1 ಕೊರಿಂಥ 6:9 - ಕೊಡವ ಬೈಬಲ್

⁹ ಅನೀತಿ ಮಾಡ್‌ವಯಿಂಗ ದೇವಡ ರಾಜ್ಯಕ್ ಬಾದ್ಯತೆ ಉಳ್ಳಯಿಂಗಳಾಯಿತ್ ಇಪ್ಪುಲೇಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ನಿಂಗ ಮೋಸ ಪೋಕತಿ; ಕಳ್ಳ ಸಂಬಂದ ಉಳ್ಳಯಿಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವ ಆಣಾಳ್‌ಂಗ, ಆಣ್-ಆಣ್, ಪೊಣ್ಣಾಳ್-ಪೊಣ್ಣಾಳ್ ವ್ಯಬಿಚಾರ ಮಾಡ್‌ವಯಿಂಗ,

1 ಕೊರಿಂಥ 6:9 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 19:5

ಅಯಿಂಗೆಲ್ಲಾರು ಲೋಟನ ಜೋರಾಯಿತ್‌ ಕಾಕಿತ್: ಇಂದ್‌ ಬಯಿಟ್ ನೀಡ ಮನೆಲ್ ಒಳಿಯೊಕ್‌ ಬಂದಿತುಳ್ಳ ಆಣಾಳ್‌ವ ಎಲ್ಲಿ? ಅಯಿಂಗಳ ಪೊರಮೆ ಕಾಕಿಯಂಡ್‌ ಬಾ, ಅಯಿಂಗಡ ಕೂಡೆ ನಂಗ ಬುದ್ದಂಡೂಂದ್‌ ಎಣ್ಣ್‌ಚಿ.

ಜ್ಞಾನತ್‌ರ ಪಡಿಮ 11:1

ಮೋಸತ್‌ರ ತಕ್ಕಡಿ ಯೆಹೋವಂಗ್‌ ಅಸಹ್ಯ. ಆಚೇಂಗಿ ನ್ಯಾಯವಾನ ತೂಕ ಅಂವೊಂಗ್‌ ಕುಶಿ.

ಜ್ಞಾನತ್‌ರ ಪಡಿಮ 22:8

ಅನ್ಯಾಯತ್‌ನ ಬಿತ್ತುವಂವೊ ಕ್‍ೕಡ್‌ನ ಕೊಯ್ಯುವ. ಅಂವೊಂಡ ಬಲ್ಯ ಚೆಡಿರ ಕೋಲ್‌ ನಾಶ ಆಯಿಪೋಪ.

ಜ್ಞಾನತ್‌ರ ಪಡಿಮ 7:27

ಅವಡ ಮನೆಕ್‌ ಪೋಪ ಬಟ್ಟೆ ಪಾತಾಳಕ್‌ ಪೋಪ ಬಟ್ಟೆ ಆಯಿತುಂಡ್, ಅದ್‌ ಚಾವುರ ಕೋಂಬರೆಕ್‌ ಕೊಂಡ್‌ ಪೋಪ.

ಮತ್ತಾಯ 19:29

ಇದ್‍ಲ್ಲತೆ, ನಾಕಾಯಿತ್ ನಿಂಗಡ ಅಪ್ಪವ್ವನ, ನಿಂಗಡ ಅಣ್ಣತಮ್ಮಣಂಗಳ ಅಕ್ಕತಂಗೆಯಳ, ನಿಂಗಡ ಮನೆನ, ನಿಂಗಡ ತೋಟ ಬೇಲ್‍ನ ಬುಟ್ಟಿತ್ ಬಂದಯಿಂಗಕ್ ನೂರ್ ಪಾಲ್ ಜಾಸ್ತಿ ಕ್‍ಟ್ಟ್‌ವ ಪಿಂಞ ನಿತ್ಯ ಜೀವತ್‍ಲ್ ಪೋಪಕ್ ಹಕ್ಕ್‌ದಾರಂಗಳಾಯಿತ್ ಇಪ್ಪಿರ.

