1 ತಿಮೊಥೆಯ 6:4 - ಕೊಡವ ಬೈಬಲ್

⁴ ಅಂವೊ ಪೆರ್‌ಮೆ ಉಳ್ಳಂವೊನು, ಒಂದು ಅರ್ಥ ಆಕತಂವೊನಾಯಿತ್‌ಪ್ಪ. ಅನ್ನನೆ ಮಾಡ್‌ವಂವೊ, ಆಂಗಾರತ್‍ಲ್ ಕಳಿಪ ಸೊಮಾರಿಯನೆಕೆ ಮುಂಡತೆ ತರ್ಕ ಮಾಡ್‌ವಕು, ವಾಕ್ಯತ್‍ರ ಮೇಲೆ ಜಗಳ ಕಳಿಪಕೇ ಕುಶಿ ಪಡುವ. ಇದೆಲ್ಲ ವಾದ ಮಾಡ್‌ವಕ್, ಒಟ್ಟೆಕಿಚ್ಚ್, ಜಗಳ, ದೂಷಣೆ ಪಿಂಞ ಬೋಂಡತ ಕೆಟ್ಟ ಸಂಶಯತ್‍ನ ಉಂಟ್ ಮಾಡ್‌ವ.

1 ತಿಮೊಥೆಯ 6:4 ပူးပေါင်းရင်းမြစ်များ

ಜ್ಞಾನತ್‌ರ ಪಡಿಮ 13:7

ಒಂದು ಇಲ್ಲತಂವೊ ತನ್ನ ಐಶ್ವರ್ಯವಂತಂವೊನಾಯಿತ್‌ ಕಾಂಬ್‌ಚಿಡುವಂವೊನು ಉಂಡ್; ದುಂಬ ಐಶ್ವರ್ಯವ ಉಳ್ಳಂವೊ ತನ್ನ ಗರಿಬಂಡನೆಕೆ ಕಾಂಬ್‌ಚಿಡುವಂವೊನು ಉಂಡ್.

ಜ್ಞಾನತ್‌ರ ಪಡಿಮ 25:14

ಇನಾಮ್‌ ತಪ್ಪೀಂದ್‌ ಎಣ್ಣಿತ್‌ ಅದ್‌ನ ಕೊಡ್‌ಕತಂವೊ, ಮಳೆ ಇಲ್ಲತ ಮೋಡಕು ಗಾಳಿಕು ಸರಿಸಮ.

ಜ್ಞಾನತ್‌ರ ಪಡಿಮ 26:12

ತನ್ನ ತಾನೆ ಜ್ಞಾನೀಂದ್‌ ಗೇನ ಮಾಡ್‌ವಂವೊನ ನೋಟ್, ಅನ್ನನೆ ಉಳ್ಳ ಮನುಷ್ಯಕಿಂಜಿ ಮೂಡಂಡ ಮೇಲೆ ನಿರೀಕ್ಷೆ ಬೆಕ್ಕಲು.

ಅಪೊಸ್ತಲ 15:2

ಅಕ್ಕ, ಅಯಿಂಗಕು ಪಿಂಞ ಪೌಲ ಬಾರ್ನಬಂಗಕು ಬಲ್ಯ ತರ್ಕ ಆಚಿ. ಈ ವಿಷಯಕಾಯಿತ್, ಅಲ್ಲಿಂಜ ಪೆರಿಯಯಿಂಗ, ಪೌಲ ಪಿಂಞ ಬಾರ್ನಬಂಡ ಕೂಡೆ ಇಂಞು ಚೆನ್ನ ಜನಳ ಯೆರೂಸಲೇಮ್‍ಲ್ ಉಳ್ಳ ಅಪೊಸ್ತಲಂಗ ಪಿಂಞ ಸಬೆರ ಪೆರಿಯಯಿಂಗಡ ಪಕ್ಕ ಪೋಪಕ್ ಅಯಿಂಗಳ ನೇಮಿಚಿಟ್ಟತ್.

