Ebree 9:15 - New Testament

¹⁵ Pʋ-yɔɔ Krɩstʋ kɛ ceyiyu nɔɔ haʋ kɩfam mbʋ́ pʋwɛ Ɛsɔ nɛ ɛyáa pɛ-hɛkʋ taa yɔ pɩ-taa. Ɛlabɩ ḿbʋ́ se mbá Ɛsɔ ya-wɛ se pɛkɛ ɛ-ñɩma yɔ, papɩzɩ pehiɣ ñɩm maatɛŋ mbʋ́ ɛɖʋwa se ɛhaɣ-wɛ yɔ. Krɩstʋ ɛnʋ, ɛ-sɩm yɔɔ pɩtɩŋnaa nɛ pehiɣ-pʋ. Ḿbʋ́ ɖɔɖɔ lɩzɩnɩ-wɛ kɩwɛɛkɩm mbʋ́ paalabɩ alɩwaatʋ ndʋ́ paawɛ kajalaɣ nɔɔ haʋ paɣtʋ tɛɛ yɔ pi-nesi taa.

Ebree 9:15 ပူးပေါင်းရင်းမြစ်များ

Maatiyee 19:29

Mbá peyebi pa-ɖɩsɩ yaa pa-ɖalaa yaa pɔ-kɔɔnaa yaa pa-caanaa yaa po-ɖoonaa yaa pe-piya yaa pa-hayɩm mɔ-yɔɔ yɔ, pɔkɔŋ wɛnaʋ mbʋ́ mbʋ́ paawɛna yɔ tam mɩnʋʋ nɛ pɛtɛ pehiɣ wezuu maatɛŋ.

Maatiyee 22:3

Pɩkɛdaa lɛ, etiyi ɛ-tʋmlaɖaa se powolo payaa mbá paaya-wɛ ti-ɖeɖe yɔ. Paya-wɛ lɛ, paba kizi se paawoki.

Maatiyee 25:34

Peeɖe eheyiɣ ɛ-nɩwaŋ yɔɔ ñɩma se: ‹Mbá mɩ man-Caa Ɛsɔ wazɩ mɩ-yɔɔ yɔ, ɩkɔɔ ɩtɔɔ Kewiyaɣ ŋgá ɛñɔɔzɩ-mɩ ɖooo alɩwaatʋ ndʋ́ ɛlabɩ kedeŋa yɔ.

Maatiyee 25:36

Mɔnɖɔŋaɣ ndaakpeɖe nɛ ɩha-m wondu monsuu. Pɩwɩɣaɣ-m nɛ ɩcɔnɩ mɔ-yɔɔ. Maawɛ salaka taa nɛ ɩkɔɔ ɩna-m peeɖe.›

Maarkɩ 10:17

Yesu tɛm piya yɔɔ wazʋʋ nɛ ɛkpaɣ nʋmɔʋ lɛ, abalʋ nɔɔyʋ kpaɣ seya nɛ ewolo eluŋ ɛ-tɛɛ nɛ ɛpɔzɩ-ɩ se: «Wɩlɩyʋ kɩbanʋ! Ɛbɛ pʋwɛɛ kpem se mala nɛ mehiɣ wezuu maatɛŋ?»

Luka 18:18

Alɩwaatʋ natʋyʋ Yuda ñɩma wiyaʋ nɔɔyʋ pɔzɩ Yesu se: «Wɩlɩyʋ kɩbanʋ! Ɛbɛ pʋwɛɛ se mala nɛ mehiɣ wezuu maatɛŋ?»

Luka 22:20

Pɛtɛm tɔɔʋ lɛ, ɛkpaɣ ɖɔɖɔ sʋlʋm nɛ caɖaɣ nɛ ɛcɛlɩ-wɛ se: «Sʋlʋm pʋnɛ lɛ man-calɩm mbʋ́ pɩkpɛdɩɣ mɩ-yɔɔ yɔ. Pʋ-yɔɔ Ɛsɔ tɩŋɩɣna nɛ ɛɖʋ nɔɔ haʋ kɩfam.»]

Yohanɛɛsɩ 10:28

Mahaɣ-ɩ wezuu maatɛŋ, ɩɩtɛŋɛlɩɣ kaʋ. Nɔɔyʋ ɛɛkaɣ-ɩ lɛɣʋ me-nesi taa.

