1 ಯೋಹಾನ 2:16 - ಕೊಡವ ಬೈಬಲ್

¹⁶ ಎನ್ನಂಗೆಣ್ಣ್‌ಚೇಂಗಿ ತಡೀನ ಕುಶಿಪಡ್‌ತ್‌ವ ಆಸೆ, ನೋಟ್‌ವಾನೆಲ್ಲ ಬೋಂಡೂಂದ್ ಉಳ್ಳ ಆಸೆ, ಆಸ್ತಿರ ಹೆಮ್ಮೆ ಇದ್ ಏದು ದೇವನಾನ ಅಪ್ಪಂಡಿಂಜ ಬಪ್ಪುಲೆ. ಇದೆಲ್ಲ ಲೋಕತ್ಂಜ ಬಪ್ಪದೇ.

1 ಯೋಹಾನ 2:16 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 3:6

ಅಕ್ಕ ಆ ಪೊಣ್ಣಾಳ್‌ಕ್, ಈ ಮರತ್‌ರ ಪಣ್ಣ್‌ ತಿಂಬಕ್‌ ನಲ್ಲದಾಯಿತು, ನೋಟ್‌ವಕ್‌ ಚಾಯಿ ಉಂಡ್‍ೕಂದು, ಅವಕ್‌ ಜ್ಞಾನ ಕ್‌ಟ್ಟ್‌ವಕ್‌ ಅದ್‌ ಬೋಂಡ್‍ೕಂದು ಗೊತ್ತಾಯಿತ್, ಅದ್‌ನ ಪರಿಚಿತ್‌ ಅವ ತಿಂದತ್. ಅವಡ ವಡಿಯಂಗು ಕೊಡ್‌ಪಕ, ಅಂವೊನು ಅದನ ತಿಂದತ್.

ಆದ್ಯತ್‌ರ ಪುಸ್ತಕ 6:2

ದೇವಡ ಗುಣಕ್‌ ಕೂಡ್‌ನ ಕ್‌ಣ್ಣ ಮಕ್ಕ, ಈ ಲೋಕತ್‌ರ ಗುಣಕ್‌ ಕೂಡ್‌ನ ಮೂಡಿಯ ಕಾಂಬಕ್‌ ಚಾಯ ಉಂಡ್‍ೕಂದ್‌ ಕಂಡಿತ್, ಅಯಿಂಗಕ್‌ ಕುಶಿಯಾನ ಮೂಡಿಯಳ ಅಯಿಂಗಕಯಿಂಗಕ್‌ ಪೊಣ್ಣಾಯಿತ್‌ ಗೊತ್ತ್‌ ಮಾಡಿಯಂಡತ್.

ಜ್ಞಾನತ್‌ರ ಪಡಿಮ 27:20

ಪಾತಾಳವು ನಾಶನವು ತೃಪ್ತಿ ಆಪದೇ ಇಲ್ಲೆ. ಅನ್ನನೆ ಮನುಷ್ಯಂಡ ಆಸೆಕು ಮಿತಿಯೇ ಇಲ್ಲೆ.

ಜ್ಞಾನತ್‌ರ ಪಡಿಮ 6:25

ಅವಡ ಚಾಯಿ ಚಂದನ ನೋಟಿತ್‌ ಅವಕ್‌ ಇಚ್ಚೆ ಪಡತೆ. ಅವಡ ಕಣ್ಣ್‌ರ ರೆಪ್ಪೆಯಿಂಜ ನಿನ್ನ ವಶ ಪಡ್‌ತುವಕ್‌ ಬುಡತೆ.

ಮತ್ತಾಯ 4:8

ಪಿಂಞ ಸೈತಾನ ಯೇಸುನ ಒರ್ ಬಲ್ಯ ಕುಂದ್‌ರ ಕೊಡಿಕ್ ಕಾಕಿಯಂಡ್ ಪೋಯಿತ್, ಬೂಲೋಕತ್‌ರ ಎಲ್ಲಾ ರಾಜ್ಯತ್‍ನ ಪಿಂಞ ಅದ್ಂಡ ಮಹಿಮೆನ ಕಾ‌ಟಿಕೊಡ್‌ತಿತ್:

