Abhagaratia 2:9 - Eriragano Erihya

⁹ Mbe, hanú Yakobho, Kefa na Yoana, bhanú bhaaringa abhatungi abhakuru, bhaarora eriruguto rinú naahaanwa na Waryubha, bhakatugwata okubhoko oni na Bharinabha, naho okoorokya ekimanyiiriryo kya obhugwatani bhwetu. Tukeekiriranʼya ega, bheetu tugende okukora emirimu kubhantu bhanú bhataringi Abhayahudi, na bheeki bhakore emirimu ku Bhayahudi.

Abhagaratia 2:9 ပူးပေါင်းရင်းမြစ်များ

Mataayo 16:18

Oni nonse ndakukeerya ega, uuwe nuuwe Petero, unú oringi eritare, na eguru ya eritare rinu, ndihagaaja-ko erikanisa ryani, na eginguru gya oruku gitaririhiga.

Ruuka 22:8

Yeesu akatuma Petero hamwi na Yoana, akabhakeerya ega, “Mugende mutuseemerye ebhyakurya bhya enyangi ya Epasaka, naho tuuje turye hamwi.”

Yoana 1:42

Kimwi Andurea akamuhira Simoni ku Yeesu. Yeesu akamumaahirira Simoni, akamara akamukeerya ega, “Uuwe n-Simoni, omwana wa Yoana. Nawe bhoono, oraabhirikirwenga ega, Kefa.” Eriina riyo, mu Kiyunani, n-Petero, ensonga yaaryo niiga, “Eritare”.

Amakorwa ga Abhatumwa 12:17

Petero akabhoorokya kwa okubhoko ega, bhakire, akabhatondera kya ego Omukuru amuruusirye mwigereja. Akagendererya okubhakeerya ega, “Amangʼana ganu, mukeerye Yakobho na abhahiiri bheetu abhandi kuimani.” Kimwi Petero akarwa hayo, akagya ahasi ahandi.

Amakorwa ga Abhatumwa 15:13

Hanú bhaamara okuhaira, Yakobho wonse, akagamba ega, “Abhahiiri bhaani kuimani, munyitegeerere.

Amakorwa ga Abhatumwa 15:7

Hanú ryahwa eribhaga eritambi, bhakyahakaananʼya, Petero akeemirira, akabhakeerya ega, “Bheenyu abhahiiri bhaani kuimani, mumanyiri ega, Waryubha yaansora oni gati yeenyu okurwa kubhwambiro, naho kwa omunwa gwani, abhantu bhanú bhataringi Abhayahudi bheegwe Amangʼana gaaye Amajomu, okuhikira bhamwikirirye.

Amakorwa ga Abhatumwa 4:36

Mbe, yaaringa-ho Omuraawi umwi. Omuraawi uyo, yaabhirikirwanga Yusufu, omwibhurwa wa kwiginga rinú ryabhirikirwanga ega, Kipuro. Abhatumwa bha Yeesu, bhaaringa bhamutogeri ega, Bharinabha, ensonga yaaye niiga, “Owa okubhateremya omutima”.

Abharuumi 1:5

N-kuhitira kumwene, Waryubha yaangʼaana eriruguto rya okubha omutumwa waaye, naho abhantu bhonsego bhanú bhataringi Abhayahudi, bhature okumwikirirya na okumwigwa Omukuru Yeesu, na eriina ryaye rigungibhwe.

Abharuumi 12:3

Bhoono, Kiristu yangʼeeri eriruguto mbe omutumwa waaye. Kwa ego, ndakeerya kira oumwi weenyu ega, ateerora ega, yaana obhwera okukira kya ego aringi, nawe, abhe na egintungwa. Kira omuntu aheerwe endengo yaaye ya eimani na Waryubha.

Abharuumi 15:15

Kora ego, mbangʼooreeri amangʼana agandi munyarubha inu kwa obhuhaari, naho mbahiitukye amangʼana gayo. Nkoreri ego, okurekana na eriruguto rinú Waryubha yangʼeeri,

1 Abhakorinto 15:10

Nawe, n-kwa eriruguto rya Waryubha nkyo kirakora oni m-mutumwa. Eriruguto ryaye kuoni m-bwera obhunene, kwa okubha okurekana na eriruguto riyo, naakora emirimu okukira abhatumwa bhonsego. Ntaakora gayo kwa eginguru gyani omwene, nawe eriruguto rya Waryubha ndyo ryakora emirimu hamwi na oni.