ಮತ್ತಾಯ 25:34

ಅಕ್ಕ ರಾಜ ತಾಂಡ ಬಲ್‌ತೆ ಬರಿಲ್ ಉಳ್ಳ ಜನಳ ನೋಟಿತ್: ನಾಡ ಅಪ್ಪಂಡ ಆಶೀರ್ವಾದ ಪಡ್ಂದಯಿಂಗಳೇ ಬಾರಿ, ಈ ಲೋಕ ಸೃಷ್ಟಿ ಆಪಕ್ ಮಿಂಞ ತಯಾರ್ ಮಾಡ್‍ನ ನಿಂಗಡ ರಾಜ್ಯತ್‍ನ ಎಡ್‌ತೊಳಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 21:8

ಯೇಸು ಅಯಿಂಗಕ್: ನಿಂಗಳ ದಾರೂ ವಂಚನೆ ಮಾಡತನೆಕೆ ಕಾಪಾಡಿಯೊಳಿ, ಎನ್ನಂಗೆಣ್ಣ್‌ಚೇಂಗಿ ದುಂಬ ಜನ ನಾಡ ಪೆದತ್‍ಲ್ ಬಂದಿತ್, ನಾನೇ ಕ್ರಿಸ್ತ, ಕಡೆ ಕಾಲ ಬಾತ್‍ೕಂದ್ ಎಣ್ಣುವ, ಅಯಿಂಗಡ ಬಯ್ಯ ಪೋಕತಿ.

ಅಪೊಸ್ತಲ 20:32

ನಾನ್ ಇಕ್ಕ ನಿಂಗಳ ದೇವಂಗೂ ಅಂವೊಂಡ ಕೃಪೇರ ವಾಕ್ಯ‌ಕೂ ಒಪ್ಪ್‌ಚಿಟ್ಟಿತ್ ಪೋಪಿ. ಈ ಕೃಪೇರ ವಾಕ್ಯ ನಿಂಗಡ ಬಕ್ತಿ ಬೊಳಿವಕು, ಅಂವೊಂಗಾಯಿತ್ ಬೋರೆ ಮಾಡಿತುಳ್ಳ ಪವಿತ್ರವಾನ ಜನಕ್ ಬೆಚ್ಚಿತುಳ್ಳ ಬಾದ್ಯತ್‌ಲ್ ನಿಂಗಕು ಕ್‍ಟ್ಟ್‌ವನೆಕೆ ಮಾಡ್‌ವ.

ಅಪೊಸ್ತಲ 24:25

ಪೌಲ, ಅಯಿಂಗಕ್ ದೇವಡ ನೀತಿನ, ತನ್ನಡಕತ್‍ನ ಪಿಂಞ ಇಂಞು ಮಿಂಞಕ್ ದೇವ ಮಾಡ್‌ವಕುಳ್ಳ ನ್ಯಾಯತೀರ್ಪ್‌ನ ಎಣ್ಣ್‌ವಕ, ಫೇಲಿಕ್ಸಂಗ್ ದುಂಬ ಪೋಡಿಯಾಚಿ. ಅಕ್ಕ ಅಂವೊ ಪೌಲಂಗ್, ಇಕ್ಕ ಇಚ್ಚಕ್ ಮದಿ, ನೀನ್ ಪೋ, ನಾಕ್ ಸಮಯ ಕ್‍ಟ್ಟ್‌ವಕ ನಿನ್ನ ಕಾಕ್‌ಚಿಡುವೀಂದ್ ಎಣ್ಣ್‌ಚಿ.

ರೋಮ್ 1:18

ಸತ್ಯತ್‍ನ ಅನ್ಯಾತ್‌ಲ್‌ ಪುಡ್‌ಚಿತ್ ಬೆಪ್ಪ ಮನುಷ್ಯಂಡ ಎಲ್ಲಾ ತರ ಬಕ್ತಿಯಿಲ್ಲತ ಕಾರ್ಯಕು ಪಿಂಞ ಅನ್ಯಾಯಕು ವಿರೋದವಾಯಿತ್, ದೇವಡ ಚೆಡಿನ ಪರಲೋಕತ್ಂಜ ದೇವ ಕಾಂಬ್‍ಚಿಟ್ಟಂಡುಂಡ್.