Tʋma Labʋ 20:32

Lɛɛlɛɛyɔ, manɖʋzʋʋ mɩtɩŋa payɩ Ɛsɔ nɛ e-lootiye tɔm pe-nesi taa. Ɛlabɩ-mɩ lootiye. Ɛnʋ pɩzɩɣnɩ eyele nɛ ɩkpa ɖoŋ nɛ ɛha-mɩ ñɩm mbʋ́ ɛsɩwa se ɛhaɣ mbá patɩŋa payɩ eyeba nɛ papɩsɩ ɛ-ñɩma yɔ.

Room 5:10

Đɩɩkɛ Ɛsɔ koyindinaa. Ɛlɛ́, eyele nɛ pɩtɩŋnɩ ɛ-Pɩyalʋ sɩm yɔɔ nɛ ɖa nɛ ɩ ɖɛ-hɛkʋ taa ñɔɔzɩ. Yee ɖa nɛ ɩ ɖɛ-hɛkʋ taa ɛñɔɔzaa lɛ, ɛzɩma ɛɛpɩzɩɣ ɛtɩŋnɩ ɛ-Pɩyalʋ wezuu yɔɔ nɛ ɛya ɖa-ñʋʋ yɔ?

Room 5:6

Toovenim lɛ, Krɩstʋ sɩba mbá ɖa ɖa-paa fɛyɩnɩ Ɛsɔ yɔ ɖɔ-yɔɔ alɩwaatʋ ndʋ́ Ɛsɔ ɖʋwa yɔ. Alɩwaatʋ ńdʋ́ lɛ, ɖɩtatɩɩwɛnɩdɩ ɖoŋ nɩɩyɩ.

Room 5:8

Ɛlɛ́, Ɛsɔ ñawɩlɩ-ɖʋ ɛzɩma mbʋ́ ɛsɔɔlɩ-ɖʋ yɔ. Mbʋ́ pʋyɔɔ yɔ, alɩwaatʋ ndʋ́ ɖɩɩkɛ kɩwɛɛkɩm laɖaa yɔ eyeba nɛ Krɩstʋ sɩ ɖɔ-yɔɔ.

Room 6:23

Kɩwɛɛkɩm kɩhɛyʋʋ lɛ sɩm. Ɛlɛ́, kʋjɔʋ ŋgʋ́ Ɛsɔ lakɩ-ɖʋ falaa yɔ lɛ wezuu maatɛŋ ŋgʋ́ ɖihiɣ ɖa nɛ ɖa-Kɩpaɣlʋ Krɩstʋ Yesu ɖɛ-kpɛndʋʋ taa yɔ.

Room 8:28

Đɩsɩm ḿbʋ́ se Ɛsɔ lakɩ tʋmɩyɛ pɩtɩŋa pɩ-taa se pʋwazɩ mbá pɔsɔɔlɩ-ɩ yɔ. Ḿbá lɛ mbá ɛya-wɛ ɛzɩ ɛɖʋʋ yɔ.

Room 8:30

Mbá ɛɛɖʋ ɖooo lɔŋ se ɛlakɩ-wɛ ḿbʋ́ yɔ, ɛya-wɛ ɖɔɖɔ, nɛ mbá ɛya-wɛ yɔ, ɛpɩsɩ-wɛ kʋtʋʋzaa, nɛ mbá ɛpɩsɩ-wɛ kʋtʋʋzaa yɔ, eyele nɛ pɛwɛɛ e-Koboyaɣ taa.

Room 9:24

Toovenim lɛ, ɖa lɛ ɛyáa ḿbá. Paa ɖɩkɛ Yuda ñɩma yaa ɖɩtɛkɛ Yuda ñɩma yɔ, ɖa ɛyawa.

2 Kɔrɛntɩ 3:6

Eyeba ɖɔɖɔ se ɖɩkɛ nɔɔ haʋ kɩfam tʋmlaɖaa. Nɔɔ haʋ kɩfam ḿbʋ́, pɩtɛkɛ paɣtʋ ndʋ́ paamawa yɔ. Ɛlɛ́, pɩkɛ mbʋ́ pɩlɩnɩ Fezuu Kiɖeɖeu cɔlɔ yɔ. Mbʋ́ pʋyɔɔ yɔ, paɣtʋ yeki nɛ ɛyáa sɩkɩ. Ɛlɛ́, Fezuu Kiɖeɖeu ñahaɣ wezuu.

