಜ್ಞಾನತ್‍ಲ್ ದುಂಬ್‍ನ ನಲ್ಲರಿಕೆ ಪಡ್ಂದಿತುಳ್ಳ ಏಳ್ ಜನಳ ನಿಂಗ ಆಯ್ಕೆ ಮಾಡಿಯೊಳಿ, ಅಯಿಂಗಳ ಈ ಸೇವೆಕಾಯಿತ್ ನೇಮಿಚಿಡನ.

ಅಪೊಸ್ತಲ 6:5

ಸಬೇಲ್ ಇಂಜಯಿಂಗಕೆಲ್ಲಾ ಈ ಆಲೋಚನೆ ಕುಶಿಯಾಚಿ. ಅಕ್ಕ ಅಯಿಂಗ, ಪವಿತ್ರಾತ್ಮತ್‍ಲ್ ಪಿಂಞ ನಂಬಿಕೇಲ್ ದುಂಬ್‌ನಯಿಂಗಳಾನ ಸ್ತೆಫನ, ಪಿಂಞ ಫಿಲಿಪ್ಪ, ಪ್ರೊಖೋರ, ನಿಕನೋರ, ತಿಮೋನ, ಪರ್ಮೇನ ಪಿಂಞ ಯೆಹೂದ್ಯಂಗಡ ನಂಬಿಕೇಕ್ ಕೂಡ್‍ನ ಅಂತಿಯೋಕ್ಯ ಪಟ್ಟಣತ್‍ರ ನಿಕೊಲಾಯ ಎಣ್ಣ್‌ವಯಿಂಗಳ ಗೊತ್ತ್ ಮಾಡಿತ್ ಅಪೊಸ್ತಲಂಗಡ ಮಿಂಞತ್ ನಿಪ್ಪ್‌ಚಿಟ್ಟತ್.

ಅಪೊಸ್ತಲ 6:8

ಇಕ್ಕ, ಸ್ತೆಫನ ದೇವಡ ಕೃಪೆಯು ಶಕ್ತಿಯು ದುಂಬ್‍ನಂವೊನಾಯಿತ್, ಜನಡ ಮದ್ಯತ್‍ಲ್ ಬಲ್ಯ ಬಲ್ಯ ಗುರ್‍ತ್‍ನ ಪಿಂಞ ಆಶ್ಚರ್ಯ ಕಾರ್ಯತ್‍ನ ಮಾಡಿಯಂಡಿಂಜತ್.

ಅಪೊಸ್ತಲ 9:31

ಇನ್ನನೆ ಇಪ್ಪಕ ಯೂದಾಯ ಗಲಿಲಾಯ ಸಮಾರ್ಯ ಪ್ರಾಂತ್ಯತ್‍ಲ್ ಉಳ್ಳ ಸೆಬೇಕೆಲ್ಲ ಸಮಾದಾನ ಕ್‍ಟ್ಟ್‌ಚಿ; ಅನ್ನನೆ ಅಯಿಂಗ ಒಡೆಯಂಡ ಬಕ್ತಿಲ್ ಪಿಂಞ ಪವಿತ್ರಾತ್ಮ ತಪ್ಪ ಪುರಡ್‍ಲ್ ಬದ್‍ಕಿಯಂಡ್, ಬೊಳ್ಂದಂಡ್ ಬಲಪಟ್ಟಂಡ್ ಇಂಜತ್.

ರೋಮ್ 15:15

ಆಚೇಂಗಿಯು, ನಾಡ ಅಣ್ಣತಮ್ಮಣಂಗಳೇ, ದೇವ ನಾಕ್ ಕೊಡ್‍ತಿತುಳ್ಳ ಕೃಪೇರಗುಂಡ್, ಇದ್‍ನೆಲ್ಲ ನಿಂಗಡ ನೆನಪ್‌ಕ್ ಕೊಂಡ್ ಬಪ್ಪನೆಕೆ ದುಂಬ ದೈರ್ಯವಾಯಿತ್ ನಿಂಗಕ್ ಒಳ್‍ದಿಯೆ.

ರೋಮ್ 5:7

ನೀತಿವಂತಂವೊನಾನ ಒರ್ ಮನುಷ್ಯಂಗಾಯಿತ್ ಒಬ್ಬ ಚಾವದೇ ಕಷ್ಟ ಕಾರ್ಯ, ಒರ್ ನಲ್ಲ ಮನುಷ್ಯಂಗಾಯಿತ್ ಒಮ್ಮೊಮ ದಾರಾಚು ಚಾವಕ್ ಸಹ ದೈರ್ಯ ಎಡ್‍ತವ.