1 ಕೊರಿಂಥ 16:2 - ಕೊಡವ ಬೈಬಲ್

² ಓರೋರ್ ವಾರತ್‍ರ ಆದ್ಯ ದಿವಸತ್‍ಲ್ ನಿಂಗ ಕೂಡಿ ಬಪ್ಪಕ, ಆ ವಾರತ್‍ಲ್ ನಿಂಗ ನಯಿಚ ದುಡ್ಡ್‌ಲ್, ಚೆನ್ನ ದುಡ್ಡ್‌ನ ಬೋರೆ ಮಾಡಿತ್ ಬೆಕ್ಕಂಡು. ನಾನ್ ನಿಂಗಡಲ್ಲಿಕ್ ಬಪ್ಪಕತ್ತನೆ ನಿಂಗ ಪಾರಕಾತಂಡಿಪ್ಪಕ್ಕಾಗ. ಅಕ್ಕ ನಾನ್ ಬಪ್ಪಕ, ಪಣತ್‍ನ ಕೂಟಿತ್ ಬೆಪ್ಪ ಕೆಲಸ ನಿಂಗಕ್ ಇಪ್ಪುಲೆ.

1 ಕೊರಿಂಥ 16:2 ပူးပေါင်းရင်းမြစ်များ

ಆದ್ಯತ್‌ರ ಪುಸ್ತಕ 26:12

ಪಿಂಞ ಇಸಾಕ ಆ ದೇಶತ್‌ಲ್‌ ಬೇಲ್‌ಲ್‌ ಬಿತ್ತ್‌ ಬೀಜಿಯತ್. ಯೆಹೋವ ಅಂವೊನ ಆಶೀರ್ವಾದ ಮಾಡ್‍ನಗುಂಡ್, ಆ ಕಾಲಕ್‌ ನೂರ್‌ ಪಟ್ಟ್‌ ಬೊಳೆ ಕ್‌ಟ್ಟ್‌ಚಿ.

ಆದ್ಯತ್‌ರ ಪುಸ್ತಕ 30:27

ಆಚೇಂಗಿ ಲಾಬಾನ: ನೀಡ ಕಣ್ಣ್‌ಲ್‌ ನಾಕ್‍ ದಯೆ ಕ್‌ಟ್ಟಿತುಂಡೇಂಗಿ ನನ್ನ ಬುಟ್ಟಿತ್‌ ಪೋಕತೆ. ನೀಡಗುಂಡ್‌ ಯೆಹೋವ ನನ್ನ ಆಶೀರ್ವಾದ ಮಾಡಿತುಂಡ್‍ೕಂದ್‌ ನಾಕ್‍ ಸೂಷ್ಮತ್‌ಲ್‌ ಗೊತ್ತುಂಡ್‍ೕಂದ್‌ ಎಣ್ಣ್‌ಚಿ.

ಆದ್ಯತ್‌ರ ಪುಸ್ತಕ 30:30

ನಾನ್‌ ಬಪ್ಪಕ್‌ ಮಿಂಞ ನೀಡ ಪಕ್ಕ ಚೆನ್ನಂಗೇ ಇಂಜತ್. ನಾನ್‌ ಬಂದ ಪಿಂಞ ಯೆಹೋವ ನಿನ್ನ ಆಶೀರ್ವಾದ ಮಾಡ್‌ನಗುಂಡ್‌ ಅದ್‌ ದುಂಬ ಜಾಸ್ತಿ ಆಯಿತುಂಡ್. ಎಕ್ಕ ನಾನ್‌ ನಾಡ ಕುಟುಂಬಕಾಯಿತ್‌ ಸಂಪಾದನೆ ಮಾಡಡ್‍ೕಂದ್‌ ಕ್‍ೕಟತ್.

