2 Petero 2:14 - Eriragano Erihya

¹⁴ Ameeso gaabho geejwiri obhusuunu, na orunamba rwabho rwa okukora obhusarya, rutaana obhuteero. Bharabharuta abhantu bhanú bhatanagiri kuimani kwa amangʼana na amakorwa, bhagwate amakorwa gaabho amabhiibhi. Emitima gyabho gyanara okubha na orunamba rwa ebhintu. Abhantu bhayo, Waryubha yaabheehiima!

2 Petero 2:14 ပူးပေါင်းရင်းမြစ်များ

Mataayo 12:34

Bheenyu orwibhuro rwa eginjoka! Muratura egaki okugamba amangʼana amajomu eribhaga bheenyu m-basarya? Ndagamba ego, kwa okubha kira omuntu arahaira ganú geejwiri mumutima gwaye.

Mataayo 23:14

“Murikirora-ko, bheenyu abheehigirya bha amaragiriryo na bheenyu Abhafarisaayo! Bheenyu m-banyarwambe, kwa okubha murasabha Waryubha kwa amasabho amatambi bhukongʼu, naho mwiyorokye kubhantu, nawe, enu muraraarira abhasino ebhintu bhyabho. Mbe, mumanye ega, kurusiku rwa okubhuturirwa ekiina, maheene Waryubha aribhajibhya bhururu.]

Mataayo 25:41

“Kweki, aribhakeerya bhanú bharingi orubhaara rwaye rwa obhumosi ega, ‘Murwe hanu, bheenyu bhanú mweehiimwa na Waryubha! Mugende mumururo gwa koko, gunú guseemeriibhwe Erisambwa na bhamaraika bhaaryo.

Mataayo 5:28

Nawe, oni ndabhakeerya ega, omusaaja wowonse unú aramumaahirira omukari kwa orunamba, uyo amariri okukora nawe ameega mumutima gwaye.

Mariko 13:22

kwa okubha bhariibhuka abharooti bha obhubheehi na abhantu bhanú bharibhanga bhareebhirikira ega, mbo Kiristu Omutuurya. Bharibha bharakora ebhimanyiiriryo na ebhiruguuryo, naho bhature okungʼeena, kora abhasorwa bha Waryubha.

Yoana 5:44

Bheenyu muhanjiri okugungibhwa na abharikyenyu, nawe, mutakutuna eginkuma ginú girarwa ku Waryubha omumwemwe. Bhoono, muratura egaki okunyikirirya oni?

Abharuumi 16:18

Abhantu bhayo, bhatakumukorera emirimu Kiristu, Omukuru weetu, nawe, kinú bhareenda, nu-kwigutya orunamba rwabho orubhiibhi. Bharagamba amangʼana amasambaaruku ga okwikangatirirya, naho bhangʼeene abheekirirya bhanú bhatakwisigira obhubhiibhi bhobhonse.

1 Abhakorinto 11:19

Obhwahukani bhureebhuka gati yeenyu, naho bhanú bharingi abhaheene bhamanyikane.

Abhaefeso 2:3

Bheetu bhonsego, twaringa kya bheeki, tweekaranga okuringʼaana na orunamba rwetu rwa ekyaro, na okukora amangʼana ganú gaajomeranga emibhiri gyetu na obhungʼeeni bhwetu ageenego. Tweebhurwa na obhusimuka bhwa obhusarya kya abhandi, kwa ego Waryubha yaaringa atujimiiri na tweenderwanga okujibhibhwa.

Abhaefeso 4:14

Hayo tutarihumbibhwa enu na enu kya abhaana abharera, kwa emiyaga gya ameehigiryo ganú abhantu abhangʼeenererya bhareebhukya. Abhantu bhayo, oranyoora bhareenda bhabhahabhye kwa ameehigiryo gaabho aga obhubheehi.

Abhakorosai 2:18

Mutamwitegeerera omuntu wowonse unú areeyorokya ega, areesuuhya kwa kibhara na okusyengera bhamaraika. Omuntu kya uyo, atabharuusya omutuho gwenyu gwa koko. Weeki areeheemera obhurori bhwaye. Nawe maheene, akangiheeri kwa ameetegeerero gaaye amabhiibhi ga mukyaro.

Yakobho 1:8

Weeki, ngʼ-wa ameetegeerero amanga gabhiri, areekubhyakubhya kumangʼana gaaye gonsego.

2 Petero 2:18

Kwa okugamba amangʼana ga okwirora na ganú gataana obhwera, bharabharuta abhantu bhonse bhagwate orunamba rwabho orubhiibhi rwa omubhiri. Abhantu bhayo bhataana eribhaga eritambi, okurwa kya ego bheeyahura okurwa kubhakori bha amabhiibhi.

2 Petero 2:3

Kwa orunamba rwabho rwa ebhintu, bharibhanga bharabhakeerya amagano ga obhubheehi, naho bheenyoorere ebhintu okurwa kubheenyu. Nawe, okurwa akare, Waryubha yaakemera ega, aribhabhuturira ekiina, na kweki yeeseemerye okubhasikya!

2 Petero 3:16

Muginyarubha gyaye gyonsego, arahairira eguru ya amangʼana gayo. Muginyarubha gyaye giyo, garimo amangʼana agandi amakongʼu okugamanya. Abhantu bhanú bhateehigiribhwa eguru yaago, na bhataranaga kuimani, bharagahabhya kya ego bharahabhya Amangʼoore Amarabhu agandi. Kwa okukora ego, bhareesikya abheene.

1 Yoana 2:16

Ndagamba ego, kwa okubha aga ekyaro kya ganu, orunamba rwa omubhiri, orunamba rwa okwenda kira kinú orarora, na obhwiheemi bhunú bhurarekana na ebhintu, gatakurekana na Taata Waryubha, nawe, gararekana na ekyaro.

Yuda 1:11

Bharikirora-ko, kwa okubha bhaagwata enjira ya Kaini, eya okukora obhusarya. Bharikirora-ko, kwa okubha bheesohya mubhusarya kya bhunú Bharamu yaakora, kurusumo rwa okunyoora obhuniibhi. Bharikirora-ko, kwa okubha bharasika kwa ekisigo bhaajeema kya ego Koora yaajeema, akasika.

Obhukundukuri 12:9

Erijoka riyo, rikeeswa mukyaro. Riyo ndyo enjoka ya akare inú erabhirikirwa ega, Omusarya kasi Erisambwa. Ryeki ndyo rirangʼeena abhantu bhonsego mukyaro, naho bhamwange Waryubha na bhakore obhusarya. Maheene ryeeswa mukyaro hamwi na bhamaraika bhaaryo.