1 Petero 4:17 - Eriragano Erihya

¹⁷ Mumanye ega, eribhaga rya okubhutura ekiina rihikiri, na Waryubha aryamba okubhutura ekiina kubhantu bhaaye. Bhoono nyoore okubhutura ekiina kuryambira kubheetu abhantu bhaaye, bhoono eribha egaki kubhanú bhatakwikirirya Amangʼana Amajomu ga Waryubha?

1 Petero 4:17 ပူးပေါင်းရင်းမြစ်များ

Ruuka 23:31

Ndagamba ego, kwa okubha nyoore bharankora ego oni, omuti omubhisi, eribha enyanko bhukongʼu kubheenyu, omuti omomu.”

Abharuumi 1:1

Enyarubha inu, erwiri kuoni Pauro, omugaya wa Kiristu Yeesu. Oni naabhirikirwa okubha omutumwa waaye, nkasorwa mbenga ndaraarika Amangʼana Amajomu ga Waryubha.

Abharuumi 2:9

Abhantu bhonsego bhanú bharakora amabhiibhi, bharinyoora enyanko enduru bhukongʼu, okwambira ku Bhayahudi, na kora kubhantu bhanú bhataringi Abhayahudi.

Abhagaratia 3:1

Bheenyu Abhagaratiya, abhakangi! Niwi yaabharoga? Amangʼana eguru ya okubhambwa kumusarabha kwa Yeesu Kiristu, gaatuurwa kubhurabhu embere ya ameeso geenyu.

Abhagaratia 5:7

Kubhwambiro, mwaringa murakora bhujomu! Bhoono, niwi yaabhangʼeenererye mutagwata ameehigiryo ga obhuheene?

Abhagaratia 6:10

Mbe, eribhaga ryoryonse hanú turanyoora omweya, tukorere abhantu bhonsego amajomu, nawe, ekinene kubheekirirya abharikyetu.

2 Abhatesaronike 1:8

Yeesu ngʼo arijibhya bhonsego bhanú bharamwanga Waryubha na bhanú bhatakugwata Amangʼana Amajomu eguru ya Omukuru weetu.

1 Timoteo 3:15

Ndatura okutigita, kwa ego, onyoore omanyiri ganú gareenderwa kubhantu bha Waryubha omuhoru, kwa okubha abhantu bhaaye mbo erikanisa ryaye. Riyo ndyo riragumya obhuheene kwa okubha ndyo entimu na obhurusa bhwaye.

Abhaebhurania 11:8

Eimani yaakora Abhurahamu akamwigwa Waryubha, hanú yaamukeerya ega, yeemuke mukyaro kyaye, agye mukyaro kinú amuragiri okumuhaana. Abhurahamu akeemuka mukyaro kyaye, onyoora ataaringa amanyiri enú yaaringa aragya.

Abhaebhurania 2:2

Tumanyiri ega, amaragiriryo ga Waryubha ganú bhajaaji weetu bhaagwata okurwa kubhamaraika bhaaye, gaaringa na obhutungi. Ego, abhantu bhonsego bhanú bhaaringa bhatakugagwata na okugeegwa, Waryubha yaabhajibhya okurekana na obhusarya bhwabho.

Abhaebhurania 2:4

Waryubha wonse yaaringa arakomererya obhutuurya bhuyo, kwa okukora ebhimanyiiriryo, ebhiruguuryo na ebhika amanga amaaru. Akabhahaana abhantu ebhibharo bhya Omutima Omurabhu kwa okuringʼaana na obhwendi bhwaye.

Abhaebhurania 3:6

Nawe Kiristu, weeki m-Mwana omuheene unú areemiririra abhantu bha enyumba ya Waryubha. Na bheetu mbo abhantu bhayo, nyoore turagendererya okuhikira obhuteero okubha abhahaari na okwirora kuganú tureesigira.

Abhaebhurania 5:9

Mbe, okurekana na gayo, Waryubha akamukora Yeesu yeenderwe okubha obhusimuka bhwa obhutuurya bhwa koko, kubhantu bhonsego bhanú bharamwigwa.

1 Petero 2:5

mumanye ega, bheenyu bhonse n-kya amagina amahoru, murahagaajwa na Waryubha mubhe enyumba ya omutima. Kweki arabhakora mubhe abhasyengeri bhanú bhasorerwe okuruusya ebhimwenso kurusumo rwa emitima, bhinú bhiramungʼarira kwa obhuturo bhwa Yeesu Kiristu.

1 Petero 2:8

Kweki, Amangʼoore garagamba ega, “Erigina riyo ni-rigina rya okwikuujura, ni-ritare rya okugwisya abhantu.” Abhantu bhareekuujura kwa okubha bhatakugwata Amangʼana ga Waryubha, na ego niigo bhaaringa bhaseemeriibhwe okurwa akare.