ಆದ್ಯತ್‌ರ ಪುಸ್ತಕ 32:10

ನೀಡ ಸೇವಕನಾನ ನಾಡ ಮೇಲೆ ನೀನ್‌ ಕಾಟ್‌ನ ಎಲ್ಲಾ ಪ್ರೀತಿಕು, ನೀನ್‌ ಬೆಚ್ಚಿತುಳ್ಳ ಎಲ್ಲಾ ನಂಬಿಕೆಕು ನಾನ್‌ ಎಚ್ಚಕು ಯೋಗ್ಯನಲ್ಲ . ಮಿಂಞ ನಾನ್‌ ಈ ಯೊರ್ದನ್‌ ಪೊಳೆನ ದಾಟ್‌ವಕ ನಾಡ ಕೈಯಿಲ್‌ ಬರಿ ಕೋಲ್‌ ಮಾತ್‌ರ ಇಂಜತ್. ಇಕ್ಕ ನಾನ್‌ ದಂಡ್‌ ಗುಂಪ್‌ಕ್‌ ಎಜಮಾನನಾಯಿತುಳ್ಳ.

ಆದ್ಯತ್‌ರ ಪುಸ್ತಕ 33:11

ದಯಬೆಚ್ಚಿತ್‌ ನಾಡ ಇನಾಮ್‌ನ ಸ್ವೀಕಾರ ಮಾಡ್. ನಾಡ ಮೇಲೆ ದೇವ ದುಂಬ ಕನಿಕರ ಬೆಚ್ಚನಗುಂಡ್‌ ನಾಕ್‍ ಬೋಂಡಿಯದೆಲ್ಲ ಉಂಡ್‍ೕಂದ್‌ ಎಣ್ಣ್‌ಚಿ. ಯಾಕೋಬ ದುಂಬ ಒತ್ತಾಯ ಮಾಡ್‌ನಂಗ್, ಏಸಾವ ಸ್ವೀಕಾರ ಮಾಡ್‌ಚಿ.

ಮಾರ್ಕ 14:8

ಅವಕ್ ಎಂತ ಕಯ್ಯುವ ಅದ್‍ನ ಅವ ಮಾಡ್‍ಚಿ. ನನ್ನ ಪೂಪಂಗ್ ಮಿಂಞಲೇ ಅವ ಈ ತರ ಸುಗಂದ ತೈಲತ್‌ನ ಬೂಕಿತ್ ನನ್ನ ತಯಾರ್ ಮಾಡ್‍ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 16:10

ಚೆರಿಯ ಚೆರಿಯ ವಿಷಯತ್‍ಲ್ ನಂಬಿಕಸ್ತನಾಯಿತುಳ್ಳಂವೊ ಬಲ್ಯ ಬಲ್ಯ ವಿಷಯತ್‍ಲು ನಂಬಿಕಸ್ತನಾಯಿತಿಪ್ಪ. ಚೆರಿಯ ವಿಷಯತ್‍ಲ್ ನಂಬಿಕಸ್ತನಾಯಿತ್ ಇಲ್ಲತಂವೊ ಬಲ್ಯ ವಿಷಯತ್‍ಲು ನಂಬಿಕಸ್ತನಾಯಿತ್ ಇಪ್ಪುಲೆ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 24:1

ವಾರತ್‍ರ ಆದ್ಯ ದಿವಸ ನಾರಾಚೆ ಪೊಲಾಕ ನೇರತೆ ಸೂರ್ಯ ಉದಿಪಕ್ ಮಿಂಞಲೇ ಆ ಪೊಣ್ಣಾಳ್‍ಂಗ ತಯಾರ್ ಮಾಡ್‍ನ ಸುಗಂದ ವಾಸನೆರ ಮದ್ದ್‌ನ ಎಡ್‍ತಂಡ್ ಗೋರಿಕ್ ಪೋಚಿ.

ಯೋಹಾನ 20:19

ಆ ದಿವಸ ವಾರತ್‍ರ ಆದ್ಯ ನಾಳಾನ ನಾರಾಚೆ ಆಯಿತ್ಂಜತ್. ಅಂದ್ ಬೈಟಾಪಕ, ಯೇಸುರ ಶಿಷ್ಯಂಗ ಒಟ್ಟ್ ಕೂಡಿತ್ ಇಂಜ ಜಾಗತ್‍ಲ್, ಯೆಹೂದ್ಯಂಗಕ್ ಬೊತ್ತಿಯಂಡಿಂಜಗುಂಡ್, ಪಡಿ ಇಟ್ಟಿತ್ ಒಳ್‍ಲ್ ಇಂಜತ್. ಅಕ್ಕ ಯೇಸು ಅಲ್ಲಿಕ್ ಬಪ್ಪಂಜಿ ಅಯಿಂಗಡ ಮದ್ಯತ್‍ಲ್ ನಿಂದಂಡ್: ನಿಂಗಕ್ ಸಮಾದಾನಾಂದ್ ಎಣ್ಣ್‌ಚಿ.

