1 Petero 2:24 - Eriragano Erihya

²⁴ Kiristu omwene yaagega obhusarya bhwetu kumubhiri gwaye, akabhambwa kumusarabha. Yaakora ego, naho bheetu tutatungwa kweki na obhusarya, twikare kwa okumungʼarira Waryubha. Bheenyu mwahonibhwa kwa okuhitira okutemwa kwaye.

1 Petero 2:24 ပူးပေါင်းရင်းမြစ်များ

Mataayo 27:26

Kimwi, Pirato akabhahaatirira Bharaabha, na akaragirirya abhasirikare bhaaye ega, bhamuteme Yeesu emijariti, bhamare bhamubhambe kumusarabha.

Mataayo 5:20

Nkyo kirakora ndabhakeerya ega, nyoore mutaakore obhuheene bhunú Waryubha areenda, okukira kya ego Abhafarisaayo na abheehigirya bha amaragiriryo bharakora, mutarisoha kora ahake, mubhukama bhwa murwire.

Mataayo 8:17

Gayo gaakoreka, naho rikunaane eringʼana rinú ryagambwa eguru yaaye na omurooti Isaaya ega, “Yaagega obhunyooheeru bhwetu, yaagega amarweri geetu.”

Mariko 15:15

Pirato kwa okwenda okujomerya omuganda gwa abhantu, akabhahaatirira Bharaabha. Akamara akaragirirya abhasirikare bhaaye ega, bhamuteme Yeesu emijariti, bhamare bhamubhambe kumusarabha.

Ruuka 4:18

“Omutima wa Omukuru Waryubha aringi hamwi na oni. Yansoreri okubharaarikira abhatobhu amangʼana amajomu. Yantumiri okuraarikira abhabhohwa ega, bharisiikurirwa, na okukeerya abhahoku ega, bhariribhurwa ameeso, na bhanú bharanyankibhwa, mbatuurye.

Yoana 1:29

Ejo wendeko, Yoana akamurora Yeesu aramuuja-ko. Akabhakeerya abhantu bhanú bhaaringa hayo ega, “Mumaahe, uyo ngʼo Omwana wa Eringʼondi wa Waryubha, unú aragega obhusarya bhwa abhantu bhonsego bha mukyaro munu!

Yoana 19:1

Mbe, Pirato akaamura abhasirikare bhaaye ega, bhamugege Yeesu, bhamuteme na emijariti.

Amakorwa ga Abhatumwa 10:35

Nawe, arabheekirirya abhantu bha ebhigambo bhyonsego bhanú bharamwigwa, na okukora ganú gareenderwa embere waaye.

Amakorwa ga Abhatumwa 10:39

“Na bheetu mbo abheemiririri bha amangʼana gonsego ganú Yeesu yaakora mukyaro kya Abhayahudi, na mumugi gwa Yerusaremu. Kimwi akeetwa kwa okubhambwa kumusarabha.

Amakorwa ga Abhatumwa 13:29

Hanú bhaamara okukora amangʼana gonsego ganú gaangʼoorwa eguru yaaye, bhakamwituumya okurwa kumusarabha na okumubhiika mumbihira.

Amakorwa ga Abhatumwa 5:30

Bheenyu mweeta Yeesu kwa okumubhamba kumusarabha, nawe, Waryubha wa bhajaaji weetu yaamuhyukya.

Abharuumi 6:11

Bheenyu bhonse, mwibhare ega, mwakwa hamwi nawe, na obhusarya bhutakutura okubhatunga kweki. Bhoono muringi abhahoru, na mureekara kurusumo rwa okumungʼarira Waryubha, kwa okugwatana na Kiristu Yeesu.

Abharuumi 6:13

Muteekirirya ebhiroobhero bhya emibhiri gyenyu, bhitumirwe kya ebhirwaniro bhya okukorera obhusarya, nawe, mwiruusye ku Waryubha. Mwirore ega, mubheeri abhantu bhanú muhyukiibhwe okurwa mubhaku, na okusohibhwa mubhuhoru obhuhya. Mwiruusye ku Waryubha, na ebhiroobhero bhya emibhiri gyenyu, bhibhe bhirakora emirimu gya obhuheene.

Abharuumi 6:16

Mutamanyiri ega, hanú mureeruusye okumukorera omuntu ganú areenda, nho, murabha muramwigwa kya abhagaya bhaaye? Mbe, nyoore muraabhenga mureeruusya okukora obhusarya, murabha abhagaya bha obhusarya, na kinú muraanyoore-mo, n-duku. Nawe, mukaabha mureeruusya okumwigwa Waryubha, murabha abhagaya bha Waryubha, na kinú muraanyoore-mo, nu-kubharwa okubha abhaheene embere ya Waryubha.

Abharuumi 6:2

Tiigo-ha kora ahake! Bheetu tubheeri kya abhaku kwa amangʼana ga okukora obhusarya. Kwa ego, tutakutura okugendererya kweki okukora obhusarya.

Abharuumi 6:22

Nawe bhoono, muheerwe na Waryubha obhwiyagaari, naho mutabha abhagaya bha obhusarya. Kweki, abhakoreri okubha abhagaya bhaaye, na okurekana na gayo, munyooreri obhwera. Obhwera bhuyo, nu-kuraamwa na weeki omwene, na obhuteero bhwa gayo nu-kunyoora obhuhoru bhwa koko.

Abharuumi 6:7

Omuntu akaakwa kya ego, atakutungwa kweki na eginguru gya obhusarya, kwa okubha arabha omuntu unú yeeyagaariri.

