2 ಕೊರಿಂಥ 12:19 - ಕೊಡವ ಬೈಬಲ್

¹⁹ ನಂಗ ಯೋಗ್ಯವಾನಯಿಂಗಾಂದ್ ಕಾಂಬ್‍ಚಿಡುವಕಾಯಿತ್ ಇನ್ನನೆ ತಕ್ಕ್ ಪರ್ಂದಂಡುಳ್ಳ್ಂದ್ ಗೇನಮಾಡಿಯಡುಳ್ಳಿರಾ? ದೇವಡ ಮಿಂಞತ್ ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ತಕ್ಕ್ ಪರ್ಂದಂಡುಳ್ಳ. ನಾಡ ಪ್ರೀತಿರ ಜನಳೇ, ನಿಂಗ ಬಕ್ತಿಲ್ ಬೊಳಿಯುವಕಾಯಿತೇ ಇದ್‍ನೆಲ್ಲಾ ಮಾಡಿಯಂಡುಳ್ಳ.

2 ಕೊರಿಂಥ 12:19 ပူးပေါင်းရင်းမြစ်များ

ರೋಮ್ 12:19

ನಾಡ ಪ್ರೀತಿರ ಜನಳೇ, ಪಗೆ ತ್‍ೕಪದ್ ನಾಡ ಕೆಲಸ, ನಾನೇ ಪಗೆ ತ್‍ೕಪೀಂದ್ ಒಡೆಯ ಎಣ್ಣಿತುಂಡ್‍ೕಂದ್ ಒಳ್‍ದಿತುಳ್ಳಾಂಗ್, ನಿಂಗ ದಾರ್‌ಕು ಪಗೇನ ತ್‍ೕಕತೆ, ದೇವಡ ಬಲ್ಯ ಚೆಡಿಕ್ ಬುಟ್ಟ್ ಕೊಡಿ.

ರೋಮ್ 14:19

ಆನಗುಂಡ್, ಸಮಾದಾನ ತಪ್ಪ ವಿಷಯತ್‍ನ ಪಿಂಞ, ಒಬ್ಬೊಬ್ಬನು ಆತ್ಮೀಯ ವಿಷಯತ್‍ಲ್ ಬೊಳ್‍ತ್‍ವಕ್ ಸಹಾಯ ಮಾಡ್‌ವ ವಿಷಯತ್‍ನ ಮಾಡ್‌ವಕ್ ಪ್ರಯತ್ನ ಪಡಂಡು.

ರೋಮ್ 15:2

ನಂಗ ಒಬ್ಬೊಬ್ಬನು ಬೋರೆಯಿಂಗಡ ಕುಶಿಕಾಯಿತ್ ಅಯಿಂಗ ಬಕ್ತಿಲ್ ಬೊಳಿಯುವನೆಕೆ ನಡ್‌ಕಂಡು.

ರೋಮ್ 9:1

ನಾನ್ ಕ್ರಿಸ್ತಂಡಲ್ಲಿ ಸತ್ಯ ಎಣ್ಣಿಯಂಡುಂಡ್. ನಾನ್ ಪೊಟ್ಟ್‌ಪರ್ಂದಂಡಿಲ್ಲೆ.

1 ಕೊರಿಂಥ 10:14

ಆನಗುಂಡ್ ನಾಡ ಪ್ರೀತಿರ ಜನಳೇ, ವಿಗ್ರಹ ಆರಾದನೆ ಮಾಡ್‌ವದ್‍ನ ಬುಟ್ಟಿತ್ ಓಡಂಡು.

1 ಕೊರಿಂಥ 10:33

ನಿಂಗಳು ಯೆಹೂದ್ಯಂಗಕು, ಯೆಹೂದ್ಯರಲ್ಲತಯಿಂಗಕು ಪಿಂಞ ದೇವಡ ಸಬೇಲ್ ಉಳ್ಳಯಿಂಗ ಎಲ್ಲಾರು ರಕ್ಷಣೆ ಆಪಕ್ ತಡೆ ಮಾಡತಯಿಂಗಳಾಯಿತ್ ಇರಿ.