2 Abhakorinto 11:5

Oni ntakwirora ega, ndingi omutumwa omuke okukira bhanú muragamba ega, mbo abhatumwa abhakuru.

2 Abhakorinto 12:11

Ngambiri kya omukangi, kwa okubha bheenyu mbo mukoreri ngambe ego. Bheenyu mwaringa mureenderwa okungungya. Onyoora ndamaahikana ega, ntakwenderwa, oni ntaringi omutumwa omuke okukira bhanú muragamba ega, mbo abhatumwa abhakuru.

2 Abhakorinto 8:4

Bhaatukomereryanga ega, bhonse bhanyoore omweya gwa okugwatana kumirimu giyo gya okubheera abheekirirya bha Yerusaremu.

Abhagaratia 1:16

okuntubhurira kya ego Omwana waaye aringi. Yaakora ego, naho ndaarike Amangʼana Amajomu eguru ya Omwana waaye uyo, kubhantu bhanú bhataringi Abhayahudi. Oni ntaatuna omuntu owa okuntongera kinú ndaakore.

Abhagaratia 1:18

Hanú emyaka esatu gyahwa, nkagya Yerusaremu, naho mmaahane na Kefa eyo. Nkeekara owaaye eginsiku ekumi na etaanu egyenego.

Abhagaratia 2:1

Hanú gyahita emyaka ekumi na ena, nkariina kweki okugya Yerusaremu. Nkagega Bharinabha, nkagega na Tiito wonse, tukagya nawe.

Abhagaratia 2:2

Naariina okugya Yerusaremu kwibhaga riyo, kwa okubha Waryubha yaaringa yaantubhuriiri ega, ngende. Hanú naahika, nkamaahana kabhejyo na abhatungi bha erikanisa bhanú bharasuukwa bhukongʼu na abhantu. Kimwi nkabhakeerya Amangʼana Amajomu ganú naaringa ndaraarikira abhantu bhanú bhataringi Abhayahudi. Naamura okukora ego, naho emirimu ginú naaringa nkoreri na ginú ndagendererya okukora gitariija okubha gya bhusa.

Abhagaratia 6:3

Mbe, omuntu wowonse unú areerora ega, yaana obhwera okukira abharikyaye, enu ataana obhwera bhobhonse, uyo areengʼeena omwene!

Abhaefeso 2:20

Bheenyu mubheeri kya enyumba inú ehagaajirwe kubhurusa, na obhurusa bhuyo, m-batumwa na abharooti, na Kiristu Yeesu omwene n-kya erigina erikuru rya obhurusa bhuyo.

Abhaefeso 3:8

Onyoora oni ngʼ-wa insi okukira abhantu bha Waryubha bhonsego, nawe, Waryubha yaangʼaana eriruguto rinu, okuraarikira abhantu bhanú bhataringi Abhayahudi, obhuniibhi obhwaru bhunú bhuratuuka ku Kiristu.

Abhakorosai 1:29

Eringʼana riyo, ndyo rirakora ndeekongʼererya okukora emirimu kwa ekituunyo, okuringʼaana na eginguru eginene gya Kiristu ginú girakora emirimu munsi waani.

1 Timoteo 3:15

Ndatura okutigita, kwa ego, onyoore omanyiri ganú gareenderwa kubhantu bha Waryubha omuhoru, kwa okubha abhantu bhaaye mbo erikanisa ryaye. Riyo ndyo riragumya obhuheene kwa okubha ndyo entimu na obhurusa bhwaye.

1 Yoana 1:3

Kinú twamaaha na okwigwa, nkyo turabharaarikira, naho bheenyu bhonse, muture okugwatana na bheetu kubhumwi hamwi na Taata Waryubha na Omwana waaye Yeesu Kiristu.

Obhukundukuri 3:12

“Omuntu unú arihiga, ndimukora abhe kya entimu ya mwisyengerero erikuru rya Waryubha waani, na atarirwa muyo kweki. Oni ndingʼoora eguru yaaye eriina rya Waryubha waani, na eriina rya omugi gwa Waryubha waani. Omugi guyo, n-Yerusaremu enhya, gunú guriituuma okurwa murwire ku Waryubha waani. Kweki ndingʼoora eguru yaaye eriina ryani erihya.