ಅಪೊಸ್ತಲ 18:15

ಆಚೇಂಗಿ ನಿಂಗ ಕುತ್ತ ಪರಿಯುವ ವಿಷಯ, ಬೋದನೆರ ವಿಷಯವಾಯಿತು, ಪೆದತ್‍ರ ವಿಷಯವಾಯಿತು ಪಿಂಞ ನಿಂಗಡ ಸ್ವಂತ ನ್ಯಾಯಪ್ರಮಾಣತ್‍ರ ವಿಷಯವಾಯಿತುಳ್ಳಗುಂಡ್, ಇದ್‍ನ ವಿಚಾರಣೆ ಮಾಡ್‌ವಕ್ ನಾಕ್ ಕುಶಿ ಇಲ್ಲೆ, ನಿಂಗಳೇ ಸರಿ ಮಾಡಿಯೊಳೀಂದ್ ಎಣ್ಣ್‌ಚಿ.

ಅಪೊಸ್ತಲ 8:9

ಆಚೇಂಗಿ, ಆ ಪಟ್ಟಣತ್‍ಲ್ ಸೀಮೋನ ಎಣ್ಣುವ ಒಬ್ಬ ಇಂಜತ್. ಅಂವೊ, ಚೆನ್ನ ಕಾಲತ್ಂಜ ಬಲ್ಯ ಬಲ್ಯ ಮಾಟಮಂತ್ರ ಮಾಡಿಯಂಡ್, ಅಲ್ಲಿಯತ್‍ರ ಜನ ಆಶ್ಚರ್ಯ ಪಡುವನೆಕೆ ಮಾಡಿತ್, ಅಂವೊ ಒರ್ ಬಲ್ಯ ಮನುಷ್ಯಾಂದ್ ಎಣ್ಣಿಯಂಡಿಂಜತ್.

ರೋಮ್ 12:16

ಎಲ್ಲಾಡ ಕೂಡೆ ಒರೇ ಮನಸ್ಸುಳ್ಳಯಿಂಗಳಾಯಿತಿರಿ; ಜಂಬ ಮಾಡತೆ, ಕಮ್ಮಿಯಾಯಿತ್ ಉಳ್ಳಯಿಂಗಡ ಕೂಟ್‍ಕ್ ಕೂಡಿ. ನಿಂಗಳ ನಿಂಗಳೇ ಬುದ್ದಿವಂತಯಿಂಗಾಂದ್ ಗೇನ ಮಾಡತಿ.

ರೋಮ್ 13:13

ಕೂಟ್‌ಕಳಿ, ಕುಡಿಪದ್, ಲೈಂಗಿಕ ಪಾಪ, ಕಾಮಾಬಿಲಾಷೆ, ತರ್ಕ, ಒಟ್ಟೆಕಿಚ್ಚ್ ಉಳ್ಳಯಿಂಗಳಾಯಿತ್ ನಡ್‍ಕತೆ, ಪೋಲ್‍ಲ್ ನಡ್‍ಪಯಿಂಗಡನೆಕೆ ಸರಿಯಾಯಿತ್ ನಡ್‌ಕಂಡು.

ರೋಮ್ 14:1

ನಂಬಿಕೇಲ್ ಸ್ತಿರಯಿಲ್ಲತಯಿಂಗಳ ಕೂಟಿಯೊಳಿ; ಆಚೇಂಗಿಯು ಅಯಿಂಗಡ ಅನುಮಾನತ್‍ನ ಕುತ್ತ ಪರಿಯತಿರಿ.

ರೋಮ್ 2:8

ಆಚೇಂಗಿ, ಅಯಿಂಗಕಾಯಿತೇ ಬದ್‍ಕಿಯಂಡ್, ಸತ್ಯತ್‍ರನೆಕೆ ಮಾಡತೆ, ಅನ್ಯಾಯ ಮಾಡಿಯಂಡುಳ್ಳಯಿಂಗಡ ಮೇಲೆ ದೇವಡ ಚೆಡಿಯು, ಬಲ್ಯ ಚೆಡಿಯು ಬಪ್ಪ.

1 ಕೊರಿಂಥ 11:16

ಆಚೇಂಗಿ, ಒಬ್ಬಂಗ್ ಈ ವಿಷಯತ್‍ಲ್ ತರ್ಕ ಮಾಡ್‌ವಕ್ ಮನಸ್ಸ್ ಇಂಜತೇಂಗಿ, ನಂಗಕ್ ಪಿಂಞ ದೇವಡ ಸಬೇಕ್, ಈ ತರ ಅಬ್ಯಾಸ ಇಲ್ಲೇಂದ್ ಅಯಿಂಗಕ್ ಗೊತ್ತಿರಡ್.