Galaatɩ 3:20

Ɛyáa naalɛ hɛkʋ taa weyi patɩŋɩɣnɩ ɛ-yɔɔ yɔ ɛwɛɛ. Weyi patɩŋɩɣnɩ ɛ-yɔɔ yɔ, ɛfɛyɩ wazaɣ ɛyʋ kʋɖʋm tɔm taa. Ŋgʋ́, Ɛsɔ ñɛwɛ e-ɖeke.

Efɛɛzɩ 1:7

Đa nɛ ɩ ɖɛ-kpɛndʋʋ taa Ɛsɔ tɩŋnɩ ɛ-calɩm yɔɔ nɛ eholi-ɖʋ kɩdɛkɛdɩm nesi taa nɛ ekpeɣ-ɖʋ ɖa-kɩwɛɛkɩm. Ḿbʋ́ wɩlɩɣna se e-lootiye fɛyɩ ɖaɣʋ.

2 Tesalooniki 2:14

Pʋ-yɔɔ ɖɔɖɔ ɛtɩŋnɩ Laŋhɛzɩyɛ Tɔm ndʋ́ ɖiheyi-mɩ yɔ, tɩ-yɔɔ nɛ ɛ́yáa-mɩ se ihiɣ ɖa-Kɩpaɣlʋ Yesu Krɩstʋ koboyaɣ.

1 Timootee 2:5

Mbʋ́ pʋyɔɔ yɔ, Ɛsɔ kʋɖʋm koŋ wɛna nɛ ceyiyu kʋɖʋm koŋ ñɛwɛɛ Ɛsɔ ɛnʋ nɛ ɛyáa pɛ-hɛkʋ taa nɛ patɩŋɩɣnɩ ɛ-yɔɔ. Ɛnʋ lɛ Krɩstʋ Yesu.

2 Timootee 2:10

Pʋ-yɔɔ mentisaa se manɩɩ wɩzasɩ ńzɩ́ sɩtɩŋa nɛ pʋwazɩ mbá Ɛsɔ lɩzaa yɔ. Ḿbʋ́ yekina nɛ paba pɩzɩ pehiɣ ñʋʋ yabʋ mbʋ́ pʋwɛ Krɩstʋ Yesu cɔlɔ yɔ nɛ koboyaɣ maatɛŋ.

Tiiti 1:2

Ḿbʋ́ paɖaŋaa se pehiɣ wezuu maatɛŋ. Ɛsɔ weyi ɛɛcɛtɩɣ yɔ, pʋcɔ ɛla kedeŋa lɛ, ɛɛɖʋwa se ɛhaɣ-ɖʋ-kʋ.

Tiiti 3:7

Ɛlabɩ ḿbʋ́ se pɩtɩŋnɩ e-lootiye yɔɔ nɛ ɖɩpɩsɩ kʋtʋʋzaa ɛ-ɛsɩndaa nɛ ɛha-ɖʋ wezuu maatɛŋ ŋgʋ́ ɖɩɖaŋaa yɔ.

Ebree 10:34

Toovenim lɛ, ɩna salaka tɩnaa pʋtɔdɩyɛ. Mɩ-laŋa kahʋlʋmɩ alɩwaatʋ ndʋ́ pamʋwaɣ mɩ-ñɩm yɔ. Mbʋ́ pʋyɔɔ yɔ, ɩtɛm naʋ se ɩwɛnɩ ñɩm mbʋ́ pɩkɩlɩ ḿbʋ́ nɛ pʋwɛɛ tam yɔ.

Ebree 10:36

Ɩɖɔkɩ mɩ-hɔ kpam nɛ ɩla mbʋ́ Ɛsɔ liu wɛɛ yɔ nɛ ihiɣ mbʋ́ ɛɖʋwa se ɛhaɣ-mɩ yɔ.

