Abhagaratia 4:4 - Eriragano Erihya

⁴ Nawe, eribhaga rinú ryaringa riseemiibhwe hanú ryahika, Waryubha akamutuma Omwana waaye mukyaro munu. Omwana uyo, yeebhurwa na omukari kya ego na bheetu tweebhurwa, akabha insi wa amaragiriryo.

Abhagaratia 4:4 ပူးပေါင်းရင်းမြစ်များ

Mataayo 1:23

“Maaha, unú ataakataariri na omusaaja arigega enda, weeki ariibhura omwana wa ekimura. Bharimutoga eriina ryaye Emanueri.” Ensonga ya eriina rinu niiga, “Waryubha aringi hamwi na bheetu.”

Mataayo 3:15

Yeesu akamukyukya ega, “Uuwe ikirirya umbatiije bhoonwego, kwa okubha niigo tureenderwa okukunaanʼya obhuheene bhunú Waryubha areenda.” Kimwi Yoana akamwikiririrya akamubhatiija.

Mataayo 5:17

“Mutamanya ega, niijiri naho nduusye-ho amaragiriryo ga Musa, kasi ganú gaagambwa na abharooti. Tiigo-ha, nawe, naaja okukunaanʼya ganú garingi mumaragiriryo.

Mariko 1:15

Yaaringa aragamba ega, “Eribhaga rinú ryarootwa, rihikiri. Kweki, obhukama bhwa Waryubha bhuringi haangʼi! Mbe, mutige obhusarya bhwenyu, mumwihunjurire Waryubha na okwikirirya Amangʼana Amajomu gayo.”

Ruuka 1:31

Bhoono, oragega enda, wibhure omwana wa ekisaaja, omutoge Yeesu.

Ruuka 1:35

Maraika akakyukya ega, “Omutima Omurabhu arikuujira, na obhuturo bhwa Waryubha wa eguru ya bhyonsego, bhurikukundikirya. Kwa ego, omwana unú oriibhura, aribha omwahurwa na aribhirikirwa Omwana wa Waryubha.

Ruuka 2:7

Akeebhura omwana wa ekisaaja omutangi, muriigo rya egintugo. Akamukundikirya emyenda gya ekyana, akamuraarya mwitubha rya okuriisya-mo egintugo. Yeebhurira muyo, kwa okubha bhataanyoora omweya gwa okuraara, muginyumba gya abhageni.

Ruuka 20:44

Bhoono, nyoore Daudi aramubhirikira Kiristu ega, ‘Omukuru,’ Kiristu aratura egaki kweki okubha omuhiiri waaye?”

Yoana 1:14

Mbe, Engʼana uyo, akabha omuntu, akeekara gati yeetu. Na bheetu tukarora obhukuru bhwaye, obhukuru bhwa Omwana omumwemwe wa Taata Waryubha. Yaaringa na eriruguto erinene na obhuheene bhonsego.

Yoana 10:36

Taata ngʼo yaansora na okuntuma mukyaro munu. Mbe bhoono, kwaki muragamba ega, oni ndamutuka Waryubha, hanú ndagamba ega, ‘Oni m-Mwana wa Waryubha’?

Yoana 3:16

Waryubha yaahanja bhukongʼu abhantu bhonsego bha mukyaro. Kiyo nkyo kyakora akatuma Omwana waaye omumwemwe yaaje mukyaro, naho, kira omuntu unú aramwikirirya atabhura, nawe, abhe na obhuhoru bhwa koko.

Yoana 6:38

Oni ntaaja okurwa murwire, naho mbe ndakora kya ego oni ndeenda, nawe, mbe ndakora kya ego Taata unú yaantuma areenda.

Yoana 8:42

Yeesu akabhakyukya ega, “Nyoore Waryubha akaabheeri Eseweenyu, mukaanhanjiri, kwa okubha naarwa ku Waryubha, na bhoono ndingi hanu. Oni ntaaja kwa obhutungi bhwani, nawe, Waryubha ngʼo yaantuma.

Amakorwa ga Abhatumwa 1:7

Akabhakyukya ega, “Taata kwa obhutungi bhwaye omwene, yaamura ega, n-duuha gariibhuka. Bheenyu mutakwenderwa okumanya eribhaga na orusiku rwa gayo.

Abharuumi 1:3

Amangʼana Amajomu gayo, ngo amangʼana eguru ya Omwana waaye. Omwana uyo, yeebhurwa kya omuntu, muhamati ya omukama Daudi.

