1 ಕೊರಿಂಥ 11:32 - ಕೊಡವ ಬೈಬಲ್

³² ಆಚೇಂಗಿಯು, ಒಡೆಯ ನಂಗಳ ನ್ಯಾಯತೀರ್ಪ್ ಮಾಡಿತ್ ಶಿಕ್ಷನೆ ತಪ್ಪಗುಂಡ್, ಈ ಲೋಕತ್‍ರ ಕೂಡೆ ನಂಗಳ ಅಂವೊ ಕಂಡನೆ ಮಾಡುಲೆ.

1 ಕೊರಿಂಥ 11:32 ပူးပေါင်းရင်းမြစ်များ

ರೋಮ್ 3:19

ದೇವಡ ನ್ಯಾಯಪ್ರಮಾಣತ್‍ಲ್ ಎಣ್ಣುವ ವಿಷಯವೆಲ್ಲ, ನ್ಯಾಯಪ್ರಮಾಣಕ್ ಒಳಪಟ್ಟಯಿಂಗಕ್ ಎಣ್ಣಿಯಂಡುಂಡ್‍ೕಂದ್ ನಂಗಕ್ ಇಕ್ಕ ಗೊತ್ತುಂಡ್. ಅನ್ನನೆ ದಾರೂ ನಂಗ ಪಾಪಿ ಅಲ್ಲಾಂದ್ ಎಣ್ಣುವಕ್ ಕಯ್ಯತನೆಕೆ, ಈ ಲೋಕತ್‍ಲ್ ಉಳ್ಳ ಎಲ್ಲಾರು ಅಂವೊಂಗ್ ಲೆಕ್ಕ ಕೊಡ್‍ಪನೆಕೆ ಆಚಿ.

ರೋಮ್ 5:16

ಇದ್‍ಲ್ಲತೆ, ಒಬ್ಬ ಪಾಪ ಮಾಡ್‍ನಗುಂಡ್ ಕ್‍ಟ್ಟ್‌ನ ತೀರ್ಪ್, ದೇವ ತಪ್ಪ ಇನಾಮ್‍ಕ್ ಸಮವಾನದಲ್ಲ; ಆ ಒರೇ ಪಾಪಕಾಯಿತ್ ಕ್‍ಟ್ಟ್‌ನ ತೀರ್ಪ್ ನಾಶ ಆಪಕ್ ಕಾರಣ ಆಚಿ; ಆಚೇಂಗಿ ಕೃಪೇರ ಇನಾಮ್ ಬಯ್ಯ ಬಂದ ದುಂಬ ಅಪರಾದತ್‍ನ ತಳ್ಳಿತ್, ಅಪರಾದ ಇಲ್ಲೇಂದ್ ನೀತಿ ತಪ್ಪ ತೀರ್ಪ್‌ಕ್ ಕಾರಣ ಆಚಿ.

1 ಕೊರಿಂಥ 1:20

ಜ್ಞಾನಿ ಎಲ್ಲಿ? ನ್ಯಾಯಪ್ರಮಾಣತ್‍ರ ಉಪಾದ್ಯ ಎಲ್ಲಿ? ಶಾಸ್ತ್ರಿ ಎಲ್ಲಿ? ಈ ಲೋಕತ್‍ಲ್ ನಲ್ಲ ತರ್ಕ ಮಾಡ್‌ವಯಿಂಗ ಎಲ್ಲಿ? ಈ ಲೋಕತ್‍ರ ಜ್ಞಾನತ್‍ನ ದೇವ ಪುಚ್ಚಿತನವಾಯಿತ್ ಮಾಡಿತುಂಡಲ್ಲ.

