2 Petero 2:4 - Eriragano Erihya

⁴ Na bhamaraika bhanú bhaasarya, Waryubha ataabhaabhira, nawe yaabheesa mwituko rya ekisunte kinú kikurirye, muyo bhabhoherwe na eminyororo, bharaganyirira orusiku rwa okubhuturirwa ekiina.

2 Petero 2:4 ပူးပေါင်းရင်းမြစ်များ

Mataayo 25:41

“Kweki, aribhakeerya bhanú bharingi orubhaara rwaye rwa obhumosi ega, ‘Murwe hanu, bheenyu bhanú mweehiimwa na Waryubha! Mugende mumururo gwa koko, gunú guseemeriibhwe Erisambwa na bhamaraika bhaaryo.

Mataayo 8:29

Mbe, ebhihwi bhikakora ekituri bhikagamba ega, “Ee Omwana wa Waryubha, uuna enyanko-ki na bheetu, oratutuna? Bhoono, uujiri okutusikya enú eribhaga ryetu ritarahika?”

Mariko 5:7

Yeesu akakikemera ekihwi ekibhiibhi kiyo ega, “Uuwe ekihwi ekibhiibhi, nuurwe kumuntu unu!” Hayo omuntu uyo, akajiirira ega, “Yeesu, Omwana wa Waryubha wa eguru ya bhyonsego, uuna enyanko-ki na oni? Ndakuriisya emuuma ku Waryubha ega, otannyankya!”

Ruuka 10:18

Yeesu akabhakeerya ega, “Nkarora Erisambwa riragwa hansi okurwa murwire kya orukubha.

Ruuka 8:31

Ebhihwi bhiyo, bhikaamba okumwisasaama Yeesu ega, atabhikenyia bhigye okusoha mukibhohe kya amasambwa.

Yoana 8:44

Bheenyu m-ba Erisambwa, riyo ndyo eseweenyu! Kwa ego, mureenda okukora ganú eseweenyu areegomba. Erisambwa ni-riiti okwambira obhusimuka. Ritahanjiri obhuheene, kwa okubha obhuheene bhuyo, bhutarimo mumutima gwaryo. Ryeki riragamba obhubheehi, ngʼyo enteemo yaaryo, kwa okubha eryene ni-bheehi, kweki ndyo esewaabho obhubheehi bhonsego.

Abharuumi 11:21

Waryubha yaajibhya Abhaisiraeri bhanú bharingi amasagi ga obhusimuka bhwa emijeituni. Kwa ego, kora uuwe wonse, aratura okukujibhya.

Abharuumi 8:32

Waryubha ataamumaahira ekyabhira Omwana waaye omumwemwe, nawe, yaamuruusya naho akwe kurusumo rwetu bhonsego. Nyoore yaakora ego, bhoono, atarituhaana amajomu agandi gonsego?

2 Petero 2:11

Nawe, onyoora bhamaraika bhaana obhutungi na eginguru okukira abheehigirya bha obhubheehi bhayo, kora bheeki bhatakutuka ebhibhumbwa bhya obhukuru bhiyo, na okubhijongera ku Mukuru Waryubha.

2 Petero 2:5

Kweki eribhaga rirya erya Nuhu, Waryubha ataabhira abhantu bhanú bhataaringa bharamwigwa, nawe, yaareeta obhusiki bhwa amanji eguru ya ekyaro kirya, abhantu bhakakwa. Nawe, yaamutuurya Nuhu hamwi na abhantu abhandi muhungati. Nuhu ngʼo yaaringa araarikiiri abhantu ega, bhakore ganú gareenderwa embere ya Waryubha.

2 Petero 2:9

Bhoono, amangʼana gonsego gayo garatoorokya-ki? Garoorokya ega, Omukuru Waryubha amanyiri kya ego aratuurya abhantu bhanú bharamwigwa, okurwa mumasakyo. Kweki amanyiri kya ego aratuura abhasarya munyanko, okuhikira orusiku rwa okubhabhuturira ekiina,

1 Yoana 3:8

Nawe, wowonse unú araagendereryenga okukora obhusarya, m-muntu wa Erisambwa, kwa okubha Erisambwa okurwa kubhwambiro rikyagendereryanga okukora obhusarya. Nawe, Omwana wa Waryubha yaaja mukyaro, naho anyamure emirimu gya Erisambwa.

Yuda 1:13

Bharatamwa okwiribhira kya amabhooka amanene ga munyanja, na amakorwa gaabho ga eginsoni garanyaragana kya erihuro rya amabhooka. Bharingi kya eginjota ginú girayengayenga ginú gitakutura okoorokererya enjira. Waryubha yaabhaseemerya omweya mukisunte kinú kikurirye, naho bhariija okwikara muyo koko.

Yuda 1:6

Kweki muhiituke bhamaraika bhanú bhateeswanga na obhutungi bhunú bhaaringa nabho, bhakatiga egimenyo gyabho, Waryubha yaabhabhoha mukisunte kwa eminyororo gya koko. Eyo bharaganyirira orusiku orukuru rurya rwa okubhuturirwa ekiina.

Obhukundukuri 20:10

Na Erisambwa rinú ryabhangʼeena, riryeswa munyanja ya omururo omuhaari. Muyo mmo ogutyenyi ogunene gurya na omurooti wa obhubheehi urya bheeswa. Bhonse bharinyankibhwa eyo obhutiku na omubhasu, koko na koko.