1 ಕೊರಿಂಥ 11:18

ಮುಕ್ಯವಾಯಿತ್, ದೇವಡ ಸಬೇಲ್ ನಿಂಗ ಕೂಡಿ ಬಪ್ಪಕ, ನಿಂಗಡಡೆಲ್ ಬೋರೆ ಬೋರೆ ಗುಂಪ್ ಉಂಡ್‍ೕಂದ್ ನಾಕ್ ಸುದ್ದಿ ಬಾತ್; ಅದ್‍ಲ್ ನಾನ್ ಚೆನ್ನ ವಿಷಯತ್‍ನ ನಂಬುವಿ.

1 ಕೊರಿಂಥ 3:18

ನಿಂಗಡಲ್ಲಿ ದಾರೂ ನಿಂಗಳ ನಿಂಗಳೇ ವಂಚನೆ ಮಾಡ್‌ವಕ್ಕಾಗ, ಈ ಲೋಕತ್‍ರ ಜನತ್‍ರ ಮಿಂಞತ್‍ಲ್ ನಿಂಗ ಬಲ್ಯ ಬುದ್ದಿವಂತಯಿಂಗಾಂದ್ ನಿಂಗ ಗೇನಮಾಡಿಯಂಡಿಂಜತೇಂಗಿ, ಅಯಿಂಗಡ ಮಿಂಞತ್ ನಿಂಗ ಮುಠಾಳಂಗಳಾಯಿತ್ ಇರಂಡು, ಅಕ್ಕ ನಿಂಗ ಬುದ್ದಿವಂತಯಿಂಗಳಾಯಿತಿಪ್ಪಿರ.

1 ಕೊರಿಂಥ 3:3

ನಿಂಗಡ ಪಕ್ಕ ಒಟ್ಟೆಕಿಚ್ಚ್ ಉಂಡ್, ಬೋರೆಯಿಂಗಡ ಕೂಡೆ ಜಗಳ ಮಾಡ್‌ವಿರ. ಇದೆಲ್ಲಾನ ನಿಂಗಡ ಪಾಪತ್‍ರ ಗುಣತ್‍ನಗುಂಡ್ ಈ ಲೋಕತ್‍ರ ಜನತ್‍ರನೆಕೆ ಮಾಡಿಯಂಡುಳ್ಳಿರಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ?

2 ಕೊರಿಂಥ 11:20

ಒಬ್ಬ ನಿಂಗಳ ಅಡಿಮೆ ಪಡ್‍ತ್‍ಚೇಂಗಿಯು, ಒಬ್ಬ ನಿಂಗಳ ಮುಗ್ಗ್‌ಚಿಟ್ಟತೇಂಗಿಯು, ಒಬ್ಬ ನಿಂಗಳ ಪುಡ್‌ಚಿತ್ ಕೊಂಡ್ ಪೋಚೇಂಗಿಯು, ಒಬ್ಬ ತನ್ನ ತಾನೆ ಕೊಚ್ಚ್‌ತೇಂಗಿಯು, ಒಬ್ಬ ನಿಂಗಡ ಮೂಡ್‍ಕ್ ಪೊಜ್ಜತೇಂಗಿಯು ನಿಂಗ ಸಹಿಸಿಯಂಡಿಂಜಿರ.

ಗಲಾತ್ಯ 5:15

ಆಚೇಂಗಿ, ನಿಂಗ ಕಾಡ್ ಪ್ರಾಣಿಯರನೆಕೆ ಒಬ್ಬೊಬ್ಬನ ಕಡಿಚಂಡ್ ತಿಂದಂಡೇ ಉಂಡೇಂಗಿ, ನೋಟಿಯಂಡಿರಿ, ಎಚ್ಚರತ್‍ಲ್ ಇರಿ, ಇಲ್ಲತಪೋನಕ ನಿಂಗ ಒಬ್ಬೊಬ್ಬಂಡಗುಂಡ್ ಪಾಳಾಯಿ ಪೋಪಿರ.