ಮತ್ತಾಯ 5:28

ಆಚೇಂಗಿ ನಾನ್ ನಿಂಗಕ್ ಎಣ್ಣ್‌ವಿ: ಬೋರೆ ಪೊಣ್ಣಾಳ್‍ನ ಆಸೆಯಿಂಜ ನೋಟ್‍ಚೇಂಗಿ ಸಹ, ಅಂವೊ ತಾಂಡ ಹೃದಯತ್‍ಲ್ ಅವಡ ಕೂಡೆ ವ್ಯಬಿಚಾರ ಮಾಡ್‍ನನೆಕೆ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 4:5

ಆ ಸೈತಾನ ಯೇಸುನ ಒರ್ ಕುಂದ್‌ರ ಕೊಡಿಕ್ ಕಾಕಿಯಂಡ್ ಪೋಯಿತ್, ಬೂಲೋಕತ್‌ರ ಎಲ್ಲಾ ರಾಜ್ಯತ್‍ನ ಒರು ಕ್ಷಣತ್‍ಲ್ ಕಾ‌ಟಿಕೊಡ್‌ತಿತ್: ನಾನ್ ನೀಕ್ ಈ ರಾಜ್ಯತ್‍ರ ಎಲ್ಲಾ ಅದಿಕಾರ ಪಿಂಞ ಎಲ್ಲಾ ಮಹಿಮೆನ ತಪ್ಪಿ, ಎನ್ನಂಗೆಣ್ಣ್‌ಚೇಂಗಿ ಇದೆಲ್ಲಾ ನಾಕ್ ಕೊಡ್‌ತಿತುಂಡ್. ನಾಕ್ ದಾರ್‌ಕ್ ಕೊಡ್‍ಪಕ್ ಕುಶಿ ಉಂಡೋ ಅಯಿಂಗಕ್ ನಾನ್ ಕೊಡ್‍ಪಿ.

ರೋಮ್ 13:14

ಆಚೇಂಗಿ, ತಡೀರ ಮೋಹಕಾಯಿತ್ ತಡೀನ ನೋಟತೆ, ಒಡೆಯನಾನ ಯೇಸು ಕ್ರಿಸ್ತನ ಇಟ್ಟೊಳಿ.

1 ಕೊರಿಂಥ 10:6

ಅಯಿಂಗ ಮಾಡ್‍ನನೆಕೆ ನಂಗಳು ಸಹ ಕೆಟ್ಟ ಕೆಲಸ ಮಾಡ್‌ವಕ್ ಕುಶಿಪಡತನೆಕೆ, ಇದೆಲ್ಲಾ ಒರ್ ಎಚ್ಚರವಾಯಿತ್ ನಂಗಕ್ ಉಂಡ್.

ಗಲಾತ್ಯ 5:17

ಮನುಷ್ಯಂಡ ಪಾಪತ್‍ರ ಗುಣ ಪವಿತ್ರಾತ್ಮಕ್ ವಿರೋದವಾಯಿತು, ದೇವಡ ಆತ್ಮ ಮನುಷ್ಯಂಡ ಪಾಪತ್‍ರ ಗುಣಕ್ ವಿರೋದವಾಯಿತು ಪೋರಾಡಿಯಂಡುಂಡ್. ನಿಂಗ ಮಾಡಂಡೂಂದ್ ಉಳ್ಳದ್‍ನ ಮಾಡ್‌ವಕ್ ಕಯ್ಯತನೆಕೆ ಈ ದಂಡು ಶತ್ರುವಳಾಯಿತುಂಡ್.

ಗಲಾತ್ಯ 5:24

ಯೇಸು ಕ್ರಿಸ್ತಂಡ ಕೂಡೆ ಐಕ್ಯತ್‍ಲ್ ಉಂಡ್‍ೕಂದ್ ಎಣ್ಣ್‌ವಯಿಂಗೆಲ್ಲಾ, ಅಯಿಂಗಡ ಪಾಪತ್‍ರ ಗುಣತ್‍ನ, ಅದ್ಂಡ ಆಸೆ ಪಿಂಞ ಇಚ್ಛೆನೆಲ್ಲಾ ಶಿಲುಬೇಲ್ ಇಟ್ಟಿತ್‌ಪ್ಪ.

