Yuda 1:25 - Eriragano Erihya

²⁵ Weeki ngʼo Waryubha omumwemwe, Omutuurya weetu kwa okuhitira ku Yeesu Kiristu Omukuru weetu. Waryubha agungibhwe. Weeki yaana obhukuru, eginguru, na obhutungi, okurwa akare, bhoonwego, na kora koko. Amina.

Yuda 1:25 ပူးပေါင်းရင်းမြစ်များ

Mataayo 6:13

Otakaatutiga tusohe mumasakyo, nawe, otutuurye na omusarya urya Erisambwa. [Kwa okubha obhukama na eginguru na obhukuru, m-byaho, koko na koko! Amina.]”

Ruuka 1:47

erajomererwa Waryubha, Omutuurya waani,

Yoana 4:22

Bheenyu Abhasamaria murasyengera kinú mutamanyiri. Nawe, bheetu Abhayahudi turasyengera kinú tumanyiri, kwa okubha Waryubha arituurya abhantu kwa okuhitira ku Bhayahudi.

Yoana 5:44

Bheenyu muhanjiri okugungibhwa na abharikyenyu, nawe, mutakutuna eginkuma ginú girarwa ku Waryubha omumwemwe. Bhoono, muratura egaki okunyikirirya oni?

Abharuumi 11:33

Niwi unú aratura okumanya kya ego bhuringi obhuniibhi, egintungwa na obhumanyi bhwa Waryubha? Bhiragendererya okwanga okumanyikana kubheetu! Atariho omuntu unú aratura okumanya obhwamuri bhwaye, kasi okugigamba eginjira gyaye.

Abharuumi 11:36

Waryubha ngʼo yaabhumba ebhintu bhyonsego. Nu-kuhitira kumwene ega, ebhintu bhyonsego bhiragendererya okubha-ho, na ebhintu bhyonsego bhiriho kurusumo rwa obhukuru bhwaye. Waryubha agungibhwe koko! Amina.

Abharuumi 16:27

Waryubha omwenego, ngʼo yaana egintungwa gyonsego. Weeki ngʼo abhenga aragungibhwa koko, okuhitira ku Yeesu Kiristu! Amina.

Abhaefeso 1:8

Weeki yaatwaruhirya eriruguto ryaye bhukongʼu, hamwi na okutuhaana egintungwa na obhungʼeeni bhonsego.

Abhaefeso 3:10

Yaakora ego, naho kwibhaga rinu, egintungwa gyaye gya amanga amaaru, gimanyikane kubhakuru na abhatungi bha murwire, kwa enjira ya erikanisa.

Abhaefeso 3:21

Agungibhwe kwa obhukuru bhwaye kubhantu bhaaye na ku Kiristu Yeesu, kora eginyibhuro gyonsego, koko na koko. Amina.

1 Timoteo 1:17

Waryubha ngʼo Omukama unú ataana obhuteero, atakukwa kora atakumaahikana, weeki m-mumwemwe. Weeki asuukwe na agungibhwe koko na koko. Amina.

1 Timoteo 2:3

Eringʼana rinu ni-rijomu, kweki riramungʼarira Waryubha Omutuurya weetu.

Tiito 2:10

Bhatabheebhira, nawe, bhoorokye obhuheene bhwabho bhonsego, naho emirimu gyabho gikore abhantu abhandi bhajomererwe na ameehigiryo ga Waryubha Omutuurya weetu.

Tiito 2:13

Tubhenga ego, eribhaga turaganyirira orusiku rwa enonkwe, rurya rwa okuhunjuka kwa Yeesu Kiristu. Orusiku ruyo, arimaahikana mubhukuru bhwaye. Weeki ngʼo Waryubha weetu omukuru, na ngʼo Omutuurya weetu.

Tiito 3:4

Nawe, Waryubha Omutuurya weetu, akatoorokya ega, weeki m-muserenʼya na atuhanjiri bhukongʼu, akatutuurya.

Abhaebhurania 13:8

Yeesu Kiristu atakwihunjura. Weeki ngʼ-uryaurya, ejo, reero, na kora koko na koko.

1 Petero 4:11

Nyoore omuntu yaana amangʼana ga okugamba, agagambe muna gararwa ku Waryubha. Na nyoore omuntu arakorera abharikyaye emirimu, akore kwa obhuturo bhunú bhurarwa ku Waryubha. Kwa enjira inu, Waryubha aragungibhwa kumangʼana gonsego, kwa ekisigo kya Yeesu Kiristu. Omwene yaana obhukuru na eginguru, koko na koko. Amina.

2 Petero 1:1

Enyarubha inu, erwiri kuoni Simoni Petero, omugaya na omutumwa wa Yeesu Kiristu. Ndabhangʼoorera bheenyu bhanú muheerwe eimani ya obhwera inú bheetu bhonse tuheerwe. Muheerwe eimani iyo, kwa okubha Waryubha, Omutuurya weetu Yeesu Kiristu, yaakora ganú gareenderwa.

2 Petero 3:18

Nawe, mugendererye okunaga kwiruguto na okumumanya Omukuru na Omutuurya weetu Yeesu Kiristu. Weeki agungibhwe, bhoonwego na kora koko!

Obhukundukuri 1:6

Yaatukora okubha obhukama bhwa abhasyengeri, naho tumukorere emirimu Waryubha, Esewaabho. Yeesu agungibhwe! Weeki yaana eginguru koko na koko! Amina.