Ebree 11:13

Mbá paawɛnɩ lidaʋ Ɛsɔ yɔɔ yɔ, pɔɖɔkɩ-kʋ ḿbʋ́ nɛ pʋcɔ pɔkɔɔ pasɩ patɩŋa payɩ. Ɛlɛ́, petehiɣ mbʋ́ Ɛsɔ kaɖʋwa se ɛhaɣ-wɛ yɔ. Polosi-pʋ kulosuu poliŋ taa nɛ pɔyɔɔdɩ se pɛkɛ agɔmaa nɛ ñɩtʋ sʋyaa yem kedeŋa yɔɔ cɩnɛ.

Ebree 12:24

Iwobi Yesu nɛ ɛ-calɩm mbʋ́ pɩkpɛdaa nɛ pɩkɩlɩ wazaɣ Aabɛɛlɩ ñɩmbʋ yɔ pɔ-cɔlɔ. Ɛnʋ lɛ ceyiyu nɔɔ haʋ kɩfam mbʋ́ pʋwɛ Ɛsɔ nɛ ɛyáa pɛ-hɛkʋ taa yɔ pɩ-taa.

Ebree 13:20

Ɛsɔ lɛ laŋhɛzɩyɛ tʋ. Mentendiɣ-i se ɛtɩŋnɩ calɩm mbʋ́ ɖa-Kɩpaɣlʋ Yesu kpɛdaa nɛ piyele nɔɔ haʋ wɛɛ tam yɔ pʋ-yɔɔ nɛ efezi-i nɛ sɩɖaa taa. Yesu ɛnʋ lɛ heŋ ɖiyiyu sɔsɔ.

Ebree 2:14

Yee ḿbʋ́, ɛzɩma mbʋ́ ɛyáa ḿbá pɛkɛ kedeŋa yɔɔ cɩnɛ ñɩma yɔ, ḿbʋ́ ɖɔɖɔ Yesu ɛnʋ ɛ-maɣmaɣ ɛkɔm ɛzɩ ɛyʋ yɔ nɛ ɛkɔɔ ɛsɩ. Ɛlabɩ ḿbʋ́ se ɛpɩsɩ weyi ɛɛɖɔkɩ sɩm ɖoŋ yɔ ɛjam: ɛnʋ lɛ Satanɩ.

Ebree 3:1

Pʋ-yɔɔ lɛ, taabalaa Ɛsɔ ñɩma mbá mɩ ɛya-mɩ ɖɔɖɔ yɔ, ɩcɔnɩ Yesu weyi Ɛsɔ tiyaa se ɛkɛ cɔjɔnaa ñʋʋdʋ yɔ. Ɛ-tɔm ɖiheyiɣ ɛyáa, ɛ-yɔɔ ɖɩwɛnɩ lidaʋ.

Ebree 6:13

Nɔɔyʋ takɩlɩ Ɛsɔ se eeɖuuni pʋdʋ. Pʋ-yɔɔ eɖuuni ɛ-tɩ alɩwaatʋ ndʋ́ ɛɖʋwa se ɛlakɩ Abraham pʋyʋ yɔ

Ebree 6:15

Ḿbʋ́ yebina nɛ Abraham ɖɔkɩ ɛ-tɩ nɛ ɛwɛɛ ɖaŋʋʋ yɔɔ nɛ ɛkɔɔ ɛmʋ mbʋ́ Ɛsɔ kaɖʋwa se ɛlakɩ-ɩ yɔ.

Ebree 7:22

Pʋ-yɔɔ Yesu pɩsɩ nɔɔ haʋ mbʋ́ pɩkɩlɩ ɖeu yɔ pʋ-yʋsaɣ.

Ebree 8:13

Ɛsɔ yɔɔdʋʋ nɔɔ haʋ kɩfam tɔm ḿbʋ́ yɔ, pɩwɩlɩɣ se kajalaɣ ñɩmbʋ pɩnaa. Ŋgʋ́, mbʋ́ pɩpɩnaa nɛ pɩkpadɩyɩ yɔ, pɩwɩzɩ mʋʋ́ʋ.

Ebree 9:12

Krɩstʋ sʋ kpaagbaa sʋʋ lone nɖɩ́ ɖɩkɩlɩ kaɖɛ yɔ ɖɩ-taa. Ɛsʋwaɣ lɛ, ɛtɛkpɛndɩnɩ tuliŋ nɛ neɣna pa-calɩm. Ɛlɛ́, ɛ-maɣmaɣ ɛ-calɩm ɛsʋnaa. Ḿbʋ́ ɛlaba nɛ ɖihiɣ ñʋʋ yabʋ maatɛŋ.

