मर्कूस 11:18 - जिरेल

¹⁸ थेकी थोक थोक खासुङ सिन थोनामेई छ्ये छ्ये पूजारीताङ धर्मे गुरूओनला ज्‍यीबा लासुङ। च्‍यिला सासीन मि गाङेराङ येशूकी चुक लेमु खाला बात लोप्‍कीका सिन थे छ्य्‌वापा लै खिताला स्‍यूबा ओतान। थोक थोङगीन था थेकी मिबरी थे खोरोङ लाःक्‍तु लाला थोरूम चुक चुक खिताना सिन ज्‍यीबेकी छ्ये छ्ये पूजारीताङ धर्मे गुरूओनगी थेला सेत्‍च्‍येते मौका छोलाला स्‍यूसुङ।

मर्कूस 11:18 ပူးပေါင်းရင်းမြစ်များ

मत्ती 21:15

थेकी थोक अचम्‍बते काम खिता थोङगीन थेमे थेङला मन्‍दिर नाङला ओताते फिजाओनगी “दाऊद सन्‍तानते जय जय ओङस्‍यीत,” सिन छेरा खिन थेला थोक खाईन मान खाबा थोङजीन छ्ये छ्ये पूजारीताङ धर्मे गुरूओनला स्‍येदाङगी मे बारसुङ।

मत्ती 7:28

येशूकी दि बाततेबा लाप्‍कीन सिन्‍नामेकी थेरू ओताते मि गाङे छक्‍क परे खासुङ।

मर्कूस 1:22

थेकी लापाते बात थोकीन थेरू मि गाङेराङ छक्‍क परे खासुङ। च्‍यिला सासीन थेकी थेबा खोपरोङ धर्मे गुरूओनगी च्‍योक खाला लोप्‍कीन मेतान। थेत्ताङ परमेश्‍वरगी बिन्‍दाते अधिकार ओतेकी थेकी आउदी लेमु खाला लोप्‍कीन ओतान।

मर्कूस 11:32

मेन मिकीका ताङाते ईन सिइ सासीन मिओनगी ङुरूङला चुक खाओङा?” सिन बात खासुङ। यूहन्‍ना परमेश्‍वर बात खित्‍कान्‍ते मि ओतान सिन मि गाङेकी मान खिन ओतान। थोगी मिओन ज्‍यीबेकी थेबेकी यूहन्‍नाला थे काम खि सिन मिकी कोताते ईन सिन सिरच्‍ये आँट माक्‍यासुङ।

मर्कूस 12:12

थेकी साबाते थे अंगूर स्‍यीङ फेम्‍माला बिन्‍दाते कथा थोनामेई थे छ्ये छ्ये पूजारीताङ धर्मे गुरूओनगी दिकी थोक साबातेनी ङुरूङला छ्येर ग्‍यापातेका ईन सिन थेजीनराङ थेला जिन्‍दा चाल्‍सुङ। तर थेरू ओताते ज्‍येन मि ज्‍यीबेकी थेबेकी छ्याःङ खिता माथुपेई थोकराङ गाल्‍सुङ।

मर्कूस 3:6

थेकी थे मि लाक्‍पा ठाक्‍पा खानामेकी थे फरिसी पाटी मिओन मिटिङ खित्‍च्‍येते खाम्‍बादुकी गाल्‍सुङ। थेमे हेरोद गेल्‍बोताङ डिक्‍कान्‍ते मिओनताङ ठेता खाईन येशूला सेता फाप्‍क्‍यो सिन ठो खिताला स्‍यूसुङ।

मर्कूस 6:20

च्‍यिला सासीन यूहन्‍ना परमेश्‍वरगी खि साबा साबा च्‍योकराङ खित्‍कान्‍ते लेमु मि ईन सिन हेरोदला छ्या ओतान। थोगी थेला मेलेबा खिता मेङगो सिन ज्‍यीबेकी यूहन्‍नाला सुङगीङ छ्याःङ मेलेबा खिता मुथुप्‍स्‍यीत सिन लेमु खाईन ज्‍याक्‍पा ओतान। बेला बेलाला यूहन्‍ने बात ङेन्‍जीन हेरोदला लेमु लाबा ओतान। थे खोरोङगी खाबाते मेलेबाते काम सम्‍झे खित्‍जीन यूहन्‍ने बात ङेन्‍नामेकी जहिलेङ थेला सेमला चुक ईन चुक ईन लाङगीन ओतान।

