2 ಕೊರಿಂಥ 11:13 - ಕೊಡವ ಬೈಬಲ್

¹³ ಅನ್ನನೆ ಉಳ್ಳಯಿಂಗ ಕಳ್ಳ ಅಪೊಸ್ತಲಂಗ, ಕಪಟಿಯಾನ ಸೇವಕಂಗ, ಕ್ರಿಸ್ತಂಡ ಅಪೊಸ್ತಲಂಗಡ ವೇಷತ್‍ನ ಇಟ್ಟಂಡುಂಡ್.

2 ಕೊರಿಂಥ 11:13 ပူးပေါင်းရင်းမြစ်များ

ಮತ್ತಾಯ 25:24

ಒರ್ ಬಾಗ ಕ್‍ಟ್ಟ್‌ನಂವೊ ಮಿಂಞ ಬಂದಿತ್: ಸ್ವಾಮೀ, ನೀನ್ ಬಿತ್ತ್ ಇಡತ ಜಾಗತ್‍ಲ್ ಕೊಯ್ಯುವಂವೊನು, ಬಿತ್ತ್ ಚದ್‍ರತ ಜಾಗತ್‍ಲ್ ಕೂಟ್‌ವ ಕಠಿಣ ಮನುಷ್ಯಾಂದ್ ನಾಕ್ ಗೊತ್ತುಂಡ್.

ಅಪೊಸ್ತಲ 15:1

ಪೌಲ ಪಿಂಞ ಬಾರ್ನಬ ಅಂತಿಯೋಕ್ಯ ಪಟ್ಟಣತ್‍ಲ್ ಇಂಜ ಸಮಯತ್‍ಲ್, ಚೆನ್ನ ಯೆಹೂದ್ಯ ಜನ ಯೂದಾಯತ್ಂಜ ಅಂತಿಯೋಕ್ಯಕ್ ಬಂದಿತ್: ನಿಂಗ ನ್ಯಾಯಪ್ರಮಾಣತ್‍ಲ್ ಎಣ್ಣ್‌ನ ಪ್ರಕಾರ ಸುನ್ನತಿ ಮಾಡತೆ ಪೋಚೇಂಗಿ ನಿಂಗಕ್ ರಕ್ಷಣೆ ಕ್‍ಟ್ಟ್‌ಲೇಂದ್ ಅಲ್ಲಿಯತ್‍ರ ಯೇಸುನ ನಂಬ್‍ನ ಜನಕ್ ಉಪದೇಶ ಮಾಡಿಯಂಡ್ ಇಂಜತ್.

ಅಪೊಸ್ತಲ 15:24

ನಂಗ ಅಪ್ಪಣೆ ಕೊಡ್‌ತಿತ್ ಅಯಿಕತ ಚೆನ್ನ ಜನ ನಂಗಡ ಕಡೇಯಿಂಜ ನಿಂಗಡ ಪಕ್ಕ ಬಂದಿತ್, ನಿಂಗಡ ಮನಸ್ಸ್‌ನ ಗಲಿಬಿಲಿ ಮಾಡ್‌ಚೀಂದ್ ನಂಗಕ್ ಗೊತ್ತಾಚಿ.

ಅಪೊಸ್ತಲ 20:30

ನಿಂಗಡ ಮದ್ಯತ್ಂಜಲು ಚೆನ್ನ ಜನ ಎದ್ದಿತ್ ಸತ್ಯ ಬೋದನೆನ ತಿರಿತ್ ಯೇಸುನ ನಂಬ್‍ನಯಿಂಗಳ ಅಯಿಂಗಡ ಕಡೇಕ್ ಬಲ್‍ಚಿರುವಾಂದ್ ನಾಕ್ ಗೊತ್ತುಂಡ್.

