1 Petero 4:6 - Eriragano Erihya

⁶ Kiyo nkyo ekisigo, abhantu bhanú bhaakwa, bhaaraarikirwa Amangʼana Amajomu, naho kora nyoore bhaajibhibhwa omubhiri kya abhandi, bhabhe abhahoru kwa obhuturo bhwa Omutima Omurabhu, kya ego Waryubha m-muhoru.

1 Petero 4:6 ပူးပေါင်းရင်းမြစ်များ

Mataayo 24:9

Kwibhaga riyo, abhantu bharibhariira eniku, naho munyanke na okwitwa, na abhantu bha ebhyaro bhyonsego bharibhajimira kurusumo rwani.

Abharuumi 8:2

Kunjira ya okugwatana na Kiristu Yeesu, eginguru gya Omutima Omurabhu unú arareeta obhuhoru bhwa koko, ginkoreri mbe omwiyagaari, naho ntige okutungwa na eginguru gya obhusarya na oruku.

Abhagaratia 2:19

Eribhaga rinú naaringa ndagwata amaragiriryo ga Musa, amaragiriryo gaambuturiranga ekiina. Nawe bhoono, ntakwenda kweki okwikara kwa okugwata amaragiriryo, naho nture okwikara kya ego Waryubha areenda.

Abhagaratia 5:25

Omutima Omurabhu atuheeri obhuhoru obhuhya, mbe twikare kwa obhutungi bhwaye.

1 Petero 1:12

Waryubha yaakeerya abharooti bharya ega, amangʼana ganú bhaaringa bhararoota, gataabhatunʼyanga bheeki abheene, nawe bheenyu. Garya bhaagambanga, ngo mwaraarikirwa na bhanú bhaabhareetera Amangʼana Amajomu eguru ya Yeesu Kiristu. Na bhaabhakeerya amangʼana amajomu gayo, kwa obhuturo bhwa Omutima Omurabhu unú yaaringa atumirwe okurwa murwire. Amangʼana gayo, kora bhamaraika bhareegomba bhukongʼu okumanya.

1 Petero 3:18

Kiristu omwene yaakwa kurusumo rwa obhusarya bhwenyu, yaakwa rumwigo, ekeesa. Omuheene yaakwa kurusumo rwa abhasarya, naho tugwatane na Waryubha. Yeetwa omubhiri, nawe kwa obhuturo bhwa Omutima Omurabhu, yaanyoora kweki obhuhoru.

1 Petero 3:19

Na kwa obhuturo bhwa Omutima Omurabhu, akagya okuraarikira emitima gya abhantu bhanú bhaakwa, enu gibhoherwe.

Obhukundukuri 14:18

Nho, akaaja maraika oundi. Maraika uyo akarwa ahasi ha okumwensera, weeki yaaringa areemiririra omururo. Akamukeerya kwa eriisi erinene, maraika wa omooro omoogi ega, “Gega omooro gwaho omoogi, obhuture eginsero gya emijabhibhu gya ekyaro, kwa okubha emisumo gitobheri.”