ಗಲಾತ್ಯ 5:26

ಆನಗುಂಡ್ ನಂಗ ಆಂಗಾರತ್‍ಲ್ ಇಪ್ಪಕ್ಕಾಗ, ಒಬ್ಬಂಗ್ ಒಬ್ಬ ಕಷ್ಟಕೊಡ್‌ಪಕ್ಕಾಗ, ದಾಡಮೇಲು ಒಟ್ಟೆಕಿಚ್ಚ್‌ಲ್ ಇಪ್ಪಕ್ಕಾಗ.

ಗಲಾತ್ಯ 6:3

ಒಬ್ಬ, ಅಂವೊ ಒಂದು ಇಲ್ಲತ ಇಂಜತೇಂಗಿಯು, ಅಂವೊನ ಬಲ್ಯ ಮನುಷ್ಯಾಂದ್ ಗೇನ ಮಾಡ್‍ಚೇಂಗಿ, ಅಂವೊನ ಅಂವೊನೇ ಮೋಸ ಮಾಡ್‌ವ. ನೀನ್ ಒಂದು ಅಚ್ಚಕ್ ಬಲ್ಯ ಮನುಷ್ಯನಲ್ಲ.

ಫಿಲಿಪ್ಪಿ 1:15

ಅಕ್ಕು, ಚೆನ್ನ ಜನ ನಾಡ ಮೇಲೆ ಉಳ್ಳ ಒಟ್ಟೆಕಿಚ್ಚ್‌ಲ್ ಪಿಂಞ ವಿರೋದತ್‍ಲ್ ಯೇಸು ಕ್ರಿಸ್ತನ ಬೋದನೆ ಮಾಡಿಯಂಡುಂಡ್, ಆಚೇಂಗಿ ಚೆನ್ನ ಜನ ಸತ್ಯತ್‍ಲ್ ನಲ್ಲ ಮನಸ್ಸ್‌ಲ್ ಬೋದನೆ ಮಾಡಿಯಂಡುಂಡ್.

ಫಿಲಿಪ್ಪಿ 2:14

ಎಲ್ಲಾನ ಏದ್ ಕುತ್ತವು ಪರಿಯತೆ, ಬೋಂಡತ ಚರ್ಚೆ ಮಾಡತೆ ಮಾಡಿಯಂಡಿರಿ.

ಫಿಲಿಪ್ಪಿ 2:3

ನಿಂಗ ಮಾತ್ರ ಬಲ್ಯಯಿಂಗಾಂದ್ ಗೇನ ಮಾಡತಿ, ನಿಂಗಳ ತಗ್ಗ್‌ಚಿಟ್ಟಂಡ್ ಬೋರೆಯಿಂಗ ನಿಂಗಕಿಂಜ ಬಲ್ಯಯಿಂಗಾಂದ್ ಗೇನ ಮಾಡಿ.

ಕೊಲೊಸ್ಸೆ 2:18

ದಾರೂ ನಿಂಗಳ, ನಿಂಗಡ ಇನಾಮ್‍ನ ಕಳೆಂದ್ ಪೋಪನೆಕೆ ವಂಚನೆ ಮಾಡ್‌ವಕ್ ಬುಡತಿ; ಅಯಿಂಗ ದಾರ್ ಎಣ್ಣ್‌ಚೇಂಗಿ, ವಂಚನೆ ಮಾಡ್‌ವ ತಾಳ್ಮೆಲ್ ಇಪ್ಪನೆಕೆ ಕಾಟಿಯಂಡ್, ದೇವದೂತಂಗಳ ಆರಾದನೆ ಮಾಡ್‌ವಕ್ ಕುಶಿಪಟ್ಟಂಡ್, ಅಯಿಂಗಕ್ ಗೊತ್ತಿಲ್ಲತ ವಿಷಯತ್‍ಲ್ ನುಗ್ಗಿತ್ ಪಿಂಞ ಅಯಿಂಗ ತಡೀರ ಗೇನತ್‍ಲ್ ಒರ್ ಕಾರಣವು ಇಲ್ಲತೆ ಗರ್ವ ಪಡ್‌ವಯಿಂಗಳಾಯಿತ್ ಉಂಡ್.