ರೋಮ್ 16:18

ಅನ್ನನೆ ಉಳ್ಳಯಿಂಗ, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಗ್ ಸೇವೆ ಮಾಡತೆ, ಅಯಿಂಗಡ ಕೆಲಕಾಯಿತ್ ಸೇವೆ ಮಾಡಿಯಂಡುಂಡ್. ಅಯಿಂಗ ಅಯಿಂಗಡ ಮದುರವಾನ ತಕ್ಕ್‌ನ ಪರ್ಂದಿತ್ ಪಿಂಞ ಕುಶಿಪಡ್‌ತ್‌ವನೆಕೆ ತಕ್ಕ್ ಪರ್ಂದಿತ್, ಒಂದು ಅರಿಯತ ಜನಡ ಹೃದಯತ್‍ನ ವಂಚನೆ ಮಾಡ್‌ವಯಿಂಗಳಾಯಿತುಂಡ್.

2 ಕೊರಿಂಥ 11:15

ಆನಗುಂಡ್, ಅಂವೊಂಡ ಸೇವಕಂಗಳು ಸಹ, ನೀತಿರ ಸೇವಕಂಗಡ ವೇಷತ್‍ನ ಇಟ್ಟತೇಂಗಿ ಅದ್ ಆಶ್ಚರ್ಯ ಅಲ್ಲ; ಅಯಿಂಗಡ ಅಂತ್ಯ ಅಯಿಂಗಡ ಕ್ರಿಯೇಕ್ ತಕ್ಕಂತದಾಯಿತ್‌ಪ್ಪ.

2 ಕೊರಿಂಥ 2:17

ದುಂಬ ಜನತ್‍ರನೆಕೆ, ನಂಗಕ್ ಲಾಬ ಕ್‍ಟ್ಟ್‌ವಕಾಯಿತ್ ದೇವಡ ವಾಕ್ಯತ್‍ನ ಕಲಪ್‍ಲ್ ಬೋದನೆ ಮಾಡತೆ, ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್, ನಂಬಿಕಸ್ತಂಗಳಾಯಿತ್, ದೇವ ಅಯಿಚಯಿಂಗಳಾಯಿತ್, ದೇವಡ ಮಿಂಞತ್‍ಲ್ ತಕ್ಕ್ ಪರ್ಂದಂಡುಂಡ್.

2 ಕೊರಿಂಥ 4:2

ಅದ್ಂಡ ಬದ್‍ಲ್, ಞಾಣ ಆಪಕುಳ್ಳ ಪಿಂಞ ಗುಟ್ಟಾಯಿತುಳ್ಳ ವಿಷಯತ್‍ನೆಲ್ಲಾ ನಂಗ ತ್‍ಕ್ಕಾರ ಮಾಡಿತ್, ಕಪಟಿಯರನೆಕೆ ನಡ್‍ಕತೆ, ದೇವಡ ವಾಕ್ಯತ್‍ನ ತಪ್ಪಾಯಿತ್ ಬೋದನೆ ಮಾಡಿಯಂಡಿಲ್ಲೆ. ಆಚೇಂಗಿ, ಸತ್ಯತ್‍ನ ಎಲ್ಲಾರ್‌ಕು ಗೊತ್ತಾಪನೆಕೆ ಅರಿಚಿಟ್ಟಿತ್, ದೇವಡ ಮಿಂಞತ್ ಎಲ್ಲಾ ಮನುಷ್ಯಂಗಡ ಮನಸಾಕ್ಷಿಕ್ ನಂಗ ಸತ್ಯವಂತಯಿಂಗಾಂದ್ ಕಾಂಬ್‍ಚಿಟ್ಟಂಡುಂಡ್.