ಯೋಹಾನ 20:26

ಪುನಃ ಎಟ್ಟ್ ದಿವಸ ಆನ ಪಿಂಞ, ಯೇಸುರ ಶಿಷ್ಯಂಗ ಪಡಿ ಇಟ್ಟಂಡ್ ಒಳ್‍ಲ್ ಇಂಜತ್. ಅಯಿಂಗಡ ಕೂಡೆ ಇಕ್ಕ ತೋಮ ಸಹ ಇಂಜತ್. ಎಲ್ಲಾ ಪಡಿಕ್ ಬೀಗ ಇಟ್ಟಿತ್ಂಜತ್. ಅಕ್ಕ ಯೇಸು ಅಯಿಂಗಡ ಮದ್ಯತ್‍ಲ್ ಬಪ್ಪಂಜಿ, ನಿಂಗಕ್ ಸಮಾದಾನ ಇಕ್ಕಡ್‍ೕಂದ್ ಎಣ್ಣ್‌ಚಿ.

ಅಪೊಸ್ತಲ 20:7

ವಾರತ್‍ರ ಆದ್ಯ ದಿವಸತ್‍ಲ್ ನಂಗ ಒಟ್ಟಿನ ಪೊಳಿಪ ಸಮಯಕಾಯಿತ್ ಕೂಡಿ ಬಂದಿತ್ಂಜತ್. ಅಲ್ಲಿ ಕೂಡಿ ಬಂದಿತ್ಂಜ ಜನಡ ಕೂಡೆ ಪೌಲ ಪ್ರಸಂಗ ಮಾಡಿಯಂಡಿಂಜತ್. ಪಿತ್ಯಾಂದ್ ಪೌಲ ಅಲ್ಲಿಂಜ ಪೊರಟಿತ್ ಪೋಂಡೂಂದ್ ಇಂಜಗುಂಡ್, ನಡ್‍ಪಾದ್ರೆಕತ್ತನೆ ಅಯಿಂಗಡ ಕೂಡೆ ಪೌಲ ತಕ್ಕ್ ಪರ್ಂದಂಡ್ ಪ್ರಸಂಗ ಮಾಡಿಯಂಡ್ ಇಂಜತ್.

2 ಕೊರಿಂಥ 8:10

ಈ ವಿಷಯತ್‍ಲ್ ನಾಡ ಆಲೋಚನೆನ ಎಣ್ಣ್‌ವಿ; ಇದ್‍ನ ಮಾಡಂಡೂಂದ್ ಒರ್ ಕಾಲಕ್ ಮಿಂಞ ಸುರು ಮಾಡ್‍ನದ್‍ಲ್ ಪಿಂಞ ಅದ್‍ನ ಮಾಡಂಡೂಂದ್ ಮಿಂಞಕ್ ಎಡ್‍ತಂಡ್ ಪೋಪದ್‍ಲ್ ಕುಶಿಪಡ್‌ವಕು ನಿಂಗಕ್ ಯೋಗ್ಯವಾಯಿತ್‌ಪ್ಪ.

ಪ್ರಕಟನೆ 1:10

ಒಡೆಯಂಡ ದಿವಸತ್‍ಲ್ ಪವಿತ್ರಾತ್ಮಂಡ ಶಕ್ತಿ ನನ್ನ ಅಂವೊಂಡ ಪುಡ್‍ತತ್‍ಲ್ ಬೆಚ್ಚತ್. ಅಕ್ಕ ನಾಡ ಬಯ್ಯ ವಾಲಗತ್‍ರ ಸದ್ದ್‌ರನೆಕೆ ಒರ್ ಜೋರಾನ ಬಲ್ಯ ವಾಣಿ ನಾಕ್ ಕ್‍ೕಟತ್.