2 ಥೆಸಲೊನೀಕ 2:2 - ಕೊಡವ ಬೈಬಲ್

² ಒರ್ ಆತ್ಮತ್ಂಜ ಬಂದದ್‍ೕಂದ್ ಎಣ್ಣುವ ಪ್ರವಾದನೆಯಾಡ್, ನಂಗ ಎಣ್ಣ್‌ನದಾಯಿತ್ ಬಪ್ಪ ಸುದ್ದಿಯಾಡ್, ನಂಗಡಿಂಜ ಬಂದದ್‍ೕಂದ್ ಎಣ್ಣ್‌ವ ಕಾಗದವಾಡ್, ಕ್ರಿಸ್ತಂಡ ದಿವಸ ಬಂದ್‍ರ್‌ತ್‍ೕಂದ್ ಎಣ್ಣ್‌ಚೇಂಗಿ, ನಿಂಗ ಅದ್ಂಡ ವಿಷಯತ್ ಒಡನೆ ಬೇಜಾರ್ ಮಾಡಿಯಂಡ್ ವ್ಯಸನ ಪಟ್ಟಂಡ್ ಇಪ್ಪಕ್ಕಾಗ.

2 ಥೆಸಲೊನೀಕ 2:2 ပူးပေါင်းရင်းမြစ်များ

ಮತ್ತಾಯ 24:24

ಎನ್ನಂಗೆಣ್ಣ್‌ಚೇಂಗಿ, ಕಳ್ಳ ಕ್ರಿಸ್ತಂಗ ಪಿಂಞ ಕಳ್ಳ ಪ್ರವಾದಿಯಂಗ ಬಂದಿತ್, ಕಯ್ಯುವೇಂಗಿ ದೇವ ಗೊತ್ತ್ ಮಾಡಿತುಳ್ಳಯಿಂಗಡ ನಂಬಿಕೇನ ಕೆಡ್‍ತ್‌ವಕ್ ವಂಚನೆ ಮಾಡ್‌ವನೆಕೆ ಗುರ್‌ತ್ ಕಾಟಿತ್ ಆಶ್ಚರ್ಯ ಕಾರ್ಯತ್‍ನ ಮಾಡ್‌ವ.

ಮಾರ್ಕ 13:7

ಯುದ್ದತ್‍ನ ಪಿಂಞ ಯುದ್ದತ್‍ರ ಸುದ್ದಿನ ಕ್‍ೕಪಕ ಗಾಬರಿ ಆಕತಿ. ಎಲ್ಲಾ ನಡ್‌ಕಂಡು, ಆಚೇಂಗಿಯು ಅದ್ ಅಂತ್ಯ ಕಾಲವಾಯಿತ್‌ಪ್ಪುಲೆ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 21:19

ಆಚೇಂಗಿ, ನಿಂಗ ಸ್ತಿರವಾಯಿತ್ ನಿಪ್ಪಕ, ನಿಂಗಡ ಆತ್ಮತ್‌ನ ಕಾಪಾಡ್‍ವಿರ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 21:9

ಯುದ್ದತ್‍ರ ಪಿಂಞ ಕಲಹತ್‍ರ ಸುದ್ದಿನೆಲ್ಲ ಕ್‍ೕಪಂಜಿ ಬೊತ್ತತಿ, ಇದೆಲ್ಲ ಮಿಂಞಲೇ ಆಕಂಡು; ಆಚೇಂಗಿಯು ಅದ್ ಅಂತ್ಯ ಕಾಲವಾಯಿತ್‌ಪ್ಪುಲೆ.

ಯೋಹಾನ 14:1

ನಿಂಗಡ ಹೃದಯ ಸಂಕಟ ಪಡತೆ ಇರಡ್; ದೇವನ ನಂಬಿ, ನನ್ನ ಸಹ ನಂಬಿ.