ಗಲಾತ್ಯ 1:7

ಆಚೇಂಗಿ ಇದ್‍ನ ಬುಟ್ಟಿತ್ ಬೋರೆ ನಲ್ಲ ಸುದ್ದಿ ಏದ್ ಉಂಡ್? ಚೆನ್ನ ಜನ, ನಿಂಗಡ ಮನಸ್ಸ್‌ನ ಕಲ್‍ಕಿತ್ ಕ್ರಿಸ್ತಂಡ ನಲ್ಲ ಸುದ್ದಿನ ತಿರ್‌ಕ್‍ವಕ್ ಪ್ರಯತ್ನ ಪಟ್ಟಂಡುಳ್ಳದಲ್ಲತೆ ಬೋರೆ ಒಂದು ಮಾಡಿಯಂಡಿಲ್ಲೆ.

ಗಲಾತ್ಯ 2:4

ಆಚೇಂಗಿ, ಈ ವಿಷಯತ್‍ಲ್ ಯೇಸುನ ನಂಬ್‍ನಯಿಂಗಾಂದ್ ಎಣ್ಣುವ ಚೆನ್ನ ಕಳ್ಳಂಗ ತರ್ಕ ಮಾಡ್‍ಚಿ. ಅಯಿಂಗ ದಾರ್ ಎಣ್ಣ್‌ಚೇಂಗಿ; ದಾರ್‌ಕು ಗೊತ್ತಿಲ್ಲತೆ ನಂಗಡ ಒಳ್‍ಕ್ ಕೂಡ್‍ನ ಅಣ್ಣತಮ್ಮಣಂಗಳೇ. ಯೇಸು ಕ್ರಿಸ್ತನಗುಂಡ್ ನಂಗಕುಳ್ಳ ಸ್ವಾತಂತ್ರತ್‍ನ, ನಂಗಡಿಂಜ ಎಡ್‍ಪಕ್ ನೋಟಿತ್, ಯೆಹೂದ್ಯಂಗಡ ನ್ಯಾಯಪ್ರಮಾಣಕ್ ಅಡಿಯಾಳ್‌ರನೆಕೆ ನಂಗ ಇರಂಡೂಂದ್ ಅಯಿಂಗ ಒತ್ತಾಯ ಮಾಡ್‍ಚಿ.

ಗಲಾತ್ಯ 4:17

ಆ ಕಳ್ಳ ಉಪಾದ್ಯಂಗಕ್ ನಿಂಗಡ ದಯೆ ಕ್‍ಟ್ಟಂಡೂಂದ್ ನಿಂಗಡ ಮೇಲೆ ದುಂಬ ಗೇನ ಮಾಡಿಯಂಡ್ ಉಂಡ್, ಆಚೇಂಗಿ ಅಯಿಂಗಡ ಗೇನ ಸರಿ ಅಲ್ಲ. ನಿಂಗ ಅಯಿಂಗ ಎಣ್ಣ್‌ವಾನ ಮಾತ್ರ ಕ್‍ೕಕಂಡೂಂದ್ ನಿಂಗಳ ನನ್ನಿಂಜ ಬೋರೆ ಮಾಡಂಡೂಂದ್ ಗೇನ ಮಾಡಿಯಂಡುಂಡ್.

ಗಲಾತ್ಯ 6:12

ಅಯಿಂಗಡ ವಿಷಯತ್ ಎಲ್ಲಾರು ಚಾಯಿ ಎಣ್ಣಂಡೂಂದ್ ಗೇನಮಾಡ್‌ವಯಿಂಗಳೇ ನಿಂಗಳ ಸುನ್ನತಿ ಮಾಡಂಡೂಂದ್ ಒತ್ತಾಯ ಮಾಡ್‌ವ. ಅಯಿಂಗ ಕ್ರಿಸ್ತಂಡ ಶಿಲುಬೇರಗುಂಡ್ ಬಪ್ಪ ಕಷ್ಟತ್ಂಜ ತಪ್ಪ್‌ಚಿಡುವಕಾಯಿತ್ ಅನ್ನನೆ ಮಾಡ್‌ವ.

