1 Petero 1:3 - Eriragano Erihya

³ Tumugungye Waryubha, Taata wa Omukuru weetu Yeesu Kiristu. Okuringʼaana na ekyabhira kyaye ekyaru, yaatwibhura orwa kabhiri kwa okumuhyukya Yeesu Kiristu, okurwa mubhaku. Kwa ego, tunyooreri obhwisige bhwa obhuheene ega, turabha abhahoru koko.

1 Petero 1:3 ပူးပေါင်းရင်းမြစ်များ

Yoana 1:13

Bhayo bhataringi abhaana bha Waryubha, kwa okwibhurwa kwa enjira ya abhantu, kasi kwa orunamba rwa omubhiri, kora kwa obhwendi bhwa omuntu, nawe, n-kwa obhwendi bhwa Waryubha.

Abharuumi 12:12

Mujomerwe kuganú Waryubha yaabharaga, mubhenga mureegumirirya muginyanko, na mugume kumasabho.

Abharuumi 15:13

Waryubha ngʼo tureesigira ega, arikora gonsego ganú yaaraga. Kwa ego, ndabhasabhira ega, abhahaane omurembe bhukongʼu na obhujomerwa obhwaru hanú muragendererya okumwikirirya. Hayo nho muraabhe na obhwisige obhunene, kwa obhuturo bhwa Omutima Omurabhu.

Abharuumi 4:25

Waryubha yaamuruusya Yeesu, naho akwe kurusumo rwa obhusarya bhwetu, akamuhyukya okurwa mubhaku, naho bheetu tubharwe okubha abhaheene embere yaaye.

Abharuumi 5:10

Hanú bheetu twaringa tukyari abhasigu bhaaye, Waryubha yaatugwatanʼya nawe, okuhitira oruku rwa Omwana waaye. Kwa ego, ekinene niiga, kwa okubha twamara okugwatanibhwa nawe, okuhitira oruku rwa Omwana waaye, turituuribhwa okurwa kubhujibhu bhwa Waryubha okuhitira obhuhoru bhwa Omwana waaye.

Abharuumi 8:11

Omutima Omurabhu unú areekara munsi weenyu, ngʼo Omutima wa Waryubha unú yaamuhyukya Yeesu Kiristu okurwa mubhaku. Kwa ego, Waryubha arihyukya kora emibhiri gyenyu ginú girakwa, kwa enjira ya Omutima waaye Omurabhu unú areekara munsi weenyu.

Abharuumi 8:24

Obhwisige bhuyo tuunabho okurwa hanú Waryubha yaatutuurya. Nawe, nyoore tureesiga ekintu kinú turatura okukirora, bhuyo bhutaringi obhwisige. Bhoono, niwi areesiga ekintu kinú ararora?

1 Abhakorinto 13:13

Mbe bhoono, ebhintu ebhisatu bhinu bhitarihwa, eimani, obhwisige na obhuhanje. Na kubhiyo, eringʼana erikuru okukira gonsego m-buhanje.

1 Abhakorinto 15:20

Nawe bhoono, obhuheene niiga, Kiristu yaahyuka okurwa mubhaku, weeki ngʼo owa mbere okuhyuka kubhanú bhaakwa.

2 Abhakorinto 1:3

Agungibhwe Waryubha, Taata wa Omukuru weetu Yeesu Kiristu, Taata wa ekyabhira, kweki ngʼo Waryubha unú aratuhorisya kugonsego.

Abhagaratia 6:16

Omurembe na ekyabhira bhinú bhirarwa ku Waryubha, bhibhe na abhantu bhonsego bhanú bharagwata obhuheene bhuyo, bhayo mbo abhantu bha Waryubha.

Abhaefeso 1:17

Ndamusabha Waryubha wa Omukuru weetu Yeesu Kiristu, Taata wa obhukuru, abhahaane omutima gwa egintungwa na okubhatubhurira, naho muture okumumanya weeki bhukongʼu.