ಯೋಹಾನ 14:27

ಸಮಾದಾನತ್‍ನ ನಿಂಗಕ್ ಬುಟ್ಟಿತ್ ಪೋಪಿ, ನಾಡ ಸಮಾದಾನತ್‍ನೇ ನಿಂಗಕ್ ತಪ್ಪಿ; ಈ ಲೋಕ ತಪ್ಪ ಪ್ರಕಾರ ನಾನ್ ನಿಂಗಕ್ ತಪ್ಪುಲೆ. ನಿಂಗಡ ಹೃದಯ ಬೇಜಾರ್ ಪಡತೆ, ಗಾಬರಿ ಆಕತೆ ಇರಡ್.

1 ಕೊರಿಂಥ 1:8

ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ದಿವಸತ್‍ಲ್ ನಿಂಗ ಒರ್ ತಪ್ಪು ಇಲ್ಲತಯಿಂಗಳಾಯಿತ್ ನಿಪ್ಪಕ್ ಕಡೇಕತ್ತನೆ ಅಂವೊ ನಿಂಗಳ ಸ್ತಿರಪಡ್‍ತ್‌ವ.

1 ಕೊರಿಂಥ 14:32

ಪ್ರವಾದನೆ ಎಣ್ಣ್‌ವಯಿಂಗಡ ಆತ್ಮ ಅಯಿಂಗಡ ಅದಿಕಾರತ್‍ಲ್ ಇಪ್ಪ ಅಲ್ಲಾ?

1 ಕೊರಿಂಥ 7:26

ಅದ್ ಎಂತ ಎಣ್ಣ್‌ಚೇಂಗಿ, ಇಕ್ಕತ್‍ರ ಕಾಲತ್‍ಲ್ ಆಪ ಕಷ್ಟತ್‍ನ ನೋಟ್‍ಚೇಂಗಿ, ಒರ್ ಮನುಷ್ಯ ಮಂಗಲ ಆಕತೆ ಅನ್ನನೆ ಇಪ್ಪದ್ ನಲ್ಲದ್‍ೕಂದ್ ನಾನ್ ಗೇನ ಮಾಡ್‌ವಿ.

ಎಫೆಸ 5:6

ದಾರೂ ನಿಂಗಳ ಪ್ರಯೋಜನ ಇಲ್ಲತ ತಕ್ಕ್‌ರ ಮೂಲಕ ವಂಚನೆ ಮಾಡ್‌ವಕ್ ಬುಡತಿ. ಇಂತ ಪಾಪಕಾಯಿತೇ ದೇವಡ ಬಲ್ಯ ಚೆಡಿ, ಅಂವೊಂಗ್ ತಗ್ಗಿತ್ ನಡ್‌ಕತಯಿಂಗಡ ಮೇಲೆ ಬಪ್ಪ.

1 ಥೆಸಲೊನೀಕ 3:3

ಅಕ್ಕ, ದಾರೂ ನಿಂಗಳ ನಿಂಗಡ ನಂಬಿಕೆಯಿಂಜ ಬಲಿಪಕ್ ಕಯ್ಯುಲೆ. ನಂಗ ಯೇಸುರ ಬಯ್ಯಕ್ ಬಪ್ಪಕ, ಜನ ನಂಗಳ ಹಿಂಸೆ ಮಾಡ್‌ವಾಂದ್ ಉಳ್ಳದ್ ದೇವಡ ಚಿತ್ತಾಂದ್ ನಿಂಗಕ್ ಗೊತ್ತುಂಡಲ್ಲ.