1 ಕೊರಿಂಥ 14:26

ನಾಡ ಅಣ್ಣತಮ್ಮಣಂಗಳೇ, ನಿಂಗ ಒಕ್ಕಚೆ ಕೂಡಿ ಬಪ್ಪಕ ಏದ್ ರೀತಿಲ್ ಆರಾದನೆ ಮಾಡಿಯಂಡುಳ್ಳಿರಾ? ಒಬ್ಬ ಪಾಟ್ ಪಾಡಿಯಂಡುಂಡ್, ಒಬ್ಬ ಬೋದನೆ ಮಾಡಿಯಂಡುಂಡ್, ಬೋರೆ ಒಬ್ಬ ದೇವಡ ಗುಟ್ಟ್‌ನ ಎಣ್ಣಿಯಂಡುಂಡ್, ಒಬ್ಬ ಬೋರೆ ಬೋರೆ ಬಾಷೆಲ್ ತಕ್ಕ್ ಪರ್ಂದಂಡುಂಡ್, ಬೋರೆ ಒಬ್ಬ ಅದ್‍ನ ಅರ್ಥ ಮಾಡಿ ಕೊಡ್‍ತಂಡುಂಡ್. ಇದೆಲ್ಲಾ ಎಂತ? ಸಬೆ ಬಕ್ತಿಲ್ ಬೊಳಿವಕಾಯಿತ್ ಇದ್‍ನೆಲ್ಲಾ ಮಾಡಂಡು.

2 ಕೊರಿಂಥ 10:8

ಒಡೆಯ ನಂಗಕ್ ಕೊಡ್‍ತಿತುಳ್ಳ ಅದಿಕಾರತ್‍ರ ವಿಷಯತ್, ನಾನ್ ಇಂಞು ದುಂಬ ಹೊಗಳಿಚಿಟ್ಟತೇಂಗಿಯು ನಾಕ್ ಞಾಣ ಆಪುಲೆ. ನಿಂಗಳ ಪಾಳ್ ಮಾಡ್‌ವಕಾಯಿತಲ್ಲ, ನಿಂಗಳ ಚಾಯಿ ಬೊಳ್‌ತಿತ್ ಕೆಟ್ಟುವಕಾಯಿತ್ ಈ ಅದಿಕಾರತ್‍ನ ನಂಗಕ್ ಕೊಡ್‍ತತ್.

2 ಕೊರಿಂಥ 11:10

ಕ್ರಿಸ್ತಂಡ ಸತ್ಯ ನನ್ನಲ್ಲಿ ಇಪ್ಪಗುಂಡ್ ಅಖಾಯ ನಾಡ್‍ರ ಪ್ರಾಂತ್ಯತ್‍ಲ್ ನಾಡ ವಿಷಯತ್‍ರ ಈ ಹೊಗಳಿಕೆನ ನಿಪ್ಪ್‌ಚಿಡುವಕ್ ಕಯ್ಯುಲೇಂದ್ ಎಣ್ಣ್‌ವಿ.

2 ಕೊರಿಂಥ 11:31

ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ದೇವನಾಯಿತು ಅಪ್ಪನಾಯಿತು ಎಕ್ಕಾಲು ತುದಿನ ಪಡ್ಂದಂವೊನಾಯಿತ್ ಉಳ್ಳ ಅಂವೊಂಗ್ ನಾನ್ ಪೊಟ್ಟ್ ಪರ್ಂದಂಡಿಲ್ಲೇಂದ್ ಗೊತ್ತುಂಡ್.

2 ಕೊರಿಂಥ 12:15

ಆನಗುಂಡ್, ನಾನ್ ನಿಂಗಡಲ್ಲಿ ಎಚ್ಚಕ್ ಜಾಸ್ತಿಯಾಯಿತ್ ಪ್ರೀತಿ ಮಾಡಿಯಂಡ್ ಉಂಡೋ, ಅಚ್ಚಕ್ ಕಮ್ಮಿಯಾಯಿತ್ ನಿಂಗ ನನ್ನ ಪ್ರೀತಿ ಮಾಡ್‍ಚೇಂಗಿಯು, ನಿಂಗಕಾಯಿತ್ ನಾಡ ಪಕ್ಕ ಉಳ್ಳದ್‍ನ ಕೊಡ್‌ಪಕು, ನನ್ನ ಸಹ ಕೊಡ್‌ಪಕು ದುಂಬ ಕುಶಿ ಪಡುವಿ.

2 ಕೊರಿಂಥ 13:10

ಆನಗುಂಡ್ ನಿಂಗಡ ಕೂಡೆ ಇಲ್ಲತಿಪ್ಪಕಲೇ ಇದ್‍ನೆಲ್ಲಾ ಒಳ್‍ದಿಯೆ; ನಿಂಗಳ ಪೊಳಿಪಕಾಯಿತ್ ಅಲ್ಲ, ಕೆ‍ಟ್ಟ್‌ವಕಾಯಿತೇ ಒಡೆಯ ನಾಕ್ ತಂದಿತುಳ್ಳ ಅದಿಕಾರತ್‍ರನೆಕೆ, ನಾನ್ ನಿಂಗಡ ಪಕ್ಕ ಬಪ್ಪಕ, ಕಠಿಣವಾಯಿತ್ ಇಪ್ಪದ್ ಬೋಂಡಾಂದ್ ಕುಶಿ ಪಡುವಿ.