1 ಕೊರಿಂಥ 15:33

ಈ ವಿಷಯತ್‍ಲ್ ಮೋಸ ಪೋಕತಿ, ಬೋಂಡತ ಜನಡ ಕೂಟ್, ನಿಂಗಡ ನಲ್ಲ ಗುಣತ್‍ನ ಪಾಳ್ ಮಾಡಿರ್‌ವ.

1 ಕೊರಿಂಥ 15:50

ನಾಡ ಅಣ್ಣತಮ್ಮಣಂಗಳೇ, ನಾನ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ, ನಂಗಡ ಈ ತಡೀರ ಯರ್ಚಿ ಪಿಂಞ ಚೋರೆಯುಳ್ಳ ತಡೀನಗುಂಡ್ ದೇವಡ ರಾಜ್ಯತ್‍ರ ಬಾದ್ಯಕಾರಂಗಳಾಪಕ್ ಕಯ್ಯುಲೆ. ಕಾಂಗತೆ ಆಯಿಪೋಪ ಈ ತಡಿ ಕಾಂಗತೆ ಪೋಕತ ತಡಿಕ್ ಬಾದ್ಯತೆ ಆಪುಲೆ.

1 ಕೊರಿಂಥ 3:16

ನಿಂಗ ದೇವಡ ಆಲಯವಾಯಿತ್ ಉಳ್ಳೀರಾಂದೂ, ನಿಂಗಡ ಹೃದಯತ್‍ಲ್ ದೇವಡ ಆತ್ಮ ವಾಸ ಮಾಡಿಯಂಡ್ ಉಂಡ್‍ೕಂದು ನಿಂಗಕ್ ಗೊತ್ತ್‌ಲ್ಲೆಯಾ?

1 ಕೊರಿಂಥ 5:1

ನಿಂಗಡ ಮದ್ಯತ್‍ಲ್ ವ್ಯಬಿಚಾರ ಕಾರ್ಯ ಆಯಂಡುಂಡ್‍ೕಂದ್ ನೇರಾಯಿತು ಜನ ಪುಕಾರ್ ಮಾಡಿಯಂಡುಂಡ್. ಒಬ್ಬ ಅಂವೊಂಡ, ಚಿಕ್ಕವ್ವಡ ಕೂಡೆ ಬುದ್ದಂಡ್ ಉಂಡ್‍ೕಂದ್ ನಾಕ್ ಸುದ್ದಿ ಬಾತ್. ಈ ತರ ಕಾರ್ಯ ದೇವನ ಗೊತ್ತಿಲ್ಲತ ಜನ ಕೂಡೆ ಮಾಡ್‌ಲೆಲ್ಲಾ?

1 ಕೊರಿಂಥ 5:10

ನಾಡ ಉದ್ದೇಶ ಎಂತ ಎಣ್ಣ್‌ಚೇಂಗಿ, ಈ ಲೋಕತ್‍ಲ್ ಉಳ್ಳ ವ್ಯಬಿಚಾರಿಯಂಗ, ದುಡ್ಡ್‌ರ ಆಸೆ ಉಳ್ಳಯಿಂಗ, ಕಳ್ಳಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗಡ ಕೂಟ್‍ಕ್ ಕೂಡತೀಂದ್ ಒಳ್‍ದಿತ್‌ಲ್ಲೆ. ಅನ್ನನೆ ಆಚೇಂಗಿ, ನಿಂಗ ಈ ಲೋಕತ್‍ನ ಬುಟ್ಟಿತ್ ಪೋಪನೆಕೆ ಆಪಲ್ಲ.