Abhaefeso 1:3

Agungibhwe Waryubha, Taata wa Omukuru weetu Yeesu Kiristu, kwa okubha kwa okugwatana kwetu na Kiristu, yaatunonka kwa eginonkwe gyonsego egya omutima okurwa murwire.

Abhaefeso 1:7

Waryubha atutungwirye kwa enjira ya amanyinga ga Yeesu Kiristu, yaani atwabhiiri obhusarya bhwetu bhonsego, okurekana na obhwaru bhwa eriruguto ryaye.

Abhaefeso 2:4

Nawe, Waryubha kwa okubha ngʼ-wa ekyabhira ekyaru, atuhanjiri kwa obhuhanje bhwaye bhunú bhutaana obhuteero.

Abhaefeso 3:20

Mbe, Waryubha agungibhwe, weeki aratura okukora amangʼana ga okuruguurya bhukongʼu, okukira ganú turamusabha, kasi kora ganú tureeganirirya ega, aratura okukora. Weeki arakora okuringʼaana na eginguru ginú girakora emirimu munsi weetu.

Abhakorosai 1:23

Nawe, mureenderwa okugendererya okubha na eimani, munage na mubhe na eginguru. Mutakyukibhwa mutige obhwisige bhunú mwanyoora hanú mweegwa Amangʼana Amajomu. Amangʼana Amajomu gayo, gaaraarikwa kubhantu bhonsego bha mukyaro hanu, na oni Pauro, naabha omukori wa emirimu waago.

Abhakorosai 1:27

Waryubha yaahanja okubhatubhurira abhantu bhaaye, obhuniibhi na obhukuru bhwa ekinyerera kiyo, kora kurusumo rwa abhantu bhanú bhataringi Abhayahudi. Ekinyerera kiyo, ensonga yaaye niiga, Kiristu aringi munsi weenyu, kweki weeki ngʼo arabhahaana obhwisige ega, murisanga obhukuru bhwa Waryubha.

1 Abhatesaronike 1:3

Hanú turabhasabhira ku Taata Waryubha, turahiituka embere yaaye, emirimu gyenyu ginú murakora kwa eimani. Turahiituka ekituunyo kyenyu kinú kirarekana na obhuhanje bhwenyu, kweki kya ego mwimiriiri okurekana na obhwisige bhwenyu bhwa okuhunjuka kwa Omukuru weetu Yeesu Kiristu.

1 Abhatesaronike 4:13

Nawe, abhahiiri bheetu kuimani, tureenda mumanye ganú gariibhuka kubheekirirya bhanú bhaakwa, naho mutige okusurumbara kya abhantu abhandi bhanú bhataana obhwisige bhwa okuhyuka.

2 Abhatesaronike 2:16

Taata Waryubha atuhanjiri, na kwa eriruguto ryaye aratuhorisya koko na yaatuhaana ekintu ekijomu kya okwisigira. Turamusabha weeki, hamwi na Omukuru weetu Yeesu Kiristu omwene ega,

1 Timoteo 1:14

Omukuru weetu Kiristu Yeesu, yaanhumirira eriruguto ryaye eryaru bhukongʼu, yaangʼaana eimani na obhuhanje, kukugwatana nawe.

Tiito 2:13

Tubhenga ego, eribhaga turaganyirira orusiku rwa enonkwe, rurya rwa okuhunjuka kwa Yeesu Kiristu. Orusiku ruyo, arimaahikana mubhukuru bhwaye. Weeki ngʼo Waryubha weetu omukuru, na ngʼo Omutuurya weetu.

Abhaebhurania 3:6

Nawe Kiristu, weeki m-Mwana omuheene unú areemiririra abhantu bha enyumba ya Waryubha. Na bheetu mbo abhantu bhayo, nyoore turagendererya okuhikira obhuteero okubha abhahaari na okwirora kuganú tureesigira.

