1 Petero 2:11 - Eriragano Erihya

¹¹ Abhahanje bhaani, bheenyu muringi abhageni na m-bahiti bha enjira mukyaro hanu. Kwa ego ndabhakomererya ega, muteekirirya orunamba rwa emibhiri gyenyu, runú rurasongana na bheenyu, rubhahige.

1 Petero 2:11 ပူးပေါင်းရင်းမြစ်များ

Ruuka 21:34

“Mwiyangararire! Emitima gyenyu gitariija okugwatwa na orunamba rwa okukora amangʼana ga mukyaro bhuyagayaga, okurehwa, na obhoobha bhwa obhuhoru. Nyoore tiigo, orusiku rwa okuhunjuka Omwana wa Adamu, ruribhaajira mutamanyiri.

Amakorwa ga Abhatumwa 15:20

Nawe, tureenderwa tubhangʼoorere enyarubha ya okubhakeerya ega, bhatarya ebhyakurya bhya omugiro bhinú bhimwenseerwe ebhisusano na bhatigenga okukora obhusimbe. Kweki bhatige okurya enyama ya entugo inú ebhuutirwe na bhatige okurya amanyinga.

Amakorwa ga Abhatumwa 15:29

Mutige okurya ebhyakurya bhinú bhimwenseerwe ebhisusano, mutige okurya amanyinga, kora mutige okurya enyama ya entugo inú ebhuutirwe, na mutige okukora obhusimbe. Nyoore muraatige gayo, nho muraabhe mukoreri bhwaheene. Turabhakeeranʼya.”

Abharuumi 12:1

Bhoono, abhahiiri bhaani kuimani, mumanyiri kya ego Waryubha aratumaahira ekyabhira. Kwa ego mbe, ndabhakomererya ega, mwiruusye obhuhoru bhwenyu ku Waryubha. Mubhe kya ebhimwenso ebhihoru, ebhirabhu, ebhijomu, bhinú bhiramungʼarira Waryubha. Okukora ego, nko enjira ya heene ya okumusyengera Waryubha.

Abharuumi 7:23

Nawe, ndarora ega, ebhiroobhero bhya omubhiri gwani, oranyoora bhiratungwa na eginguru gya obhusarya bhunú bhurahigana na ameetegeerero gaani amajomu. Kiyo nkyo kirankora mbe omugaya wa obhusarya okuhitira ebhiroobhero bhya omubhiri gwani.

Abharuumi 8:13

Nyoore mureekare kwa okoorokereribhwa na obhusimuka bhwenyu bhwa obhusarya, murikwa. Nawe, mukaanga kimwi kwa eginguru gya Omutima Omurabhu, okukora amangʼana ganú obhusimuka bhwenyu bhwa obhusarya bhureenda mukore, muriikara koko.

2 Abhakorinto 5:20

Mbe, Kiristu atutumiri okukora emirimu gyaye, na okuhitira kubheetu, Waryubha arabhakomererya ega, mwigwanibhwe na weeki. Nkyo kirakora turasabha ku Kiristu ega, mwigwanibhwe na Waryubha.

2 Abhakorinto 6:1

Bhoono, kwa okubha turakora emirimu hamwi na Waryubha, turabhakomererya ega, eriruguto rya Waryubha rinú munyooreri, mutaritiga ribhure bhusa.

2 Abhakorinto 7:1

Bhoono, abhahanje bhaani, kwa okubha Waryubha yaaraga gayo gonsego, kwa ego mbe twiraame, tutigane na obhukonu bhonsego, bhwa emibhiri na emitima gyetu. Tubhe abha emitima emirabhu kumangʼana gonsego, kwa enjira ya okumusuuka Waryubha.

Abhagaratia 5:24

Abhantu bhanú bhagwateeni na Kiristu Yeesu, bhatakutungwa na orunamba orubhiibhi rwa omubhiri, hamwi na ameetegeerero gaabho amabhiibhi. N-kya muna bhaabhamba eginteemo gyabho gya akare, kumusarabha gwa Yeesu.

Abhaefeso 2:19

Mbe, okwambira bhoono, bheenyu mutaringi abhageni kora abhahiti, nawe, mwabheeri abhasimuka hamwi na abhantu bha Waryubha, abhantu abha omuganda gwa Waryubha.

Abhaefeso 4:1

Mbe, oni omubhohwa kwa okubha ndamukorera emirimu Omukuru Yeesu, ndabhakomererya mwikare, okuringʼaana na okubhirikirwa kunú Waryubha yaabhabhirikirira.

2 Timoteo 2:22

Otige orunamba rwa obhumura, ogwate obhuheene, eimani, obhuhanje na omurembe. Ogwate gayo, hamwi na bhonsego bhanú bharamusabha Omukuru kwa omutima omujomu.

Abhaebhurania 11:13

Abhantu bhayo bhonsego, bhaakwa bhaana eimani. Bhaakwa bhataanyoora ganú Waryubha yaaringa abharagiri okubhahaana. Nawe, bhaaringa bharagarora kwa ahare, bhakajomerwa. Bhaaringa bhareekirirya ega, m-bageni na abhahiti mukyaro kinu.

Abhaebhurania 6:9

Abhahanje bhaani, onyoora mbangʼooreeri kwa amangʼana amahaari, nawe, niina obhuheene ega, murakora amajomu ganú garoorokya ega, mwatuuribhwa.

Yakobho 4:1

Bhoono, eriihe na eritoongʼana gati yeenyu bhirarwa-ha? Bhirarekana na orunamba rwenyu orubhiibhi runú rurahigana mumitima gyenyu.

1 Petero 1:1

Enyarubha inu, erwiri kuoni Petero, omutumwa wa Yeesu Kiristu. Ndabhangʼoorera bheenyu bhanú musorerwe na Waryubha, bhanú munyarageeni kya abhageni mubhyaro bhya Ponto, Garatia, Kapadokia, Asia na Bhitunia.

1 Petero 1:17

Hanú muratogora Waryubha mumasabho geenyu, muramubhirikira Taata. Weeki atakungʼahirya omuntu wowonse. Aribhuturira ekiina kira omuntu okuringʼaana na kinú okoreri. Kwa ego, mwikare kwa okumwigwa weeki, kwibhaga ryenyu rinú ritamiri mukyaro hanu.

1 Petero 4:12

Abhahanje bhaani, mutaruguura eguru ya enyanko enduru kya omururo, inú ereebhuka gati yeenyu okusakya eimani yeenyu. Mutarora ega, n-kintu ekigeni kinú kirabhanyoora.

1 Petero 4:2

Kwa enjira iyo, obhwikari bhwaye bhonsego, areekara okuringʼaana na kya ego Waryubha areenda, etaringi okuringʼaana na orunamba rwa abhantu.

2 Petero 3:1

Abhahanje bhaani, enyarubha inu ngʼ-ya kabhiri inú ndabhangʼoorera. Muginyarubha ebhiri giyo, ndasakya okwimukya ameetegeerero geenyu amajomu, kwa okubhahiitukya.