1 ಕೊರಿಂಥ 5:11

ನಾನ್ ನಿಂಗಕ್ ಎಂತ ಒಳ್‍ದಿಯೆ ಎಣ್ಣ್‌ಚೇಂಗಿ, ಯೇಸು ಕ್ರಿಸ್ತನ ನಂಬ್‍ವಂವೋಂದ್ ಎಣ್ಣಿಯಂಡ್, ಆಚೇಂಗಿ ವ್ಯಬಿಚಾರ ಮಾಡಿಯಂಡ್, ದುಡ್ಡ್‌ರ ಮೇಲೆ ಅತಿ ಆಸೆ ಬೆಚ್ಚಂಡ್, ವಿಗ್ರಹ ಆರಾದನೆ ಮಾಡಿಯಂಡ್, ಬಜ್ಜಂಡ್, ಕುಡ್‌ಚಂಡ್, ಜನಳ ವಂಚನೆ ಮಾಡಿಯಂಡ್ ಉಳ್ಳಯಿಂಗಡ ಕೂಡೆ ಕೂಟ್ ಕೂಡತೀಂದ್ ಎಣ್ಣಿಯೆ. ಅಂತ ಜನಡ ಕೂಡೆ ಉಂಬಕ್ ಸಹ ಅಳ್‌ಕತಿ.

1 ಕೊರಿಂಥ 6:10

ಕಳ್ಳಂಗ, ಅತಿ ಆಸೆ ಉಳ್ಳಯಿಂಗ, ಕುಡ್‍ಕಂಗ, ತಪ್ಪಿಲ್ಲತದ್‍ನ ತಪ್ಪ್‍ೕಂದ್ ಎಣ್ಣ್‌ವಯಿಂಗ, ಲೂಟಿಕಾರಂಗ, ಈಂಗ ದಾರೂ ದೇವಡ ರಾಜ್ಯಕ್ ಬಾದ್ಯತೆ ಉಳ್ಳಯಿಂಗಳಾಯಿತ್ ಇಪ್ಪುಲೆ.

1 ಕೊರಿಂಥ 6:18

ಲೈಂಗಿಕ ಪಾಪತ್ಂಜ ಓಡಿ ಪೋಯಿ! ಒರ್ ಮನುಷ್ಯ ಮಾಡ್‌ವ ಬೋರೆ ಏದ್ ಪಾಪವು ಅಂವೊಂಡ ತಡಿಕ್ ಪೊರಮೆ ಆಯಿತಿಪ್ಪ, ಆಚೇಂಗಿ ಲೈಂಗಿಕ ಪಾಪ ಮಾಡ್‌ವಂವೊ ತಾಂಡ ಸ್ವಂತ ತಡಿಕ್ ವಿರೋದವಾಯಿತ್ ಪಾಪ ಮಾಡ್‌ವ.

1 ಕೊರಿಂಥ 6:19

ನಿಂಗಡ ತಡಿ ಪವಿತ್ರಾತ್ಮ ವಾಸ ಮಾಡ್‌ವ ಆಲಯವಾಯಿತ್ ಉಂಡ್‍ೕಂದು, ಪವಿತ್ರಾತ್ಮತ್‍ನ ನಿಂಗಕ್ ದೇವ ಕೊಡ್‍ತತ್‍ೕಂದು ನಿಂಗಕ್ ಗೊತ್ತ್‌ಲ್ಲೆಯಾ? ಆನಗುಂಡ್ ನಿಂಗ ನಿಂಗಕ್ ಸ್ವಂತ ಅಲ್ಲ.

1 ಕೊರಿಂಥ 9:24

ಪೈಪೋಟೀಲ್ ಓಡುವಯಿಂಗ ಎಲ್ಲಾರು ಓಡುವ, ಆಚೇಂಗಿ ಒಬ್ಬಂಗ್ ಮಾತ್ರ ಇನಾಮ್ ಕ್‍ಟ್ಟ್‌ವಾಂದ್ ನಿಂಗಕ್ ಗೊತ್ತುಂಡಲ್ಲ? ಆನಗುಂಡ್ ನಿಂಗಳು, ದೇವ ನಿಂಗಕಾಯಿತ್ ಬೆಚ್ಚಿತುಳ್ಳ ಕಿರೀಟ ಕ್‍ಟ್ಟ್‌ವಕಾಯಿತ್ ಓಡಿ.