Abharuumi 15:8

Muhiituke ega, Kiristu yaaja okubha omukori wa emirimu wa Abhayahudi. Yaaja naho abhoorokye ega, Waryubha m-muheene, na kwa enjira ya Kiristu, Waryubha akuneenʼye egindago gyonsego ginú yaaraga bhajaaji weetu.

Abharuumi 5:6

Mbe, hanú bheetu twaringa tukyari abhanyooheeru, Kiristu yaaja akatukwira bheetu abhasarya, hanú ryahika eribhaga rinú Waryubha yaaringa aseemerye.

Abharuumi 8:3

Amaragiriryo gataaringa na eginguru gya okutukora twiyagaare, kwa ekisigo kya obhusimuka bhwetu bhwa obhusarya. Nawe, kinú amaragiriryo gayo gataatura okukora, Waryubha yaakora. Yaatuma Omwana waaye omumwemwe, yaaje kubheetu mukyaro, aringi omuntu kya bheetu abha obhusarya, naho abhe ekimwenso kurusumo rwa obhusarya bhwetu. Kwa okukora ego, Waryubha yaabhuturira ekiina eginguru gya obhusarya mubhuhoru bhwetu.

Abharuumi 9:5

Abhaisiraeri bhayo, mbo bhaasimuka okurwa kubhajaaji waabho, bha Abhurahamu, Esaaka na Yakobho. Kiristu yaaringa Omwisiraeri okurekana na obhusimuka bhwaye bhwa okubha omuntu. Kiristu unú ngʼ-Waryubha, Omukuru wa bhyonsego, agungibhwe koko! Amina.

Abhaefeso 1:10

Ensonga ya Waryubha niiga, hanú eribhaga ryaye rinú yaaseemya ririhika, arikumanʼya hamwi ebhibhumbwa bhyonsego, ebhya murwire na ebhya mukyaro, na okubhikora bhibhe insi ya obhutungi bhwa Kiristu.

Abhakorosai 2:14

Waryubha aturihiiri esiiri ya obhusarya bhwetu kwa enjira ya Yeesu okutukwira kumusarabha. Yaaruusya-ho amangʼoore ga esiiri ganú gaatujongeranga, akagaruusya-ho kimwi kwa okugabhamba kumusarabha.

1 Timoteo 2:6

Weeki yaaruusya obhuhoru bhwaye omwene, naho atungurye abhantu bhonsego. Hayo nho, Waryubha yoorokya obhuhanje bhwaye, kwibhaga rinú rireenderwa.

1 Timoteo 3:16

Obhuheene bhunú Waryubha yaatutubhurira m-bwa okuruguurya, bhunú tureekirirya m-bunu ega, Kiristu yeeyorokya kwa enjira ya omubhiri, akoorokibhwa na Omutima Omurabhu ega, m-muheene, bhamaraika bhakamurora, amangʼana eguru yaaye, gakaraarikwa kubhantu bha ebhyaro bhyonsego, akeekiriribhwa na abhantu bha ebhyaro bhyonsego, na akasakwa okugya eguru mubhukuru.

Abhaebhurania 2:14

Mbe, kwa okubha abhaana bhayo bhaana emibhiri na amanyinga, Yeesu wonse yaaja na omubhiri kya bheetu. Yaakora ego, naho okuhitira okukwa kwaye, ahige eginguru gya Erisambwa rinú riina obhuturo bhwa okukora abhantu bhabhenga bharakwa.

Abhaebhurania 9:10

Amangʼana gayo, gaaringa eguru ya ebhyakurya, ebhyokunywa na okwiraama emibhiri, gayo m-mangʼana ga kibhara ego. Gonsego gayo garihwa eribhaga rinú Waryubha arikyukya ebhintu okubha ebhihya.

1 Yoana 4:14

Na bheetu turuuji na tureemiririra ega, Taata Waryubha yaatuma Omwana waaye abhe Omutuurya wa ekyaro.

1 Yoana 4:2

Enjira ya okumanya ega, omuntu aroorokereribhwa na Omutima wa Waryubha, ngʼ-inu. Omuntu unú areekirirya ega, Yeesu Kiristu yaaja mukyaro akabha na omubhiri kya omuntu, uyo ngʼo aroorokereribhwa na Omutima wa Waryubha.