1 Petero 2:8 - Eriragano Erihya

⁸ Kweki, Amangʼoore garagamba ega, “Erigina riyo ni-rigina rya okwikuujura, ni-ritare rya okugwisya abhantu.” Abhantu bhareekuujura kwa okubha bhatakugwata Amangʼana ga Waryubha, na ego niigo bhaaringa bhaseemeriibhwe okurwa akare.

1 Petero 2:8 ပူးပေါင်းရင်းမြစ်များ

Ruuka 2:34

Hayo, Simeoni akabhanonka, akamukeerya Mariamu, ngʼina waabho omwana uyo ega, “Omwana unu, asorerwe na Waryubha okusikya Abhaisiraeri abhaaru na okutuurya abhandi abhaaru. Aribha ekimanyiiriryo kya Waryubha, kinú kiryangwa na abhantu.

Abharuumi 9:22

Niigo eringi ku Waryubha. Yeendanga okoorokya abhantu enkoro yaaye na obhuturo bhwaye, nawe, yaabheegumirirya bhukongʼu abhantu bhanú bheenderwanga okusikibhwa.

1 Abhakorinto 1:23

Nawe bheetu, turaraarika amangʼana eguru ya Kiristu unú yaabhambwa kumusarabha. Amangʼana gayo garabhabhihira Abhayahudi, na kubhanú bhataringi Abhayahudi m-mangʼana ga ekikangi.

2 Abhakorinto 2:16

Kubhanú bharabhura, obhurange bhuyo, m-bubhiibhi bhurareeta oruku, nawe, kubhanú bharatuuribhwa, obhurange bhuyo, m-bujomu bhurareeta obhuhoru. Bhoono, niwi aratura okukora emirimu giyo?

Abhagaratia 5:11

Abhahiiri bhaani kuimani, abhantu abhandi bharagamba ega, oni ndaraarika ega, kira omusaaja niiga, asaarwe. Nyoore maheene niigo ndaraarika, kwaki Abhayahudi bharannyankya? Na nyoore niigo ndaraarika, obhuraariki bhwani eguru ya okukwa kwa Yeesu Kiristu kumusarabha, kutakukora Abhayahudi bhambihirirwe.

1 Abhatesaronike 5:9

Waryubha ataatusora bheetu, naho atusikye kwa enkoro yaaye, nawe, yaatusora naho tunyoore obhutuurya okuhitira ku Mukuru weetu Yeesu Kiristu.

1 Petero 2:6

Mbe, Amangʼoore Amarabhu garagamba ega, “Maaha! Ndatuura erigina erikuru rya obhurusa Sayuni, kweki ndyo erigina rya obhwera rinú naasora. Nawe, omuntu wowonse nyoore aramwikirirya unú ni-rigina riyo, atarisuuka kora orusiku rumwi!”

1 Petero 2:7

Kubheenyu bhanú mureekirirya erigina riyo, ni-rya okusuukwa. Nawe, kubhanú bhatakwikirirya, Amangʼoore Amarabhu garagamba ega, “Erigina rinú abhahagaaji bhaangiri, ndyo ryabheeri erigina erikuru rya obhurusa.”

2 Petero 2:3

Kwa orunamba rwabho rwa ebhintu, bharibhanga bharabhakeerya amagano ga obhubheehi, naho bheenyoorere ebhintu okurwa kubheenyu. Nawe, okurwa akare, Waryubha yaakemera ega, aribhabhuturira ekiina, na kweki yeeseemerye okubhasikya!

Yuda 1:4

Ndabhangʼoorera enyarubha inu, kwa okubha, abhantu nyabhurebhe bhanú bhatakumwigwa Waryubha, bheesoherye gati yeenyu bhugunyi na okwisanganʼya na bheenyu. Abhantu bhayo, bharagamba ega, eriruguto rya Waryubha weetu rirabheekiririrya okugwata orunamba rwabho orubhiibhi rwa omubhiri. Na bharamwanga Yeesu Kiristu, Omukangatya na Omukuru weetu omumwemwe. Nawe, okwambira akare yaangʼoorwa ega, abhantu bhayo, bharibhuturirwa ekiina kya ego abhandi bhaamara okubhuturirwa ekiina.