2 ಕೊರಿಂಥ 12:21

ಪುನಃ ನಾನ್ ನಿಂಗಡ ಪಕ್ಕ ಬಪ್ಪಕ, ನಾಡ ದೇವ ನಿಂಗಡ ಮಿಂಞ ನನ್ನ ತಗ್ಗ್‌ಚಿಡುವಕಾಯಿತ್, ಮಿಂಞ ಪಾಪ ಮಾಡ್‍ನ ದುಂಬ ಜನ ಅಯಿಂಗ ಮಾಡ್‍ನ ಅಶುದ್ದತ್‍ನ, ಲೈಂಗಿಕ ಪಾಪತ್‍ನ ಪಿಂಞ ತಡೀರ ಮೋಹತ್‍ನ ಬುಟ್ಟಿತ್ ಪಶ್ಚಾತಾಪ ಪಡತೆ ಇಪ್ಪದ್‍ನ ಕಂಡಿತ್ ನಾನ್ ದುಃಖಪಡುವಕ್ ಇಪ್ಪೋಂದ್ ನಾಕ್ ಪೋಡಿ ಆಯಂಡುಂಡ್.

ಗಲಾತ್ಯ 6:7

ನಿಂಗಳ ನಿಂಗಳೇ ಮೋಸ ಮಾಡತಿ, ದೇವನ ದಾರ್‌ಕು ಪರಿಹಾಸ ಮಾಡ್‌ವಕ್ ಕಯ್ಯುಲೆ; ಒರ್ ಮನುಷ್ಯ ಎಚ್ಚಕ್ ಕುರು ಬಿತ್ತ್‌ಚೊ ಅಚ್ಚಕೇ ಅಂವೊಂಗ್ ಫಲ ಕ್‍ಟ್ಟುವ.

ಕೊಲೊಸ್ಸೆ 3:5

ಆನಗುಂಡ್, ಲೈಂಗಿಕ ಪಾಪ, ಪವಿತ್ರಯಿಲ್ಲತ ವಿಷಯ, ಇಚ್ಛೆ, ಕೆಟ್ಟ ಆಸೆ, ದುಷ್ಟತನ, ಅತಿ ಆಸೆಯಾಯಿತುಳ್ಳ ವಿಗ್ರಹ ಆರಾದನೆ, ಈ ಲೋಕತ್‍ರ ಗುಣವಾಯಿತುಳ್ಳ ಇದೆಲ್ಲಾ ನಿಂಗಡಿಂಜ ಪಾಳ್ ಆಪನೆಕೆ ಬುಡ್‍ವಿರ.

ಇಬ್ರಿಯ 12:14

ಎಕ್ಕಾಲು ಎಲ್ಲಾ ಜನಡ ಕೂಡೆಯು ಸಮಾದಾನತ್‍ಲ್ ಬದ್‌ಕಿತ್ ಪವಿತ್ರವಾಯಿತ್ ಇಪ್ಪಕ್ ಪ್ರಯತ್ನ ಪಡಿ; ಪವಿತ್ರವಾಯಿತ್ ಇಲ್ಲತ ಒಬ್ಬನು ಒಡೆಯನ ಕಾಂಬಕ್ ಕಯ್ಯುಲೆ.

ಇಬ್ರಿಯ 12:16

ದಾರ್ ಒಬ್ಬನು ವೇಶಿತನ ಮಾಡ್‌ವಂವೊನಾಯಿತ್ ಇಪ್ಪಕ್ಕಾಗ. ಏಸಾ ಎಣ್ಣ್‌ವಂವೊ ಬರಿ ಕೂಳ್‍ಕಾಯಿತ್ ತಾಂಡ ಅಪ್ಪಯಿಂಜ ಕ್‍ಟ್ಟುವ ಆದ್ಯ ಮೋಂವೊಂಡ ಆಶೀರ್ವಾದತ್‍ನ ಮಾರ್‍ನನೆಕೆ ಬಕ್ತಿ ಇಲ್ಲತಂವೊನಾಯಿತು ಇಪ್ಪಕ್ಕಾಗ.