ಎಫೆಸ 2:3

ನಂಗಳು ಸಹ ಅನ್ನನೆ ನಂಗಡ ತಡೀರ ಇಚ್ಛೆರ ಪ್ರಕಾರ ನಡ್ಂದಂಡ್, ನಂಗಡ ತಡಿ ಪಿಂಞ ಮನಸ್ಸ್ ಇಷ್ಟ ಪಟ್ಟಾನ ಮಾಡಿಯಂಡ್ ಇಂಜತ್. ಅನ್ನನೆ ನಂಗಡ ಪಾಪ ಗುಣತ್‍ರ ಪ್ರಕಾರ ಬೋರೆಯಿಂಗಡನೆಕೆ ದೇವಡ ಬಲ್ಯ ಚೆಡಿರ ಮಕ್ಕಳಾಯಿತ್ ಶಿಕ್ಷೆಕ್ ಒಳಪಟ್ಟಿತ್ಂಜತ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2:12

ಆನಗುಂಡ್ ಈ ಕೃಪೆ ದೇವಡ ಮೇಲೆ ಬಕ್ತಿಲ್ ಬದ್‍ಕ್‍ವಕ್ ಪಿಂಞ ಈ ಲೋಕತ್‍ರ ಮೇಲೆ ಉಳ್ಳ ಆಸೇನ ಬುಟ್ಟಿತ್ ಬದ್‍ಕ್‍ವಕ್ ನಂಗಕ್ ಎಣ್ಣಿ ಕೊಡ್‍ಪ. ಪಾಪ ದುಂಬ್‍ನ ಈ ಲೋಕತ್‍ಲ್, ನಂಗ ಜ್ಞಾನ ಉಳ್ಳಯಿಂಗಳಾಯಿತ್, ನೀತಿ ಉಳ್ಳಯಿಂಗಳಾಯಿತ್ ದೇವಡ ಮೇಲೆ ಬಕ್ತಿ ಉಳ್ಳಯಿಂಗಳಾಯಿತ್ ಬದ್‍ಕ್‍ವಕ್ ಸಹಾಯ ಮಾಡ್‌ವ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3:3

ಎನ್ನಂಗೆಣ್ಣ್‌ಚೇಂಗಿ, ಒರ್ ಸಮಯತ್‍ಲ್ ನಂಗ ಸಹ ಮುಠಾಳಂಗಳಾಯಿತ್, ದಾಡ ತಕ್ಕ್‌ನ ಕೇಕತಯಿಂಗಳಾಯಿತ್, ವಂಚನೆ ಮಾಡ್‌ವಯಿಂಗಳಾಯಿತ್, ಎಲ್ಲಾ ತರ ಆಸೆ ಪಿಂಞ ಇಚ್ಛೆಕ್ ಅಡಿಯಾಳಾಯಿತ್, ಜನ ಕಷ್ಟಪಡ್‌ವಕ್ ಕುಶಿಪಡ್‌ವಯಿಂಗಳಾಯಿತ್, ಹೊಟ್ಟೆಕಿಚ್ಚ್‌ಲ್ ಬದ್‍ಕಿಯಂಡ್, ಬೋರೆಯಿಂಗ ನಂಗಳ ವಿರೋದಿಚಿಡ್‍ವನೆಕೆ ಪಿಂಞ ಒಬ್ಬನ ಒಬ್ಬ ವಿರೋದಿಚಿಟ್ಟಂಡ್ ಇಂಜತ್.

ಯಾಕೋಬ 3:15

ಅಂತ ಬುದ್ದಿವಂತಿಗೆ ಪರಲೋಕತ್ಂಜ ಬಪ್ಪದ್ ಅಲ್ಲ, ಅದ್ ಬೂಲೋಕಕ್ ಕೂಡ್‍ನದ್, ಆತ್ಮೀಯವಾನದಲ್ಲತದ್ ಪಿಂಞ ಕೂಳಿಯಡದ್.

ಯಾಕೋಬ 4:16

ಇಕ್ಕ ನಿಂಗ, ನಿಂಗಳ ದುಂಬ ಹೊಗಳಿಯಂಡುಂಡ್. ಈ ತರ ಹೊಗಳಿಕೆ ಎಲ್ಲಾ ಕೆಟ್ಟದ್.