ಎಫೆಸ 4:14

ನಂಗ ಇಂಞು ಮಿಂಞಕ್ ಕುಂಞಿಯರನೆಕೆ ಇಕ್ಕತೆ, ಮನುಷ್ಯಂಗಡ ಕಪಟ ಪಿಂಞ ವಂಚನೆ ಮಾಡ್‌ವ ತಂತ್ರವುಳ್ಳ ಬೋದನೆಯಾನ, ನಾನಾತರ ಗಾಳಿರಗುಂಡ್ ಅಲ್ಲಾಡಿಯಂಡಿಪ್ಪ, ಅಲೆರನೆಕೆ ಅಪ್ಪರ ಇಪ್ಪರ ಪೋಯಂಡಿಪ್ಪಯಿಂಗಳಾಯಿತ್ ಇರತಿ.

ಫಿಲಿಪ್ಪಿ 3:18

ಎನ್ನಂಗೆಣ್ಣ್‌ಚೇಂಗಿ, ದುಂಬ ಜನ ಅಯಿಂಗ ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಿತುಂಡ್‍ೕಂದ್ ಎಣ್ಣುವ, ಆಚೇಂಗಿ ಅಯಿಂಗೆಲ್ಲಾ ಕ್ರಿಸ್ತಂಡ ಶಿಲುಬೇರ ಬೋದನೆಕ್ ವಿರೋದವಾಯಿತ್ ಬದ್‍ಕಿಯಂಡುಂಡ್. ಅಯಿಂಗಡ ವಿಷಯ ನಾನ್ ನಿಂಗಕ್ ಮಿಂಞಲೇ ದುಂಬ ಎಣ್ಣಿತುಂಡ್. ಇಕ್ಕ ಪುನಃ ನಾನ್ ನಿಂಗಕ್ ಮೊರಟಂಡ್ ಎಣ್ಣ್‌ವಿ.

ಫಿಲಿಪ್ಪಿ 3:2

ನಿಂಗ ಸುನ್ನತಿ ಮಾಡಂಡೂಂದ್, ನಾಯಿಯಡನೆಕೆ ನಿಂಗಳ ತೊಂದರೆ ಮಾಡ್‌ವ ಕಳ್ಳ ಬೋದನೆಕಾರಂಗಡ ವಿಷಯತ್‍ಲ್ ನಿಂಗ ಎಚ್ಚರ ಎಡ್‌ತೊಳಿ.

ಕೊಲೊಸ್ಸೆ 2:4

ದಾರೂ ನಿಂಗಳ ತಪ್ಪಾನ ತರ್ಕ ಮಾಡಿತ್ ವಂಚನೆ ಮಾಡ್‌ವಕ್ಕಾಗಾಂದ್ ಇದ್‍ನ ನಾನ್ ನಿಂಗಕ್ ಎಣ್ಣಿಯಂಡುಳ್ಳ.

ಕೊಲೊಸ್ಸೆ 2:8

ಈ ಒಂದು ಇಲ್ಲತ ವಂಚನೆ ಮಾಡ್‌ವ ಶಾಸ್ತ್ರತ್‍ರ ಮೂಲಕ ಪಿಂಞ ಈ ಲೋಕತ್‍ರ ಆತ್ಮೀಯ ಅದಿಕಾರತ್ಂಜ ದಾರೂ ನಿಂಗಳ ಚಿಕ್ಕಿಚಿಡತೆ ಇಪ್ಪಕ್, ಎಚ್ಚರತ್‍ಲ್ ಇರಿ. ಅದೆಲ್ಲಾ, ಪ್ರಯೋಜನ ಇಲ್ಲತ ವಂಚನೆ ಮಾಡ್‌ವ ಮನುಷ್ಯಂಗಡ ಪದ್ದತಿಯು, ಈ ಲೋಕತ್‍ರ ಪದ್ದತಿರ ಜ್ಞಾನವು ಅಲ್ಲತೆ ಕ್ರಿಸ್ತಂಡಿಂಜ ಬಪ್ಪ ಜ್ಞಾನ ಅಲ್ಲ.