ಇಬ್ರಿಯ 13:4

ಮಂಗಲತ್‍ನ ಎಲ್ಲಾರು ಗನಪಡ್‌ತಂಡು, ಮಂಗಲ ಕಯಿಚಯಿಂಗ ಅಯಿಂಗಯಿಂಗಡ ವಡಿಯ ಪೊಣ್ಣ್‌ಕ್ ನಂಬಿಕಸ್ತಯಿಂಗಳಾಯಿತ್ ಇಕ್ಕಂಡು; ವೇಶಿಯಳ ಪಿಂಞ ವ್ಯಬಿಚಾರ ಮಾಡ್‌ವಯಿಂಗಳ ದೇವ ನ್ಯಾಯತೀರ್ಪ.

ಯಾಕೋಬ 1:16

ನಾಡ ಅಣ್ಣತಮ್ಮಣಂಗಳೇ, ನಿಂಗ ಮೋಸ ಪೋಕತಿ.

1 ಯೋಹಾನ 3:7

ಪ್ರೀತಿರ ಮಕ್ಕಳೇ ದಾರೂ ನಿಂಗಳ ಈ ವಿಷಯತ್‍ಲ್ ವಂಚನೆ ಮಾಡ್‌ವಕ್ ಅವಕಾಶ ಕೊಡ್‌ಕತಿ. ನೀತಿಲ್ ನಡ್‌ಪಂವೊ, ಕ್ರಿಸ್ತ ನೀತಿವಂತಂವೊನಾಯಿತ್ ಉಳ್ಳನೆಕೆ ತಾನು ನೀತಿವಂತಂವೊನಾಯಿತುಂಡ್.

ಪ್ರಕಟನೆ 21:8

ಆಚೇಂಗಿ, ಬೊತ್ತಿಯಂಡುಳ್ಳಯಿಂಗಳು, ನಂಬಿಕೆ ಇಲ್ಲತಯಿಂಗಳು, ಅಶುದ್ದವಾಯಿತುಳ್ಳಯಿಂಗಳು, ಕೊಲೆ ಮಾಡ್‌ವಯಿಂಗಳು, ವ್ಯಬಿಚಾರ ಮಾಡ್‌ವಯಿಂಗಳು, ಮಾಟಮಂತ್ರ ಮಾಡ್‌ವಯಿಂಗಳು, ವಿಗ್ರಹ ಆರಾದನೆ ಮಾಡ್‌ವಯಿಂಗಳು, ಪೊಟ್ಟ್ ಪರಿಯುವ ಎಲ್ಲಾರು ದಂಡನೆ ಚಾವಾಯಿತುಳ್ಳ ಗಂಧಕತ್‍ಲ್ ತಿತ್ತ್ ಕತ್ತಿಯಂಡಿಪ್ಪ ಕಡಲ್‍ಲ್ ಪಾಲ್‍ದಾರಂಗಳಾಪಾಂದ್ ಎಣ್ಣ್‌ಚಿ.

ಪ್ರಕಟನೆ 22:15

ನಾಯಿಂಗ, ಮಾಟಮಂತ್ರ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವಯಿಂಗ, ಕೊಲೆಮಾಡ್‍ವಯಿಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗ, ಪೊಟ್ಟ್ ಪರಿಯುವಕ್ ಕುಶಿಪಟ್ಟಿತ್, ಅದ್ಂಡ ಪ್ರಕಾರ ಮಾಡ್‌ವಯಿಂಗ ಎಲ್ಲಾರು ಪಟ್ಟಣತ್‍ರ ಪೊರಮೆ ಇಪ್ಪ.