1 ಥೆಸಲೊನೀಕ 4:15

ಒಡೆಯ ನಂಗಕ್ ಪಡಿಪಿಚಿಟ್ಟನೆಕೆ ನಂಗ ನಿಂಗಕ್ ಎಣ್ಣಿಯಂಡುಂಡ್: ಯೇಸು ಬಪ್ಪಕತ್ತನೆ ಬದ್‍ಕಿಯಂಡ್ ಉಳ್ಳ ನಂಗ, ಯೇಸುನ ನಂಬಿತ್ ದೇವಡ ಮಕ್ಕಳಾಯಿತ್ ಚತ್ತ್ ಪೋನಯಿಂಗ, ಅಂವೊ ಬಪ್ಪಕ, ಅಂವೊಂಡ ಕೂಡೆ ಪೋಪಕ್ ಮಿಂಞ ನಂಗ ಅಂವೊಂಡ ಪಕ್ಕ ಪೋಪುಲೆ.

1 ಥೆಸಲೊನೀಕ 5:2

ನಿಂಗಕ್ ಚಾಯಿ ಗೊತ್ತುಳ್ಳನೆಕೆ, ಬಯಿಟ್ ದಾರ್‌ಕು ಗೊತ್ತಿಲ್ಲತ ಸಮಯತ್‍ಲ್ ಕಳ್ಳ ಬಪ್ಪನೆಕೆ ಒಡೆಯಂಡ ದಿವಸ ಬಪ್ಪ.

2 ಥೆಸಲೊನೀಕ 2:15

ಆನಗುಂಡ್ ನಾಡ ಅಣ್ಣತಮ್ಮಣಂಗಳೇ, ನಿಂಗ ಸ್ತಿರವಾಯಿತ್ ನಿಂದಂಡ್, ನಂಗ ನಿಂಗಡ ಕೂಡೆ ಇಪ್ಪಕ ಮಾಡ್‍ನ ಬೋದನೆನ ಮಾತ್ರ ಅಲ್ಲ ನಂಗ ನಿಂಗಕ್ ಒಳ್‍ದ್‍ನ ಕಾಗದತ್‍ರ ಮೂಲಕ ಕ್‍ಟ್ಟ್‌ನ ಬೋದನೆನ ಸಹ ಗಟ್ಟಿಯಾಯಿತ್ ಪುಡ್‍ಚೊಳಿ.

2 ಥೆಸಲೊನೀಕ 3:17

ಪೌಲನಾನ ನಾನ್ ನಾಡ ಸ್ವಂತ ಕೈಯಿಲ್ ಒಳ್‍ದಿತ್ ನಿಂಗಕ್ ವಂದನೆ ಮಾಡ್‌ವಿ. ನಾನ್ ಒಳ್‍ದ್‍ವ ಕಾಗದಕೆಲ್ಲ ಅದ್ ಒರ್ ಗುರ್‌ತಾಯಿತ್‌ಪ್ಪ. ನಾನ್ ಇನ್ನನೆ ಎಕ್ಕಾಲು ಒಳ್‍ದಿಯಂಡುಳ್ಳ.

ಪ್ರಕಟನೆ 19:20

ಅಕ್ಕ ಆ ಮೃಗತ್‍ನ ಪುಡ್‍ಚತ್; ಅದ್ಂಡ ಮಿಂಞತ್‍ಲ್ ಮಾಡ್‍ನ ಅದ್ಬುತ ಕಾರ್ಯತ್‍ನಗುಂಡ್, ಅದ್ಂಡ ಮುದ್ರೆನ ಇಟ್ಟಯಿಂಗಳ, ಅದ್ಂಡ ವಿಗ್ರಹತ್‍ನ ಆರಾದನೆ ಮಾಡ್‍ನಯಿಂಗಳ ಪಿಂಞ ಮೋಸ ಮಾಡ್‍ನ ಕಳ್ಳ ಪ್ರವಾದಿನ ಸಹ ಪುಡ್‌ಚಿರ್‌ತ್. ಜೀವತ್‍ಲ್ ಇಪ್ಪಕಲೆ ಈ ದಂಡಾಳ್‌ನ ಗಂಧಕ ಕತ್ತಿಯಂಡುಳ್ಳ ತಿತ್ತ್‌ರ ಕಡಲ್‍ಲ್ ಇಟ್ಟತ್.