2 ಥೆಸಲೊನೀಕ 2:4

ಆ ಮನುಷ್ಯ ದೇವಕ್ ವಿರೋದವಾಯಿತ್ ನಿಂದಂಡ್, ಜನ ದೇವಾಂದ್ ಕಾಕುವ ಎಲ್ಲಾಂಗ್ ಬಲ್ಯದಾಯಿತ್, ಆರಾದನೆ ಮಾಡ್‌ವ ಎಲ್ಲಾಂಗ್ ಬಲ್ಯದಾಯಿತ್ ಅಂವೊ ಅಂವೊನನೇ ಕೊಚ್ಚ್‌ವ. ದೇವನ ಆರಾದನೆ ಮಾಡ್‌ವ ಜಾಗತ್‍ಲ್ ದೇವಡನೆಕೆ ಅಂವೊ ಅಳ್‌ತಂಡ್, ನಾನೇ ದೇವಾಂದ್ ಎಲ್ಲಾ ಜನಕು ಎಣ್ಣಿಯಂಡಿಪ್ಪ.

1 ತಿಮೊಥೆಯ 1:4

ಅರ್ಥ ಇಲ್ಲತ ಕಥೇನ ಪರ್ಂದಂಡ್, ಪಂಡತ್‌ರ ಜನಡ ವಿಷಯತ್‍ನ ತಕ್ಕ್ ಪರ್ಂದಂಡ್ ಇಪ್ಪಯಿಂಗಳ ಸಹ ನೀನ್ ಎಚ್ಚರ ಮಾಡ್. ಎನ್ನಂಗೆಣ್ಣ್‌ಚೇಂಗಿ ಈ ತಕ್ಕೆಲ್ಲಾ ವಾದ ಮಾಡ್‌ವಕ್ ಬಟ್ಟೆ ಕೊಡ್‍ಪದ್‍ನ ಬುಟ್ಟಿತ್ ನಂಬಿಕೆಯಿಂಜ ಮಾಡ್‍ವಕ್ಕುಳ್ಳ ದೇವಡ ಕೆಲಸತ್‍ನ ಮಾಡ್‌ವಕ್ ಬಟ್ಟೆ ಕಾಟುಲೆ.

1 ತಿಮೊಥೆಯ 1:7

ಅಯಿಂಗ ಅಚ್ಚಕ್ ದೃಡವಾಯಿತ್ ಗತ್ತ್‌ಲ್ ತಕ್ಕ್ ಪರ್ಂದತೇಂಗಿಯು, ಅಯಿಂಗ ಪರಿಯುವ ತಕ್ಕ್‌ರ ಅರ್ಥ ಎಂತ್‍ೕಂದ್ ಅಯಿಂಗಕೇ ಗೊತ್ತಿಲ್ಲತೆ ಪೋಚೇಂಗಿಯು, ಅಯಿಂಗ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳಾಯಿತ್ ಇರಂಡೂಂದ್ ಕುಶಿ ಪಡುವ.

1 ತಿಮೊಥೆಯ 3:6

ಇದ್ಂಗಾಯಿತ್ ಸಬೆರ ಪೆರಿಯಂವೊ, ಕ್ರಿಸ್ತ ನಂಬಿಕೇಲ್ ಬೊಳ್ಂದಂವೊನಾಯಿತ್ ಇರಂಡು. ಎನ್ನಂಗೆಣ್ಣ್‌ಚೇಂಗಿ ಅಂವೊಂಗ್ ದುಂಬ ಹಮ್ಮ್ ಬಂದಿತ್ ಸೈತಾನಂಗ್ ಕ್‍ಟ್ಟ್‌ನ ಅದೇ ತೀರ್ಪ್ ಇಂವೊಂಗೂ ಕ್‍ಟ್ಟಿ ಪೋಪ.

2 ತಿಮೊಥೆಯ 2:14

ಈ ವಿಷಯತ್‍ನ ಎಕ್ಕಾಲು ಅಯಿಂಗಕ್ ನೀನ್ ಞಾಪಕ ಮಾಡಿಯಂಡಿರ್. ಒಂದಾಂಗು ಪ್ರಯೋಜನವಿಲ್ಲತ ಪಿಂಞ ಕ್‍ೕಪಯಿಂಗಳ ಪಾಳ್ ಮಾಡ್‌ವಂತ ಅರ್ಥ ಇಲ್ಲತ ತಕ್ಕ್‌ಲ್ ಮಾಡ್‌ವ ತರ್ಕತ್‍ನ ಮಾಡತನೆಕೆ, ದೇವಡ ಮಿಂಞತ್ ಅಯಿಂಗಕ್ ಎಚ್ಚರ ಮಾಡ್.