1 ಕೊರಿಂಥ 1:21

ಎನ್ನನೆ ಎಣ್ಣ್‌ಚೇಂಗಿ, ಮನುಷ್ಯಂಡ ಬುದ್ದಿಲ್ ಈ ಲೋಕ ಅಂವೊನ ಗೊತ್ತ್ ಮಾಡಿತ್‌ಲ್ಲೇಂದ್, ದೇವಕ್ ಅಂವೊಂಡ ಜ್ಞಾನತ್‍ಲ್ ಗೊತ್ತುಂಡ್. ಅನ್ನನೆ ನಂಗ ಎಣ್ಣುವ ಈ ತಕ್ಕ್‌ನ ಲೋಕತ್‍ರ ಜನ ಜ್ಞಾನ ಇಲ್ಲತ ಬೋದನೇಂದ್ ಎಣ್ಣುವ. ಆಚೇಂಗಿ ಅದ್‍ನ ನಂಬುವ ಜನತ್‍ನ ರಕ್ಷಣೆ ಮಾಡ್‌ವಕ್, ದೇವಕ್ ಕುಶಿಯಾಚಿ.

1 ಕೊರಿಂಥ 11:30

ಅದ್ಂಗಾಯಿತ್ ನಿಂಗಡಲ್ಲಿ ದುಂಬ ಜನ ಬಲಹೀನವಾನಯಿಂಗಳು, ಕಾಯಿಲೆ ಉಳ್ಳಯಿಂಗಳು ಆಯಿತುಳ್ಳಿರ. ಚೆನ್ನ ಜನ ಚತ್ತ್ ಪೋಚಿ.

1 ಕೊರಿಂಥ 11:31

ಆನಗುಂಡ್ ನಂಗಳ, ನಂಗ ನೇರಾಯಿತು ಪರೀಕ್ಷೆ ಮಾಡ್‍ಚೇಂಗಿ ದೇವಡ ನ್ಯಾಯತೀರ್ಪ್‌ಕ್ ಒಳಪಡ್‌ಲೆ.

1 ಕೊರಿಂಥ 11:33

ಆನಗುಂಡ್ ನಾಡ ಅಣ್ಣತಮ್ಮಣಂಗಳೇ, ನಿಂಗ ಒಕ್ಕಚೆ ಕೂಡಿ ಬಂದಿತ್ ಕ್ರಿಸ್ತಂಡ ಚಾವ್‍ನ ಗೇನ ಮಾಡಿತ್ ಉಂಬಕ, ಒಬ್ಬೊಬ್ಬಂಗಾಯಿತ್ ಪಾರಕಾತಂಡ್ ಇರಂಡು.

1 ತಿಮೊಥೆಯ 1:20

ಹುಮೆನಾಯ ಪಿಂಞ ಅಲೆಕ್ಸಾಂದ್ರ ಅನ್ನನೆ ಉಳ್ಳಯಿಂಗಳೇ. ಅಯಿಂಗ ದೇವ ದೂಷಣೆ ಮಾಡತೆ ಇರಂಡೂಂದ್ ಅಯಿಂಗಕ್ ಶಿಕ್ಷೆ ಕ್‍ಟ್ಟ್‌ವಕಾಯಿತ್ ನಾನ್ ಅಯಿಂಗಳ ಸೈತಾನಂಗ್ ಒಪ್ಪ್‌ಚಿಟ್ಟಿಯೆ.

1 ಯೋಹಾನ 5:19

ಇಡಿ ಲೋಕ ಸೈತಾನಂಡ ಕೈಯಿಲ್ ಉಂಡೇಂಗಿಯು, ನಂಗೆಲ್ಲಾ ದೇವಕ್ ಕೂಡ್‍ನಯಿಂಗಾಂದ್ ನಂಗಕ್ ಗೊತ್ತುಂಡ್.

ಪ್ರಕಟನೆ 3:19

ನಾಕ್ ದಾಡ ಮೇಲೆ ಕುಶಿ ಉಂಡೋ, ಅಯಿಂಗಕ್ ಜೋರ್ ಮಾಡಿತ್, ಅಯಿಂಗಕ್ ಶಿಕ್ಷೆ ತಪ್ಪಿ. ಆನಗುಂಡ್ ನೀನ್ ಎಚ್ಚರತ್‍ಲ್ ಇಂಜಿತ್ ದೇವಡ ಪಕ್ಕ ತಿರಿತ್ ಪಶ್ಚಾತಾಪ ಪಡ್‌ವಿಯ.