1 ಯೋಹಾನ 2:18

ನಾಡ ಮಕ್ಕಳೇ ಕಡೆ ಕಾಲ ಬೆರಿಯ ಬಂದಂಡುಂಡ್! ಅಕ್ಕ, ನಾನೇ ಕ್ರಿಸ್ತಾಂದ್ ಪೊಟ್ಟ್ ಪರಿಯುವಂವೊ ಬಪ್ಪಾಂದ್ ಅಕ್ಕ ಕ್‍ೕಟಿತುಳ್ಳಿರ, ಆಚೇಂಗಿ ಇಕ್ಕಲೆ ಕಳ್ಳ ಕ್ರಿಸ್ತಂಗ ಬಂದಿತುಂಡ್. ಅಂದಕ ಇದ್ ಕಡೆ ಕಾಲಾಂದ್ ನಂಗಕ್ ಗೊತ್ತಾಪ.

1 ಯೋಹಾನ 4:1

ನಾಡ ಪ್ರೀತಿರ ಜನಳೇ, ಈ ಲೋಕತ್‍ಲ್ ದುಂಬ ಕಳ್ಳ ಪ್ರವಾದಿಯ ಉಂಡ್. ಆನಗುಂಡ್ ನಿಂಗ ಎಲ್ಲಾ ಆತ್ಮತ್‌ನ ನಂಬತೆ, ಆ ಆತ್ಮ ದೇವಡ ಕಡೇಯಿಂಜ ಬಾತಾಂದ್ ನಿಂಗ ಪರೀಕ್ಷೆ ಮಾಡಿತ್ ನೋಟಂಡು.

ಯೂದ ಒಳ್‍ದ್‍ನ ಕಾಗದ 1:4

ಎನ್ನಂಗೆಣ್ಣ್‌ಚೇಂಗಿ, ದೇವಡ ಮೇಲೆ ದಂಗೆ ಮಾಡ್‌ವ ಚೆನ್ನ ಜನ ನಿಂಗಕ್ ಗೊತ್ತಿಲ್ಲತೆ ನಿಂಗಡ ಸಬೇಲ್ ನುಗ್ಗಿತ್, ದೇವಡ ಕೃಪೆ ನಂಗಳ ಕಾಮಾಬಿಲಾಷೆ ಪಾಪ ಮಾಡ್‌ವಕ್ ಅನುಮತಿ ಕೊಡ್‍ತಿತುಂಡ್‍ೕಂದ್ ಎಣ್ಣಿಯಂಡ್, ಯೇಸು ಕ್ರಿಸ್ತ ಒಬ್ಬನೇ ನಂಗಡ ಮೇಲೆ ಎಲ್ಲಾ ಅದಿಕಾರ ಉಳ್ಳ ಒಡೆಯಾಂದ್ ಉಳ್ಳಾನ ಒತ್ತಂಡಿಲ್ಲೆ. ಅಯಿಂಗಡ ತೀರ್ಪ್‌ನ ಪಂಡೇ ದೇವ ಒಳ್‍ದಿ ಬೆಚ್ಚಿತುಂಡ್.

ಪ್ರಕಟನೆ 19:20

ಅಕ್ಕ ಆ ಮೃಗತ್‍ನ ಪುಡ್‍ಚತ್; ಅದ್ಂಡ ಮಿಂಞತ್‍ಲ್ ಮಾಡ್‍ನ ಅದ್ಬುತ ಕಾರ್ಯತ್‍ನಗುಂಡ್, ಅದ್ಂಡ ಮುದ್ರೆನ ಇಟ್ಟಯಿಂಗಳ, ಅದ್ಂಡ ವಿಗ್ರಹತ್‍ನ ಆರಾದನೆ ಮಾಡ್‍ನಯಿಂಗಳ ಪಿಂಞ ಮೋಸ ಮಾಡ್‍ನ ಕಳ್ಳ ಪ್ರವಾದಿನ ಸಹ ಪುಡ್‌ಚಿರ್‌ತ್. ಜೀವತ್‍ಲ್ ಇಪ್ಪಕಲೆ ಈ ದಂಡಾಳ್‌ನ ಗಂಧಕ ಕತ್ತಿಯಂಡುಳ್ಳ ತಿತ್ತ್‌ರ ಕಡಲ್‍ಲ್ ಇಟ್ಟತ್.