Yakobho 1:18

Kya ego omwene yeenda, yaatukora tubhe abhaana bhaaye, kwa enjira ya amangʼana gaaye ga obhuheene, naho tubhe abha mbere kubhyonsego bhinú yaabhumba.

1 Petero 1:13

Kwa ego, mwiseemye na mwiyangararire. Mutuure obhwisige bhonsego kwiruguto rinú murihaanwa, hanú Yeesu Kiristu ariija na okwiyorokya kubhurabhu.

1 Petero 1:21

Kwa okuhitira ku Kiristu, muramwikirirya Waryubha. Weeki yaamuhyukya na okumuhaana obhukuru, na kiyo nkyo kirakora bheenyu muramwikirirya na okumwisiga Waryubha.

1 Petero 1:23

Mukore ego, kwa okubha mweebhurwa orwa kabhiri. Okwibhurwa kuyo, kutakurekana na bheseweenyu, bheeki bharakwa, nawe bheenyu mutakukwa kwa okubha mweebhurwa kwa eringʼana rya Waryubha erihoru. Na eringʼana ryaye, riraguma koko.

1 Petero 2:2

Bhoono mumariri okumanya ega, Omukuru Yeesu m-muheene. Mbe, kya ego abhaana abharera bhareenda amabheere ga bhangʼina waabho, bheenyu mubhe na enamba ya amabheere amajomu ga emitima, naho muture okukongʼa na okutuuribhwa.

1 Petero 3:15

Mubhenga mwiseemerye eribhaga ryonsego okukyukya wowonse unú aribhabhuurya kinú mureesiga, nawe mukorenga ego, kwa obhunyoohu na kwa obhusuuku.

1 Petero 3:21

Amanji gayo, n-kirengekanʼyo kya obhubhatiijo bhwenyu, kwa okubha hanú murabhatiijwa eroorokya ega, Waryubha arabhatuurya okuhitira obhuhyuki bhwa Yeesu Kiristu. Obhubhatiijo bhuyo, bhutaringi bhwa okuruusya eriiko kumubhiri, nawe n-kubha na ameetegeerero amajomu ku Waryubha.

1 Petero 3:5

Ego niigo, abhakari bhanú bhaamwigwanga Waryubha na okumwisiga, bheejomyanga akare hayo, enu bhareegwa abhasaaja bhaabho.

1 Yoana 2:29

Mumanyiri ega, Kiristu m-muheene, mbe, mumanye kweki ega, wowonse unú arakora aga heene, ngʼo omwana wa Waryubha.

1 Yoana 3:3

Kira omuntu unú areesiga ego, yeeraame, naho abhe omurabhu wa omutima, kya ego Kiristu omwene aringi.

1 Yoana 3:9

Kira omuntu unú abheeri omwana wa Waryubha, atakugendererya okukora obhusarya, kwa okubha yaana enteemo ya Waryubha. Atakutura okugendererya okukora obhusarya, kwa okubha m-mwana wa Waryubha.

1 Yoana 4:7

Abhahanje bhaani, tuhanjane, kwa okubha obhuhanje bhurarwa ku Waryubha. Na kira omuntu unú arahanja abharikyaye, uyo m-mwana wa Waryubha, na weeki amumanyiri Waryubha.

1 Yoana 5:1

Omuntu wowonse unú areekirirya ega, Yeesu ngʼo Kiristu Omutuurya, uyo ngʼo omwana wa Waryubha. Wowonse unú aramuhanja taata, arahanja na abhaana bhaaye bhonse.

1 Yoana 5:18

Tumanyiri ega, kira omuntu unú abheeri omwana wa Waryubha, atakugendererya okukora obhusarya, kwa okubha Yeesu Kiristu Omwana wa Waryubha aramwangararira, na omusarya urya Erisambwa, atakunagya okumukora kyokyonse.

1 Yoana 5:4

kwa okubha kira omwana wa Waryubha arahiga amangʼana ga ekyaro. Turahiga amangʼana ga ekyaro, kwa eimani yeetu.