लूका 19:47

थेमे ङीमे ठाङमा येशू मन्‍दिरदु गाल्‍ला मिओनला लोप्‍कीन ओतान। छ्ये छ्ये पूजारी, धर्मे गुरूओन थेमे यहूदीओनते ज्‍येनोङ छ्ये छ्ये मिकीचेन थेला सेता छोल्‍गीन ओतान।

लूका 2:47

थेरू थेकी थे धर्मे गुरूओनगी साबाते बात आउदी लेमु खाईन खोबाते थेमे थेबेकी ठिबाते बातओनोङ आउदी लेमु खाईन लाःपाते थोङजीन थेरू ओताते मिबरी दि चुक अचम्‍बज्‍यीक फिजा ईन्‍दाका सिन छक्‍क परे खासुङ।

लूका 20:19

थेकी साबाते थे अंगूर स्‍यीङ फेम्‍माला बिन्‍दाते कथा थोनामेई धर्मे गुरूओनताङ छ्ये छ्ये पूजारीकी दिकी थोक साबातेनी ङुरूङला छ्येर ग्‍यापातेका ईन सिन थेजीनराङ थेला जिन्‍दा चाल्‍सुङ। तर थेरू ओताते ज्‍येन मि ज्‍यीबेकी थेबेकी थोक खिता माथुप्‍सुङ।

लूका 4:22

थेकी खाबाते बात थोजीन थे मिओन छक्‍क परे खिन दिकी लोप्‍कीन ओताते बातनी ङेन्‍गीनराङ देत्‍की सिराच्‍योक दुक सिन बात खिताला स्‍यूसुङ। बात खिन खिन याङराङ थेबेकी “दि सु ईन्‍देरो? यूसुफ फुज्‍युङराङनी ईन,” सिनोङ सासुङ।

यूहन्‍ना 7:1

दि तिरी येशू गालील अञ्‍चलदु युल युलला थेमे सार सारला युगीन देत्‍सुङ। यहूदीओनते छ्ये छ्ये मिकी थे खोरोङला सेता चाला ओतेकी थे यहूदियापा मागाल्‍सुङ।

यूहन्‍ना 7:19

च्‍यि मोशेकी ख्‍योकोनला परमेश्‍वर नियम बिन्‍दा मेतरो? ईन्‍सीनोङ ख्‍योकोन खाङगीङ थे नियम मेङेन्‍दुक। थेमे ङालाचेन ख्‍योकोन च्‍यिला सेता छोल्‍गीते?” सिन सिदुक।

यूहन्‍ना 7:46

ठिजीन थेबेकी “आबिई, ङ्योकोननी थेकी बात खाबा थोङगीनराङ ख्‍यारसुङ। थेकी च्‍योक खाईननी ङ्योकोनगीनी थातासाक सुङगीङ बात खिताराङ थोबा मेत,” सिन सिदुक।

शक्ति काम 24:25

मिओनगी परमेश्‍वरगी साबा साबा च्‍योकराङ खिता फाप्‍च्‍येते, दाक्‍पोन सेम काबूला ज्‍य्‌वाबा फाप्‍च्‍येते थेमे परमेश्‍वरगी मि गाङे न्‍याय खित्‍च्‍येते दिन ओङगो सिनोङ लाप्‍कीन बिन्‍सुङ। थेकी दि बातओन खित्‍जीन ज्‍यीबा लाबेकी फेलिक्‍सकी थेला “लो थरिङ दोस्‍यिकराङ ओङसुङ। ज्‍येन बात खिताला फुर्सत ङेत्‍नामेई ङा ङारो ना लोक्‍ला खोल्‍ला कातोङामीन,” सिन थेला थेरूकी ताङसुङ।