ಪ್ರಕಟನೆ 2:2

ನೀಡ ಕ್ರಿಯೇನ, ನೀಡ ಪ್ರಯತ್ನತ್‍ನ, ನೀಡ ಪೊರುಮೆನ, ಕೊಳ್ಳತಯಿಂಗಳ ನೀನ್ ಸಹಿಸಿಯಂಡ್ ಇಪ್ಪಕ್ ಕಯ್ಯತ ಇಪ್ಪದ್‍ನ, ಪಿಂಞ ಅಪೊಸ್ತಲ ಅಲ್ಲತಯಿಂಗ ನಂಗ ಅಪೊಸ್ತಲಂಗಾಂದ್ ಎಣ್ಣುವದ್‍ನ ಪರೀಕ್ಷೆ ಮಾಡಿತ್ ಅಯಿಂಗ ಪೊಟ್ಟ್ ಪರ್ಂದಂಡ್ ಉಂಡ್‍ೕಂದ್ ನೀನ್ ಗೊತ್ತ್ ಮಾಡ್‍ನದೆಲ್ಲಾ ನಾಕ್ ಗೊತ್ತುಂಡ್.

ಪ್ರಕಟನೆ 2:20

ಆಚೇಂಗಿಯು, ನೀಡ ಮೇಲೆ ಚೆನ್ನ ವಿಷಯತ್ ನಾಕ್ ಕುತ್ತ ಪರಿಯುವನೆಕೆ ಉಂಡ್; ಅದ್ ಎಂತ ಎಣ್ಣ್‌ಚೇಂಗಿ, ಯೆಜೆಬೇಲಾಂದ್ ಎಣ್ಣುವ ಒರ್ ಪೊಣ್ಣಾಳ್, ನಾನೇ ಪ್ರವಾದೀಂದ್ ಎಣ್ಣಿಯಂಡ್, ನಾಡ ಸೇವಕಂಗ ವ್ಯಬಿಚಾರ ಪಾಪ ಮಾಡ್‌ವಕು, ವಿಗ್ರಹಕ್ ಅರ್ಪಿಚಿಟ್ಟದ್‍ನ ತಿಂಬಕು ಬೋದನೆ ಮಾಡಿತ್, ಅಯಿಂಗಳ ವಂಚನೆ ಮಾಡ್‌ವಕ್ ನೀನ್ ಜಾಗ ಕೊಡ್‍ತಂಡುಂಡ್.

ಪ್ರಕಟನೆ 2:9

ನೀಕುಳ್ಳ ಹಿಂಸೆನ ಪಿಂಞ ನೀನ್ ಐಶ್ವರ್ಯವಂತಂವೊನಾಯಿತ್ ಇಂಜತೇಂಗಿಯು ಗರೀಬನಾಯಿತ್ ಇಪ್ಪದ್ ನಾಕ್ ಗೊತ್ತುಂಡ್. ಪಿಂಞ ಯೆಹೂದ್ಯಂಗಾಂದ್ ಎಣ್ಣ್‌ಚೇಂಗಿಯು ಯೆಹೂದ್ಯ ಅಲ್ಲತಯಿಂಗಳಾಯಿತ್ ಅಯಿಂಗ ಎಣ್ಣುವ ದೂಷಣೆ ನಾಕ್ ಗೊತ್ತುಂಡ್. ಅಯಿಂಗ ಸೈತಾನಂಡ ಸಬಾಮಂದಿರಕ್ ಕೂಡ್‍ನಯಿಂಗಳಾಯಿತುಂಡ್.