Ebree 9:16

Yee nɔɔyʋ ɛɖʋwa se ñakaɣnɩ kpaɣʋ ɛ-ñɩm ɛ-sɩm wayɩ yɔ, pʋmʋnaa se ŋna siŋŋ se ɛsɩba nɛ pʋcɔ.

Ebree 9:28

Ḿbʋ́ ɖɔɖɔ Krɩstʋ ha ɛ-tɩ kpaagbaa haʋ se palaa-ɩ nɛ Ɛsɔ kpeɣ ɛyáa sakɩyɛ pa-kɩwɛɛkɩm. Pʋ-yɔɔ lɛ, ɛkɔŋʋʋ nabʋlɛ ɖeɖe yɔ, kɩwɛɛkɩm tɔm ɛɛtasɩɣ wɛʋ. Ɛlɛ́, ɛkɔŋ se ɛya mbá paɖaŋ-ɩ kpam yɔ pa-ñʋʋ.

Yakubu 1:12

Weyi ɛɖɔkʋʋ ɛ-tɩ takʋʋ taa yɔ, ehiɣ ɛ-tɩ! Mbʋ́ pʋyɔɔ yɔ, ɛtɛŋ wɩlʋʋ ɛ-tɩ ɖɔkʋʋ lɛ, Ɛsɔ cɛlɩ-ɩ ɛ-kɩhɛyʋʋ: ŋ́gʋ́ lɛ wezuu maatɛŋ. Ŋ́gʋ́ ɛɖʋwa se ɛhɛyɩɣ mbá pɔsɔɔlɩ-ɩ yɔ.

1 Pɩyɛ 3:18

Toovenim lɛ, Krɩstʋ maɣmaɣ sɩbɩ ɛyáa kɩwɛɛkɩm yɔɔ kpaagbaa sɩbʋ. Ɛnʋ weyi ɛtʋʋzaa yɔ, ɛsɩbɩ mbá ɖa ɖɩtatʋʋzɩ yɔ ɖɔ-yɔɔ se ɛpɩzɩ ewoni-ɖʋ Ɛsɔ cɔlɔ. Pakʋ-ɩ nɛ ɛsɩ ɛzɩ ɛyáa sɩkʋʋ yɔ. Ɛlɛ́, Fezuu Kiɖeɖeu fezi-i.

1 Pɩyɛ 5:10

Paa pɩɩwɛɛ se ɩla kʋñɔŋ alɩwaatʋ pazɩ yɔ, Ɛsɔ ɛnʋ ɛ-maɣmaɣ ɛtɛzɩ-mɩ ñɔɔzʋʋ nɛ ɩpɩɩ ɛ-nʋmɔʋ taa nɛ ɩkpa ɖoŋ nɛ nabʋyʋ ɛtaaciɣdi-mɩ kaʋ. Ɛnʋ labɩnɩ-mɩ lootiye siŋŋ. Ɛnʋ ɖɔɖɔ yanɩ-mɩ se ɩsʋʋ e-koboyaɣ ŋgá kaatɛŋ wiɖiyi kaʋ yɔ ka-taa mɩ nɛ Krɩstʋ mɩ-kpɛndʋʋ taa.

1 Yohanɛɛsɩ 2:25

Mbʋ́ Yesu Krɩstʋ ɖʋwa se ɛhaɣ-ɖʋ yɔ lɛ: wezuu maatɛŋ.

Wɩlʋʋ 5:9

Peteɣaɣ hendu kɩfatʋ natʋyʋ. Ńdʋ́ lɛ se: «Heɣa, ŋmʋnaa se ŋmʋ takayaɣ nee. Ŋmʋnaa se ŋkpɛzɩ ɖenɖe pataaɖaa yɔ. Mbʋ́ pʋyɔɔ yɔ, ña Ɛsɔ yeba nɛ palaa nɛ pɩtɩŋnɩ ña-calɩm yɔɔ nɛ ŋya ɛyáa ñʋʋ cejewee tɩŋa taa, kʋnʋmɩŋ tɩŋa taa, samaɣ tɩŋa taa, ajɛya tɩŋa taa nɛ ŋwoni-wɛ Ɛsɔ cɔlɔ.