Abharuumi 7:6

Twaringa tubhoherwe na amaragiriryo, nawe bhoono, tukwiri hamwi na Kiristu, kwa ego, tunyooreri obhwiyagaari okurwa kumaragiriryo. Bhoono tutakumukorera emirimu Waryubha kwa enjira ya akare, eya okugwata amaragiriryo ganú gaangʼoorwa, nawe, kwa enjira ehya ya okoorokereribhwa na Omutima Omurabhu.

1 Abhakorinto 15:3

Naabheehigirya ameehigiryo ga obhwera ganú oni omwene naagagwata, kya ego engʼoorerwe mu Mangʼoore Amarabhu ega, Kiristu yaakwa kurusumo rwa obhusarya bhwetu.

2 Abhakorinto 6:17

Kwa ego, Omukuru yaagamba kweki ega, “Murwe gatigati waabho, mwiyahure nabho. Mutakuunʼya ekintu ekikonu, na oni, nho, ndibhaturuungʼana.

Abhagaratia 3:13

Kiristu yaatutungurya okurwa mumeehiimo ga amaragiriryo, kwa okugega ameehiimo gayo, kurusumo rwetu. Yaabha ego, kwa okubha Amangʼoore Amarabhu garagamba ega, “Wowonse unú arabhambwa kumusarabha, yeehiimirwe.”

Abhaefeso 5:9

kwa okubha obhwera bhwa okwikara mundingaasi n-kukora amangʼana amajomu na aga obhuheene.

Abhafiripi 1:11

Obhwikari bhwenyu, bhuriijura amangʼana ga obhuheene ganú garatuuka kwa enjira ya okumwikirirya Yeesu Kiristu, naho gamutogoonʼye na okumugungya Waryubha.

Abhakorosai 2:14

Waryubha aturihiiri esiiri ya obhusarya bhwetu kwa enjira ya Yeesu okutukwira kumusarabha. Yaaruusya-ho amangʼoore ga esiiri ganú gaatujongeranga, akagaruusya-ho kimwi kwa okugabhamba kumusarabha.

Abhakorosai 2:20

Bheenyu, eginteemo gyenyu gya obhusarya, gyakwa hamwi na Kiristu, kwa okubha yaabhatuurya okurwa kuginkoro egimbiibhi ginú giratunga ekyaro kinu. Bhoono kwaki mukyagendererya okwikara kya abhantu bha mukyaro munu? Muteekirirya okugwata ameehigiryo kya ganu, ega,

Abhakorosai 3:3

kwa okubha eginteemo gyenyu gya obhusarya gyakwa. Obhuhoru bhwenyu, bhoono bhuringi hamwi na Kiristu embere ya Waryubha. Nawe, bhutakumaahikana kubhantu abhandi.

Abhaebhurania 10:10

Mbe, kwa okubha Yeesu Kiristu yaaringa aragwata obhwendi bhwa Waryubha, Waryubha araturaama obhusarya bhwetu, kwa enjira ya Yeesu okwiruusya rumwigo okubha ekimwenso.

Abhaebhurania 10:5

Kiyo nkyo kyakora Kiristu hanú yaaja mukyaro kinu, yaamukeerya Waryubha ega, “Uuwe oteenda ekimwenso kora esadaaka, nawe, oseemerye omubhiri gwani.

Abhaebhurania 12:13

Mugende kuginjira ginú giimiri, naho kinú kiremeheeri kitaaja okunyahaarika, nawe, kibhe kirahwena.

Abhaebhurania 7:26

Omusyengeri Omukuru kya uyo, areenderwa bhukongʼu kubheetu, kwa okubha weeki m-murabhu, ataana obhubhiibhi, kweki ataakora obhusarya bhobhonse. Waryubha yaamwahura okurwa kubhakori bha obhusarya, akamuriinʼya okugya murwire.

Abhaebhurania 9:28

Egoego Kiristu yaaruusibhwa okubha ekimwenso rumwigo, naho agege obhusarya bhwa abhantu abhaaru. Kweki Kiristu ariija orwa kabhiri, kwibhaga riyo atariija okuruusya-ho obhusarya. Nawe, ariija okubhahaana obhutuurya abhantu bhanú bharamuganyirira kwa ekituunyo.

Yakobho 5:16

Mbe bhoono, mugambiranenga obhusarya bhwenyu na okusabhirana ku Waryubha, nho murahwenibhwa amarweri geenyu. Amasabho ga omuntu omuheene gaana obhuturo na garakora emirimu.

1 Yoana 2:29

Mumanyiri ega, Kiristu m-muheene, mbe, mumanye kweki ega, wowonse unú arakora aga heene, ngʼo omwana wa Waryubha.

1 Yoana 3:7

Bhoono, abhaana bhaani abhahanje kuimani, muteekirirya ega, omuntu wowonse abhangʼeene. Nawe, wowonse unú arakora amangʼana ganú gareenderwa, m-muheene embere ya Waryubha, kya ego Kiristu aringi omuheene.

Obhukundukuri 22:2

Oruuji ruyo rwaringa ruragera gatigati ya eribharabhara erinene rya omugi guyo. Haaringa-ho na omuti gunú gurahaana abhantu obhuhoru bhwa koko gunú gwaringa mbaara gyonsego gya oruuji. Omuti guyo gwamanga emisumo mara ekumi na ebhiri kumwaka, okuringʼaana na emyeri. Amasya ga omuti guyo ni-dyogo rya okuhwenʼya ebhyaro.