2 ತಿಮೊಥೆಯ 2:23

ಮೂಡ ತಕ್ಕ್ ಪಿಂಞ ಪ್ರಯೋಜನ ಇಲ್ಲತ ಚರ್ಚೆ, ಬರಿ ಜಗಳಕ್ ಬಟ್ಟೆ ಕೊಡ್‍ಪಾಂದ್ ಗೊತ್ತಾನಗುಂಡ್, ಅದ್‍ಂಜ ನೀನ್ ದೂರ ಇರ್.

2 ತಿಮೊಥೆಯ 3:4

ದುಷ್ಟ ಬುದ್ದಿ ಉಳ್ಳಯಿಂಗಳಾಯಿತ್, ಎಂತ ಆಪಾಂದ್ ಗೇನ ಮಾಡತೆ ತಪ್ಪ್ ಮಾಡ್‌ವಕ್ ದೈರ್ಯ ಉಳ್ಳಯಿಂಗಳಾಯಿತ್, ಒಂದು ಇಲ್ಲತ ಇಂಜತೇಂಗಿಯು ಎಲ್ಲಾ ಉಳ್ಳಯಿಂಗಡನೆಕೆ ಪೆರುಮೆ ಕಾಟ್‌ವಯಿಂಗಳಾಯಿತು, ದೇವನ ಕುಶಿಪಡ್‍ತತೆ ಅಯಿಂಗಯಿಂಗಳ ಕುಶಿಪಡ್‍ತ್‍ವಯಿಂಗಳಾಯಿತ್,

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3:9

ಬುದ್ದಿಯಿಲ್ಲತ ತರ್ಕ, ವಂಶಾವಳಿರ ವಿಷಯತ್‍ರ ತರ್ಕ, ಜಗಳ ಮಾಡ್‍ವದ್ ಪಿಂಞ ನ್ಯಾಯಪ್ರಮಾಣಕ್ ಒಳಪಡಂಡೂಂದ್ ಎಣ್ಣುವ ವಿಷಯತ್‍ರ ಚರ್ಚೆನೆಲ್ಲ ನಿಪ್ಪ್‌ಚಿಡ್. ಇನ್ನನೆ ಮಾಡ್‌ವಗುಂಡ್ ಒರ್ ಪ್ರಯೋಜನ ಇಲ್ಲತದು ಒರ್ ನಲ್ಲದ್ ಮಾಡ್‌ವಕ್ ಕಯ್ಯತದು ಆಯಿತುಂಡ್.

ಯಾಕೋಬ 1:19

ನಾಡ ಅಣ್ಣತಮ್ಮಣಂಗಳೇ! ಎಲ್ಲಾರು ಕ್‍ೕಪಕ್ ಚುರ್‌ಕಾಯಿತು, ತಕ್ಕ್ ಪರಿಯುವಕ್ ನಿದಾನವಾಯಿತು, ಚೆಡಿ ಮಾಡ್‌ವಕ್ ತಾಳ್ಮೆಯಾಯಿತು ಇಕ್ಕಂಡು.

2 ಪೇತ್ರ 2:12

ಆಚೇಂಗಿ, ಈ ಕಳ್ಳ ಬೋದನೆ ಮಾಡ್‌ವಯಿಂಗ ಅಯಿಂಗಕ್ ಗೊತ್ತಿಲ್ಲತ ವಿಷಯತ್‍ಲ್ ದೇವ ದೂಷಣೆ ಎಣ್ಣಿಯಂಡುಂಡ್. ಈಂಗ ಮುಠಾಳರನೆಕೆ ಉಳ್ಳ ಪ್ರಾಣಿಯರನೆಕೆ, ಬುದ್ದಿಯಿಲ್ಲತ ಸೂನ್ಯ ಮೃಗತ್‍ರನೆಕೆ, ಪುಡ್‌ಚಿತ್ ಪಾಳಾಪಕಾಯಿತೇ ಪುಟ್ಟ್‌ನಯಿಂಗ. ಮೃಗತ್‍ರನೆಕೆ ಈಂಗಳು ಪಾಳಾಯಿ ಪೋಪ.

