Abhafiripi 2:8 - Eriragano Erihya

⁸ Wonse hanú yaaringa atuubheeni na abhantu, yeesuuhya, akabha omwigwa ku Waryubha, akeekirirya okukwa, kora okukwa kumusarabha!

Abhafiripi 2:8 ပူးပေါင်းရင်းမြစ်များ

Mataayo 17:2

Hanú bhaaringa eyo, Yeesu akeehunjura ekisusa kyaye embere yaabho. Obhusu bhwaye bhukangʼarabha kya eryubha na emyenda gyaye gikabha emirabhu pee, gikangʼesangʼesa bhukongʼu kya endingaasi.

Mataayo 26:39

Akasuntara embere hakego, akeeyesa bhwibhumbike, akasabha ega, “Taata, nyoore eraturikana, ndakusabha unduusirye-ho ekikombe kya enyanko kinu! Nawe, otakora kya ego oni ndeenda, okore kya ego uuwe oreenda.”

Mataayo 26:42

Yeesu akabhatiga hayo kweki, akahunjuka okumusabha Waryubha orwa kabhiri, akagamba ega, “Taata, nyoore enyanko inu etakuturikana okuhita bira okunnyoora, mbe obhwendi bhwaho bhukoreke kya ego oreenda.”

Ruuka 9:29

Hanú yaahika munkuku, akaamba okumusabha Waryubha. Hanú yaasabhanga, obhusu bhwaye bhukeehunjura. Emyenda gyaye, gikabha emirabhu pee, gikangʼesangʼesa bhukongʼu.

Yoana 10:18

Atariho omuntu unú aratura okunduusya obhuhoru bhwani. Nooni omwene ndaruusya obhuhoru bhwani. Niina obhutungi bhwa okuruusya obhuhoru bhwani, kweki niina obhutungi bhwa okugega obhuhoru bhwani. Taata omwene ngʼo yaantuma okukora ego.”

Yoana 14:31

Ganú Taata yaandagirirya okukora, ngo ndakora, naho abhantu bhonsego bhamanye ega, nhanjiri Taata. “Bhoono, mwimuke, turwe hanu.”

Yoana 15:10

Mukaagwata amaragiriryo gaani, mureekare mubhuhanje bhwani, kya ego oni naagwata amaragiriryo ga Taata na okwikara mubhuhanje bhwaye.

Yoana 4:34

Yeesu akabhakyukya ega, “Ebhyakurya bhyani, n-kukora ganú areenda unú yaantuma, na okukunaanʼya emirimu gyaye.

Amakorwa ga Abhatumwa 8:33

Bhaamujabhura na bhaamubhuturira ekiina bira obhuheene. Atariho omuntu unú aratura okuhairira orwibhuro rwaye, kwa okubha yeetirwa mukyaro hanu.”

Abharuumi 5:19

Omuntu oumwi yaanga okumwigwa Waryubha, akakora abhantu bhonsego bhakabha abhakori bha obhusarya. Egoego, omuntu oumwi unú yaamwigwa Waryubha, arikora abhantu bhabhe abhaheene embere ya Waryubha.

2 Abhakorinto 8:9

Bheenyu mumanyiri eriruguto rya Omukuru weetu Yeesu Kiristu ega, yeekora omutobhu kurusumo rwenyu, onyoora yaaringa omuniibhi, naho okuhitira kubhutobhu bhwaye, bheenyu mubhe abhaniibhi.

Abhagaratia 3:13

Kiristu yaatutungurya okurwa mumeehiimo ga amaragiriryo, kwa okugega ameehiimo gayo, kurusumo rwetu. Yaabha ego, kwa okubha Amangʼoore Amarabhu garagamba ega, “Wowonse unú arabhambwa kumusarabha, yeehiimirwe.”

Tiito 2:14

Yeeruusya omwene okukwa kurusumo rwetu, naho atutuurye okurwa mubhusarya bhonsego. Yeendanga okuturaama, naho maheene tubhe abhantu bhaaye, bhanú twiruusirye okukora amajomu.

Abhaebhurania 12:2

Tubhenga turamwisigira Yeesu, kwa okubha ngʼo aratoorokererya tumwikirirye Waryubha, na ngʼo aratukora tugendererye okumwikirirya okuhikira kubhuteero. Weeki yeegumirirya oruku kumusarabha, kora ataarora eginsoni kwa ekisigo kya obhujomerwa bhunú bhwaringa embere yaaye. Bhoono, yeekeeri orubhaara rwa obhuryo rwa ekitumbi kya ekikama kya Waryubha.

Abhaebhurania 12:4

Onyoora murakora ekituunyo okuhiga obhusarya, nawe, mukyari okurwana eriihe okuhikira okwitira amanyinga geenyu.

1 Petero 2:24

Kiristu omwene yaagega obhusarya bhwetu kumubhiri gwaye, akabhambwa kumusarabha. Yaakora ego, naho bheetu tutatungwa kweki na obhusarya, twikare kwa okumungʼarira Waryubha. Bheenyu mwahonibhwa kwa okuhitira okutemwa kwaye.

1 Petero 3:18

Kiristu omwene yaakwa kurusumo rwa obhusarya bhwenyu, yaakwa rumwigo, ekeesa. Omuheene yaakwa kurusumo rwa abhasarya, naho tugwatane na Waryubha. Yeetwa omubhiri, nawe kwa obhuturo bhwa Omutima Omurabhu, yaanyoora kweki obhuhoru.