1 ಪೇತ್ರ 1:14

ನಿಂಗ ಯೇಸುನ ನಂಬ್‍ನಯಿಂಗಳಾಯಿತ್ ಉಳ್ಳಾಂಗ್, ಅಂವೊ ಎಣ್ಣುವಾನ ಮಾಡಿಯಂಡ್ ಇರಿ. ನಿಂಗಡ ಪಳೆಯ ಬದ್‍ಕ್‍ಲ್ ಗೊತ್ತ್‌ಲ್ಲತೆ ಮಾಡಿಯಂಡಿಂಜ ಇಚ್ಛೆರನೆಕೆ ಮಡ್‌ವಕ್ಕಾಗ.

1 ಪೇತ್ರ 2:11

ನಾಡ ಪ್ರೀತಿರ ಜನಳೇ, ಈ ಲೋಕತ್‍ಲ್ ಚೆನ್ನ ಕಾಲ ಮಾತ್ರ ಬದ್‍ಕ್‍ವಯಿಂಗಳಾಯಿತ್, ಮನೆ ಇಲ್ಲತಯಿಂಗಡನೆಕೆ ಇಪ್ಪ ನಿಂಗಳ ನಾನ್ ಬೋಡ್‍ವದ್ ಎಂತ ಎಣ್ಣ್‌ಚೇಂಗಿ: ನಿಂಗಡ ಆತ್ಮಕ್ ವಿರೋದವಾಯಿತ್ ಯುದ್ದ ಮಾಡ್‌ವ ಪಾಪತ್‍ರ ಗುಣತ್‍ನ ಕಳೆಯಂಡು.

2 ಪೇತ್ರ 2:10

ಎಲ್ಲಾಕಿಂಜ, ಅಯಿಂಗಡ ಸ್ವಂತ ಮೋಸವಾನ ಲೈಂಗಿಕ ಪಾಪತ್‍ರ ಗುಣತ್‍ರ ಆಸೆರನೆಕೆ ಬದ್‍ಕ್‍ವಕ್ ಬಗ್ಗ್‌ಚಿಟ್ಟಿತ್ ನಡ್ಂದಂಡ್, ಒಡೆಯಂಡ ಅದಿಕಾರತ್‍ನ ಅಲ್ಲಗೆಳೆಯುವಯಿಂಗಕ್ ಕಂಡಿತವಾಯಿತ್ ಇನ್ನನೆ ಮಾಡ್‌ವ. ಈಂಗ, ದಾರ್ ಎಣ್ಣ್‌ಚೇಂಗಿಯು ತಗ್ಗಿತ್‌ ನಡ್‌ಕತಯಿಂಗಳು, ಆಂಗಾರಿಯಳು, ದೇವಡ ಸನ್ನಿದಾನತ್‍ಲ್ ಪರಲೋಕತ್‍ಲ್ ಮಹಿಮೆ ಪಡ್ಂದಯಿಂಗಳ ದೂಷಣೆ ಮಾಡ್‌ವಕ್ ಪೋಡಿಯಿಲ್ಲತಯಿಂಗಳು ಆಯಿತುಂಡ್.

2 ಪೇತ್ರ 2:18

ಅಯಿಂಗಡ ಬಾಯಿಲ್ ಮುಠಾಳತನತ್‍ರ ಪಿಂಞ ಒಂದು ಇಲ್ಲತ ಬಡಾಯಿ ತಕ್ಕ್ ಮಾತ್ರ ಉಂಡ್. ಅಯಿಂಗಡ ಕಳ್ಳ ಬೋದನೆರ ಮೂಲಕ, ತಡೀರ ಇಚ್ಛೆರ ಆಸೆ, ಪಾಪ ಅಲ್ಲಾಂದ್ ಎಣ್ಣಿತ್, ಪಾಪ ಮಾಡ್‌ವ ಜನತ್‍ಂಜ, ಇಕ್ಕ ಬುಡ್‌ಗಡೆಯಾಯಿತ್ ಬಂದ ಯೇಸುನ ನಂಬ್‍ನಯಿಂಗಕ್ ಆಸೆ ಕಾಟಿತ್ ಅಯಿಂಗಳ ತಿರಿತ್ ಪೋಪಕ್ ಮಾಡಿಯಂಡುಂಡ್.