2 ಪೇತ್ರ 2:18

ಅಯಿಂಗಡ ಬಾಯಿಲ್ ಮುಠಾಳತನತ್‍ರ ಪಿಂಞ ಒಂದು ಇಲ್ಲತ ಬಡಾಯಿ ತಕ್ಕ್ ಮಾತ್ರ ಉಂಡ್. ಅಯಿಂಗಡ ಕಳ್ಳ ಬೋದನೆರ ಮೂಲಕ, ತಡೀರ ಇಚ್ಛೆರ ಆಸೆ, ಪಾಪ ಅಲ್ಲಾಂದ್ ಎಣ್ಣಿತ್, ಪಾಪ ಮಾಡ್‌ವ ಜನತ್‍ಂಜ, ಇಕ್ಕ ಬುಡ್‌ಗಡೆಯಾಯಿತ್ ಬಂದ ಯೇಸುನ ನಂಬ್‍ನಯಿಂಗಕ್ ಆಸೆ ಕಾಟಿತ್ ಅಯಿಂಗಳ ತಿರಿತ್ ಪೋಪಕ್ ಮಾಡಿಯಂಡುಂಡ್.

ಯೂದ ಒಳ್‍ದ್‍ನ ಕಾಗದ 1:10

ಆಚೇಂಗಿ ನಿಂಗಡ ಮದ್ಯತ್‍ಲ್ ಕಳ್ಳ ಬೋದನೆ ಮಾಡಿಯಂಡುಳ್ಳ ಈ ಜನ ಅಯಿಂಗಕ್ ಅರ್ಥ ಆಕತ ವಿಷಯತ್‍ನ ಎಲ್ಲಾ ಕೆಟ್ಟದಾಯಿತ್ ತಕ್ಕ್ ಪರಿವ. ಪಿಂಞ ಬುದ್ದಿ ಇಲ್ಲತ ಪ್ರಾಣಿಯರನೆಕೆ ಅಯಿಂಗಕ್ ಗೊತ್ತುಳ್ಳ ವಿಷಯತ್‍ನ ಸ್ವಾಬಾವಿಕವಾಯಿತ್ ಕಳಿಚಿತ್, ಅದ್‍ಯಿಂಜ ಅಯಿಂಗಯಿಂಗಳೇ ಪಾಳ್ ಮಾಡಿಯೊವ.

ಯೂದ ಒಳ್‍ದ್‍ನ ಕಾಗದ 1:16

ಈಂಗ ಗೊಣಗುವಯಿಂಗಳು, ಕುತ್ತಪರಿಯುವಯಿಂಗಳು, ತಂಗಡ ತಂಗಡ ಕೆಟ್ಟ ಆಸೆನೆ ಪೂರ್ತಿ ಮಾಡ್‌ವಯಿಂಗಳಾಯಿತುಂಡ್. ಅಯಿಂಗ ಅಯಿಂಗಳ ಹೊಗಳ್‍ಚಿಟ್ಟಂಡ್, ಅಯಿಂಗಕ್ ಬೋಂಡಿಯಾನದ್ ಕ್‍ಟ್ಟ್‌ವಕಾಯಿತ್ ಬೋರೆಯಿಂಗಳ ಕೊಂಡಾಡುವ.

ಪ್ರಕಟನೆ 3:17

ನಾನ್ ಐಶ್ವರ್ಯವಂತಂವೊ, ನಾಕ್ ದುಂಬ ಸೊತ್ತ್ ಕೂಟಿ ಬೆಚ್ಚಿಯೆ, ನಾಕ್ ಒಂದು ಕಮ್ಮಿಯಿಲ್ಲೇಂದ್ ನೀನ್ ಎಣ್ಣಿಯಂಡುಳ್ಳಿಯ. ಆಚೇಂಗಿ, ನೇರಾಯಿತ್ ನೀನ್ ಒರ್ ಗತಿಯು ಇಲ್ಲತಂವೊನಾಯಿತು, ವ್ಯಸನಕಾರನಾಯಿತು, ಗರೀಬನಾಯಿತು, ಕುರ್‌ಡನಾಯಿತು, ಬೆತ್ತಲೆಯಾಯಿತು ಉಳ್ಳಿಯಾಂದ್ ನೀಕ್ ಅರ್ಥ ಆಯಂಡಿಲ್ಲೆ.