2 ಕೊರಿಂಥ 2:17

ದುಂಬ ಜನತ್‍ರನೆಕೆ, ನಂಗಕ್ ಲಾಬ ಕ್‍ಟ್ಟ್‌ವಕಾಯಿತ್ ದೇವಡ ವಾಕ್ಯತ್‍ನ ಕಲಪ್‍ಲ್ ಬೋದನೆ ಮಾಡತೆ, ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್, ನಂಬಿಕಸ್ತಂಗಳಾಯಿತ್, ದೇವ ಅಯಿಚಯಿಂಗಳಾಯಿತ್, ದೇವಡ ಮಿಂಞತ್‍ಲ್ ತಕ್ಕ್ ಪರ್ಂದಂಡುಂಡ್.

2 ಕೊರಿಂಥ 3:1

ನಂಗ ನಂಗಳ ಹೊಗಳ್‍ಚಿಡ್‍ವಕ್ ಪುನಃ ಸುರ್ ಮಾಡ್‍ಚಾ? ಅಥವ, ಚೆನ್ನ ಜನಕ್ ಬೋಂಡುವನೆಕೆ, ನಂಗಡಿಂಜ ನಿಂಗಕು, ನಿಂಗಡಿಂಜ ನಂಗಕು ಸಿಪಾರ್‍ಸ್ ಕಾಗದ ಎನ್ನಂಗ್ ಬೋಂಡು?

2 ಕೊರಿಂಥ 7:1

ಪ್ರೀತಿರ ಜನಳೇ, ಇನ್ನತಾನ ವಾಗ್ದಾನವೆಲ್ಲ ನಂಗಕ್ ಉಳ್ಳಗುಂಡ್, ತಡಿ ಪಿಂಞ ಆತ್ಮತ್‌ನ ಅಶುದ್ದ ಮಾಡ್‌ವ ಎಲ್ಲಾನ ಕಳೆಂದಿತ್ ಶುದ್ದಮಾಡಿಯಂಡ್, ಪವಿತ್ರವಾಪದ್‍ಲ್, ದೇವಡ ಮೇಲೆ ಉಳ್ಳ ಪೋಡಿಲ್ ಪೂರ್ತಿಯಾಯಿತ್ ಬೊಳಿಯನ.

ಫಿಲಿಪ್ಪಿ 4:1

ಇದ್ಂಗಾಯಿತ್ ನಾಡ ಅಣ್ಣತಮ್ಮಣಂಗಳೇ, ನಾನ್ ನಿಂಗಕ್ ಇಲ್ಲಿಕತ್ತನೆ ಎಣ್ಣ್‌ನದ್‍ನ ಗೇನ ಮಾಡಿಯಂಡ್ ಒಡೆಯಂಡ ವಿಷಯತ್‍ಲ್ ಸ್ತಿರವಾಯಿತ್ ಇರಿ. ನಾನ್ ನಿಂಗಳ ಎಚ್ಚಕ್ ಪ್ರೀತಿ ಮಾಡ್‌ವಿ, ನಿಂಗಳ ಕಾಂಗಂಡೂಂದ್ ನಾಕ್ ದುಂಬ ಆಸೆ ಉಂಡ್. ನಿಂಗಳೇ ನಾಡ ಕುಶಿ, ನಿಂಗಳೇ ನಾಡ ಕಷ್ಟಕೆಲ್ಲ ಕ್‍ಟ್ಟ್‌ನ ಕಿರೀಟ.

1 ಥೆಸಲೊನೀಕ 5:11

ಅದ್ಂಗಾಯಿತ್, ನಿಂಗ ಇಕ್ಕ ಮಾಡಿಯಂಡಿಪ್ಪನೆಕೆ, ಒಬ್ಬೊಬ್ಬಂಗ್ ಒತ್ತಾಸೆ ಕೊಡಿ. ನಿಂಗ ಅನ್ನನೆ ಮಾಡಿತ್ ಒಬ್ಬೊಬ್ಬಂಗಳ ಬೊಳಿಯುವಕ್ ಸಹಾಯ ಮಾಡಿ.

ಇಬ್ರಿಯ 6:9

ಪ್ರೀತಿರ ಜನಳೇ, ನಂಗ ಇನ್ನನೆ ಎಣ್ಣ್‌ಚೇಂಗಿಯು, ನಿಂಗಡ ಪಕ್ಕ ನಲ್ಲದ್ ಪಿಂಞ ರಕ್ಷಣೆರ ವಿಷಯ ಉಂಡ್‍ೕಂದ್ ನಂಗ ನಂಬಿಯಂಡುಂಡ್.